以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
20:1 Siōng-chú ê Chí-ì, Lâng Bô Sūn-ho̍k
Tē-chhit nî gō͘-goe̍h chhe-cha̍p, ū I-su-la-el ê tiúⁿ-ló kúi-nā-ê lâng lâi beh mn̄g Siōng-chú, chē tī góa ê bīn-chêng.
20:2 Siōng-chú ê ōe lîm-kàu góa, kóng,
20:3 " Jîn-chú, lí tio̍h tùi I-su-la-el ê tiúⁿ-ló kóng, kā i kóng, chì-koân Siōng-chú ánne kóng: Lín lâi kám sī beh mn̄g Góa? Chì-koân Siōng-chú kóng: Góa kí góa ê éng-oán oa̍h-miā lâi chiùchōa, Góa m̄ hō͘ lí mn̄g.
20:4 " Jîn-chú, lí kám ē sím-mn̄g in, kā in sím-mn̄g? Lí tio̍h hō͘ in chai in ê chó͘-sian hiahê khó-ò͘ⁿ ê tāichì,
20:5 tùi in kóng, chì-koân Siōng-chú ánne kóng: Tng Góa kéng I-su-la-el ê ji̍t, ǹg Iâ-kop ke ê kiáⁿ-sun gia̍h-khí Góa ê chhiú, tī Ai-gi̍p tē hō͘ in bat Góa, tùi in gia̍h-khí Góa ê chhiú, kóng: Góa sī Siōng-chú — lín ê Siōng-tè.
20:6 Hit ji̍t, Góa tùi in gia̍h-khí chhiú, beh chhōa in chhut Ai-gi̍p tē, kàu Góa ūi tio̍h in só͘ kóng lâu leng kah bi̍t ê tē; hit-ê tē tī bān-kok tiong sī khah ū êng-kng ê.
20:7 Góa tùi in kóng: Lín ta̍k lâng tio̍h khì-sak ba̍k-chiu só͘ hoaⁿ-hí ê khó-ò͘ⁿ ê tāichì, m̄ thang in-ūi Ai-gi̍p ê ngó͘-siōng kā kakī òe lahsap. Góa sī Siōng-chú — lín ê Siōng-tè.
20:8 " Chóng-.sī, in pōe-ge̍k Góa, m̄-khéng thiaⁿ Góa ê ōe, m̄ pàng-sak in ta̍k lâng ba̍k-chiu só͘ hoaⁿ-hí ê hiahê khó-ò͘ⁿ ê tāichì, m̄ lī-khui Ai-gi̍p ê ngó͘-siōng. Góa chiū kóng, Góa beh kā Góa ê tōa siū-khì piàⁿ tī in ê téng-bīn, tī Ai-gi̍p tē tùi in choân-pō͘ chiâⁿ Góa ê siū-khì.
20:9 To̍k-to̍k Góa ūi tio̍h Góa ê miâ ê iân-kò͘ teh chò tāichì, bián-tit Góa ê miâ tī in só͘ tòa ê lia̍t pang tiong siū siat-to̍k; Góa chhōa in chhut Ai-gi̍p tē, tī lia̍t pang tiong ê ba̍k-chiu chêng hō͘ in bat Góa.
20:10 " Án-ne, Góa chiū hō͘ in chhut Ai-gi̍p tē, chhōa in kàu khòng-iá,
20:11 kā Góa ê lu̍t-lē siúⁿ-sù hō͘ in, kā Góa ê hoat-tō͘ chí-sī in; to̍h-sī lâng nā chiàu ánne kiâⁿ, i chiū ē tùi ánne lâi tit tio̍h oa̍h-miā.
20:12 Jî-chhiáⁿ Góa ēng Góa ê An-hioh-ji̍t siúⁿ-sù hō͘ in, thang tī Góa kah in ê tiong-kan chò chèng-kì, hō͘ in chai Góa — Siōng-chú sī hō͘ in chiâⁿ-chò sèng ê.
