耶利米書 線上收聽:中文和合本 現代中文譯本修訂版 台語聖經 客語 福州話 希伯來文讀經 下載檔案 關於語音聖經
51:1 Koh-chài Sím-phòaⁿ Ba-bú-lông
Siōng-chú ánne kóng, " Lí khòaⁿ, Góa beh khí húi-bia̍t ê hong, lâi kong-kek Ba-bú-lông kah tòa tī hia ê Kal-tí-ah lâng.
51:2 Góa beh chhe gōa-pang lâng lâi-kàu Ba-bú-lông lâi kā in pòa, hō͘ in ê tē piàn khang-hi. Tī in tú tio̍h hoān-lān ê ji̍t, in ē tùi sì-kho͘-ûi lâi kā i kong-kek.
51:3 Khui kiong ê tio̍h ǹg khui kiong ê lâi khui kiong, ǹg chhēng chiàn-kah théng-sin ê lâi khui kiong. M̄-thang sioh in ê siàu-liân lâng, tio̍h choân-pō͘ bia̍t-tiāu in ê kun-tūi.
51:4 Siū thâi ê ē tó tī Kal-tí-ah lâng ê tē, siū chhì ê ē tó tī ke-lō͘.
51:5 Sûi-jiân I-su-la-el kah Iô-tah in ê só͘-chāi móa-móa tek-chōe I-su-la-el ê sèng ê, in iáu koh bô hō͘ bān-kun ê Siōng-chú — i ê Siōng-tè kā in khì-sak.
51:6 Lín tio̍h tùi Ba-bú-lông tiong cháu chhut-.lâi, ta̍k lâng kiù kakī ê sèⁿ-miā! M̄-thang tī in ê chōe tiong lâi bia̍t-bông; in-ūi che sī Siōng-chú pò-siû ê kî, I beh hō͘ in tú tio̍h eng-kai siū ê pò-èng.
51:7 Ba-bú-lông pêng-sî sī Siōng-chú chhiú lāi ê kim poe, hō͘ choân tē ê lâng chùi; lia̍t pang bat lim i ê chiú, só͘-í lia̍t-pang khí-kông.
51:8 Ba-bú-lông hut-jiân siū chhia-tó, húi-hoāi; tio̍h ūi i thî-khàu, the̍h jú-hiuⁿ lâi chí i ê thàng-thiàⁿ, kiámchhái iáu ē i-.tit.
51:9 Lán siūⁿ beh i-tī Ba-bú-lông, m̄ koh i bô tit-.tio̍h. Lán tio̍h lī-khui i, ta̍k lâng tńg-khì pún-kok; in-ūi i ê chōe-àn tú thiⁿ, thàu kàu kiong-chhong. "
51:10 Siōng-tè ê chú-bîn ē kóng, " Siōng-chú í-keng hián-bêng lán ê kong-gī. Lâi, lán thang tī Si-óng pò-iông lán ê Siōng-tè — Siōng-chú ê só͘ chò.
51:11 Siōng-chú tiāⁿ tio̍h ì-sù beh kong-kek Ba-bú-lông, lâi kā i húi-bia̍t. Só͘-í, kek-tōng Ma-tái kun-ông ê sim, kóng, " Lín tio̍h bôa kng lín ê chìⁿ, giâ-tiâu lín ê tîn-pâi. " In-ūi che sī Siōng-chú ê pò-siû, to̍h-sī I ūi tio̍h I ê tiān lâi pò-siû.
51:12 Koh kóng: Tio̍h khiā tōa kî lâi kong-kek Ba-bú-lông ê siâⁿ chhiûⁿ! Tio̍h kian-kò͘ liâu-bāng ê tâi! Tio̍h phài siú-bōng ê lâng! Tio̍h siat bâi-ho̍k! In-ūi Siōng-chú só͘ kóng koan-hē tòa tī Ba-bú-lông ê jîn-bîn, I ū ánne kè-ōe, mā ū kā i chiâⁿ.
51:13 Tòa tī tōa hái téng-bīn teh tōa hoat-châi ê lâng, lí ê chiong-kio̍k kàu à! Tham-sim ê liōng í-keng móa à!
51:14 Bān-kun ê Siōng-chú kí kakī chiùchōa kóng, " Góa beh hō͘ lâng chhiong-móa lín tiong-kan, chhin-chhiūⁿ chháu-meh hiah chē, in ē hoah-hiàm lâi kong-kek lí. "
51:15 O-ló Siōng-chú ê Si-koa
Siōng-chú ēng tōa koân-lêng chhòng-chō tē; ēng tì-hūi kiàn-li̍p sè-kài, ēng chhong-bêng thián-khui chiahê thiⁿ.
