以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
46:1 Kun-ông kah Cheh-kî
Chì-koân Siōng-chú ánne kóng, " Lāi-īⁿ ǹg tang ê mn̂g, tī chò-kang ê la̍k kang lāi it-tēng tio̍h koaiⁿ; to̍k-to̍k tī An-hioh-ji̍t tio̍h khui, múi goe̍h ê chhe-it mā tio̍h khui.
46:2 Kun-ông tio̍h tùi chit-ê mn̂g ê lông tùi gōa-bīn ji̍p-.lâi, khiā tī mn̂g-kheng piⁿ. Chè-si tio̍h chún-pī i ê sio-chè kah i ê siā-un-chè, i tio̍h tī hō͘-tēng hit só͘-chāi kèng-pài, jiân-āu chhut-.khì. Chit-ê mn̂g kàu ê-hng sî lóng m̄ thang koaiⁿ.
46:3 Tī chiahê An-hioh-ji̍t kah múi goe̍h ê chhe-it, kok lāi ê jîn-bîn tio̍h tī chit-ê mn̂g-kháu kèng-pài Siōng-chú.
46:4 Kun-ông tī An-hioh-ji̍t só͘ tio̍h hiàn hō͘ Siōng-chú ê sio-chè, tio̍h ēng bô khoat-tiám ê iûⁿ-ko la̍k chiah, bô khoat-tiám ê mî-iûⁿ-káng chi̍t chiah;
46:5 i ūi tio̍h hit chiah mî-iûⁿ-káng ê sò͘-chè tio̍h chi̍t-ê e-hoat, ūi tio̍h hiahê iûⁿ-ko ê sò͘-chè sī chiàu i ê keng-chè le̍k-liōng, chi̍t-ê e-hoat phòe iû chi̍t hin.
46:6 Tong goe̍h ê chhe-it, tio̍h hiàn bô khoat-tiám ê gû-káng chi̍t chiah, iûⁿ-ko la̍k chiah, mî-iûⁿ-káng chi̍t chiah, lóng tio̍h bô khoat-tiám ê.
46:7 I mā tio̍h chún-pī sò͘-chè, ūi tio̍h gû-káng hiàn chi̍t-ê e-hoat, ūi tio̍h mî-iûⁿ-káng hiàn chi̍t-ê e-hoat, ūi tio̍h hiahê iûⁿ-ko chiū chiàu i ê keng-chè le̍k-liōng, chi̍t-ê e-hoat phòe iû chi̍t hin.
46:8 Kun-ông ji̍p-.lâi ê sî, tio̍h tùi chit-ê mn̂g ê lông ji̍p-.lâi, mā tio̍h tùi chit-ê lō͘ chhut-.khì.
46:9 " Tī ta̍k-ê cheh-kî, kok lāi ê jîn-bîn tiâu-kìⁿ Siōng-chú ê sî, tùi pak-mn̂g ji̍p-lâi kèng-pài ê tio̍h tùi lâm-mn̂g chhut-.khì; tùi lâm-mn̂g ji̍p-.lâi ê tio̍h tùi-pak mn̂g chhut-.khì; m̄ thang tùi só͘ ji̍p-.lâi ê mn̂g oa̍t tò tńg-.khì, tio̍h ti̍t-ti̍t chìn-chêng chhut-.khì.
46:10 Jîn-bîn ji̍p-khì ê sî, kun-ông mā tio̍h tī in ê tiong-kan ji̍p-.khì; jîn-bîn chhut-.khì, kun-ông mā tio̍h kah in chhut-.khì.
46:11 Tī cheh-kî kah tāi-hōe ê sî, sò͘-chè tio̍h ūi tio̍h chi̍t chiah gû-káng hiàn chi̍t-ê e-hoat, ūi tio̍h chi̍t chiah mî-iûⁿ-káng hiàn chi̍t-ê e-hoat, ūi tio̍h hiahê iûⁿ-ko chiū chiàu i ê keng-chè le̍k-liōng, chi̍t-ê e-hoat phòe iû chi̍t hin.
