出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Chèng-gī kah Kong-tō
" M̄-thang soan-iông iâu-giân, m̄ thang kah pháiⁿ lâng liân-ha̍p chò lāmsám ê kiàn-chèng.
23:2 M̄-thang tòe kûn-chiòng kiâⁿ pháiⁿ, tī sio-kò ê tāichì, m̄ thang phian-óa tōa pêng, kóng i ê ōe, lâi oan-óng chèng-ti̍t.
23:3 M̄-thang tī sio-kò ê tāichì, thán-hō͘ sànchhiah lâng.
23:4 " Nā tú tio̍h lí ê tùi-te̍k ê gû á-.sī lî bê-lō͘, it-tēng tio̍h khan tńg-lâi kau i.
23:5 Nā khòaⁿ tio̍h oàn-hūn lí ê lâng ê lî-á chài tāng teh tó lo̍h-.khì, m̄ thang kiâⁿ-khui, tio̍h kah i chò-hóe sià lo̍h lî só͘ chài ê hòe.
23:6 " Sàn-chhiah lâng nā ū sio-kò, lí m̄ thang phian-toàn.
23:7 Tio̍h lī-khui hi-ké ê tāichì hn̄g-hn̄g, m̄ thang thâi bô chōe kah gī ê lâng, in-ūi Góa it-tēng bô kā pháiⁿ lâng sǹg-chò sī gī lâng.
23:8 M̄-thang siū o͘-se, in-ūi o͘-se ē hō͘ ba̍k-chiu kim ê lâng piàn chheⁿmê, koh ē hō͘ gī lâng ê ōe péng tò-péng.
23:9 " M̄-thang ap-chè chhut-gōa lâng, in-ūi lín bat chhut-gōa tī Ai-gi̍p tē, chai chhut-gōa lâng ê sim.
23:10 Tē-chhit Nî kah Tē-chhit Ji̍t
" La̍k nî lāi lí tio̍h chèng-choh lí ê chhân-hn̂g, siu-sêng lông-sán-bu̍t.
23:11 To̍k-to̍k tē-chhit nî, tio̍h hō͘ thó͘-tē hioh-khùn bô chèng-choh, hō͘ lí ê jîn-bîn tiong ê sànchhiah lâng ū thang chia̍h; só͘ chhun-.ê thang hō͘ iá-siù chia̍h. Lí ê phû-tô hn̂g kah kaⁿ-ná hn̂g, mā tio̍h ánne.
23:12 " La̍k ji̍t lāi lí tio̍h chò lí ê kang, tē-chhit ji̍t tio̍h an-hioh, hō͘ gû, lî thang hioh-khùn, mā hō͘ lú-pī ê kiáⁿ kah chhut-gōa lâng lóng thang ióng cheng-le̍k.
23:13 " Kiàn-nā Góa tùi lín kóng ê ōe, lín tio̍h kín-sīn lâi chun-siú. Lí m̄ thang thê-khí pa̍t-ê sîn-bêng ê miâ, mā m̄ thang kóng hō͘ lâng thiaⁿ.
23:14 Saⁿ-ê Tiōng-iàu ê Cheh-kî
( CAG 34: 18-26; SBK 16: 1-17)
" Chi̍t nî saⁿ pái, lí tio̍h siú cheh ho̍k-sāi Góa.
23:15 A-pit-goe̍h, lí chhut Ai-gi̍p, kàu tiāⁿ tio̍h ê kî, tio̍h siú Tû-kàⁿ-cheh, chhit ji̍t chia̍h bô-kàⁿ piáⁿ, chiàu Góa só͘ hoan-hù ê; tiâu-kìⁿ Góa ê lâng m̄ thang khang-chhiú.
23:16 " Koh ū siu-koah ê cheh, to̍h-sī lí tī chhân-.ni̍h chai-chèng, tùi lô-khó͘ tit tio̍h khí-thâu se̍k ê lông-sán-bu̍t. Koh ū siu-chông ê cheh, to̍h-sī nî bóe, lín siu-chông tùi chhân-.ni̍h lô-khó͘ só͘ tit tio̍h ê.
23:17 " Chi̍t nî saⁿ pái, lí só͘-ū ê chapo͘ teng lóng tio̍h kàu chì-koân Siōng-chú ê bīn-chêng.