20:13 Chóng-.sī, I-su-la-el ê chú-bîn tī khòng-iá pōe-ge̍k Góa, bô sūn-ho̍k Góa ê lu̍t-lē, khì-sak Góa ê hoat-tō͘, ( to̍h-sī lâng nā chiàu ánne kiâⁿ, i chiū ē tùi ánne lâi tit tio̍h oa̍h-miā ), tōa-tōa hoān tio̍h Góa ê An-hioh-ji̍t. " Góa chiū kóng, Góa beh tī khòng-iá kā Góa ê tōa siū-khì piàⁿ tī in ê téng-bīn, kā in bia̍t-bông.
20:14 To̍k-to̍k Góa sī ūi tio̍h Góa ê miâ ê iân-kò͘ teh chò tāichì, bián-tit Góa ê miâ tī lia̍t pang lâng ê ba̍k-chiu chêng siū siat-to̍k, to̍h-sī hiahê ū khòaⁿ tio̍h Góa chhōa in chhut Ai-gi̍p ê lia̍t pang.
20:15 Góa koh tī khòng-iá tùi in gia̍h-khí Góa ê chhiú kóng, Góa bô beh chhōa in ji̍p-khì Góa só͘ siúⁿ-sù hō͘ in lâu leng kah bi̍t ê tē （hit-ê tē tī bān-kok tiong sī khah ū êng-kng ê）;
20:16 in-ūi in thó-ià Góa ê hoat-tō͘, bô sūn-ho̍k Góa ê lu̍t-lē, hoān tio̍h Góa ê An-hioh-ji̍t, in ê sim ì-hiòng in ê ngó͘-siōng.
20:17 " Sûi-jiân ánne, Góa ê ba̍k-chiu iáu koh sī thiàⁿ-sioh in, bô kā in húi-bia̍t, bô tī khòng-iá kā in bia̍t liáu-liáu.
20:18 Góa tī khòng-iá tùi in ê kiáⁿ-jî kóng: M̄-thang chun-thàn lín lāu-pē ê lu̍t-lē, m̄ thang chun-siú in ê hoat-tō͘, mā m̄ thang in-ūi in ê ngó͘-siōng kā kakī phah lâ-sām.
20:19 Góa sī Siōng-chú — lín ê Siōng-tè, lín tio̍h sūn-ho̍k Góa ê lu̍t-lē, siú Góa ê hoat-tō͘, chiàu ánne lâi kiâⁿ,
20:20 koh ēng Góa chiahê An-hioh-ji̍t chò sèng. Chiahê ji̍t tī Góa kah lín ê tiong-kan chò chèng-kì, hō͘ lín chai Góa sī Siōng-chú — lín ê Siōng-tè.
20:21 " To̍k-to̍k in ê kiáⁿ-jî pōe-ge̍k Góa, bô sūn-ho̍k Góa ê lu̍t-lē, mā bô siú Góa ê hoat-tō͘ lâi kiâⁿ, ( Chiū-sī lâng nā chiàu ánne kiâⁿ, i chiū ē tùi ánne lâi tit tio̍h oa̍h-miā ); in hoān tio̍h Góa ê An-hioh-ji̍t. " Góa chiū kóng, Góa beh kā Góa ê tōa siū-khì piàⁿ tī in ê téng-bīn, tī khòng-iá choân-pō͘ chiâⁿ Góa ê siū-khì, lâi kā i kong-kek.
20:22 Sûi-jiân ánne, Góa iáu koh kiu Góa ê chhiú, ūi tio̍h Góa ê miâ ê iân-kò͘ chò tāichì, bián-tit Góa ê miâ tī lia̍t pang lâng ê ba̍k-chiu chêng siū siat-to̍k, to̍h-sī hiahê khòaⁿ tio̍h Góa chhōa in chhut Ai-gi̍p ê lia̍t pang.
20:23 Jî-chhiáⁿ Góa tī khòng-iá tùi in gia̍h-khí Góa ê chhiú, kóng beh kā in hun-sòaⁿ tī lia̍t kok, hō͘ in sì-sòaⁿ tī lia̍t pang.
20:24 In-ūi in bô chun-thàn Góa ê hoat-tō͘, thó-ià Góa ê lu̍t-lē, hoān tio̍h Góa ê An-hioh-ji̍t, ba̍k-chiu ì-hiòng in lāu-pē ê ngó͘-siōng.
