以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 I-su-la-el ê Chiong-kio̍k Pek-kīn
Siōng-chú ê ōe koh lîm-kàu góa, kóng,
7:2 " Jîn-chú, chì-koân Siōng-chú tùi I-su-la-el tē ánne kóng: Chiong-kio̍k kàu à! Chit-ê tē-sì-kho͘-ûi ê kiat-kio̍k kàu à!
7:3 " Taⁿ lí ê chiong-kio̍k í-keng kàu à, Góa beh hō͘ Góa ê siū-khì lîm-kàu tī lí, mā beh chiàu lí ê só͘ kiâⁿ lâi kā lí sím-phòaⁿ; chiàu lí it-chhè khó-ò͘ⁿ ê tāichì kā lí pò-èng.
7:4 Góa ê ba̍k-chiu bô beh pó-sioh lí, Góa mā bô beh khó-liân lí, sī beh chiàu lí ê só͘ kiâⁿ kā lí pò-èng, lí khó-ò͘ⁿ ê tāichì ē kui tī lí ê tiong-kan. Lín chiū chai Góa sī Siōng-chú.
7:5 " Chì-koân Siōng-chú ánne kóng: Ū chai-hō, hui-siông ê chai-hō; lí khòaⁿ, teh beh kàu à!
7:6 Chiong-kio̍k kàu à! Chiong-kio̍k kàu à! Khí-lâi kong-kek lí; lí khòaⁿ, í-keng kàu à!
7:7 Kéng lāi ê jîn-bîn só͘ tiāⁿ tio̍h ê chai-hō ē lîm-kàu lí; sî-kî kàu à, ji̍t-chí teh beh kàu à, to̍h-sī hōa-hōa jióng, m̄-sī soaⁿ téng hoaⁿ-hí ê siaⁿ ê ji̍t.
7:8 " Góa beh kóaⁿ-kín piàⁿ-chhut Góa ê tōa siū-khì tī lí, koh choân-pō͘ chiâⁿ Góa ê siū-khì tī lí, chiàu lí ê só͘ kiâⁿ lâi kā lí sím-phòaⁿ, chiàu lí it-chhè khó-ò͘ⁿ ê tāichì kā lí pò-èng.
7:9 Góa ê ba̍k-chiu bô beh pó-sioh lí, Góa mā bô beh khó-liân lí, beh chiàu lí ê só͘ kiâⁿ kā lí pò-èng, lí khó-ò͘ⁿ ê tāichì ē kui tī lí ê tiong-kan. Lín to̍h ē chai kā lín phah ê sī Góa — Siōng-chú.
7:10 " Lí khòaⁿ, lí khòaⁿ, ji̍t-chí í-keng kàu à; só͘ tiāⁿ tio̍h ê chai-hō í-keng hoat-chhut. Koái-á í-keng khui hoe, kiau-ngō͘ í-keng puh-gê.
7:11 Kiông-pō heng-khí, chiâⁿ-chò hêng-hoa̍t pháiⁿ ê koái-á. In sí-.khì, in ê kûn-chiòng mā sí-.khì, in ê châi-pó mā bô-.khì, in tiong-kan bô lâng tit tio̍h chun-kùi.
7:12 " Sî-kî kàu à, ji̍t-chí teh beh kàu; bé ê lâng m̄ thang hoaⁿ-hí, bē ê lâng m̄ thang hoân-ló, in-ūi tōa siū-khì í-keng lîm-kàu tī in chèng lâng.
7:13 Bē ê in sûi-jiân iáu oa̍h-.leh, mā bē tàng tò-tńg kàu i só͘ bē ê, in-ūi chit-ê ī-siōng kóng tio̍h in chèng lâng, lóng bē tàng tò tńg-.lâi, mā bô lâng ē tùi i ê pháiⁿ só͘ kiâⁿ lâi kian-kò͘ i ê oa̍h-miā. "
7:14 Hêng-hoa̍t I-su-la-el ê Chōe-ok
" In í-keng pûn sàu-kak, chún-pī chê-choân; chóng-.sī, bô lâng chhut-khì kau-chiàn, in-ūi Góa ê tōa siū-khì lîm-kàu in chèng lâng.
