以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
37:1 Ko͘-tâ Kut ê Koh-oa̍h
Siōng-chú ê chhiú hē tī góa ê sin chiūⁿ, Siōng-chú ēng I ê sîn-lêng chhōa góa chhut-.khì, kā góa hē tī soaⁿ-kok tiong; hit-ê soaⁿ-kok ū kut-thâu móa-móa.
37:2 I hō͘ góa tùi kut-thâu ê sì-kho͘-ûi keng-kòe; lí khòaⁿ, tī soaⁿ-kok ê bīn-chiūⁿ ū kut-thâu chin chē, lí khòaⁿ, in chin ko͘-tâ.
37:3 I tùi góa kóng, " Jîn-chú, chiahê kut kám ē oa̍h? " Góa ìn kóng, " Chì-koân Siōng-chú ah, Lí kakī chai. "
37:4 I koh tùi góa kóng, " Lí tio̍h tùi chiahê kut-thâu soan-pò͘, lâi kā in kóng: Lín ko͘-tâ ê kut, tio̍h thiaⁿ Siōng-chú ê ōe.
37:5 Chì-koân Siōng-chú kā chiahê kut ánne kóng, ' Lí khòaⁿ, Góa beh hō͘ oa̍h-khì ji̍p-khì lín ê lāi-bīn, lín chiū ē oa̍h khí-.lâi.
37:6 Góa beh hō͘ lín ê téng-bīn ū kin, koh hō͘ lín ū bah, koh ēng phôe kā lín pau, ēng oa̍h-khì ji̍p-khì tī lín lāi-bīn, lín chiū ē oa̍h khí-.lâi. Lín chiū ē chai Góa sī Siōng-chú. '"
37:7 Chiū ánne, góa chun-thàn bēng-lēng lâi soan-pò͘. Tng góa teh soan-pò͘ ê sî, ū siaⁿ hoat-chhut, hut-jiân tē-tāng, chiahê kut sio liân-ha̍p, ta̍k ki kui i ê pún ūi.
37:8 Góa kā i khòaⁿ, khòaⁿ tio̍h kut ê téng-bīn ū kin, mā ū bah, koh ū phôe pau tī i ê téng-bīn, chóng-.sī, lāi-bīn bô oa̍h-khì.
37:9 I chiū tùi góa kóng, " Lí tio̍h ǹg hong lâi soan-pò͘; jîn-chú, lí tio̍h soan-pò͘, lâi tùi hong kóng, chì-koân Siōng-chú ánne kóng: Oa̍h-khì, tio̍h tùi hiahê hong lâi, pûn tī chiahê siū thâi ê, hō͘ in ē oa̍h khí-.lâi. "
37:10 Chiū ánne, góa chiàu I só͘ bēng-lēng góa ê lâi soan-pò͘, oa̍h-khì chiū lâi, ji̍p-khì tī in lāi-bīn; in chiū oa̍h khí-lâi khiā-.leh, chiâⁿ-chò ke̍k tōa ê kun-tūi.
37:11 I chiū kā góa kóng, " Jîn-chú, chiahê kut to̍h-sī I-su-la-el ê choân ke; lí khòaⁿ, in kóng, ' Goán ê kut lóng ko͘-tâ, goán ê ǹg-bāng lóng sit-lo̍h; goán choân-pō͘ siū châu-bia̍t. '
37:12 Só͘-í, lí tio̍h soan-pò͘, lâi tùi in kóng, chì-koân Siōng-chú ánne kóng, ' Góa ê chú-bîn, lí khòaⁿ, Góa beh khui lín ê bōng, hō͘ lín tùi lín ê bōng khí-.lâi, chhōa lín ji̍p-khì I-su-la-el tē.
37:13 Góa ê chú-bîn, Góa khui lín ê bōng, hō͘ lín tùi lín ê bōng khí-.lâi, lín chiū ē chai Góa sī Siōng-chú.
37:14 Góa beh kā góa ê sîn-lêng hē tī lín ê lāi-bīn, lín chiū ē oa̍h khí-.lâi. Góa kā lín an-tì tī lín ê pún só͘-chāi, lín chiū ē chai Góa — Siōng-chú ū ánne kóng, mā ū ánne lâi chiâⁿ. Che sī Siōng-chú kóng ê. '"
37:15 Iô-tah kah I-su-la-el Cho͘-sêng Liân-ha̍p Ông-kok
Siōng-chú ê ōe koh lîm-kàu góa, kóng,
37:16 " Jîn-chú, lí tio̍h the̍h chi̍t tè chhâ-pán, tī i ê téng-bīn siá ' Ūi Iô-tah kah i ê tâng-phōaⁿ I-su-la-el cho̍k ', koh the̍h chi̍t tè chhâ-pán, tī i ê téng-bīn siá ' Ūi tio̍h Iô-sé-huh, E-hu-laim kah i ê tâng-phōaⁿ I-su-la-el choân ke ' ê chhâ-pán.
