以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Sian-ti Pān-ián Chò Lān-bîn
Siōng-chú ê ōe koh lîm-kàu góa, kóng,
12:2 " Jîn-chú, lí tòa tī pōe-ge̍k ê chhù lāi. In ū ba̍k-chiu thang khòaⁿ mā m̄-khòaⁿ, ū hīⁿ-khang thang thiaⁿ mā m̄-thiaⁿ, in-ūi in sī pōe-ge̍k ê ke.
12:3 Só͘-í, jîn-chú, lí tio̍h ūi kakī chún-pī siū chhian-sóa su-iàu ēng ê mi̍h-kiāⁿ, tng-thâu pe̍h-ji̍t tī in ê ba̍k-chiu chêng lâi chhian-sóa, koh tio̍h tùi lí ê só͘-chāi tī in ê ba̍k-chiu chêng chhian-sóa kàu pa̍t ūi; in sûi-jiân sī pōe-ge̍k ê ke, kiámchhái chiū ánne ē-hiáu siūⁿ.
12:4 Lí tio̍h tng-thâu pe̍h-ji̍t, tī in ê ba̍k-chiu chêng, tòa lí ê mi̍h-kiāⁿ chhut-.khì, chhin-chhiūⁿ tòa siū chhian-sóa su-iàu ēng ê mi̍h-kiāⁿ. Kàu ê-hng, lí tio̍h tī in ê ba̍k-chiu chêng kakī chhut-.khì, chhin-chhiūⁿ siū lia̍h ê lâng chhut-khì ánne.
12:5 Lí tio̍h tī in ê bīn-chêng, tùi chhiûⁿ-piah iah khang, tùi hit khang tòa mi̍h-kiāⁿ chhut-.khì.
12:6 Kàu ji̍t àm, lí tio̍h tī in ê ba̍k-chiu chêng, phāiⁿ tī keng-kah-thâu chhut-.khì, mā tio̍h tà lí ê bīn, tà kàu bô khòaⁿ tio̍h tē, in-ūi Góa beh ēng lí chò I-su-la-el chú-bîn ê tiāu-thâu. "
12:7 Góa chiū chiàu só͘ hoan-hù ê khì kiâⁿ, tng-thâu pe̍h-ji̍t tòa góa ê mi̍h-kiāⁿ chhut-.khì, chhin-chhiūⁿ tòa siū chhian-sóa su-iàu ēng ê mi̍h-kiāⁿ. Ji̍t beh àm, góa ēng chhiú tùi chhiûⁿ iah khang; ji̍t í-keng àm, chiū tng in ê ba̍k-chiu chêng, phāiⁿ tī keng-kah-thâu tòa chhut-.khì.
12:8 Keh tńg kang chá-khí, Siōng-chú ê ōe lîm-kàu góa, kóng,
12:9 " Jîn-chú, I-su-la-el ê chú-bîn, to̍h-sī pōe-ge̍k ê ke, kám m̄ bat mn̄g lí kóng, ' Lí teh chò siáⁿ-mi̍h? '
12:10 Lí tio̍h ìn in kóng, ' Chì-koân Siōng-chú ánne kóng: Chit-ê khé-sī kóng tio̍h Ê-lú-sa-lèm ê kun-ông, í-ki̍p in tiong-kan I-su-la-el ê choân ke. '
12:11 Lí tio̍h kóng, ' Góa chò lín ê tiāu-thâu, góa án-chóaⁿ kiâⁿ, in só͘ tú-.tio̍h ê mā ē ánne, in ē siū lia̍h, siū chhian-sóa. '
12:12 In tiong-kan ê kun-ông mā ē tī ji̍t àm ê sî, kā mi̍h-kiāⁿ phāiⁿ tī keng-kah-thâu, tòa chhut-.khì. In ē tùi chhiûⁿ iah khang, tùi hit-ê khang tòa mi̍h-kiāⁿ chhut-.khì. I ē khàm i ê bīn, in-ūi ba̍k-chiu bô khòaⁿ tio̍h tē.
12:13 Góa beh tiuⁿ Góa ê lô-bāng tī i ê téng-bīn, i ē hō͘ Góa ê oa̍h-tauh tauh tio̍h. Góa beh hō͘ i khì-kàu Ba-bú-lông, Kal-tí-ah lâng ê tē; i sûi-jiân sí tī hia, mā khòaⁿ bē tio̍h hit-ê tē.
