以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Nn̄g-ê Hoān-chōe ê Chí-mōe
Siōng-chú ê ōe koh lîm-kàu góa, kóng,
23:2 " Jîn-chú, ū nn̄g-ê chabó͘ lâng, in sī kāng chi̍t-ê lāu-bú seⁿ ê.
23:3 In tī Ai-gi̍p kiâⁿ kan-îm, to̍h-sī tī siàu-liân ê sî kiâⁿ kan-îm. Tī hia in ê leng hō͘ lâng teh, koh tī hia lâng lia̍p i chāi-sek-lí ê leng-thâu.
23:4 In ê miâ, tōa-ché miâ A-hô-la̍h, sió-mōe miâ A-hô-lí-bah; in lóng kè hō͘ Góa, ū seⁿ kiáⁿ-jî. Kóng tio̍h in ê miâ, A-hô-la̍h to̍h-sī Sa-má-lī-a, A-hô-lí-bah to̍h-sī Ê-lú-sa-lèm.
23:5 " A-hô-la̍h kè hō͘ Góa liáu-āu, chiū khì kiâⁿ kan-îm, loân-ài i siong-hó ê lâng, to̍h-sī i ê keh-piah kok A-siul lâng.
23:6 In chhēng nâ-sek ê saⁿ, chò séng-tiúⁿ, chò koaⁿ-oân, lóng sī khó-ài ê siàu-liân lâng, koh sī khiâ bé ê ióng-sū.
23:7 I chiū kah in kiâⁿ kan-îm, to̍h-sī kah i só͘ ì-ài ê A-siul lâng; kiàn-nā i só͘ loân-ài ê, chiū ēng in it-chhè ê ngó͘-siōng lâi kā kakī òe lahsap.
23:8 I mā bô pàng-sak i tī Ai-gi̍p si̍p-koàn kiâⁿ ê îm-loān, in-ūi i iáu siàu-liân ê sî, chiū ū lâng kah i chò-hóe khùn, lia̍p i chāi-sek-lí ê leng, koh lâu chhut i îm-loān ê tāichì tī hia.
23:9 In-ūi ánne, Góa kā i kau tī i siong-hó ê lâng ê chhiú, to̍h-sī i só͘ loân-ài ê A-siul lâng ê chhiú.
23:10 In chiū lō͘-hiān i ê ē-sin, ēng to thâi i, lia̍h i ê kiáⁿ-jî, hō͘ i tī chabó͘ lâng tiong-kan lâu chhàu-miâ, in-ūi in tùi i kiâⁿ sím-phòaⁿ.
23:11 " I ê sió-mōe A-hô-lí-bah khòaⁿ tio̍h ánne, chiū pí i koh khah hòng-chhiòng îm-io̍k; kiâⁿ kan-îm pí i ê tōa-ché koh khah siong-tiōng.
23:12 I loân-ài keh-piah kok ê A-siul lâng, to̍h-sī chhēng ke̍k súi ê saⁿ-khò͘, chò séng-tiúⁿ, chò koaⁿ-oân, khiâ bé ê ióng-sū, lóng sī khó-ài ê siàu-liân lâng.
23:13 Góa khòaⁿ tio̍h i siū òe lahsap, chí-mōe-á nn̄g-ê kiâⁿ kâng lō͘.
23:14 " I mā ke-thiⁿ i ê îm-hēng, in-ūi i khòaⁿ tio̍h lâng ê siōng ōe tī piah-.ni̍h, to̍h-sī ēng chu-âng sek só͘ ōe ê Kal-tí-ah lâng ê siōng,
23:15 io hâ tòa, thâu-khak pau chhái-sek ê kin sôe lo̍h-.lâi; khòaⁿ khí-.lâi chhin-chhiūⁿ kun-tiúⁿ, chiàu Ba-bú-lông lâng ê hêng-siōng; in ê pún só͘-chāi to̍h-sī Kal-tí-ah.
23:16 I chi̍t-ē khòaⁿ tio̍h chiū loân-ài in, sûi-sî chhe sù-chiá khì Kal-tí-ah hia kìⁿ in.
23:17 Ba-bú-lông lâng chiū lâi kah i chiuΝ7 ài-chêng ê bîn-chhn̂g, kiâⁿ kan-îm lâi kā i òe lahsap. I siū òe lahsap í-āu, sim chiū kah in léng-tām.
23:18 Án-ne, i lō͘-hiān i ê îm-hēng, koh lō͘-hiān i ê ē-sin, Góa ê sim chiū kah i léng-tām, chhin-chhiūⁿ chá-chêng kah i ê tōa-ché léng-tām.
