耶利米哀歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Hām-lo̍h Liáu-āu ê Ê-lú-sa-lèm
Ai-ah, n̂g-kim thè-kng! Sûn-kim piàn-sek! Sèng-só͘ ê chio̍h hông hiat tī ta̍k tiâu ke-lō͘ kháu.
4:2 Si-óng pó-kùi ê chèng kiáⁿ thang pí-phēng sûn-kim, chitmá ná ē hông khòaⁿ-chò sio-hûi lâng só͘ chò ê hûi-khì?
4:3 Iá-káu siōng-chhiáⁿ ēng leng-thâu hō͘ i ê kiáⁿ suh; góa ê jîn-bîn ê chabó͘ lâng tian-tò piàn-chò chân-jím, chhin-chhiūⁿ khòng-iá ê tô-chiáu.
4:4 Chia̍h leng ê eⁿ-á, i ê chi̍h ta-sò, liâm tī téng-hâm; gín'á thó piáⁿ, bô lâng peh hō͘ i.
4:5 Pêng-siông sî chia̍h hó mi̍h ê, taⁿ tī ke-lō͘ bô i-óa; pêng-siông sî khùn tī chu-âng jio̍k-á, taⁿ tó tī pùn-sò-tui.
4:6 Góa ê jîn-bîn ê chabó͘ kiáⁿ ê chōe-kò, pí So͘-tóm ê chōe-ok khah tāng; i chi̍t-ba̍k-nih kú chiū tó-hoāi, m̄-sī lâng ê chhiú hō͘ i ánne.
4:7 Si-óng ê sè-ka pêng-sî pí seh khah chheng-khì, pí leng khah pe̍h, in ê seng-khu pí âng-pó-ge̍k khah âng, chhin-chhiūⁿ nâ-pó-chio̍h ê kng-ku̍t.
4:8 Taⁿ in ê bīn pí hóe-thòaⁿ khah o͘, tī ke-lō͘-.ni̍h bô lâng ē jīn-.tit; in chi̍t chân phôe peⁿ chi̍t chân kut, ta khì chhin-chhiūⁿ chi̍t ki ta chhâ.
4:9 Hō͘ to thâi-sí ê pí gō-.sí ê khah hó, in-ūi sī khiàm-khoeh chhân-hn̂g ê lông-sán-bu̍t, chiām-chiām gō-.sí, chhin-chhiūⁿ chhì-chha̍k thàng-kòe.
4:10 Chû-sim ê chabó͘ lâng tio̍h chhin-chhiú chú i ê kiáⁿ, góa ê jîn-bîn ê chabó͘ kiáⁿ tú tio̍h húi-bia̍t ê sî, ēng chit-ê chò bí-niûⁿ.
4:11 Siōng-chú hoat-chhut I choân-pō͘ ê siū-khì, piàⁿ-chhut I ê tōa siū-khì; khí hóe tī Si-óng, sio i hiahê tē-ki.
4:12 Tē chiūⁿ ê kun-ông kah tòa tī sè-kan ê jîn-bîn, lóng m̄-sìn tùi-te̍k kah siû-te̍k ē chhim-ji̍p Ê-lú-sa-lèm ê siâⁿ mn̂g.
4:13 Che sī in-ūi i ê sian-ti ê chōe-ok, i ê chè-si ê kòe-sit; in tī siâⁿ lāi lâu lâng ê hoeh.
4:14 In tī ke-lō͘ chhin-chhiūⁿ chheⁿmê-.ê loān-loān kiâⁿ, koh hō͘ hoeh bak kah bô chheng-khì, tì-kàu lâng m̄-káⁿ bong in ê saⁿ.
4:15 Lâng kā in hoah kóng: Bô chheng-khì ê, siám-khui! Siám-khui! Siám-khui! M̄-thang bong! In tô-cháu sì-kè liû-lōng ê sî, lia̍t pang tiong ê lâng kóng, M̄-thang hō͘ i iáu koh kià-kha tī chia.
4:16 Siōng-chú siū-khì kā in kóaⁿ： Βô koh kā in chiàu-kò͘; lâng bô chun-tiōng chè-si, mā bô chun-kèng tiúⁿ-ló.
4:17 Goán iáu teh ǹg-bāng pang-chān, tì-sú ba̍k-chiu hoe, iû-goân sī khang-khang; goán tī liâu-bāng ê só͘-chāi, liâu-bāng chi̍t-ê bē tàng kiù lâng ê kok.
4:18 In chhin-chhiūⁿ phah-la̍h ê teh jiok goán ê kha-pō͘, tì-sú goán m̄-káⁿ kiâⁿ tī goán ê ke-lō͘. Goán ê chiong-kio̍k teh beh kàu, goán ê ji̍t-chí í-keng móa à; in-ūi goán ê chiong-kio̍k kàu à.
4:19 Jiok goán ê pí khong-tiong ê eng-chiáu khah kín; in tī soaⁿ-.ni̍h jiok goán, tī khòng-iá bâi-ho̍k tng-tán goán.
4:20 Siōng-chú só͘ boah iû ê, thang pí-phēng goán phīⁿ-khang lāi ê khùi, tī in ê hām-kheⁿ lāi hō͘ lâng lia̍h-.tio̍h; kóng tio̍h i, goán bat kóng: Goán beh tī i ê tì-ìm ē, oa̍h tī lia̍t kok tiong.
4:21 Tòa tī U-chuh tē E-tóm ê chabó͘ kiáⁿ, chò lí hoaⁿ-hí khoài-lo̍k; chóng-.sī, khó͘-poe mā beh phâng kàu lí hia; lí ē lim kàu chùi, kakī thǹg kng-kng.
4:22 Si-óng ê chabó͘ kiáⁿ, lí ê chōe-kò ê hêng-hoa̍t í-keng chīn à. Siōng-chú it-tēng bô hō͘ lí koh siū lia̍h; E-tóm ê chabó͘ kiáⁿ, I beh pān lí ê chōe-kò; I beh hián-bêng lí ê chōe-ok.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。