耶利米哀歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Siōng-chú Têng-hoa̍t Ê-lú-sa-lèm
Ai-ah! Chú siū-khì, I hō͘ o͘-hûn jia-khàm Si-óng ê chabó͘ kiáⁿ! I kā I-su-la-el ê súi tùi thiⁿ hiat lo̍h tē; tī I siū-khì ê ji̍t, mā bô kò͘ tio̍h I kakī ê kha-ta̍h-í.
2:2 Chú thún-ta̍h Iâ-kop it-chhè tòa ê só͘-chāi, mā bô liân-bín; I siū-khì chhia-tó Iô-tah chabó͘ kiáⁿ ê siâⁿ-pó, hō͘ i tó kàu pêⁿ-tē; I lêng-jio̍k chit kok kah hit kok ê kùi-cho̍k.
2:3 I ê siū-khì chin ke̍k-lia̍t, kā I-su-la-el ê kak choân-pō͘ chám-tn̄g, tī tùi-te̍k ê bīn-chêng kiu I ê chiàⁿ chhiú. I chhin-chhiūⁿ sì-kho͘-ûi thun-bia̍t ê hóe-iām, kā Iâ-kop sio-sio-.khì.
2:4 I chhin-chhiūⁿ tùi-te̍k khui kiong, I khiā-teh gia̍h-khí chiàⁿ chhiú chhin-chhiūⁿ siû-te̍k, mā choân-pō͘ châu-bia̍t ba̍k-chiu só͘ hoaⁿ-hí ê. Tī Si-óng chabó͘ kiáⁿ ê pò͘-pêⁿ, chhin-chhiūⁿ hóe piàⁿ-chhut I ê tōa siū-khì.
2:5 Chú soah piàn-chò chhin-chhiūⁿ tùi-te̍k, thun-bia̍t I-su-la-el, I thun-bia̍t i só͘-ū ê kiong-tiān, I húi-hoāi i hiahê siâⁿ-pó; tī Iô-tah chabó͘ kiáⁿ ê tiong-kan, ke-thiⁿ chin chē pi-siong kah pi-ai.
2:6 I chhut-la̍t thiah-húi i ê lî-pa, chhin-chhiūⁿ hoe-hn̂g, I húi-hoāi i chū-hōe ê só͘-chāi. Só͘ tiāⁿ tio̍h ê cheh-kî kah An-hioh-ji̍t, tī Si-óng lóng bē kì-.tit; Siōng-chú hō͘ i ánne, koh tī I ê siū-khì thòng-hūn tiong, khòaⁿ-khin kun-ông kah chè-si.
2:7 Chú khì-sak I ê chè-tôaⁿ, thó-ià I ê sèng-só͘, kā I ê kiong-tiān ê chhiûⁿ kau tī tùi-te̍k ê chhiú tiong. In tī Siōng-chú ê tiān hōa-hōa háu, ná chhin-chhiūⁿ tī cheh-kî ê ji̍t.
2:8 Si-óng chabó͘ kiáⁿ ê siâⁿ chhiûⁿ, Siōng-chú koat-ì beh thiah-húi; I khan chún-chîn ê sòaⁿ, ti̍t-ti̍t húi-bia̍t, chhiú bô kiu tò-tńg. I hō͘ gōa-chhiûⁿ kah siâⁿ chhiûⁿ lóng pi-ai, chò chi̍t-ē soe-pāi.
2:9 I ê mn̂g tîm lo̍h tē, Chú húi-hoāi at-tn̄g i ê mn̂g-chhòaⁿ. I ê kun-ông kah kùi-cho̍k tòa tī bô lu̍t-hoat ê lia̍t kok tiong; i ê sian-ti bô tit tio̍h Siōng-chú ê khé-sī.
2:10 Si-óng chabó͘ kiáⁿ ê tiúⁿ-ló chē tī thô͘-kha, tiām-tiām bô siaⁿ; ēng thô͘-soa hún sám thâu-khak, ēng môa-pò͘ hâ io; Ê-lú-sa-lèm ê chāi-sek-lí thâu-khak chhih lo̍h tē.
2:11 Góa ê ba̍k-chiu lâu ba̍k-sái tì-sú ba̍k-hîn, góa ê sim-tn̂g kiáu-ká. Góa ê koaⁿ, táⁿ tūi-lo̍h tē, in-ūi góa ê jîn-bîn ê chabó͘ kiáⁿ tú tio̍h húi-bia̍t, koh in-ūi gín'á kah chia̍h leng ê tī siâⁿ lāi ê ke-lō͘ hūn-.khì.