23:18 " Chè-sū Góa ê seng-lé, i ê hoeh m̄ thang chham ū kàⁿ ê mi̍h lâi hiàn, mā m̄ thang kā Góa cheh-kî seng-lé ê iû lâu kàu keh kang chá-khí.
23:19 " Tē-.ni̍h siōng khí-thâu se̍k ê mi̍h, tio̍h sàng kàu Siōng-chú — lí ê Siōng-tè ê chhù. Chú soaⁿ-iûⁿ-á m̄ thang ēng i ê bó ê leng.
23:20 Èng-ín kah Kà-sī
" Lí khòaⁿ, Góa chhe Góa ê sù-chiá tī lí ê thâu-chêng, tī lō͘-.ni̍h pó-hō͘ lí, chhōa lí kàu Góa só͘ chún-pī ê só͘-chāi.
23:21 Lín tī i ê bīn-chêng tio̍h kín-sīn, chun-thàn i ê ōe, m̄ thang ûi-pōe i, i bô beh sià-bián lín ê kòe-sit, in-ūi i sī hōng Góa ê miâ lâi ê.
23:22 " Lí nā si̍t-chāi chun-thàn i ê ōe, chiàu Góa it-chhè só͘ kóng ê khì kiâⁿ, Góa chiū chò lí ê siû-te̍k ê siû-te̍k, chò lí ê tùi-te̍k ê tùi-te̍k.
23:23 " Góa ê sù-chiá ē kiâⁿ tī lí ê thâu-chêng, chhōa lí kàu A-mô͘-lī, Hiat, Pe-lí-ji, Ka-nân, Hi-bī, I-é-bú-suh hiahê cho̍k ê tē; Góa beh kā in chián-tû.
23:24 Lí m̄ thang kūi-pài in ê sîn-bêng, mā m̄ thang ho̍k-sāi in, m̄ thang o̍h in ê só͘ chò, tio̍h choân-pō͘ kā in húi-bia̍t, phah-chhùi in tiau-khek ê thiāu.
23:25 Lín tio̍h ho̍k-sāi Siōng-chú — lín ê Siōng-tè, I it-tēng sù-hok tī lí ê bí-niûⁿ kah lí ê chúi, Góa koh ē tû-khì lín tiong-kan ê phòa-pēⁿ.
23:26 Góa mā beh hō͘ lí ê kéng lāi bē ū làu-the ê, bô bē seⁿ ê, Góa beh hō͘ lí ê hòe-siū boán-chiok.
23:27 " Góa ē chò lí ê thâu-chêng lâi sī-ui, lí só͘ kàu ê só͘-chāi, hiahê jîn-bîn, Góa beh hō͘ in sí-bông, koh beh hō͘ lí só͘-ū ê tùi-te̍k oa̍t tńg-sin tô-cháu.
23:28 Góa beh chhe tōa-chiah phang tī lí ê thâu-chêng, kā Hi-bī lâng, Ka-nân lâng kah Hiat lâng kóaⁿ chhut-.khì, lī-khui lí.
23:29 Tī chi̍t nî lāi, Góa bô beh tùi lí ê thâu-chêng kā in choân-pō͘ kóaⁿ chhut-.khì, khióng-kiaⁿ thó͘-tē pha-hng, iá-siù ke-thiⁿ chin chē lâi hāi tio̍h lín.
23:30 Góa beh chiām-chiām tùi lín ê thâu-chêng kā in kóaⁿ chhut-.khì, thèng-hāu lín ê lâng-gia̍h ke-thiⁿ chin chē, lâi sêng-siū hit-ê tē chò sán-gia̍p.
23:31 Góa beh tiāⁿ tio̍h lí ê kéng-kài, tùi Âng-hái kàu Hui-lī-sū ê hái, koh tùi khòng-iá kàu tōa hô. In-ūi Góa beh kā tòa tī hit só͘-chāi ê jîn-bîn kau tī lín ê chhiú, hō͘ lí kā in tùi lí ê bīn-chêng kóaⁿ chhut-.khì.
23:32 M̄-thang kah in í-ki̍p in ê sîn-bêng li̍p-iok.
23:33 M̄-thang hō͘ in tòa tī lí ê thó͘-tē, khióng-kiaⁿ in ē hō͘ lí tek-chōe Góa. Lí nā ho̍k-sāi in ê sîn-bêng, che ē chiâⁿ-chò lí ê lô-bāng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。