23:19 I iáu koh khah kiâⁿ îm-loān, ē kì-tit i siàu-liân tī Ai-gi̍p tē kiâⁿ kan-îm ê ji̍t.
23:20 Loân-ài i siong-hó ê lâng, seng-khu ióng-chòng koh cheng-le̍k pá-chiok, chhin-chhiūⁿ lî-á, chhin-chhiūⁿ bé.
23:21 Án-ne, lí chiū ē kì-tit lí siàu-liân ê sî ê îm-hēng. Hit sî, Ai-gi̍p lâng teh lí ê leng, siàu-liām lí siàu-liân ê leng. "
23:22 Siōng-tè Sím-phòaⁿ Sió-mōe
Koan-hē A-hô-lí-bah, chì-koân Siōng-chú ánne kóng, " Lí khòaⁿ, Góa beh kek-tōng lí chiahê siong-hó ê lâi kong-kek lí, to̍h-sī lí ê sim só͘ léng-tām ê, Góa beh hō͘ i tùi sì-kho͘-ûi lâi kong-kek lí.
23:23 Chiū-sī Ba-bú-lông lâng, Kal-tí-ah chèng lâng kah Pe-ko͘t, Siú-oa, Go-ah chiahê cho̍k. A-siul ê chèng lâng kah in lâi, ū séng-tiúⁿ, koaⁿ-oân, kun-tiúⁿ, ū miâ-siaⁿ ê, khiâ bé ê, lóng sī khó-ài ê siàu-liân lâng.
23:24 In ē tòa kun-khì, chiàn-chhia kah ūn niû ê chhia, chhōa tōa tūi ê kûn-chiòng lâi kong-kek lí. In gia̍h tōa pâi, sió-pâi koh tì thâu-khoe, pâi tīn tī lí ê sì-kho͘-ûi lâi kong-kek lí. Góa ē kā sím-phòaⁿ ê tāichì kau-tài in, in ē ēng in ê lu̍t-hoat kā lí sím-phòaⁿ.
23:25 Góa beh ēng Góa ê chi̍t-tò͘ lâi kong-kek lí; in ē ēng tōa siū-khì lâi pān lí. In ē koah lí ê phīⁿ kah hīⁿ-á; lí só͘ chhun lo̍h-.lâi ê lâng ē tó tī to hā. In ē lia̍h lí ê kiáⁿ-jî, lí só͘ lâu lo̍h-.lâi ê mā ē hō͘ hóe sio-sio-.khì.
23:26 In ē pak lí ê saⁿ-khò͘, chhiúⁿ lí súi ê pó-bu̍t.
23:27 Án-ne, Góa beh hō͘ lí ê îm-hēng kah lí tī Ai-gi̍p tē si̍p-koàn kiâⁿ ê îm-loān lóng soah-.khì, hō͘ lí bô koh gia̍h thâu khòaⁿ in, mā bô koh kì-liām Ai-gi̍p.
23:28 " In-ūi chì-koân Siōng-chú ánne kóng: Lí khòaⁿ, Góa beh kā lí kau tī lí só͘ oàn-hūn ê lâng ê chhiú, to̍h-sī lí ê sim kah in léng-tām ê lâng ê chhiú.
23:29 In ē oàn-hūn lâi pān lí, chhiúⁿ-toa̍t lí it-chhè lô-lo̍k só͘ tit tio̍h ê, chhun lí chi̍t-ê lâng chhiah-sin lō͘-thé. Lí îm-loān ê ē-sin, liân lí ê îm-hēng kah lí ê îm-loān lóng ē lō͘-hiān.
23:30 Lí ē tú tio̍h hiahê tāichì, in-ūi lí tòe gōa-pang lâng lâi kiâⁿ îm-loān, koh in-ūi lí tùi in hiahê ngó͘-siōng lâi bô chheng-khì.
23:31 Lí ū kiâⁿ lí ê tōa-ché ê lō͘, só͘-í Góa beh kā i ê poe kau tī lí ê chhiú. "
23:32 Chì-koân Siōng-chú ánne kóng: Lí tio̍h lim lí ê tōa-ché só͘ lim ê poe; hit-ê poe chhim koh khoah, té chin chē mi̍h, lí chiū ē hō͘ lâng thí-chhiò, khau-sé.
23:33 Lí ē tōa chiú-chùi, tōa iu-khó͘, lim lín tōa-ché Sa-má-lī-a ê poe, to̍h-sī hō͘ lâng tio̍h-kiaⁿ kah gāng-.khì ê chhi-chhám ê poe.