37:17 Lí tio̍h hō͘ in sio óa, liân chò chi̍t tè chhâ-pán; chiū tī lí ê chhiú tiong beh chiâⁿ-chò chi̍t tè.
37:18 Siat-sú lí ê jîn-bîn mn̄g lí kóng ' Lí chò chit-ê sī siáⁿ-mi̍h ì-sù, lí ná m̄ kā goán chí-sī? '
37:19 Lí chiū tio̍h tùi in kóng, ' Chì-koân Siōng-chú ánne kóng: Lí khòaⁿ, Góa beh the̍h E-hu-laim ê chhiú só͘ gia̍h Iô-sé-huh ê chhâ-pán kah i ê tâng-phōaⁿ I-su-la-el chiahê chi-cho̍k, Góa beh kā i hē tī óa Iô-tah ê chhâ-pán, hō͘ i chiâⁿ-chò chi̍t tè ê chhâ-pán, i chiū ē chiâⁿ-chò chi̍t tè tī Góa ê chhiú. '
37:20 " Lí só͘ siá ê hit nn̄g tè chhâ-pán, tio̍h tī in ê ba̍k-chiu chêng gia̍h tī lí ê chhiú.
37:21 Lí tio̍h tùi in kóng, chì-koân Siōng-chú ánne kóng: Lí khòaⁿ, Góa beh chhú I-su-la-el cho̍k tùi in só͘ khì-kàu ê ta̍k kok chhut-.lâi, koh tùi sì-kho͘-ûi kā in chū-chi̍p, chhōa in tńg-lâi pún só͘-chāi.
37:22 Góa beh hō͘ in tī hit-ê tē, tī I-su-la-el ê soaⁿ, ha̍p-chò chi̍t-ê jîn-bîn; ū chi̍t-ê ông chò in chèng lâng ê ông. In bô koh pun-chò nn̄g pêng ê jîn-bîn, mā bô koh hun-chò nn̄g kok;
37:23 mā bô koh in-ūi ngó͘-siōng kah khó-ò͘ⁿ ê mi̍h, í-ki̍p it-chhè ê chōe-kò, kā pún-sin òe lahsap. Góa beh kiù in thoat-chhut in só͘-ū tòa ê só͘-chāi, to̍h-sī in hoān chōe hia; Góa beh kā in chheng-khì; ánne, in ē chò Góa ê chú-bîn; Góa beh chò in ê Siōng-tè.
37:24 " Góa ê lô͘-po̍k — Ta-bi̍t ē chò in ê ông; in lóng ē kui tī chi̍t-ê bo̍k-chiá. In ē sūn-ho̍k Góa ê hoat-tō͘, siú Góa ê lu̍t-lē lâi kiâⁿ.
37:25 In ē tòa tī Góa siúⁿ-sù hō͘ Góa ê lô͘-po̍k — Iâ-kop ê tē, to̍h-sī lín ê chó͘-sian só͘ tòa ê. In kah in ê kiáⁿ-sun, í-ki̍p kiáⁿ-kiáⁿ sun-sun lóng éng-oán tòa tī hia. Góa ê lô͘-po̍k — Ta-bi̍t ē chò in ê kun-ông, it-ti̍t kàu éng-oán.
37:26 Jî-chhiáⁿ Góa beh kah in li̍p pêng-an ê iok kah in chò éng-oán ê iok; Góa mā beh kā in kiàn-siat, hō͘ in ê lâng-gia̍h ke-thiⁿ, koh tī in ê tiong-kan siat-li̍p Góa ê sèng-só͘, ti̍t-kàu éng-oán.
37:27 Góa tòa ê só͘-chāi ē tī in tiong-kan; Góa beh chò in ê Siōng-tè, in ē chò Góa ê chú-bîn.
37:28 Góa ê sèng-só͘ tī in tiong-kan, it-ti̍t kàu éng-oán; gōa-pang lâng chiū ē chai Góa sī Siōng-chú, hō͘ I-su-la-el chiâⁿ-chò sèng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。