12:14 Sì-kho͘-ûi só͘-ū pó-hō͘ i ê kah i só͘-ū ê kun-tūi, Góa beh kā in sì-sòaⁿ khì tī sì-hng, mā beh poe̍h to jiok in.
12:15 " Góa kā in hun-sòaⁿ khì tī lia̍t pang, kā in sì-sòaⁿ tī lia̍t kok ê sî, in chiū ē chai Góa sī Siōng-chú.
12:16 Chóng-.sī, Góa beh lâu in chi̍t-kóa lâng, thoat-lī to-kiàm, ki-hng, un-e̍k, hō͘ in tī só͘ kàu ê ta̍k kok tiong, kóng-khí in khó-ò͘ⁿ ê tāichì, in chiū ē chai Góa sī Siōng-chú. "
12:17 Sian-ti Ī-giân Kiaⁿ-hiâⁿ La̍k-la̍k chhoah ê Chêng-hóng
Siōng-chú ê ōe koh lîm-kàu góa, kóng,
12:18 " Jîn-chú, lí tio̍h phi̍h-phi̍h chhoah lâi chia̍h lí ê piáⁿ, tio̍h kiaⁿ-hiâⁿ, chún-chat lâi lim lí ê chúi.
12:19 Lí tio̍h tùi chit-ê só͘-chāi ê jîn-bîn kóng: Chì-koân Siōng-chú koan-hē Ê-lú-sa-lèm kah I-su-la-el tē ê jîn-bîn, ánne kóng: In chia̍h piáⁿ tio̍h chún-chat, lim chúi tio̍h kín-sīn, in-ūi in tiong-kan ê chèng lâng só͘ kiâⁿ kiông-pō ê tāichì, chit-ê tē ē hong-hùi, sit-lo̍h i só͘-ū ê.
12:20 Ū lâng tòa ê siâⁿ ē pha-hng, tē mā ē hong-hùi; lín chiū ē chai Góa sī Siōng-chú. "
12:21 Pêng-hoân ê Sio̍k-gí kah Bô Pêng-hoân ê Sìn-sit
Siōng-chú ê ōe koh lîm-kàu góa, kóng,
12:22 " Jîn-chú, tī lín I-su-la-el tē, ná ē ū chit khoán sio̍k-gí kóng, ' Sî-ji̍t iân-chhiân, ī-siōng lóng bô èng-giām '?
12:23 Só͘-í, lí tio̍h kā in kóng, ' Chì-koân Siōng-chú ánne kóng: Góa beh hō͘ chit-ê sio̍k-gí soah-.khì. I-su-la-el tiong bô koh ēng chit-ê chò sio̍k-gí. ' Chóng-.sī, lí tio̍h kā in kóng, ' Sî-ji̍t kīn à, ta̍k-ê ī-siōng ê èng-giām mā sī ánne. '
12:24 " Í-āu tī I-su-la-el ê chú-bîn tiong-kan, it-tēng bô koh ū hi-ké ê ī-siōng kah sūn jîn-ì ê pok-kòa.
12:25 In-ūi Góa to̍h-sī Siōng-chú, Góa beh kóng, jî-chhiáⁿ Góa só͘ kóng ê ōe ē èng-giām, bô koh iân-chhiân. Lín chit-ê pōe-ge̍k ê ke, Góa beh tī lín oa̍h-.leh ê ji̍t lâi kóng, lâi kā i chiâⁿ. Che sī chì-koân Siōng-chú kóng ê. "
12:26 Siōng-chú ê ōe koh lîm-kàu góa, kóng,
12:27 " Jîn-chú, lí khòaⁿ, I-su-la-el ê chú-bîn kóng, ' I só͘ khòaⁿ-.tio̍h ê ī-siōng, sī sio̍k tī chin chē ji̍t í-āu ê tāichì, só͘ kóng ê ī-giân sī teh chí ke̍k-hn̄g ê bī-lâi. '
12:28 Só͘-í, lí tio̍h tùi in kóng, ' Chì-koân Siōng-chú ánne kóng: Góa ê ōe bô chi̍t kù ē koh iân-chhiân, Góa só͘ kóng ê ōe it-tēng ē kā i chiâⁿ. Che sī chì-koân Siōng-chú kóng ê. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。