以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 Chek-pī Tu-lô
Tē-cha̍p-it nî, goe̍h （ Chù, Goân-bûn làu-kau goe̍h-hūn ）ê chhe-it, Siōng-chú ê ōe lîm-kàu góa, kóng,
26:2 " Jîn-chú, in-ūi Tu-lô ǹg Ê-lú-sa-lèm, kóng, ' Ah-hah! Hitê chò lia̍t pang ê mn̂g ê í-keng phòa, taⁿ kui-ǹg Góa; i í-keng pha-hng, Góa ē hong-sēng. '
26:3 " Só͘-í, chì-koân Siōng-chú ánne kóng: Tu-lô, lí khòaⁿ, Góa kah lí chò tùi-te̍k, Góa mā beh hō͘ chin chē kok khí-lâi kā lí kong-kek, chhin-chhiūⁿ hái hō͘ i ê éng giâ khí-.lâi.
26:4 In ē húi-hoāi Tu-lô ê siâⁿ chhiûⁿ, thiah i ê chiú-keⁿ lâu; góa mā beh khau i ê thô͘-soa hún, hō͘ i chiâⁿ-chò kng liu-liu ê chio̍h-pôaⁿ.
26:5 I ē tī hái tiong chò pha̍k bāng ê só͘-chāi, mā ē chiâⁿ-chò lia̍t kok só͘ chhiúⁿ-toa̍t ê mi̍h. In-ūi Góa ū ánne kóng. Che sī chì-koân Siōng-chú kóng ê.
26:6 Sio̍k tī Tu-lô hiahê siâⁿ ê jîn-bîn ē hō͘ to-kiàm thâi-sí, in chiū ē chai Góa sī Siōng-chú. "
26:7 In-ūi chì-koân Siōng-chú ánne kóng, " Lí khòaⁿ, Góa beh hō͘ lia̍t ông ê ông, to̍h-sī Ba-bú-lông ông Nep-kat-ne-chal, tùi pak-hong tòa bé, chhia, bé-peng, kun-tūi kah chin chē jîn-bîn, lâi kong-kek Tu-lô.
26:8 I ē ēng to-kiàm thâi-sí sio̍k tī lí hiahê siâⁿ ê jîn-bîn, mā ē chat iâⁿ kong-kek lí, khí thô͘-tui lâi kong-kek lí, gia̍h tîn-pâi lâi kong-kek lí.
26:9 I ē an-siat kòng siâⁿ ê thûi, kong-phòa lí ê siâⁿ chhiûⁿ, ēng pó͘-thâu thiah-húi lí ê chiú-keⁿ lâu.
26:10 In-ūi i ê bé chin chē, giâ khí ê thô͘-soa hún ē kā lí jia-khàm; i ji̍p-khì lí ê siâⁿ mn̂g, chhin-chhiūⁿ lâng ji̍p-khì ū phòa-khiah ê siâⁿ. Hit sî, in-ūi khiâ bé ê kah ūn-niû chhia, í-ki̍p chiàn-chhia ê siaⁿ, lí ê siâⁿ ē iô-tāng.
26:11 I ê bé-tê ē thún-ta̍h lí só͘-ū ê ke-lō͘, i ē ēng to thâi-sí lí ê jîn-bîn, lí kian-kò͘ ê thiāu ē tó tī thô͘-kha.
26:12 I ē chhiúⁿ lí ê châi-pó kah lí ê hòe-bu̍t, húi lí ê siâⁿ chhiûⁿ, thiah lí súi ê chhù, koh kā lí chiahê chio̍h, chiahê chhâ, chiahê thô͘ lóng hiat tī chúi tiong.
26:13 Góa beh hō͘ lí chhiùⁿ koa ê siaⁿ lóng soah-.khì, lí tôaⁿ khîm ê siaⁿ bô koh thiaⁿ-.tio̍h.
26:14 Góa beh hō͘ lí chiâⁿ-chò kng liu-liu ê chio̍h-pôaⁿ, chò pha̍k bāng ê só͘-chāi; lí bô koh siū khí-chō, in-ūi Góa — Siōng-chú ū ánne kóng. Che sī chì-koân Siōng-chú kóng ê. "
26:15 Chì-koân Siōng-chú tùi Tu-lô ánne kóng, " Tī lí tiong-kan ū tōa-tōa tô͘-sat ê tāichì, siū-siong ê lâng ai-ai-kiò ê sî, in-ūi lí tó-hoāi ê siaⁿ, tó-sū kám bô lóng iô-tāng?
26:16 Hit sî, hái piⁿ hiahê kun-ông ē tùi i ê ông-ūi lo̍h-.lâi, tû-khì i ê lé-ho̍k, thǹg-khì súi saⁿ, ōaⁿ-chhēng phi̍h-phi̍h chhoah, chē tī thô͘-kha, sî-sî khek-khek teh tiô, ūi tio̍h lí lâi tio̍h-kiaⁿ kah gāng-.khì.
26:17 In ē ūi lí chò ai-ko: Lí chit-ê ū miâ-siaⁿ ê siâⁿ, pêng-sî sī kiâⁿ-chûn ê lâng só͘ tòa, tī hái bīn chò kian-kò͘ ê; pêng-siông ji̍t, i kah tòa tī hia ê jîn-bîn, hō͘ só͘-ū tiàm tī hia ê lâng lóng kiaⁿ-hiâⁿ, taⁿ ná ē bia̍t-bông à!
26:18 Taⁿ tī lí chit-ê tó-hoāi ê ji̍t, chèng tó-sū ē phi̍h-phi̍h chhoah; hái tiong chiahê tó-sū khòaⁿ tio̍h lí sí-.khì, chiū lóng kiaⁿ-hiâⁿ. "
26:19 In-ūi chì-koân Siōng-chú ánne kóng, " Góa beh hō͘ lí chò pha-hng ê siâⁿ, chhin-chhiūⁿ hō͘ hiahê bô lâng tòa ê siâⁿ, koh hō͘ chhim-ian pôaⁿ-kòe lí, tōa-chúi kā lí khàm ba̍t.
26:20 Hit sî, Góa hō͘ lí kah hiahê lo̍h im-hú ê chò-hóe lo̍h-.khì, kàu kó͘-chá lâng hia; hō͘ lí tiàm tī tē-hā chhim ê só͘-chāi, tùi kó͘-chá to̍h pha-hng ê só͘-chāi kah hiahê lo̍h im-hú ê lâng tông-chāi, bô koh ū lâng tòa tī hia, tī oa̍h-lâng ê tē bô koh ū êng-kng.
26:21 Góa beh hō͘ lí chò thang kiaⁿ ê, bô koh lâu tī sè-kan; sûi-jiân lâng chhōe lí, mā éng-oán chhōe bē tio̍h. Che sī chì-koân Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。