以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
41:1 I koh chhōa góa lâi-kàu tiān hia, niû hiahê thiāu; chit bīn khoah la̍k tiú, hit bīn khoah la̍k tiú, khoah-tō͘ kah pò͘-pêⁿ kāng-khoán.
41:2 Mn̂g-kháu khoah cha̍p tiú. Mn̂g ê siang pêng piⁿ, chit pêng gō͘ tiú, hit pêng gō͘ tiú. I niû i ê tn̂g sì-cha̍p tiú, khoah jī-cha̍p tiú.
41:3 I khì-kàu lāi-bīn, niû mn̂g-kháu ê thiāu, nn̄g tiú; mn̂g-kháu la̍k tiú, mn̂g-kháu ê khoah chhit tiú.
41:4 I niû i ê tn̂g jī-cha̍p tiú, khoah jī-cha̍p tiú, tī tiān ê chêng-bīn; i tùi góa kóng, " Che sī chì-sèng-só͘. "
41:5 Sèng-tiān ê Hō͘-lēng Pâng
I niû chhù ê chhiûⁿ, la̍k tiú; chhù sì-kho͘-ûi ê piⁿ-pâng, kok khoah sì tiú.
41:6 Piⁿ-pâng ū saⁿ chàn, chit chàn thia̍p tī hit chàn ê téng-bīn, ta̍k chàn ū saⁿ-cha̍p keng; chit-ê chhù lēng-gōa ū chi̍t phìⁿ chhiûⁿ, chò sì-kho͘-ûi piⁿ-pâng ê lō͘-ēng, hō͘ i ê êⁿ-á thang khòa tī hia, bián-tit khòa tī chhù ê chhiûⁿ.
41:7 Chiahê sì-kho͘-ûi ê piⁿ-pâng ná koân ná khoah; in-ūi chhù ê ûi tī chhù ê sì-bīn ná koân, só͘-í, chhù ê khoah ti̍t-ti̍t kàu téng-bīn; tùi ē-chàn kàu téng-chàn, tio̍h tùi tiong-chàn chiūⁿ-.khì.
41:8 Góa koh khòaⁿ tio̍h chhù ê sì-kho͘-ûi ū koân ê gîm; piⁿ-pâng ê tē-ki, koân chiok-chiok chi̍t ko-chhioh, to̍h-sī la̍k tōa tiú.
41:9 Piⁿ-pâng gōa-bīn ê chhiûⁿ, kāu gō͘ tiú. Só͘ chhun lo̍h-.lâi ê tē to̍h-sī chhù ê piⁿ-pâng ê só͘-chāi.
41:10 Sì-bīn ûi ê chhù hiahê pâng-keng, sio-lī jī-cha̍p tiú ê khoah.
41:11 Piⁿ-pâng ê mn̂g lóng ǹg só͘ chhun lo̍h-.lâi ê tē; chi̍t-ê mn̂g ǹg pak, chi̍t-ê mn̂g ǹg lâm. Sì-kho͘-ûi só͘ chhun lo̍h-.lâi ê tē lóng khoah gō͘ tiú.
41:12 Sai Pêng ê Chhù-the̍h
Tī sai pêng lēng-gōa keh-khui ê tē thâu-chêng ê chhù-the̍h, khoah chhit-cha̍p tiú; i ê chhiûⁿ sì-kho͘-ûi kāu gō͘ tiú, tn̂g káu-cha̍p tiú.
41:13 Sèng-tiān ê Chhùn-chhioh
Án-ne, i niû chhù, tn̂g chi̍t pah tiú, mā niû keh-khui ê só͘-chāi kah só͘ khí-chō ê, kah i ê chhiûⁿ, chóng-kiōng tn̂g chi̍t pah tiú.
41:14 Chhù ê thâu-chêng bīn kah ǹg tang keh-khui ê tē, khoah chi̍t pah tiú.
41:15 I niû āu-bīn keh-khui ê tē thâu-chêng ê chhù-the̍h, í-ki̍p chit pêng, hit pêng lâu ê lông, tn̂g chi̍t pah tiú, koh niû lāi-tiān kah īⁿ ê lông.
41:16 Sèng-tiān ê Lāi-pō͘
I ê hō͘-tēng, i ê koaiⁿ-ba̍t ê thang-á, i ê sì-kho͘-ûi saⁿ chàn ê lâu ê lông, tī hō͘-tēng ê tùi-bīn, sì-kho͘-ûi ê chhiûⁿ lóng pau chhâ-pán; tùi thô͘-kha kàu thang-á, ( thang-á lóng ū jia-khàm ),
41:17 it-ti̍t kàu mn̂g ê téng-bīn, to̍h-sī kàu lāi-bīn ê chhù kah gōa-bīn, lāi-gōa sì-kho͘-ûi ê chhiûⁿ-piah, lóng chiàu chhùn-chhioh.
41:18 Ū khek ki-lō͘-peng kah chang chhiū, nn̄g-ê ki-lō͘-peng ê tiong-kan ū chi̍t châng ê chang chhiū; ki-lō͘-peng ta̍k-ê ū nn̄g-ê bīn.
41:19 Chit pêng ū lâng ê bīn, ǹg chang chhiū; hit pêng ū sai ê bīn, ǹg chang chhiū, chhù lāi sì-kho͘-ûi lóng sī ánne.
41:20 Tùi thô͘-kha kàu mn̂g téng, lóng ū khek ki-lō͘-peng kah chang chhiū. Tiān ê chhiûⁿ lóng sī ánne.
41:21 Tiān ê mn̂g-kheng sī sì-kak-hêng ê. Chì-sèng-só͘ ê thâu-chêng bīn chhin-chhiūⁿ tiān ê khoán-sit.
41:22 Tôaⁿ sī chhâ chò ê, koân saⁿ tiú, tn̂g nn̄g tiú. I ê kak, i ê chō kah i ê sì-piⁿ lóng sī chhâ chò ê. I tùi góa kóng, " Che sī Siōng-chú bīn-chêng ê toh. "
41:23 Tiān kah chì-sèng-só͘ ū nn̄g-ê mn̂g, ta̍k-ê mn̂g ū nn̄g sìⁿ.
41:24 Chit-ê nn̄g sìⁿ sī ē áu-.tit ê, chit-ê mn̂g nn̄g sìⁿ, hit-ê mn̂g mā nn̄g sìⁿ.
41:25 Tiān ê mn̂g téng ū khek ki-lō͘-peng kah chang chhiū, kah khek tī chhiûⁿ téng ê kāng-khoán. Tī gōa-bīn lông ê thâu-chêng ū kāu ê chhâ-pán.
41:26 Lông ê piⁿ-á, chit pêng kah hit pêng lóng ū koaiⁿ-ba̍t ê thang-á kah chang chhiū; chhù ê piⁿ-pâng kah kāu ê chhâ-pán lóng sī ánne.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。