出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 I-su-la-el Lâng tī Si-nái Soaⁿ
I-su-la-el lâng chhut Ai-gi̍p tē liáu-āu, tē-saⁿ kò-goe̍h tútú hit ji̍t, in chiū lâi-kàu Si-nái ê khòng-iá.
19:2 In lī-khui Le-hui-tim, lâi-kàu Si-nái ê khòng-iá, chiū tī khòng-iá chat iâⁿ, I-su-la-el lâng chiū tī hit-ê soaⁿ ê thâu-chêng chat iâⁿ.
19:3 Mô͘-se chiūⁿ-kàu Siōng-tè hia, Siōng-chú tùi soaⁿ-.ni̍h kiò i kóng, " Lí tio̍h ánne kā Iâ-kop ke kóng, thong-ti hō͘ I-su-la-el lâng chai,
19:4 ' Góa tùi Ai-gi̍p lâng só͘ kiâⁿ ê tāichì, lín lóng ū khòaⁿ-.tio̍h, koh ū khòaⁿ tio̍h Góa án-chóaⁿ chhin-chhiūⁿ eng-chiáu ê si̍t phāiⁿ lín, chhōa lín lâi kui tī Góa.
19:5 Taⁿ lín nā si̍t-chāi chun-thàn Góa ê ōe, chun-siú Góa ê iok, lín chiū ē tī lia̍t kok tiong chò Góa kakī ê pó-pòe, in-ūi choân tē lóng sī Góa ê.
19:6 Lín ē kui tī Góa, chò chè-si ê kok, chò sèng-kiat ê chú-bîn. ' Lí tio̍h kā I-su-la-el lâng kóng chiahê ōe. "
19:7 Mô͘-se chio-chi̍p jîn-bîn tiong-kan ê tiúⁿ-ló, kā Siōng-chú só͘ hoan-hù i ê ōe, lóng pâi-lia̍t tī in ê bīn-chêng.
19:8 Jîn-bîn lóng chê-siaⁿ ìn kóng, " Kiàn-nā Siōng-chú só͘ kóng ê, goán lóng beh chun-thàn. " Mô͘-se chiū kā jîn-bîn ê ōe hôe-hok Siōng-chú.
19:9 Siōng-chú kā Mô͘-se kóng, " Lí khòaⁿ, Góa beh tī ba̍t hûn ê tiong-kan lîm-kàu lí, hō͘ jîn-bîn thiaⁿ tio̍h Góa kah lí teh kóng ōe, thang hō͘ in éng-oán siong-sìn lí. " Mô͘-se chiū kā jîn-bîn ê ōe tùi Siōng-chú kóng.
19:10 Siōng-chú koh kā Mô͘-se kóng, " Lí khì jîn-bîn hia, kin-á-ji̍t, bîn-á-chài kā in hun-pia̍t chò sèng, in mā tio̍h sé saⁿ.
19:11 Tio̍h chún-pī piān khì hù tē-saⁿ ji̍t, in-ūi tē-saⁿ ji̍t Siōng-chú beh tī chèng lâng ê bīn-chêng kàng-lîm tī Si-nái soaⁿ.
19:12 Lí tio̍h tī soaⁿ ê sì-kho͘-ûi kā jîn-bîn siat kài-hān, kóng, ' Lín tio̍h kín-sīn, m̄ thang chiūⁿ soaⁿ, mā m̄ thang bong i ê kau-kài; kiàn-nā bong chit-ê soaⁿ ê, it-tēng tio̍h hō͘ i sí.
19:13 M̄-thang ēng chhiú kā i bong, tio̍h ēng chio̍h-thâu kā i tìm, á-.sī ēng chìⁿ kā i siā; bô-lūn sī lâng á-.sī chengseⁿ khì bong tio̍h lóng bē oa̍h. Kàu sàu-kak ê siaⁿ thoa tn̂g ê sî, in tio̍h lâi soaⁿ-kha. '"
19:14 Mô͘-se lo̍h soaⁿ khì-kàu jîn-bîn hia, kā in hun-pia̍t chò sèng, in chiū kakī sé saⁿ.
19:15 Mô͘-se tùi jîn-bîn kóng, " Lín tio̍h chún-pī piān thang hù tē-saⁿ ji̍t, m̄ thang chhin-kīn chabó͘ lâng. "
19:16 Kàu tē-saⁿ ji̍t thiⁿ-kng chá-khí, tī soaⁿ téng ū lûi tân, ū sihnà kah ba̍t hûn, sàu-kak ê siaⁿ koh chin tōa, iâⁿ lāi ê jîn-bîn lóng phi̍h-phi̍h chhoah.
19:17 Mô͘-se chhōa jîn-bîn chhut iâⁿ-pâng khì gêng-chiap Siōng-tè, in lóng khiā tī soaⁿ-kha.
19:18 Thong Si-nái soaⁿ lóng sī hóe-ian, in-ūi Siōng-chú tī hóe tiong kàng-lîm tī soaⁿ téng, soaⁿ ê hóe-ian chhèng koân, chhin-chhiūⁿ hûi-iô ê ian, kui-ê soaⁿ tōa tín-tāng.
19:19 Sàu-kak ê siaⁿ ná tân ná tōa, Mô͘-se kóng-ōe, Siōng-tè chhut siaⁿ kā i ìn.
19:20 Siōng-chú kàng-lîm tī Si-nái soaⁿ, tī soaⁿ-bóe-liu, Siōng-chú tiàu Mô͘-se chiūⁿ soaⁿ-bóe-liu, Mô͘-se chiū chiūⁿ-.khì.
19:21 Siōng-chú tùi Mô͘-se kóng, " Lí lo̍h-khì kìm-kài jîn-bîn, khióng-kiaⁿ in chông kòe-kài, kàu Siōng-chú chia lâi khòaⁿ, tì-sú in chin chē lâng ē sí;
19:22 Liân chhin-kīn Siōng-chú ê chè-si, mā tio̍h kakī hun-pia̍t chò sèng, khióng-kiaⁿ Siōng-chú hut-jiân chhut-lâi kā in phah. "
19:23 Mô͘-se tùi Siōng-chú kóng, " Jîn-bîn bē tàng chiūⁿ Si-nái soaⁿ, in-ūi Lí í-keng kìm-kài goán kóng, tio̍h tī soaⁿ ê sì-kho͘-ûi siat kài-hān, kā i hun-pia̍t chò sèng. '"
19:24 Siōng-chú kā i kóng, " Lí khì, lo̍h-.khì, lí tio̍h kah A-lông khí-.lâi; to̍k-to̍k chè-si kah jîn-bîn m̄ thang chông kòe-kài lâi-kàu Siōng-chú ê bīn-chêng, khióng-kiaⁿ I hut-jiân chhut-lâi kā in phah. "
19:25 Mô͘-se chiū lo̍h-.khì, khì-kàu jîn-bîn hia, kā in kóng,
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。