以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
44:1 Tang-mn̂g ê Sú-iōng
I koh chhōa góa tò tńg-lâi-kàu sèng-só͘ ê gōa-bīn ǹg tang ê mn̂g; hit-ê mn̂g koaiⁿ-.leh.
44:2 Siōng-chú kā góa kóng, " Chit-ê mn̂g it-tēng tio̍h koaiⁿ, m̄ thang khui; bô-lūn siáⁿ lâng m̄ thang tùi hia chhut-ji̍p, in-ūi Siōng-chú — I-su-la-el ê Siōng-tè, í-keng tùi hia ji̍p-.lâi, só͘-í tio̍h kú-tn̂g koaiⁿ-.leh.
44:3 Kóng tio̍h kun-ông, in-ūi i sī kun-ông, thang chē tī hit lāi-bīn, tī Siōng-chú ê bīn-chêng chia̍h piáⁿ; i tio̍h tùi chit-ê mn̂g ê lông ji̍p-.lâi, mā tio̍h tùi hia chhut-.khì. "
44:4 Chìn-ji̍p Sèng-tiān ê Kui-tēng
I koh chhōa góa tùi pak mn̂g lâi-kàu tiān ê thâu-chêng. Góa chiū khòaⁿ, khòaⁿ tio̍h Siōng-chú ê êng-kng chhiong-móa Siōng-chú ê tiān, góa chiū phak lo̍h tē.
44:5 Siōng-chú kā góa kóng, " Jîn-chú, Góa tùi lí só͘ kóng-khí Siōng-chú tiān lāi só͘-ū ê lé-gî hoat-tō͘, lí tio̍h chù-ì, ēng ba̍k-chiu khòaⁿ, ēng hīⁿ-khang thiaⁿ, mā tio̍h chù-ì sèng-tiān ji̍p-.lâi ê só͘-chāi kah sèng-só͘ it-chhè chhut-.khì ê só͘-chāi.
44:6 " Lí mā tio̍h tùi hiahê pōe-ge̍k ê I-su-la-el ê chú-bîn kóng, chì-koân Siōng-chú ánne kóng: I-su-la-el ê chú-bîn, lín kiâⁿ it-chhè khó-ò͘ⁿ ê tāichì, tio̍h lia̍h-chò í-keng kàu-gia̍h!
44:7 Lín hiàn piáⁿ, iû kah hoeh hō͘ Góa ê sî, lín chhōa hiahê sim bô siū kat-lé, seng-khu mā bô siū kat-lé ê gōa-pang lâng ji̍p-lâi Góa ê sèng-só͘, lâi kā Góa ê tiān òe lahsap, koh ûi-pōe Góa ê iok, ke-thiⁿ lín it-chhè khó-ò͘ⁿ ê tāichì.
44:8 Lín mā bô chīn-tiong tī kò͘-siú Góa sèng-mi̍h ê chit-hūn, sī ūi tio̍h lín pún-sin phài pa̍t lâng tī Góa ê sèng-só͘ kò͘-siú Góa kau-tài lín ê chit-hūn.
44:9 " Chì-koân Siōng-chú ánne kóng: I-su-la-el cho̍k tiong ê gōa-pang lâng, to̍h-sī sim bô siū kat-lé, seng-khu bô siū kat-lé ê gōa-pang lâng, lóng m̄ thang ji̍p-lâi Góa ê sèng-só͘. "
44:10 Bē-tàng Chò Chè-si ê Lē-bī Lâng
Tng I-su-la-el kiâⁿ bê-lō͘ ê sî, ū Lē-bī lâng lī-khui Góa hn̄g-hn̄g, to̍h-sī kiâⁿ bê-lō͘ lī-khui Góa khì tòe in ê ngó͘-siōng, in tio̍h tam-tng in ê chōe-kò.
44:11 Chóng-.sī, in ē tī Góa ê sèng-só͘ chò chhe-ēng, koán-lí sèng-tiān ê mn̂g, tī tiān lāi chò chhe-ēng; ūi tio̍h jîn-bîn thâi sio-chè kah chè-sū ê chengseⁿ, ē khiā tī in ê bīn-chêng lâi kā in ho̍k-sāi.
44:12 Kì-jiân tī in ê ngó͘-siōng ê bīn-chêng chò jîn-bîn ê chhe-ēng, koh chò chó͘-gāi hō͘ I-su-la-el ê chú-bîn hām-lo̍h chōe-kò, só͘-í Góa gia̍h-khí chhiú kā in kong-kek, in ē tam-tng in ê chōe-kò. Che sī chì-koân Siōng-chú kóng ê.
44:13 In bē tàng chhin-kīn Góa, tùi Góa kiâⁿ chè-si ê chit-hūn, mā m̄ thang chhin-kīn Góa chi̍t kiāⁿ sèng-mi̍h, to̍h-sī chì-sèng ê mi̍h; in tio̍h tam-tng in ê kiàn-siàu kah in só͘ kiâⁿ khó-ò͘ⁿ ê tāichì.