23:34 Lí ē lim chit-ê poe, lim kàu ta-ta, koh ēng phòa poe ê chhùi phìⁿ koah-li̍h kakī ê leng; in-ūi chit-ê tāichì Góa bat kóng-khí. Che sī chì-koân Siōng-chú kóng ê.
23:35 Só͘-í, chì-koân Siōng-chú ánne kóng, " In-ūi lí bē kì-tit Góa, kā Góa hiat tī lí ê kha-chiah-āu, taⁿ lí tio̍h tam-tng lí ê îm-loān kah lí hòng-chhiòng su-io̍k ê chōe. "
23:36 Siōng-tè Sím-phòaⁿ Nn̄g Chí-mōe
Siōng-chú koh tùi góa kóng, " Jîn-chú, lí kám beh sím-mn̄g A-hô-la̍h kah A-hô-lí-bah? Lí tio̍h chí-chhut in só͘ kiâⁿ khó-ò͘ⁿ ê tāichì.
23:37 In kiâⁿ kan-îm, mā ū hoeh tī i ê chhiú, koh kah ngó͘-siōng kiâⁿ kan-îm, mā hō͘ in tùi Góa só͘ seⁿ ê kiáⁿ keng-kòe hóe, hō͘ in thun-chia̍h.
23:38 Chit-ê í-gōa, in iáu ū tùi Góa ánne kiâⁿ, to̍h-sī kāng hit ji̍t, i kā Góa ê sèng-só͘ òe lahsap, ûi-hoān Góa chiahê An-hioh-ji̍t.
23:39 In thâi kiáⁿ hiàn hō͘ ngó͘-siōng, tng hit ji̍t koh ji̍p-khì Góa ê sèng-só͘, lâi kā i òe lahsap. Lí khòaⁿ, in tī Góa ê chhù lāi ánne kiâⁿ.
23:40 " Jî-chhiáⁿ lín ū chhe sù-chiá khì chhiáⁿ hn̄g-hn̄g ê lâng. Sù-chiá kàu in hia ê sî, lí khòaⁿ, in chiū lâi. Lí ūi tio̍h in sé seng-khu, ōe ba̍k-bâi, ēng chng-sek-phín táⁿ-pān kakī,
23:41 chē tī súi ê bîn-chhn̂g, chhn̂g thâu-chêng chhāi chi̍t tè toh, kā Góa ê phang-liāu, Góa ê phang-iû pâi tī hit téng-bīn.
23:42 Kah i tī hia ê ū kui tīn ê lâng, khùiⁿ-oa̍h hoaⁿ-hí ê siaⁿ, mā ū chho͘-sio̍k lâng kah chiú-hàn tùi khòng-iá chò-hóe lâi, kā chhiú-khoân kòa tī in nn̄g-ê lâng ê chhiú, kā súi bō tì tī in ê thâu-khak.
23:43 " Góa kóng tio̍h chit-ê lāu ê îm-hū ū kóng: Chit-má lâng iáu beh kah i kiâⁿ kan-îm, i mā beh kah lâng kiâⁿ kan-îm.
23:44 Lâng ji̍p-khì kìⁿ i, chhin-chhiūⁿ lâi kìⁿ chhiong-ki; ánne in lâi kìⁿ nn̄g-ê îm-hū — A-hô-la̍h kah A-hô-lí-bah.
23:45 Ē ū gī lâng chiàu sím-phòaⁿ îm-hū ê lē kah lâu lâng ê hoeh ê chabó͘ lâng ê lē lâi sím-phòaⁿ in; in-ūi in sī îm-hū, mā ū hoeh tī i ê chhiú. "
23:46 Chì-koân Siōng-chú ánne kóng, " Góa beh chhōa chin chē lâng lâi kā in kong-kek, hō͘ in hông hiat lâi hiat khì, tú tio̍h chhiúⁿ-toa̍t.
23:47 Hiahê lâng ē ēng chio̍h-thâu kā in tìm-sí, ēng to-kiàm kā in thâi-sí, koh kā in ê kiáⁿ-jî thâi-sí, ēng hóe sio in ê chhù-the̍h.
23:48 Án-ne, Góa beh hō͘ kéng lāi bô koh ū îm-hēng, thang hō͘ só͘-ū ê chabó͘ lâng siū kéng-kài, bô o̍h lín ê îm-hēng.
23:49 Lâng ē chiàu lín ê îm-hēng kā lín pò-èng, lín mā tio̍h tam-tng chiahê pài ngó͘-siōng ê chōe. Lín chiū ē chai Góa sī Siōng-chú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。