以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 Siōng-chú beh Têng-hoa̍t Ai-gi̍p
Siōng-chú ê ōe lîm-kàu góa, kóng,
30:2 " Jîn-chú, lí tio̍h khì soan-káng, chì-koân Siōng-chú ánne kóng: Chhám ah chit ji̍t! Lín tio̍h thî-khàu.
30:3 In-ūi ji̍t kīn à, to̍h-sī Siōng-chú ê ji̍t kīn à, to̍h-sī ba̍t hûn ê ji̍t, beh chò lia̍t kok ê sî-kî.
30:4 Ē ū to-kiàm lîm-kàu Ai-gi̍p; tī Ai-gi̍p siū thâi ê lâng tó lo̍h-.khì ê sî, Kú-si̍t lâng chiū ū thòng-khó͘, in ē lia̍h i ê chèng lâng, thiah-húi i ê tē-ki.
30:5 " Kú-si̍t lâng, Put lâng, Lù-t lâng, chham-chhap ê jîn-bîn kah Ku-p lâng, í-ki̍p tông-bêng ê kok ê jîn-bîn, lóng ē kah in chò-hóe tó tī to hā. "
30:6 Siōng-chú ánne kóng, " Hû-chō͘ Ai-gi̍p ê mā ē tò. I sè-le̍k ê kiau-ngō͘ ē kàng kē; tùi Su-be-neh ê thah khí, in lóng ē tī hia tó tī to hā. Che sī chì-koân Siōng-chú kóng ê.
30:7 In ē tī hi-bî ê tē ê tiong-kan lâi chiâⁿ-chò hi-bî; i chiahê siâⁿ mā ē lia̍t tī chiahê hong-hùi ê siâⁿ ê tiong-kan.
30:8 Tng Góa pàng hóe tī Ai-gi̍p, kiàn-nā kā i pang-chān ê lóng ē siū bia̍t-bông. Hit sî, in chiū ē chai Góa sī Siōng-chú.
30:9 " Kàu hit ji̍t, ē ū sù-chiá tùi Góa ê bīn-chêng chē chûn chhut-.khì, hō͘ an-jiân seng-oa̍h ê Kú-si̍t lâng kiaⁿ-hiâⁿ; ē ū thòng-khó͘ lîm-kàu in, chhin-chhiūⁿ Ai-gi̍p ê ji̍t ánne. Lí khòaⁿ, tāichì lâi à! "
30:10 Chì-koân Siōng-chú ánne kóng, " Góa beh ēng Ba-bú-lông ông — Nep-kat-ne-chal ê chhiú, lâi bia̍t Ai-gi̍p ê chèng lâng.
30:11 I kah tòe i ê lâng, to̍h-sī lia̍t kok tiong kiông-pō ê ē lâi húi-bia̍t chit-ê tē; in ē poe̍h to kong-kek Ai-gi̍p, hō͘ choân tē ū siū thâi ê lâng.
30:12 Góa beh hō͘ hiahê kang-hô ta-.khì, mā beh ēng hit-ê tē bē hō͘ pháiⁿ lâng ê chhiú; Góa beh ēng gōa-pang ê chhiú hō͘ hit-ê tē kah kî-tiong só͘-ū ê piàn-chò hi-bî. Che sī Siōng-chú kóng ê. "
30:13 Chì-koân Siōng-chú ánne kóng: " Góa beh húi-bia̍t hiahê ngó͘-siōng, tùi Nó͘-hu tû-bia̍t sîn-pu̍t; it-tēng bô koh ū kun-ông tùi Ai-gi̍p tē chhut. Góa beh kàng-lo̍h kiaⁿ-hiâⁿ tī Ai-gi̍p tē.
30:14 Góa beh hō͘ Pa-thó-loh hi-bî, pàng hóe tī Chó-an ê tiong-kan; kiâⁿ sím-phòaⁿ ê tāichì tī Nô͘ ê só͘-chāi.
30:15 Góa beh piàⁿ-chhut Góa ê tōa siū-khì tī Sìn, to̍h-sī Ai-gi̍p ê siâⁿ-pó, mā beh bia̍t Nô͘ ê chèng lâng.
30:16 Góa beh pàng hóe tī Ai-gi̍p, Sìn ē tú tio̍h tōa thòng-khó͘; Nô͘ ē tú tio̍h kong-phòa, Nó͘-hu ē tng-thâu pe̍h-ji̍t tú tio̍h tùi-te̍k.
30:17 Am-móng kah Pi-be-siat ê siàu-liân lâng ē tó tī to hā; in ē hō͘ lâng lia̍h-.khì.
30:18 Góa tī Ta̍k-pe-neh at-tn̄g Ai-gi̍p chiahê ka-taⁿ, hō͘ i in-ūi sè-le̍k ê kiau-ngō͘ tī i ê tiong-kan soah-.khì. Hit sî, tī hia ji̍t o͘-àm; kóng tio̍h chit-ê siâⁿ, ē ū ba̍t hûn jia-khàm, i tiong-kan ê chabó͘ kiáⁿ ē hō͘ lâng lia̍h-.khì.
30:19 Góa beh ánne sím-phòaⁿ Ai-gi̍p, in chiū ē chai Góa sī Siōng-chú. "
30:20 Ai-gi̍p Ông ê Sit-pāi
Cha̍p-it nî chiaⁿ-goe̍h chhe-chhit, Siōng-chú ê ōe lîm-kàu góa, kóng,
30:21 " Jîn-chú, Góa í-keng at-tn̄g Ai-gi̍p ông — Hôa-láu ê chhiú-kut; bô pau i ê siong, bô kô͘ io̍h, bô chat pò͘-tiâu, thang hō͘ i ū la̍t gia̍h to.
30:22 Só͘-í, chì-koân Siōng-chú ánne kóng: Lí khòaⁿ, Góa kah Ai-gi̍p ông — Hôa-láu chò tùi-te̍k, beh kā i ióng ê nn̄g ki chhiú-kut at-tn̄g, beh chò chi̍t-ē at-tn̄g, hō͘ to tùi i ê chhiú ka-la̍uh.
30:23 Góa beh kā Ai-gi̍p lâng hun-sòaⁿ khì tī lia̍t kok, sì-sòaⁿ tī lia̍t pang.
30:24 Góa beh hō͘ Ba-bú-lông ông ê chhiú-kut ū la̍t, kā Góa ê to kau tī i ê chhiú; Góa beh at-tn̄g Hôa-láu ê chhiú-kut, i ē tī i ê bīn-chêng ai-siaⁿ thó͘-khùi, chhin-chhiūⁿ sí-siong ê lâng teh ai-siaⁿ thó͘-khùi.
30:25 Góa beh hû Ba-bú-lông ông ê chhiú-kut, Hôa-láu ê chhiú-kut ē sôe lo̍h-.khì; Góa kā Góa ê to kau tī Ba-bú-lông ông ê chhiú, i ē chhun-chhut hit ki to tī Ai-gi̍p tē; hit sî in chiū ē chai Góa sī Siōng-chú.
30:26 Góa beh kā Ai-gi̍p lâng hun-sòaⁿ khì tī lia̍t kok, sì-sòaⁿ tī lia̍t pang. In chiū ē chai Góa sī Siōng-chú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。