7:15 Tī gōa-bīn ū to-kiàm, tī lāi-bīn ū un-e̍k, ū ki-hng; tī chhân-iá ê ē tùi to-kiàm lâi sí, ki-hng kah un-e̍k ē thun-bia̍t tī siâⁿ lāi ê.
7:16 Kî-tiong ē-tàng thoat-lī ê to̍h ē thoat-lī, ta̍k lâng in-ūi i ê chōe-kò, tī soaⁿ-.ni̍h chhut pi-ai ê siaⁿ, chhin-chhiūⁿ soaⁿ-kok tiong ê pan-kah.
7:17 Chhiú lóng sng, kha-thâu-u nńg kah chhin-chhiūⁿ chúi.
7:18 In ē ēng môa-pò͘ hâ io, kiaⁿ-hiâⁿ ē kā i jia-khàm, ta̍k lâng bīn kiàn-siàu, thâu-khak bô pòaⁿ-ki mn̂g.
7:19 In ē kā in ê gîn hiat tī ke-lō͘, kā kim khòaⁿ-chò ná chhin-chhiūⁿ ù-òe ê mi̍h. Tng Siōng-chú siū-khì ê ji̍t, in ê kim-gîn bē tàng kiù in, bē tàng hō͘ in ê sim boán-chiok, mā bē tàng hō͘ in ê pak-tó͘ pá, in-ūi che hō͘ in poa̍h-tó tī chōe-ok tiong.
7:20 Kóng tio̍h Siōng-chú kā tiān táⁿ-pān ê súi, sī I hō͘ i tit tio̍h ui-hong; in chiū kā i chng thang oàn-hūn ê mi̍h, thang thó-ià ê ngó͘-siōng, só͘-í Góa hō͘ in khòaⁿ-chò ná chhin-chhiūⁿ ù-òe ê mi̍h.
7:21 Góa beh kā i kau tī gōa-pang lâng ê chhiú, chò in só͘ chhiúⁿ ê mi̍h; kau hō͘ tē-chiūⁿ ê pháiⁿ lâng, chò in ê chha̍t-á hòe; in mā ē kā i òe lahsap.
7:22 Góa beh oa̍t-tńg Góa ê bīn bô koh khòaⁿ in, in ē kā Góa ki-bi̍t ê só͘-chāi òe lahsap, kiông-béng ê chha̍t mā ē ji̍p-khì òe lahsap.
7:23 " Tio̍h chō thih-liān, in-ūi chit só͘-chāi móa-móa sī lâu hoeh ê chōe, siâⁿ lāi chhiong-móa kiông-pō ê tāichì.
7:24 Góa beh hō͘ gōa-pang siōng pháiⁿ ê lâi pà-chiàm in ê chhù-the̍h; Góa beh hō͘ kiông-pō ê lâng ê kiau-ngō͘ soah-.khì, in ê sèng-só͘ siū òe lahsap.
7:25 Húi-bia̍t teh beh kàu, in beh kiû pêng-an, mā bē tàng kiû.
7:26 Ē ū chai-hō ke-thiⁿ chai-hō, hong-siaⁿ sòa-chiap hong-siaⁿ; in beh tùi sian-ti kiû ī-siōng, chóng-.sī, chè-si ê lu̍t-hoat kah tiúⁿ-ló ê kè-ōe lóng ē toān-choa̍t.
7:27 Kok-ông ē pi-ai, ông-chhin ē hi-bî, jîn-bîn ê chhiú phi̍h-phi̍h chhoah. Góa beh chiàu in ê só͘ kiâⁿ lâi kā in khoán-thāi, chiàu in eng-kai siū ê sím-phòaⁿ lâi kā in sím-phòaⁿ. In chiū chai Góa sī Siōng-chú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。