20:25 " Jî-chhiáⁿ Góa ēng m̄-hó ê lu̍t-lē kah bē tàng tùi i lâi tit tio̍h oa̍h-miā ê hoat-tō͘ hō͘ in.
20:26 In ēng só͘-ū ê tōa-kiáⁿ keng-kòe hóe; Góa chiū tī in ê chè-sū kā in òe lahsap, hō͘ in hong-hùi, hō͘ in chai Góa sī Siōng-chú.
20:27 " Jîn-chú, lí tio̍h tùi I-su-la-el ê chú-bîn kóng-ōe, kā in kóng chì-koân Siōng-chú ánne kóng: Lín ê chó͘-sian tek-chōe Góa, ēng ánne siat-to̍k Góa;
20:28 in-ūi Góa chhōa in kàu Góa gia̍h-khí chhiú beh siúⁿ-sù hō͘ in ê tē, in khòaⁿ tio̍h ta̍k-ê koân soaⁿ, ta̍k châng bō͘-sēng ê chhiū; chiū tī hia hiàn in hiahê chè-sū, hiàn kek Góa siū-khì ê lé-mi̍h, mā tī hia sio phang-phang ê seng-lé kah koàn-tiān.
20:29 Góa chiū tùi in kóng: Lín só͘ chiūⁿ-khì ê hit-ê koân ūi sī siáⁿ-mi̍h? I ê miâ kiò-chò Ba-mah（ Chù, koân-tē ê ì-sù, Pa-le̍k-su-teng ê tē-miâ, pài ngó͘-siōng ê só͘-chāi. ）, it-ti̍t kàu kin-á-ji̍t.
20:30 Só͘-í, lí tio̍h tùi I-su-la-el ê chú-bîn kóng, chì-koân Siōng-chú ánne kóng: Lín kám iû-goân chiàu lín chó͘-sian só͘ kiâⁿ ê teh kā kakī òe lahsap? Kám iû-goân chun-thàn in khó-ò͘ⁿ ê tāichì teh kiâⁿ kan-îm?
20:31 Lín hiàn lé-mi̍h, hō͘ lín ê kiáⁿ keng-kòe hóe ê sî, kám iû-goân ēng só͘-ū ê ngó͘-siōng kā kakī òe lahsap kàu kin-á-ji̍t? I-su-la-el ê chú-bîn, Góa kám ē hō͘ lín mn̄g? Chì-koân Siōng-chú kóng, Góa kí Góa ê éng-oán oa̍h-miā lâi chiùchōa, Góa it-tēng m̄ hō͘ lí mn̄g.
20:32 " Lín kóng, goán beh chhin-chhiūⁿ gōa-pang lâng, chhin-chhiūⁿ lia̍t kok ê chong-cho̍k, khì ho̍k-sāi chhâ chò ê, chio̍h-thâu chò ê. Lín hoat-khí chit khoán ê sim-ì, choa̍t-tùi bē chiâⁿ. "
20:33 Siōng-tè ê Têng-hoa̍t kah Sià-bián
Chì-koân Siōng-chú kóng, " Góa kí Góa ê éng-oán oa̍h-miā lâi chiùchōa, Góa beh ēng tōa koân-lêng ê chhiú kah chhun-chhut ê chhiú-kut, í-ki̍p piàⁿ-chhut Góa ê tōa siū-khì chò lín ê ông.
20:34 Góa beh ēng tōa koân-lêng ê chhiú kah chhun-chhut ê chhiú-kut, í-ki̍p piàⁿ-chhut ê tōa siū-khì tùi lia̍t kok tiong kā lín chhōa chhut-.khì, mā tùi lín sì-sòaⁿ khì ê hiahê kok kā lín chū-chi̍p.
20:35 Góa beh chhōa lín khì-kàu gōa-pang lâng ê khòng-iá, tī hia tng-bīn kā lín sím-mn̄g.
20:36 Góa án-chóaⁿ tī Ai-gi̍p tē ê khòng-iá sím-mn̄g lín ê chó͘-sian, mā beh ánne lâi kā lín sím-mn̄g. Che sī chì-koân Siōng-chú kóng ê.
20:37 " Góa beh hō͘ lín keng-kòe koái-á ē, mā beh hō͘ lín siū iok ê khu-sok.