2:12 In tī siâⁿ lāi ê ke-lō͘ hūn-.khì, chhin-chhiūⁿ siū-siong ê tī lāu-bú ê sim-hoâi teh beh tn̄g-khùi; hit sî, in tùi lāu-bú kóng: Ngó͘-kok kah chiú tī tó-ūi?
2:13 Ê-lú-sa-lèm ê chabó͘ kiáⁿ, góa tio̍h án-chóaⁿ ūi lí chò kiàn-chèng? Góa tio̍h ēng siáⁿ-mi̍h phì-jū lí? Si-óng ê chāi-sek-lí, góa tio̍h ēng siáⁿ-mi̍h pí-phēng lí, thang hō͘ lí tit tio̍h an-ùi? In-ūi lí ê siong-chhùi tōa kah chhin-chhiūⁿ hái, siáⁿ lâng ē kā lí i hó?
2:14 Lí ê sian-ti thè lí khòaⁿ hi-ké kah gû-gōng ê ī-siōng, bô hián-chhut lí ê chōe-kò, thang hō͘ lí siū lia̍h ê tò tńg-.lâi; to̍k-to̍k thè lí khòaⁿ hi-ké ê khé-sī kah siū chhian-sóa ê goân-in niā-niā.
2:15 Kiàn-nā tùi chia kòe lō͘ ê lâng lóng ē kā lí phah pho̍k-á. In ǹg Ê-lú-sa-lèm ê chabó͘ kiáⁿ thí-chhiò iô thâu, kóng: Chit-ê siâⁿ kám sī lâng só͘ chheng-chò cha̍p-chiok súi, chheng-chò choân tē só͘ hoaⁿ-hí ê?
2:16 Lí ê tùi-te̍k lóng ǹg lí tōa-tōa khui i ê chhùi; in thí-chhiò koh kā khí, kóng: Goán ū kā i thun-bia̍t-tiāu. Che chin-chiàⁿ sī goán só͘ ǹg-bāng ê ji̍t, taⁿ goán ū tú-.tio̍h, goán ū khòaⁿ-.tio̍h!
2:17 Siōng-chú ū chiâⁿ I só͘ tiāⁿ tio̍h ê, èng-giām I chá-sî só͘ bēng-lēng ê ōe. I chhia-tó, mā bô pó-sioh; hō͘ tùi-te̍k tùi lí tōa hoaⁿ-hí; hō͘ lí ê tùi-te̍k ê kak gia̍h koân.
2:18 In ê sim kiû-kiò Chú. Si-óng chabó͘ kiáⁿ ê chhiûⁿ, lí tio̍h mê-ji̍t lâu ba̍k-sái chhin-chhiūⁿ khe lâu, lí m̄ thang hioh-khùn, lí ê ba̍k-chiu-jîn tio̍h lâu ba̍k-sái bô soah.
2:19 Àm-mê ōaⁿ-keⁿ ê sî, lí tio̍h khí-lâi kiû-kiò;, tī Chú ê bīn-chêng piàⁿ-chhut lí ê sim chhin-chhiūⁿ teh piàⁿ chúi; lí ê gín'á tī ke-lō͘ kháu in-ūi iau hūn-.khì; lí tio̍h ūi tio̍h in ê sèⁿ-miā, ǹg Chú gia̍h chhiú lâi kî-tó.
2:20 Siōng-chú ah, kiû Lí kàm-chhat, khòaⁿ Lí ǹg siáⁿ lâng ánne kiâⁿ? Cha-bó͘ lâng kám thang chia̍h in só͘ seⁿ ê, chhiú só͘ phō ê eⁿ-á? Chè-si kah sian-ti kám thang tī Chú ê sèng-só͘ siū sat-hāi?
2:21 Gín-á kah lāu lâng tó tī ke-lō͘ ê thô͘-kha; góa chiahê chāi-sek-lí kah chòng-teng tó tī to hā; Lí siū-khì ê ji̍t kā in thâi-sí. Lí kā in thâi-sí, mā bô liân-bín.
2:22 Lí kiò sì-kho͘-ûi thang kiaⁿ-hiâⁿ ê lîm-kàu tī góa, chhin-chhiūⁿ tī cheh-kî ê ji̍t. Tī Siōng-chú siū-khì ê ji̍t, bô lâng ū thoat-lī, mā bô lâng lâu-.leh. Góa só͘ phō, só͘ io ê, tùi-te̍k kā i thâi-sí liáu-liáu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。