以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 I-che-kel Thì Thâu-mn̂g kah Chhùi-chhiu
" Jîn-chú, lí tio̍h gia̍h chi̍t ki lāi-kiàm, chò lí ê thì thâu to, lâi thì lí ê thâu-mn̂g kah lí ê chhùi-chhiu, jiân-āu ēng lî-téng lâi téng i ê tāng-khin, lâi kā i hun-khui.
5:2 Ûi-khùn siâⁿ ê ji̍t-kî móa liáu-āu, lí tio̍h kā saⁿ-hūn chi-it tī siâⁿ lāi ēng hóe sio; kā saⁿ-hūn chi-it tī siâⁿ ê sì-kho͘-ûi ēng to phah-chhùi; kā saⁿ-hūn chi-it iā hō͘ hong chhoe-sòaⁿ-.khì; Góa mā beh poe̍h to lâi jiok in.
5:3 Lí tio̍h tùi hit tiong-kan the̍h kúi ki-á, lâi pa̍k tī lí ê saⁿ-á-ki.
5:4 Koh tùi hit tiong-kan the̍h tām-po̍h-á, hiat tī hóe tiong ēng hóe sio; tùi hia ē ū hóe chhut-.lâi, kàu tī I-su-la-el choân ke.
5:5 " Chì-koân Siōng-chú ánne kóng: Che sī Ê-lú-sa-lèm. Góa beh kā i an-tì tī lia̍t pang tiong, lia̍t kok ē tī i ê sì-kho͘-ûi.
5:6 I kiâⁿ pháiⁿ, ûi-pōe Góa ê hoat-tō͘ pí lia̍t pang khah siong-tiōng; ûi-hoān Góa ê lu̍t-lē pí sì-kho͘-ûi ê lia̍t kok khah chhám, in-ūi i khì-sak Góa ê hoat-tō͘, Góa ê lu̍t-lē in mā bô teh chun-siú.
5:7 Só͘-í, chì-koân Siōng-chú ánne kóng: In-ūi lín ê jiáu-loān pí lín sì-kho͘-ûi ê lia̍t kok khah siong-tiōng, bô chun-siú Góa ê lu̍t-lē, bô chip-siú Góa ê hoat-tō͘, mā m̄ chun-siú lín sì-kho͘-ûi lia̍t kok ê hoat-tō͘.
5:8 Só͘-í, chì-koân Siōng-chú ánne kóng: Lí khòaⁿ, Góa beh kong-kek lí, Góa beh tī lín tiong-kan kā lín sím-phòaⁿ, hō͘ lia̍t kok chhin-ba̍k khòaⁿ-.tio̍h.
5:9 Koh in-ūi it-chhè khó-ò͘ⁿ ê tāichì, Góa beh tī lí ê tiong-kan kiâⁿ Góa só͘ m̄ bat kiâⁿ ê, í-āu mā bô koh ánne kiâⁿ ê.
5:10 In-ūi ánne, tī lí ê tiong-kan, lāu-pē ē thâi kiáⁿ lâi chia̍h, kiáⁿ mā ē thâi lāu-pē lâi chia̍h. Góa beh tī lín tiong-kan kā lín sím-phòaⁿ, Góa beh kā lí só͘ chhun lo̍h-.lâi ê jîn-bîn lóng kā in sì-sòaⁿ tī sì-hng.
5:11 " In-ūi ánne, chì-koân Siōng-chú kóng: Góa kí Góa ê éng-oán oa̍h-miā lâi chiùchōa, ūi tio̍h lí ēng it-chhè khó-ò͘ⁿ ê mi̍h, thang thó-ià ê tāichì, òe lahsap Góa ê sèng-só͘, Góa mā beh kiám-chió lí ê lâng-gia̍h; Góa ê ba̍k-chiu bô beh thiàⁿ-sioh lí, Góa mā bô beh liân-bín lí.
5:12 Lí ê jîn-bîn saⁿ-hūn chi-it ē tùi un-e̍k lâi sí, mā ē tùi ki-hng lâi siau-bia̍t tī lín tiong-kan; saⁿ-hūn chi-it ē tī lí ê sì-kho͘-ûi tó tī to hā; saⁿ-hūn chi-it Góa beh hō͘ in sì-sòaⁿ in tī hiahê hong （ Chù, ū ê pán-pún e̍k-chò " Sì-hng "）, mā beh poe̍h to jiok in.
5:13 " Chhin-chhiūⁿ ánne, Góa ê siū-khì tit tio̍h chiâⁿ, Góa tùi in tōa siū-khì ê ē soah, Góa chiū siū an-ùi. Jî-chhiáⁿ Góa tùi in tōa siū-khì ê í-keng chiâⁿ, in chiū thang chai Góa — Siōng-chú sī jia̍t-sim lâi kóng ê.
5:14 Góa beh hō͘ lí tī lí sì-kho͘-ûi ê lia̍t pang tiong chò hi-bî, chò lêng-jio̍k, hō͘ keng-kòe ê lâng chhin-ba̍k khòaⁿ-.tio̍h.
5:15 Án-ne, Góa beh ēng siū-khì kah tōa siū-khì, í-ki̍p giâm-giâm ê chek-pī, tī lí ê tiong-kan kā lí sím-phòaⁿ. Hit sî, lí chiū ē tī sì-kho͘-ûi ê lia̍t pang tiong, chiâⁿ-chò thang lêng-jio̍k, thang khau-sé, thang kàm-kài, thang tio̍h-kiaⁿ kah gāng-.khì ê. Che sī Siōng-chú kóng ê.
5:16 Hit sî, Góa beh ēng ē châu-bia̍t lâng ê ki-hng ê pháiⁿ chìⁿ kā in siā, to̍h-sī Góa só͘ siā lâi kā lín châu-bia̍t ê; Góa mā beh ke-thiⁿ lín ê ki-hng, toān-choa̍t lín só͘ óa-khò ê bí;
5:17 Góa koh beh hō͘ ki-hng kah ok-siù lîm-kàu tī lín hia, in ē hō͘ lín ê kiáⁿ sí liáu-liáu; jî-chhiáⁿ un-e̍k kah thâi lâng ê tāichì mā ē tī lín hia liû-hêng; Góa mā beh hō͘ to-kiàm lîm-kàu lín. Che sī Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。