以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
33:1 Siōng-chú Chí-phài I-che-kel Chò Siú-bōng ê Lâng
Siōng-chú ê ōe lîm-kàu góa, kóng,
33:2 " Jîn-chú, lí tio̍h tùi pún-kok ê jîn-bîn kóng-ōe, kā in kóng: Góa hō͘ to-kiàm lîm-kàu chi̍t kok ê sî, hit kok ê jîn-bîn tio̍h tùi in tiong-kan kéng chi̍t-ê lâng, lâi siat-li̍p i chò siú-bōng ê lâng.
33:3 I khòaⁿ tio̍h to-kiàm lîm-kàu hit só͘-chāi, nā pûn sàu-kak kéng-kài chèng lâng,
33:4 kiàn-nā thiaⁿ tio̍h sàu-kak ê siaⁿ bô siū kéng-kài ê, to-kiàm nā lâi kā i châu-bia̍t tiāu, i ê chōe ē kui tī i ê thâu-khak téng.
33:5 I thiaⁿ tio̍h sàu-kak ê siaⁿ bô siū kéng-kài, i ê chōe ē kui tī i pún-sin; i nā siū kéng-kài, chiū ē kiù tio̍h kakī ê sèⁿ-miā.
33:6 Siat-sú siú-bōng ê lâng khòaⁿ tio̍h to-kiàm kàu, bô pûn sàu-kak, tì-sú jîn-bîn bô siū kéng-kài, to-kiàm ē lâi kā in thâi-sí tiong-kan ê chi̍t-ê lâng, hit-ê lâng sûi-jiân sí tī i ê chōe, chóng-.sī, Góa beh tùi siú-bōng ê lâng thó i sit-lo̍h sèⁿ-miā ê chōe.
33:7 " Jîn-chú, Góa ánne siat-li̍p lí chò I-su-la-el chú-bîn ê siú-bōng ê lâng. Só͘-í, lí tio̍h thiaⁿ Góa chhùi lāi só͘ kóng ê ōe, thè Góa kā in kéng-kài.
33:8 Góa tùi pháiⁿ lâng kóng, ' Pháiⁿ lâng, lí it-tēng ē sí! ' Lí nā bô khui chhùi kéng-kài pháiⁿ lâng, hō͘ i lī-khui i só͘ kiâⁿ ê lō͘, chit-ê pháiⁿ lâng ē sí tī i ê chōe, chóng-.sī, Góa beh tùi lí thó i sit-lo̍h sèⁿ-miā ê chōe.
33:9 Siat-sú lí kéng-kài pháiⁿ lâng oa̍t tńg-lâi lī-khui i só͘ kiâⁿ ê lō͘, i iû-goân m̄ oa̍t tńg-lâi lī-khui, i ē sí tī i ê chōe, lí chiū ē kiù lí ê oa̍h-miā. "
33:10 Kò-jîn ê Chek-jīm
Siōng-chú kā góa kóng, " Jîn-chú, lí tio̍h tùi I-su-la-el ê chú-bîn kóng, ' Lín tiāⁿtiāⁿ ánne kóng: Goán ê kòe-sit, goán ê chōe-ok tī goán ê sin chiūⁿ, goán sī in-ūi ánne chiām-chiām siau-bia̍t, ná ē oa̍h leh? '
33:11 Lí tio̍h tùi in kóng, chì-koân Siōng-chú kóng: Góa kí Góa ê éng-oán oa̍h-miā lâi chiùchōa, Góa choa̍t-tùi bô hoaⁿ-hí pháiⁿ lâng sí-bông, to̍k-to̍k hoaⁿ-hí pháiⁿ lâng oa̍t tńg-lâi lī-khui i só͘ kiâⁿ ê lō͘ lâi oa̍h. I-su-la-el ê chú-bîn, lín tio̍h oa̍t tò tńg-.lâi, lī-khui pháiⁿ lō͘, lín ná ē beh chhú sí?
33:12 " Jîn-chú, lí tio̍h tùi lí ê jîn-bîn kóng: Gī lâng ê gī, tī i hoān chōe ê ji̍t bē tàng kiù i; kóng tio̍h pháiⁿ lâng ê pháiⁿ, tī i oa̍t tńg-lâi lī-khui i ê pháiⁿ só͘ kiâⁿ ê ji̍t, mā bē tàng hō͘ i poa̍h-tó; gī lâng tī hoān chōe ê ji̍t, mā bē tàng in-ūi i ê gī lâi tit tio̍h oa̍h.
33:13 " Góa tùi gī lâng kóng, ' I it-tēng ē oa̍h! ' I nā óa-khò i ê gī lâi kiâⁿ pháiⁿ, i só͘ kiâⁿ ê gī chiū lóng bô tit tio̍h kì-liām. I ē in-ūi i só͘ kiâⁿ ê pháiⁿ lâi sí.
33:14 Jî-chhiáⁿ Góa tùi pháiⁿ lâng kóng, ' Lí it-tēng ē sí! ' I nā oa̍t tńg-lâi lī-khui i ê chōe, kiâⁿ chèng-ti̍t kah ha̍p-lí ê tāichì;
33:15 koh ū hêng lâng ê tǹg-thâu kah só͘ chhiúⁿ lâng ê mi̍h, chun-thàn oa̍h-miā ê lu̍t-lē, bô koh chò pháiⁿ, i it-tēng ē oa̍h, bē tì-kàu sí.
33:16 I só͘ hoān it-chhè ê chōe bô koh kā i ē kì-tit. I kiâⁿ chèng-ti̍t kah ha̍p-lí ê tāichì, chiū it-tēng ē oa̍h.
