以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Siōng-tè ê Pó-chō
Tng saⁿ-cha̍p nî sì-goe̍h chhe gō͘, góa tī Ke-bal ê hô piⁿ hiahê siū lia̍h ê lâng tiong-kan; hit sî thiⁿ khui, góa khòaⁿ tio̍h Siōng-tè ê ī-siōng.
1:2 Tī hit goe̍h ê chhe gō͘, to̍h-sī E-hō͘-iá-kin ông siū lia̍h ê tē-gō͘ nî,
1:3 tī Kal-tí-ah lâng ê tē, Ke-bal ê hô piⁿ, Siōng-chú ê ōe thiau-tî lîm-kàu Bu-chih ê kiáⁿ — chè-si I-che-kel; tī hia Siōng-chú ê chhiú hē tī i ê sin chiūⁿ.
1:4 Góa khòaⁿ-.tio̍h, lí khòaⁿ, ū kông hong tùi pak-hong lâi, ū tōa phiàn hûn, ū iām-iām sih ê hóe, i ê sì-kho͘-ûi ū kng, tùi hit tiong-kan ê hóe lāi hoat-chhut chhin-chhiūⁿ hó͘-phek ê sek-tì.
1:5 Koh tùi hit tiong-kan chhut-hiān sì chiah oa̍h-mi̍h ê hêng-siōng. In ê khoán-sit sī ánne: ū lâng ê hêng-siōng,
1:6 ta̍k-ê ū sì-ê bīn, ta̍k-ê ū sì ki si̍t.
1:7 In ê kha sī ti̍t-ti̍t, kha-jiah té kah ná chhin-chhiūⁿ gû-á ê kha-tê, lóng chhàn-lān chhin-chhiūⁿ bôa-kng ê tâng ê chha̍k-ba̍k.
1:8 Tī in sì-bīn ê si̍t-ē koh ū lâng ê chhiú, chit sì chiah oa̍h-mi̍h ê bīn kah si̍t to̍h-sī ánne:
1:9 In ê si̍t lóng sio liân-chiap, kiâⁿ ê sî, seng-khu m̄-bián oa̍t, lóng ti̍t-ti̍t chìn-chêng-.khì.
1:10 Kóng tio̍h in ê bīn ê hêng-siōng, in ū lâng ê bīn, in sì-ê tī chiàⁿ pêng ū sai ê bīn, in sì-ê tī tò pêng ū gû ê bīn, in sì-ê mā ū eng-chiáu ê bīn.
1:11 In ê bīn sī ánne: in ê si̍t tùi téng-bīn thí-khui, chit-ê kah hit-ê nn̄g ki si̍t sio-liân, koh ū nn̄g ki si̍t khàm seng-khu.
1:12 In ta̍k-ê ti̍t-ti̍t kiâⁿ chìn-chêng; sîn-lêng beh khì tó-ūi, in chiū khì hia; kiâⁿ ê sî, seng-khu m̄-bián oa̍t.
1:13 Kóng tio̍h oa̍h-mi̍h ê khoán-sit, in ê hêng-siōng chhin-chhiūⁿ teh to̍h ê hóe-thòaⁿ, koh chhin-chhiūⁿ hóe-pé ê hêng-siōng, tī oa̍h-mi̍h ê tiong-kan khí-khí lo̍h-lo̍h; hóe chin kng, tùi hóe tiong ū hoat-chhut sihnà.
1:14 Hiahê oa̍h-mi̍h cháu-lâi cháu-khì, chhin-chhiūⁿ sihnà teh sih.
1:15 Góa teh khòaⁿ oa̍h-mi̍h ê sî, lí khòaⁿ, ū chhia-lián tī tē-chiūⁿ, tī oa̍h-mi̍h ê piⁿ-á, sì-bīn kok ū chi̍t-ê.
