以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Ê-lú-sa-lèm ê Hoān-chōe
Siōng-chú ê ōe koh lîm-kàu góa, kóng,
22:2 " Jîn-chú, lí kám ē sím-mn̄g, sím-mn̄g hō͘ lâng lâu hoeh ê siâⁿ? Tio̍h hō͘ i chai i it-chhè khó-ò͘ⁿ ê tāichì.
22:3 Lí tio̍h kóng, chì-koân Siōng-chú ánne kóng: Chit-ê siâⁿ, ū lâu lâng ê hoeh tī hit lāi-bīn, hō͘ i ê ji̍t-chí kàu, koh chng ngó͘-siōng lâi kā kakī òe lahsap, hām-hāi kakī.
22:4 In-ūi lí hō͘ lâng lâu hoeh, chiū ū chōe; lí chng ngó͘-siōng sī kā kakī òe lahsap; lí chiū hō͘ lí ê ji̍t chiap-kīn, lí í-keng kàu lí ê nî-hòe. Só͘-í, Góa hō͘ lí siū lia̍t kok ê lêng-jio̍k, lia̍t pang ê thí-chhiò.
22:5 Lí chit-ê chhàu-miâ chin chē koh jiáu-loān ê siâⁿ, hiahê lī-khui lí kīn, á-.sī lī-khui lí hn̄g ê, lóng ē kā lí thí-chhiò.
22:6 " Lí khòaⁿ, I-su-la-el ê siú-léng ta̍k-ê théng i ê khùi-la̍t, tī lí tiong-kan lâu lâng ê hoeh.
22:7 Tī lí tiong-kan ū bú-bān pē-bú, tī lí tiong-kan ū ap-chè chhut-gōa lâng, tī lí tiong-kan ū ko͘-hū ko͘-jî, kóaⁿ-hū ê.
22:8 Lí khòaⁿ-khin Góa ê sèng-mi̍h, hoān tio̍h Góa ê An-hioh-ji̍t.
22:9 Tī lín tiong-kan ū húi-pòng lâng kah beh hō͘ lâng lâu hoeh ê; tī lín tiong-kan ū tī soaⁿ téng chia̍h chè-mi̍h, tī lín tiong-kan ū kiâⁿ kan-îm.
22:10 Tī lín tiong-kan ū lō͘-hiān lāu-pē ê ē-sin, tī lín tiong-kan ū lêng-jio̍k goe̍h-keng bô chheng-khì ê chabó͘ lâng ê.
22:11 Ū lâng kah chhù-piⁿ ê bó͘ kiâⁿ khó-ò͘ⁿ ê tāichì, mā ū lâng îm i ê sim-pū lâi kā i òe lahsap; tī lín tiong-kan mā ū lâng lêng-jio̍k i ê chí-mōe, to̍h-sī i ê lāu-pē ê chabó͘ kiáⁿ.
22:12 Tī lín tiong-kan ū chiap-siū o͘-se lâi lâu lâng ê hoeh, lí mā ū the̍h lī-sek, thó lī-sek. Lí in-ūi tham-sim, le̍k-sek chhù-piⁿ, tit tio̍h châi-lī, lí kèng-jiân bē kì-tit Góa. Che sī chì-koân Siōng-chú kóng ê.
22:13 " Lí khòaⁿ, Góa in-ūi lí só͘ tit tio̍h put-gī ê chîⁿ kah lí tiong-kan só͘ lâu ê hoeh, Góa chiū phah phok-á.
22:14 Kàu Góa pān lí ê ji̍t, lí ê sim kám iáu ē jím-siū? Lí ê chhiú kám iáu ē ū la̍t? Siōng-chú kóng chit-ê ōe, chiū beh chiàu ánne kiâⁿ.
22:15 Góa beh kā lí hun-sòaⁿ khì tī lia̍t kok, kā lí sì-sòaⁿ tī lia̍t pang. Góa beh tû-khì lí tiong-kan ê ù-òe.
22:16 Lí ē tī lia̍t kok lâng ê bīn-chêng, in-ūi kakī ê só͘ kiâⁿ siū húi-pòng; lí chiū ē chai Góa sī Siōng-chú. "
22:17 Siōng-chú ê Tōa Liān-lô͘
Siōng-chú ê ōe lîm-kàu góa, kóng,
22:18 " Jîn-chú, I-su-la-el ê chú-bîn chāi Góa khòaⁿ sī che-tái. In lóng sī hóe-lô͘ tiong ê tâng, siah, thih, iân, lóng sī gîn ê che-tái.