33:17 " Lí ê jîn-bîn iáu teh kóng, ' Chú ê lō͘ bô kong-pêⁿ', kî-si̍t sī in ê lō͘ bô kong-pêⁿ.
33:18 Gī lâng oa̍t-tńg lī-khui i ê gī lâi kiâⁿ pháiⁿ, chiū ē in-ūi ánne lâi sí.
33:19 Pháiⁿ lâng oa̍t tńg-lâi lī-khui i ê pháiⁿ, kiâⁿ chèng-ti̍t kah ha̍p-lí ê tāichì, chiū ē in-ūi ánne lâi oa̍h.
33:20 Lín iáu teh kóng, ' Chú ê lō͘ bô kong-pêⁿ'. I-su-la-el ê chú-bîn, Góa beh chiàu lín ta̍k lâng só͘ kiâⁿ ê lâi kā lín sím-phòaⁿ. "
33:21 Ê-lú-sa-lèm Hām-lo̍h ê Siau-sit
Goán siū lia̍h liáu-āu cha̍p-jī nî cha̍p-goe̍h chhe gō͘, ū chi̍t-ê lâng tùi Ê-lú-sa-lèm tô-cháu lâi-kàu góa chia, kóng, " Siâⁿ í-keng siū kong-phòa. "
33:22 Tô-cháu ê lâng iáu-bōe kàu, chêng chi̍t ji̍t ê ê-hng, Siōng-chú ê chhiú hē tī góa ê sin chiūⁿ, khui góa ê chhùi. Kàu keh kang chá-khí, hit-ê lâng lâi-kàu góa chia, góa ê chhùi chiū khui, bô koh é-káu.
33:23 Jîn-bîn ê Chōe
Siōng-chú ê ōe lîm-kàu góa, kóng,
33:24 " Jîn-chú, tòa tī I-su-la-el hong-hùi ê tē ê lâng teh kóng, ' A-bu-la-hàm to̍k-to̍k chi̍t-ê lâng, ū tit tio̍h chit-ê tē chò sán-gia̍p; lán lâng-gia̍h chin chē, chit-ê tē sī hō͘ lán chò sán-gia̍p ê. '
33:25 " Só͘-í, lí tio̍h kā in kóng, chì-koân Siōng-chú ánne kóng: Lín chia̍h iáu ū hoeh ê bah, koh gia̍h-khí lín ê ba̍k-chiu, gióng-bōng lín ê ngó͘-siōng, koh thâi lâng lâu hoeh, lín kám iáu ē-tàng tit tio̍h chit-ê tē chò sán-gia̍p?
33:26 Lín óa-khò lín ê to-kiàm lâi kiâⁿ khó-ò͘ⁿ ê tāichì, lâng-lâng kā chhù-piⁿ ê bó͘ òe lahsap, lín kám iáu ē-tàng tit tio̍h chit-ê tē chò sán-gia̍p?
33:27 " Lí tio̍h tùi in ánne kóng, chì-koân Siōng-chú ánne kóng: Góa kí Góa ê éng-oán oa̍h-miā lâi chiùchōa, tī pha-hng ê só͘-chāi ê ē tó tī to hā; tī chhân-iá ê tiong-kan ê, Góa beh kā in kau hō͘ iá-siù thun-chia̍h; tī siâⁿ-pó kah tōng lāi ê ē sí tī un-e̍k.
33:28 Góa beh hō͘ chit-ê tē piàn hi-bî, hō͘ lâng tio̍h-kiaⁿ kah gāng-.khì; i in-ūi sè-le̍k ê kiau-ngō͘ mā ē soah-.khì. I-su-la-el chiahê soaⁿ lóng ē piàn hi-bî, bô lâng keng-kòe.
33:29 Góa in-ūi in só͘ kiâⁿ it-chhè khó-ò͘ⁿ ê tāichì, hō͘ tē pha-hng, tì-sú lâng tio̍h-kiaⁿ kah gāng-.khì. Hit sî, in chiū ē chai Góa sī Siōng-chú. "
33:30 Sian-ti Thoân-káng Sìn-sit ê Kiat-kó
Siōng-chú kóng, " Jîn-chú, lí ê jîn-bîn tī chhù-piⁿ, tī chhù mn̂g-kháu teh tâm-lūn lí. Hiaⁿ-tī tùi hiaⁿ-tī chò-hóe kóng, ' Lâi! Lâi thiaⁿ, thiaⁿ khòaⁿ Siōng-chú ê ōe sī teh kóng siáⁿ-mi̍h. '
33:31 In lâi lí chia, chhin-chhiūⁿ jîn-bîn lâi chū-hōe, chē tī lí ê bīn-chêng, chhin-chhiūⁿ sī Góa ê chú-bîn. In thiaⁿ lí ê ōe, mā bô khì kiâⁿ; in-ūi in ê chhùi hián-chhut chin chē chhin-ài, chóng-.sī, sim sī teh jiok chîⁿ.
33:32 Lí khòaⁿ, in khòaⁿ lí chhin-chhiūⁿ gâu chàu ga̍k, hó siaⁿ-im ê lâng só͘ chhiùⁿ ê Ngá-ko, in thiaⁿ lí ê ōe mā bô khì kiâⁿ.
33:33 Lí khòaⁿ, lí só͘ kóng ê ōe ē chin kín chiâⁿ, kàu chiâⁿ ê sî, in chiū ē chai bat ū sian-ti tī in tiong-kan. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。