1:16 Chhia-lián kah in ê chò-hoat ê khoán-sit chhin-chhiūⁿ n̂g-ge̍k ê sek-tì; sì-ê lián ê hêng-siōng siâng chi̍t-khoán, in ê khoán-sit kah chò-hoat sī chhin-chhiūⁿ lián tiong ū lián.
1:17 Lián kiâⁿ ê sî, sì-bīn lóng ē kiâⁿ-.tit, kiâⁿ ê sî m̄-bián tńg-oa̍t.
1:18 Kóng tio̍h chhia-lián ê khoân sī koân kah chin kiaⁿ-lâng; sì-ê lián ê khoân ū ba̍k-chiu móa-móa.
1:19 Oa̍h-mi̍h kiâⁿ ê sî, lián mā tī in ê sin piⁿ teh kiâⁿ; oa̍h-mi̍h kí-khí lī-khui tē ê sî, lián mā kí-khí.
1:20 Sîn-lêng só͘ beh khì ê só͘-chāi, in mā khì; sîn-lêng nā khì tī hia, lián mā tī in ê sin piⁿ kí-khí, in-ūi oa̍h-mi̍h ê sîn-lêng tī lián ê lāi-bīn.
1:21 Hiahê nā kiâⁿ, chiahê mā kiâⁿ; hiahê nā thêng, chiahê mā thêng; hiahê nā kí-khí lī-khui tē ê sî, lián mā tī in ê sin piⁿ kí-khí, in-ūi oa̍h-mi̍h ê sîn-lêng tī lián ê lāi-bīn.
1:22 Oa̍h-mi̍h ê thâu-khak téng-bīn ū kiong-chhong ê hêng-siōng, khòaⁿ khí-.lâi ná chhin-chhiūⁿ thang kiaⁿ ê chúi-chiⁿ sek-tì, pho͘ tī in ê thâu-khak ê téng-bīn.
1:23 Tī kiong-chhong ê ē-bīn, in ê si̍t thí ti̍t-ti̍t, tāi-ke sio-tùi, koh ū nn̄g ki si̍t khàm i ê seng-khu chit pêng, mā koh ū nn̄g ki si̍t khàm i ê seng-khu hit pêng.
1:24 In kiâⁿ ê sî, góa thiaⁿ tio̍h in ê si̍t ê siaⁿ, chhin-chhiūⁿ tōa hái ê siaⁿ, chhin-chhiūⁿ Choân-lêng-.ê ê siaⁿ, ū hōa-hōa jióng ê siaⁿ, chhin-chhiūⁿ kun-tūi ê siaⁿ. In thêng ê sî, si̍t chiū pàng lo̍h-.lâi.
1:25 Tī in thâu-khak téng kiong-chhong ê téng-bīn ū siaⁿ. In thêng ê sî, si̍t chiū pàng lo̍h-.lâi.
1:26 Tī in thâu-khak téng ê kiong-chhong téng-bīn ū pó-chō ê hêng-siōng, chhin-chhiūⁿ nâ-sek ê pó-chio̍h; tī pó-chō hêng-siōng ê téng-bīn ū hêng-siōng chhin-chhiūⁿ lâng ê khoán-sit.
1:27 Góa khòaⁿ tio̍h tùi i ê io ê hêng-siōng téng-bīn ū hó͘-phek ê sek-tì, tī i ê lāi-bīn sì-kho͘-ûi ū hóe ê hêng-siōng, mā khòaⁿ tio̍h tùi i ê io ê hêng-siōng ê ē-bīn, ū chhin-chhiūⁿ hóe ê hêng-siōng, i ê chiu-ûi chin kng.
1:28 Tī lo̍h hō͘ ê ji̍t, hûn tiong khēng ê hêng-siōng án-chóaⁿ, sì-kho͘-ûi ê kng ê hêng-siōng mā sī ánne. Góa chi̍t-ē khòaⁿ-.tio̍h, chiū phak tī thô͘-kha, koh thiaⁿ tio̍h chi̍t-ê lâng kóng-ōe ê siaⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。