22:19 Só͘-í, chì-koân Siōng-chú ánne kóng: In-ūi lín lóng chiâⁿ-chò che-tái, lí khòaⁿ, Góa beh tī Ê-lú-sa-lèm ê tiong-kan kā lín chū-chi̍p.
22:20 Lâng án-chóaⁿ kā gîn, tâng, thih, iân kah siah chū-chi̍p tī hóe-lô͘ tiong, khan hóe hō͘ i iûⁿ; ánne, Góa mā beh ēng Góa ê siū-khì kah tōa siū-khì, kā lín chū-chi̍p lâi hē tī hia, lâi kā lín iûⁿ-hòa.
22:21 Góa beh kā lín chū-chi̍p, ēng Góa tōa siū-khì ê hóe pûn lín, lín chiū ē tī hit tiong-kan iûⁿ-hòa.
22:22 Gîn án-chóaⁿ iûⁿ tī hóe-lô͘ tiong, lín mā ē ánne tī hit tiong-kan iûⁿ-.khì, lín chiū ē chai Góa — Siōng-chú piàⁿ-chhut Góa ê tōa siū-khì tī lín ê téng-bīn. "
22:23 I-su-la-el Chèng Thâu-lâng ê Chōe-ok
Siōng-chú ê ōe lîm-kàu góa, kóng,
22:24 " Jîn-chú, lí tio̍h tùi chit-ê tē kóng: Lí sī bē tàng chheng-khì ê tē, tī tōa siū-khì ê ji̍t, mā bô lo̍h hō͘ tī lí hia.
22:25 Lí tiong-kan ê sian-ti lóng kiat-tóng, chhin-chhiūⁿ hm̄-hm̄ háu ê sai jiàu tio̍h só͘ chhiúⁿ ê mi̍h, in thun-chia̍h lâng ê sîn-hûn, chhiúⁿ lâng ê châi-bu̍t, pó-bu̍t, hō͘ in tiong-kan ê kóaⁿ-hū koh khah chē.
22:26 I ê chè-si oai-khiok Góa ê lu̍t-hoat, siat-to̍k Góa ê sèng-só͘, bô hun-pia̍t sèng ê kah chho͘-sio̍k ê, mā bô hō͘ lâng hun-pia̍t chheng-khì ê kah bô chheng-khì ê, koh am ba̍k-chiu m̄-khòaⁿ Góa chiahê An-hioh-ji̍t, Góa mā tī in tiong-kan siū siat-to̍k.
22:27 I ê kùi-cho̍k chhin-chhiūⁿ chhâi-lông jiàu tio̍h só͘ chhiúⁿ ê mi̍h, thâi lâng lâu hoeh, siong-hāi lâng ê sèⁿ-miā, ài tit tio̍h put-gī ê chîⁿ-châi.
22:28 I ê sian-ti chhin-chhiūⁿ ēng hoe-chúi kā in chhéng pe̍h, khòaⁿ hi-ké ê ī-siōng, ēng pe̍h-chha̍t kā in chiam-pok, kóng, ' Chì-koân Siōng-chú ánne kóng', kî-si̍t Siōng-chú bô-iáⁿ ánne kóng.
22:29 Kok lāi ê jîn-bîn it-bī kiâⁿ ap-chè, si̍p-koàn chhiúⁿ lâng; ko͘-hū sànchhiah khùn-khó͘ ê, bô chêng-lí khi-ap chhut-gōa lâng.
22:30 Góa tī in tiong-kan chhōe-khòaⁿ ū chi̍t-ê lâng thang lâi ûi chhiûⁿ, tī Góa ê bīn-chêng ūi tio̍h chit-ê kok khiā tī phòa-khiah ê só͘-chāi, thang hō͘ Góa bô kā i châu-bia̍t tiāu, chóng-.sī, chhōe bô kah chi̍t-ê.
22:31 Só͘-í, Góa kā Góa ê thòng-hūn piàⁿ tī in ê téng-bīn, ēng Góa tōa siū-khì ê hóe kā in bia̍t-bông, chiàu in só͘ kiâⁿ ê lâi pò-èng tī in ê thâu-khak téng. Che sī chì-koân Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。