以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
43:1 Siōng-chú Tńg-lâi Sèng-tiān
Āu-lâi, i chhōa góa lâi-kàu chi̍t-ê mn̂g, to̍h-sī ǹg tang ê mn̂g.
43:2 Lí khòaⁿ, I-su-la-el Siōng-tè ê êng-kng tùi tang pêng lâi; I ê siaⁿ chhin-chhiūⁿ chin chē chúi ê siaⁿ; tē chiū in-ūi I ê êng-iāu lâi hoat-chhut kng.
43:3 I chhin-chhiūⁿ góa só͘ khòaⁿ-.tio̍h ê khoán-sit, to̍h-sī góa í-chêng lâi beh bia̍t siâⁿ ê sî só͘ khòaⁿ-.tio̍h ê khoán-sit; hit-ê ī-siōng mā chhin-chhiūⁿ góa tī Ke-bal hô piⁿ só͘ khòaⁿ-kìⁿ ê ī-siōng, góa chiū phak lo̍h tē.
43:4 Siōng-chú ê êng-kng tùi ǹg tang ê mn̂g ji̍p-khì tī tiān lāi.
43:5 Chiū ánne, Sèng Sîn chiū kí-khí góa, chhōa góa ji̍p-khì lāi-īⁿ; lí khòaⁿ, Siōng-chú ê êng-kng chhiong-móa tī tiān lāi.
43:6 Góa thiaⁿ tio̍h ū chi̍t ūi tùi tiān lāi ǹg góa kóng-ōe; ū chi̍t-ê lâng khiā tī góa ê sin piⁿ.
43:7 I tùi góa kóng, " Jîn-chú, che sī Góa pó-chō ê só͘-chāi, sī Góa kha-chiúⁿ só͘ ta̍h ê tē, Góa beh tī chia tiàm tī I-su-la-el lâng ê tiong-kan, ti̍t-kàu éng-oán. I-su-la-el ê chú-bîn kah in ê kun-ông bô beh koh ēng in ê îm-hēng í-ki̍p in ê kun-ông ê sin-si, tī koân ê só͘-chāi lâi kā Góa ê sèng-miâ òe lahsap;
43:8 in hē in ê hō͘-tēng kīn-óa Góa ê hō͘-tēng, in ê mn̂g-kheng kīn-óa Góa ê mn̂g-kheng; in kah Góa ê tiong-kan chí-put-kò sī keh chi̍t chōa chhiûⁿ, koh ēng in só͘ kiâⁿ khó-ò͘ⁿ ê tāichì kā Góa ê sèng-miâ òe lahsap, só͘-í Góa siū-khì lâi beh kā in siau-bia̍t.
43:9 Taⁿ in tio̍h tùi Góa ê bīn-chêng tû-khì in ê îm-hēng kah kun-ông ê sin-si, lī-khui Góa hn̄g-hn̄g, Góa chiū tiàm tī in ê tiong-kan ti̍t-kàu éng-oán.
43:10 " Jîn-chú, lí tio̍h kā chit-ê tiān chí-sī I-su-la-el ê chú-bîn, hō͘ in in-ūi kakī ê chōe-kò lâi kiàn-siàu; in mā tio̍h niû tiān ê kui-bô͘.
43:11 In nā ūi tio̍h kakī só͘ kiâⁿ ê it-chhè tāichì lâi kiàn-siàu, lí tio̍h chí-sī in chit-ê tiān ê kui-bô͘ kah i ê khoán-sit, i chhut ê só͘-chāi, i ji̍p ê só͘-chāi kah i it-chhè ê kui-bô͘, í-ki̍p i it-chhè ê lé-gî, i it-chhè ê kui-bô͘, i it-chhè ê hoat-tō͘, lóng tī in ê ba̍k-chiu chêng siá lo̍h-.lâi; hō͘ in siú it-chhè ê kui-bô͘, it-chhè ê lé-gî lâi chiàu ánne kiâⁿ.
43:12 Tiān ê hoat-tō͘ to̍h-sī ánne, tī soaⁿ téng sì-kho͘-ûi ê kài lāi lóng chò chì-sèng. Lí khòaⁿ, che to̍h-sī tiān ê hoat-tō͘.