44:14 Chóng-.sī, Góa beh hō͘ in tam-tng kò͘-siú tiān ê chit-hūn, pān-lí kî-tiong só͘-ū ê tāichì kah hit lāi-bīn só͘ tio̍h chò ê kang.
44:15 Ē-tàng Chò Chè-si ê Lē-bī Lâng
I-su-la-el cho̍k kiâⁿ bê-lō͘ lī-khui Góa ê sî, chè-si Lē-bī lâng Cha-tok ê kiáⁿ-sun, iû-goân kò͘-siú Góa ê sèng-só͘, in ē chhin-kīn Góa, kā Góa ho̍k-sāi, koh khiā tī Góa ê bīn-chêng, ēng iû kah hoeh hiàn hō͘ Góa. Che sī chì-koân Siōng-chú kóng ê.
44:16 In beh ji̍p-lâi Góa ê sèng-só͘, lâi-kàu Góa ê toh, kā Góa ho̍k-sāi, siú Góa só͘ kau-tài in chò ê.
44:17 In ji̍p-lâi lāi-īⁿ ê mn̂g ê sî, tio̍h chhēng iù-tē saⁿ; in tī lāi-īⁿ ê mn̂g kah tī tiān lāi kiâⁿ chit-hūn ê sî, lóng m̄ thang chhēng iûⁿ-mn̂g ê saⁿ-khò͘.
44:18 In ê thâu-khak téng tio̍h tì iù-tē pò͘ ê bō, kha-thúi tio̍h chhēng iù-tē pò͘ ê khò͘; hit-ê ē lâu kōaⁿ ê lóng m̄ thang chhēng.
44:19 In chhut-khì kàu gōa-īⁿ, to̍h-sī lâi-kàu gōa-īⁿ ê jîn-bîn hia, tio̍h thǹg i kiâⁿ chit-hūn ê saⁿ-khò͘, hē tī sèng ê pâng-keng, chhēng pa̍t chióng ê saⁿ-khò͘, bián-tit ēng in ê saⁿ hō͘ jîn-bîn chiâⁿ-sèng.
44:20 " In m̄ thang thì thâu, mā m̄ thang hō͘ thâu-mn̂g hoat tn̂g-tn̂g, chóng-.sī, tio̍h chián thâu-mn̂g.
44:21 Chè-si ji̍p-lâi lāi-īⁿ ê sî, lóng m̄ thang lim chiú.
44:22 Mā m̄ thang chhōa kóaⁿ-hū á-.sī lî-hun ê chabó͘ lâng chò bó͘, to̍k-to̍k tio̍h chhōa I-su-la-el cho̍k tiong ê chāi-sek-lí á-.sī chè-si ê kóaⁿ-hū.
44:23 " In tio̍h hō͘ Góa ê jîn-bîn chai sèng-.ê kah pêng-siông-.ê ê chha-pia̍t, koh hō͘ in hun-pia̍t chheng-khì ê kah bô chheng-khì ê.
44:24 Nā ū sio-kò ê tāichì, in tio̍h khiā-teh phòaⁿ-toàn, tio̍h chiàu Góa ê phòaⁿ-toàn lâi phòaⁿ-toàn. Tī Góa it-chhè ê cheh-kî, tio̍h siú Góa chiahê hoat-tō͘ lu̍t-lē, mā tio̍h siú Góa chiahê An-hioh-ji̍t chò sèng.
44:25 " In m̄ thang kīn-óa sí-lâng, kā kakī òe lahsap, to̍k-to̍k thang ūi tio̍h lāu-pē, lāu-bú, kiáⁿ-jî, hiaⁿ-tī kah iáu-bōe chhut-kè ê chí-mōe, kā kakī òe lahsap.
44:26 I í-keng chheng-khì liáu-āu, tio̍h kā i koh sǹg chhit ji̍t.
44:27 Tng i ji̍p-khì sèng-só͘ kàu lāi-īⁿ ê ji̍t, tio̍h tī sèng-só͘ ho̍k-sāi, tio̍h ūi pún-sin hiàn sio̍k-chōe-chè. Che sī chì-koân Siōng-chú kóng ê.
44:28 " In it-tēng ē ū sán-gia̍p, Góa sī in ê sán-gia̍p. M̄-thang tī I-su-la-el tiong hō͘ in ki-gia̍p, Góa sī in ê ki-gia̍p.
44:29 Sò͘-chè, sio̍k-chōe-chè, pó͘ kòe-si̍t chè, in lóng thang chia̍h hiahê chè-mi̍h; I-su-la-el tiong só͘ hiàn it-chhè ê mi̍h lóng kui tī in.
44:30 Kiàn-nā khí-thâu se̍k ê mi̍h ê tē-it-ê kah it-chhè lé-mi̍h tiong ê lé-mi̍h, lóng kui tī chè-si; lín mā tio̍h ēng khí-thâu chhut-sán ê mī-hún hō͘ chè-si, thang hō͘ hok-khì lîm-kàu lí ê ke.
44:31 Bô-lūn chiáu á-.sī siù, kiàn-nā kakī sí ê á-.sī siū peh li̍h ê, chè-si lóng m̄ thang chia̍h. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。