耶利米哀歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Têng-hoa̍t, Hóe-kái, ǹg-bāng
In-ūi Chú siū-khì ê koái-á lâi tú tio̍h kan-khó͘ ê, góa to̍h-sī hit-ê lâng.
3:2 I chhōa góa, hō͘ góa kiâⁿ tī o͘-àm, bô kiâⁿ tī kng-bêng tiong.
3:3 I chin-chiàⁿ tiāⁿtiāⁿ chhut-chhiú kong-kek góa, kui ji̍t bô thêng.
3:4 I hō͘ góa ê bah kah phôe ta-ta-.khì; I at-tn̄g góa ê kut-thâu.
3:5 I khí thô͘-tui lâi kong-kek góa, ēng khó͘-to̍k ê mi̍h kah kan-lân kā góa ûi-khùn.
3:6 I hō͘ góa tòa tī o͘-àm ê só͘-chāi, chhin-chhiūⁿ sí-liáu chin kú ê lâng.
3:7 I ēng lî-pa ûi góa, hō͘ góa cháu bē chhut-.khì, I hō͘ góa ê thih-liān ná tāng.
3:8 Góa ai-kiò kiû pang-chān ê sî, I hō͘ góa ê kî-tó bē tàng thiaⁿ-.tio̍h.
3:9 I ēng kòe phah ê chio̍h-thâu that-ba̍t góa ê lō͘, I hō͘ góa ê lō͘ oan-khiau.
3:10 I tùi góa chhin-chhiūⁿ hîm teh bâi-ho̍k, chhin-chhiūⁿ sai tiàm tī àm-ba̍t ê só͘-chāi.
3:11 I hō͘ góa bê-lō͘, kā góa thiah-chhùi, hō͘ góa hi-bî.
3:12 I khui kiong, ēng góa chò chìⁿ-pé.
3:13 I ēng chìⁿ tē ê chìⁿ siā ji̍p góa ê pak lāi.
3:14 Góa chiâⁿ-chò góa ê jîn-bîn ê chhiò-pièⁿ; in kui ji̍t ēng góa chò koa-khek.
3:15 I ēng khó͘-to̍k ê mi̍h chhiong-móa góa, ēng in-tîn kā góa koàn kàu kiaⁿ.
3:16 I ēng chho͘ soa-chio̍h phah-tn̄g góa ê chhùi-khí, ēng hóe-hu sám góa ê seng-khu.
3:17 Lí hō͘ góa ê sim lī-khui pêng-an hn̄g-hn̄g, hō͘ góa bē kì-tit hok-khì.
3:18 Góa chiū kóng: Góa ê khùi-la̍t soe-pāi; jî-chhiáⁿ góa tī Siōng-chú hia lóng bô ǹg-bāng!
3:19 Kiû lí ē kì-tit góa ê khùn-khó͘, góa ê kan-lân, chhin-chhiūⁿ in-tîn, khó͘-táⁿ.
3:20 Góa ê sim nā siūⁿ-khí chiahê, tī góa ê pak lāi chiū ut-būn.
3:21 Góa ê sim tò tńg-lâi siūⁿ chit-ê tāichì, só͘-í góa ū ǹg-bāng,
3:22 goán bô tì-sú bia̍t-bông, sī tùi Siōng-chú chiahê chû-ài; in-ūi I ê liân-bín bû kiông-chīn.
3:23 Chú ê jîn-chû ta̍k chá-khí ōaⁿ sin; Lí ê sêng-si̍t hui-siông khoah-tōa!
3:24 Góa ê sim kóng: Siōng-chú sī góa ê ki-gia̍p, in-ūi ánne góa beh ǹg-bāng I.
3:25 Kiàn-nā thèng-hāu Siōng-chú, cháu-chhōe I ê, I ē si un hō͘ i.
3:26 Ǹg-bāng Siōng-chú ê chín-kiù, tiām-tiām thèng-hāu, che sī hó.
3:27 Lâng siàu-liân ê sî phāiⁿ i ê ka-taⁿ, che sī hó.
3:28 I tio̍h kakī chē, bô chhut siaⁿ, in-ūi chit-ê ka-taⁿ sī Siōng-chú hē tī i ê sin chiūⁿ ê.
3:29 I ê chhùi tio̍h àⁿ tī tîn-ai, kiámchhái ū ǹg-bāng.
3:30 I tio̍h chhut-chāi lâng phah chhùi-phóe, móa-móa siū lêng-jio̍k.
3:31 In-ūi Chú ê chû-ài móa-móa, it-tēng bē éng-oán khì-sak lâng.
3:32 Chú sûi-jiân hō͘ lâng iu-būn, iáu koh ē chiàu I pah-poaⁿ ê chû-ài hoat-chhut liân-bín.
3:33 I hō͘ lâng siū khó͘, iu-būn, m̄-sī I só͘ kam-sim chêng-goān ê.