46:12 " Kun-ông nā chún-pī kam-sim ê chè, sio-chè á-.sī siā-un-chè chò kam-sim ê chè, lâi hiàn hō͘ Siōng-chú, tio̍h ū lâng kā i khui ǹg tang ê mn̂g, i tio̍h chún-pī i ê sio-chè kah i ê siā-un-chè, chhin-chhiūⁿ tī An-hioh-ji̍t só͘ chò ê, jiân-āu i tio̍h chhut-.khì. Chhut-khì liáu-āu, tio̍h ū lâng kā i koaiⁿ mn̂g. "
46:13 Múi ji̍t Tio̍h Hiàn ê Chè
Siōng-chú kóng, " Lí tio̍h ta̍k kang chún-pī bô khoat-tiám bī-móa-nî ê iûⁿ-ko chi̍t chiah, lâi chò sio-chè hiàn hō͘ Siōng-chú; ta̍k chá-khí tio̍h ánne chún-pī.
46:14 Ta̍k chá-khí mā tio̍h chún-pī chò-hóe hiàn ê sò͘-chè, chi̍t e-hoat ê la̍k-hūn chi-it kah saⁿ-hūn chi-it hin ê iû chhiau-hô mī-hún. Chit-ê sò͘-chè tio̍h tiāⁿtiāⁿ hiàn hō͘ Siōng-chú, chò éng-oán tiāⁿ tio̍h ê lē.
46:15 In tio̍h ta̍k chá-khí ánne chún-pī iûⁿ-ko, sò͘-chè kah iû, chò tiāⁿtiāⁿ hiàn ê sio-chè. "
46:16 Ông kah Thó͘-tē
Chì-koân Siōng-chú ánne kóng, " Kun-ông nā kā sán-gia̍p hō͘ i ê kiáⁿ ê chi̍t-ê, to̍h-sī chò i ê sán-gia̍p, kui tī i hiahê kiáⁿ, sī in sêng-chiap chò sán-gia̍p ê.
46:17 Chóng-.sī, i nā kā i ê sán-gia̍p ê chi̍t hūn hō͘ i ê jîn-sîn tiong-kan ê chi̍t-ê, sī chò jîn-sîn ê kàu chū-iû ê nî, hit sî iû-goân kui tī kun-ông. Kóng tio̍h i ê sán-gia̍p, tio̍h lâu hō͘ i hiahê kiáⁿ.
46:18 Kun-ông m̄ thang chhiúⁿ-toa̍t jîn-bîn ê sán-gia̍p, lâi kóaⁿ in lī-khui in só͘ sêng-chiap ê; i tio̍h tùi kakī ê sán-gia̍p tiong-kan kā sán-gia̍p hō͘ i ê kiáⁿ; bián-tit Góa ê jîn-bîn sì-sòaⁿ, ta̍k lâng lī-khui i só͘ sêng-chiap ê sán-gia̍p. "
46:19 Sèng-tiān ê Tû-pâng
I chiū chhōa góa tùi mn̂g piⁿ ê lō͘ ji̍p-lâi-kàu chè-si ǹg pak hiahê sèng ê pâng-keng; lí khòaⁿ, āu-bīn sai pêng ū chi̍t-ê só͘-chāi.
46:20 I chiū kā góa kóng, " Che sī chè-si chú pó͘ kòe-si̍t chè kah sio̍k-chōe-chè, í-ki̍p piak sò͘-chè ê só͘-chāi; bián-tit tòa kàu gōa-īⁿ, ánne lâi hō͘ jîn-bîn chiâⁿ-chò sèng. "
46:21 I koh chhōa góa chhut-khì kàu gōa-īⁿ, hō͘ góa keng-kòe īⁿ ê sì-ê kak-thâu; lí khòaⁿ, tī hit-ê īⁿ ta̍k-ê kak-thâu kok ū chi̍t-ê īⁿ.
46:22 Tī īⁿ ê sì-kak-thâu ū īⁿ, sì-bīn ū chhiûⁿ ûi-.leh; ta̍k-ê īⁿ, tn̂g sì-cha̍p tiú, khoah saⁿ-cha̍p; sì-ê kak-thâu ê īⁿ, in ê chhùn-chhioh lóng kāng-khoán.
46:23 Sì-ê īⁿ ê sì-kho͘-ûi ū khí chi̍t lia̍t, i ê ē-bīn lóng ū chú mi̍h ê só͘-chāi.
46:24 I kā góa kóng, " Chiahê to̍h-sī chú mi̍h ê chàu-kha, tiān lāi chiahê chò chhe-ēng ê tī chia chú jîn-bîn ê chè-sū. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。