43:13 Chè-tôaⁿ
Í-hā sī tôaⁿ ê liōng-sò͘, sī ēng tiú lâi niû ê; ( Chi̍t-ê tiú sī chi̍t tiú koh ke chi̍t pa-chiúⁿ ); tôaⁿ-té chi̍t tiú, khoah chi̍t tiú, sì-kho͘-ûi ê kîⁿ ū iân-piⁿ, koân chi̍t pa-chiúⁿ, che to̍h-sī tôaⁿ ê chō.
43:14 Tùi óa thô͘-kha ê té-chō kàu ē-chàn ê khiat-á, koân nn̄g tiú, khoah chi̍t tiú, tùi sè khiat-á kàu tōa khiat-á, koân sì tiú, khoah chi̍t tiú.
43:15 Téng-bīn ê tôaⁿ ū sì tiú, tôaⁿ ê téng-bīn ū thóng chhut-lâi sì ki kak.
43:16 Tôaⁿ tn̂g cha̍p-jī tiú, khoah cha̍p-jī tiú, khoán-sit sī sì-kak-hêng.
43:17 Sì-bīn ê khiat-á, tn̂g cha̍p-sì tiú, khoah cha̍p-sì tiú; sì-kho͘-ûi ê iân-piⁿ ū pòaⁿ tiú, i ê té-chō sì-kho͘-ûi chi̍t tiú. I ê kiā-chàn ǹg tang.
43:18 Hōng-hiàn Chè-tôaⁿ
Chì-koân Siōng-chú tùi góa kóng, " Jîn-chú, chì-koân Siōng-chú ánne kóng: Khí-chō chè-tôaⁿ ūi tio̍h beh tī hit téng-bīn hiàn sio-chè, hiù hoeh, kàu chō-sêng ê sî, i ê lē chhin-chhiūⁿ ē-té:
43:19 Chì-koân Siōng-chú kóng, lí tio̍h ēng chi̍t chiah kang ê gû-á chò sio̍k-chōe ê chè, kau hō͘ chè-si Lē-bī lâng Cha-tok ê kiáⁿ-sun, to̍h-sī hiahê chhin-kīn Góa lâi ho̍k-sāi Góa ê.
43:20 Lí tio̍h chhú gû-á ê hoeh, boah tī tôaⁿ ê sì-kak-thâu kah khiat-á ê sì-kak-thâu, í-ki̍p sì-kho͘-ûi ê iân-piⁿ; ánne lâi hō͘ i chheng-khì, koh ūi tio̍h i sio̍k-chōe.
43:21 Lí mā tio̍h kā hit chiah chò sio̍k-chōe-chè ê gû-á, tī sèng-só͘ ê gōa-bīn sio, chhù lāi tiāⁿ tio̍h ê só͘-chāi.
43:22 Tē-jī ji̍t, tio̍h kā bô khoat-tiám ê soaⁿ-iûⁿ-káng hiàn chò sio̍k-chōe ê chè; in ē chheng-khì hit-ê tôaⁿ, chhin-chhiūⁿ bat ēng kang ê gû-á kā i chheng-khì.
43:23 I í-keng kā i chheng-khì, tio̍h hiàn chi̍t chiah bô khoat-tiám ê kang ê gû kah iûⁿ-kûn tiong chi̍t chiah bô khoat-tiám ê kang ê mî-iûⁿ.
43:24 Lí tio̍h kā chiahê mi̍h hiàn tī Siōng-chú ê bīn-chêng, chè-si tio̍h ēng iâm sám tī in téng-bīn, hiàn hō͘ Siōng-chú chò sio-chè.
43:25 Chhit ji̍t lāi, múi ji̍t lí tio̍h chún-pī chi̍t chiah kang ê soaⁿ-iûⁿ chò sio̍k-chōe ê chè; in mā tio̍h chún-pī chi̍t chiah kang ê gû-á kah iûⁿ-kûn tiong chi̍t chiah kang ê mî-iûⁿ, lóng tio̍h bô khoat-tiám ê.
43:26 Keng-kòe chhit ji̍t, in beh ūi tôaⁿ sio̍k-chōe, hō͘ i chheng-khì; ánne kā i hun-pia̍t chò sèng.
43:27 Hiahê ji̍t móa liáu-āu, tùi tē-peh ji̍t í-āu, chè-si tio̍h tī tôaⁿ téng hiàn lín ê sio-chè kah pêng-an ê chè; Góa beh chiap-la̍p lín. Che sī chì-koân Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。