20:38 Góa beh tùi lín tiong-kan choân-pō͘ tû-bia̍t hiahê pōe-ge̍k kah tek-chōe Góa ê lâng, chhōa in thoat-chhut in kià-kha ê só͘-chāi, chóng-.sī, in bē tàng ji̍p-khì I-su-la-el tē. Lín chiū ē chai Góa sī Siōng-chú.
20:39 " I-su-la-el ê chú-bîn, kóng tio̍h lín, chì-koân Siōng-chú ánne kóng: Lí khì, ta̍k lâng ho̍k-sāi i ê ngó͘-siōng, m̄ koh āu-lâi it-tēng ē thiaⁿ Góa ê ōe, bô koh ēng lé-mi̍h kah ngó͘-siōng siat-to̍k Góa ê sèng-miâ.
20:40 " Chì-koân Siōng-chú kóng: Tī Góa ê sèng-soaⁿ, to̍h-sī I-su-la-el koân ê soaⁿ, tī hia I-su-la-el choân ke ê chèng lâng ē tī hit-ê só͘-chāi ho̍k-sāi Góa, tī hia Góa beh chiap-la̍p lín, tī hia Góa beh kā lín thó lé-mi̍h kah lín khí-thâu se̍k ê lông-sán-bu̍t, í-ki̍p lín it-chhè ê sèng-mi̍h.
20:41 Góa tùi chiahê jîn-bîn tiong-kan kā lín chhōa chhut-.lâi, tùi lín sì-sòaⁿ khì ê lia̍t kok tiong kā lín chū-chi̍p. Hit sî, Góa beh chiap-la̍p lín chhin-chhiūⁿ phang-hiuⁿ; Góa beh tī lín tit tio̍h hián-bêng chiâⁿ-chò sèng, hō͘ gōa-pang lâng khòaⁿ-.tio̍h.
20:42 Góa chhōa lín ji̍p-khì I-su-la-el tē, to̍h-sī Góa gia̍h-khí Góa ê chhiú, kóng beh siúⁿ-sù hō͘ lín chó͘-sian ê tē, hit sî lín chiū ē chai Góa sī Siōng-chú.
20:43 Tī hia lín ē kì-tit lín ê só͘ kiâⁿ, só͘ chò, to̍h-sī lín tùi hiahê lâi kā lín kakī òe lahsap ê, koh beh in-ūi lín só͘ kiâⁿ it-chhè ê pháiⁿ lâi kakī thó-ià.
20:44 Chì-koân Siōng-chú kóng: I-su-la-el ê chú-bîn, Góa ūi tio̍h Góa ê miâ ê iân-kò͘, bô chiàu lín ê pháiⁿ só͘ kiâⁿ kah lín ê hú-pāi ê só͘ chò kā lín khoán-thāi. Lín chiū ē chai Góa sī Siōng-chú. "
20:45 Lâm-hong ê Tōa-hóe
Siōng-chú ê ōe lîm-kàu góa, kóng,
20:46 " Jîn-chú, lí ê bīn tio̍h ǹg lâm-hong, ǹg lâm-hong piàⁿ-chhut ōe, lâi soan-pò͘ kóng beh kong-kek lâm-hong chhân-iá ê chhiū-nâ.
20:47 Tùi lâm-hong ê chhiū-nâ kóng, tio̍h thiaⁿ Siōng-chú ê ōe. Chì-koân Siōng-chú ánne kóng: Lí khòaⁿ, Góa beh tī lí tiong-kan khí hóe, sio lí tiong-kan it-chhè chheⁿ-chhùi ê chhiū kah ta-.khì ê chhiū, béng-lia̍t ê hóe-iām it-tēng bô sit. Tùi lâm kàu pak, ta̍k bīn lóng siū sio.
20:48 Hoān-nā ū hia̍t-khì ê lóng ē chai khí hóe ê sī Góa — Siōng-chú. "
20:49 Chiū ánne, góa kóng, " Hāiⁿ ah! Chì-koân Siōng-chú ah, lâng lóng gī-lūn góa kóng, i kám m̄-sī teh kóng phì-jū hit-ê? "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。