創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Tōa chúi Siau-thè
Siōng-tè ē kì-tit Nó͘-ah kah it-chhè ê oa̍h-mi̍h, í-ki̍p kah i tī tōa chûn lāi it-chhè ê chengseⁿ. Siōng-chú hō͘ hong chhoe tē, chúi chiū chiām-chiām siau-sit.
8:2 Chhim-ian ê chúi-goân kah thiⁿ ê khang-khiah lóng koaiⁿ-ba̍t, thiⁿ-téng ê hō͘ mā soah.
8:3 Chúi tùi tē-chiūⁿ ti̍t-ti̍t thè, chi̍t-pah gō͘-cha̍p kang āu, chúi chiū chiām-chiām siau-thè.
8:4 Chhit goe̍h cha̍p-chhit, chûn khòa tī A-la̍h-la̍t ê soaⁿ.
8:5 Chúi koh chiām-chiām siau-thè, it-ti̍t kàu cha̍p-goe̍h chhe-it, soaⁿ-thâu chiah lō͘-hiān.
8:6 Kòe sì-cha̍p kang, nó͘-ah khui i só͘ chò tōa chûn ê thang-á.
8:7 Pàng chi̍t chiah o͘-a chhut-.khì. O͘-a poe-lâi poe khì, it-ti̍t kàu tē-chiūⁿ ê chúi ta-.khì.
8:8 I koh pàng chi̍t chiah hún-chiáu chhut-.khì, beh khòaⁿ chúi tùi tē-chiūⁿ thè-khì á-bōe.
8:9 Chóng-.sī, hún-chiáu chhōe bô hioh-kha ê só͘-chāi, chiū tò tńg-lâi tōa chûn Nó͘-ah hia; in-ūi choân tē-bīn iáu ū chúi. Nó͘-ah chhun chhiú khì chiap hún-chiáu, lia̍h ji̍p-lâi tōa chûn.
8:10 Nó͘-ah koh thèng-hāu chhit ji̍t, chiah koh-chài pàng hún-chiáu chhut tōa chûn.
8:11 Kàu ê-hng, hún-chiáu tńg-lâi i hia, chhùi kā chi̍t hio̍h sin ê kaⁿ-ná hio̍h. Nó͘-ah chiah chai, chúi tùi tē-chiūⁿ thè-.khì à.
8:12 I koh thèng-hāu chhit ji̍t, pàng hún-chiáu chhut-.khì, hún-chiáu lóng bô koh tńg-.lâi.
8:13 Kàu Nó͘-ah la̍k-pah khòng chi̍t hòe, chiaⁿ-goe̍h chhe-it, tē-chiūⁿ ê chúi lóng ta. Nó͘-ah chiū hian-khui tōa chûn ê kòa lâi khòaⁿ, chiū khòaⁿ tio̍h tē-bīn í-keng ta.
8:14 Jī-goe̍h jī-chhit, thó͘-tē lóng ta.
8:15 Siōng-tè tùi Nó͘-ah kóng,
8:16 " Lí kah lí ê bó͘, lí ê kiáⁿ, lí ê sim-pū lóng tio̍h chhut tōa chûn.
8:17 Tī lí hia kiàn-nā ū jio̍k-thé ê oa̍h-mi̍h, to̍h-sī poe-chiáu, chengseⁿ kah it-chhè tī tē-chiūⁿ sô ê thâng-thōa, lóng tio̍h tòa in chhut-.khì, hō͘ in tī tē-.ni̍h heng-ōng, seⁿ-thòaⁿ chin chē.
8:18 Tùi hit sî, nó͘-ah kah i ê kiáⁿ, i ê bó͘, i ê sim-pū lóng chhut-.lâi.
8:19 Só͘-ū ê cháu-siù, só͘-ū ê thâng-thōa, só͘-ū ê poe-chiáu, kiàn-nā tē-chiūⁿ só͘-ū ê tōng-bu̍t, kok chiàu i ê cho̍k-lūi mā lóng chhut tōa chûn.
8:20 Nó͘-ah ê Hiàn-chè
Nó͘-ah ūi tio̍h Siōng-chú khí chi̍t chō tôaⁿ, tùi ta̍k chióng chheng-khì ê chengseⁿ, ta̍k chióng chheng-khì ê poe-chiáu, chhú-lâi hiàn tī tôaⁿ téng chò sio-chè.
8:21 Siōng-chú phīⁿ tio̍h sio-chè ê phang-bī, sim-lāi siūⁿ kóng, " Góa bô beh koh in-ūi lâng ê iân-kò͘ chiù-chó͘ tē, in-ūi lâng tùi sè-hàn ê sî, sim só͘ siūⁿ ê to̍h-sī pháiⁿ; Góa bô beh koh chiàu Góa chitmá só͘ chò ê, koh-chài húi-bia̍t kok chióng ê oa̍h-mi̍h.
8:22 Tē iáu chûn-chāi ê sî, chai-chèng kah siu-sêng, kôaⁿ kah joa̍h, kôaⁿ-thiⁿ kah joa̍h-thiⁿ, ji̍t kah mê, lóng bô-hioh. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。