3:34 Lâng kā sè-chiūⁿ siū koaiⁿ-kaⁿ ê ta̍h tī kha chêng, che sī Chú só͘ bô hoaⁿ-hí ê.
3:35 Á-sī tī Chì-koân-.ê ê bīn-chêng oan-óng lâng, che sī Chú só͘ bô hoaⁿ-hí ê.
3:36 Á-sī oan-óng lâng ê àn-kiāⁿ, che sī Chú só͘ bô hoaⁿ-hí ê.
3:37 Nā m̄-sī Chú só͘ bēng-lēng ê, siáⁿ lâng ū hoat-tō͘ kóng liáu to̍h chiâⁿ?
3:38 Hó pháiⁿ tāi, kám m̄-sī lóng chhut tī Chì-koân-.ê ê chhùi?
3:39 Lâng oa̍h tī sè-kan, in-ūi kakī ê chōe-kò siū hêng-hoa̍t, ná tio̍h ai-oàn?
3:40 Lán tio̍h séng-chhat koh chhâ-khó lán ê lō͘, tio̍h oa̍t tńg-lâi kui Siōng-chú.
3:41 Lán tio̍h hiàn sim gia̍h chhiú, ǹg thiⁿ-téng ê Siōng-chú.
3:42 Goán hoān chōe pōe-ge̍k, Lí bô sià-bián.
3:43 Lí ēng siū-khì tà goán, jiok goán; Lí kiâⁿ châu-bia̍t, mā bô liân-bín.
3:44 Lí ēng ba̍t hûn jia-khàm kakī, tì-sú kî-tó bē tàng thàu-kòe.
3:45 Lí hō͘ goán tī bān-bîn ê tiong-kan, chiâⁿ-chò ù-òe siū khì-sak ê mi̍h.
3:46 Goán ê tùi-te̍k, lóng ǹg goán tōa-tōa khui chhùi.
3:47 Kiaⁿ-hiâⁿ kah hām-kheⁿ, chân-hāi kah húi-bia̍t, lóng lîm-kàu tī goán.
3:48 Góa ê jîn-bîn ê chabó͘ kiáⁿ tú tio̍h húi-bia̍t, in-ūi ánne, góa lâu ba̍k-sái chhin-chhiūⁿ khe lâu.
3:49 Góa ê ba̍k-chiu lâu ba̍k-sái, bô thêng bô soah,
3:50 ti̍t-ti̍t thèng-hāu Siōng-chú àⁿ lo̍h-lâi khòaⁿ, tùi thiⁿ kā góa kàm-chhat.
3:51 In-ūi góa ê siâⁿ chiahê chabó͘ kiáⁿ, hō͘ góa khòaⁿ tio̍h to̍h siong-sim.
3:52 Bô-iân bô-kò͘ kah góa chò siû-te̍k ê jiok góa, chhin-chhiūⁿ teh jiok chiáu-á.
3:53 In hō͘ góa ê sèⁿ-miā sí tī hām-kheⁿ, ēng chi̍t tè chio̍h-thâu thūn tī góa ê téng-bīn.
3:54 Chin chē chúi im-kòe góa ê thâu-khak; góa kóng: Góa bô miā à.
3:55 Siōng-chú ah, góa tùi chhim ê hām-kheⁿ, kiû-kiò Lí ê miâ.
3:56 Lí bat thiaⁿ góa ê siaⁿ; góa ê thó͘-khùi kiû-kiò, kiû Lí m̄ thang am hīⁿ-khang m̄-thiaⁿ.
3:57 Góa kiû-kiò Lí ê ji̍t, Lí kīn-óa góa, kóng: M̄-bián kiaⁿ!
3:58 Chú ah, kiû Lí thè góa sin-oan, kiû Lí kiù-sio̍k góa ê sèⁿ-miā.
3:59 Siōng-chú ah, Lí khòaⁿ tio̍h góa só͘ siū ê oan-óng, kiû Lí kā góa phòaⁿ-toàn.
3:60 In oàn-hūn góa, bô͘-hāi góa, Lí lóng ū khòaⁿ-.tio̍h.
3:61 Siōng-chú ah, in chhoh-mē góa, bô͘-hāi góa, Lí lóng ū thiaⁿ-.tio̍h;
3:62 Mā thiaⁿ tio̍h hiahê khí-lâi kong-kek góa ê lâng só͘ kóng ê, í-ki̍p kui ji̍t só͘ siat beh hāi góa ê kè-bô͘.
3:63 Kiû Lí koan-khòaⁿ, in chē-.leh á-.sī khí-.lâi, lóng ēng góa chò in ê koa-khek.
3:64 Siōng-chú ah, Lí tio̍h chiàu in ê chhiú só͘ chò ê, lâi kā in pò-èng.
3:65 Lí tio̍h hō͘ in ê sim piàn ngē, hō͘ Lí ê chiù-chó͘ lîm-kàu tī in.
3:66 Lí tio̍h hoat-chhut siū-khì lâi jiok in, tùi Siōng-chú ê thian-hā lâi kā in châu-bia̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。