51:16 I chi̍t-ē chhut siaⁿ, khong-tiong chiū ū chin chē chúi kek-tōng; I hō͘ hûn-bū tùi tē-ke̍k chhèng khí-.lâi. I ūi tio̍h lo̍h hō͘, chhòng-chō sihnà, I hō͘ hong tùi I ê kim-khò͘ chhut-.lâi.
51:17 Ta̍k lâng lóng gû-chhún bô tì-sek. Ta̍k-ê gîn-chhiūⁿ lóng ūi tio̍h i só͘ tiau-khek ê ngó͘-siōng lâi kiàn-siàu; in-ūi i só͘ chù ê ngó͘-siōng sī ké ê, mā bô oa̍h-khì tī hit lāi-bīn,
51:18 lóng sī khang-khang ê, sī bê-he̍k lâng ê só͘ chò, kàu pān-lí in ê sî, in it-tēng ē siū tû-bia̍t.
51:19 Iâ-kop ê Siōng-tè bô chhin-chhiūⁿ chiahê, in-ūi I sī chhòng-chō bān-mi̍h ê Chú; I-su-la-el mā sī I sán-gia̍p ê chi-cho̍k. Bān-kun ê I-é-ho-bah sī I ê miâ.
51:20 Siōng-chú ê Thih-thûi
Lí sī góa ê pó͘-thâu, kau-chiàn ê ke-si; góa beh ēng Lí lâi phah-chhùi lia̍t pang, ēng lí lâi húi-bia̍t lia̍t kok;
51:21 ēng Lí lâi phah-chhùi bé kah khiâ bé ê; ēng Lí lâi phah-chhùi chiàn-chhia kah chē tī hit téng-bīn ê lâng;
51:22 ēng Lí lâi phah-chhùi chapo͘ lâng kah chabó͘ lâng; ēng Lí lâi phah-chhùi lāu lâng kah gín'á;
51:23 ēng Lí lâi phah-chhùi siàu-liân lâng kah chāi-sek-lí; ēng Lí lâi phah-chhùi bo̍k-chiá kah i ê iûⁿ-kûn; ēng Lí lâi phah-chhùi choh-chhân lâng kah i ê chi̍t tùi gû; ēng Lí lâi phah-chhùi chóng-tok kah koaⁿ-oân.
51:24 Têng-hoa̍t Ba-bú-lông
Siōng-chú kóng, " Chá-chêng tòa tī Ba-bú-lông kah Kal-tí-ah ê jîn-bîn, tī Si-óng só͘ kiâⁿ it-chhè ê pháiⁿ, Góa beh kā in pò-èng, hō͘ lín chhin-ba̍k khòaⁿ-.tio̍h. "
51:25 Lí chit-ê kiâⁿ húi-bia̍t ê soaⁿ, lí khòaⁿ, Góa kah lí chò tùi-te̍k, lí húi-bia̍t choân tē. Góa beh chhun Góa ê chhiú tī lí ê téng-bīn, tùi soaⁿ-giâm kā lí chhia lo̍h-.khì, hō͘ lí chiâⁿ-chò sio-húi ê soaⁿ.
51:26 Lâng it-tēng bô tùi lí hia chhú chi̍t tè chio̍h lâi chò chhù-kak, mā bô chhú chi̍t tè chio̍h lâi chò tē-ki; lí ē éng-oán pha-hng. Che sī Siōng-chú kóng ê.
51:27 Tio̍h tī kéng lāi khiā tōa kî, tī ta̍k kok tiong pûn sàu-kak, thiau-tî chún-pī lia̍t kok lâi kā i kong-kek, chio-chi̍p A-la̍h-la̍t, Me-nî, A-si-ke-nah chiahê kok lâi kong-kek Ba-bú-lông, koh phài kun-tiúⁿ lâi kā i kong-kek, hō͘ bé-peng khí-lâi chhin-chhiūⁿ chho͘-mn̂g ê chháu-meh.
51:28 Thiau-tî chún-pī lia̍t kok kah Ma-tái ê lia̍t ông, i ê chóng-tok, i ê koaⁿ-oân kah i só͘ koán choân tē ê lâng, lâi kā i kong-kek.
51:29 Tē iô-tāng koh chhiⁿ-chhám; in-ūi Siōng-chú kong-kek Ba-bú-lông ê chí-ì í-keng tiāⁿ tio̍h, I ē hō͘ Ba-bú-lông ê tē pha-hng, bô lâng tòa.
51:30 Ba-bú-lông ê ióng-sū bô ài kau-chiàn, tòa tī iâⁿ-pâng lāi. I ê khùi-la̍t í-keng bô-.khì, chiâⁿ-chò chhin-chhiūⁿ chabó͘ lâng. In ê chhù-the̍h siū sio, in ê mn̂g-chhòaⁿ hông phah-tn̄g.
51:31 Cháu bûn-su ê cháu-khì tú tio̍h cháu bûn-su ê, pò siau-sit ê khì tú tio̍h pò siau-sit ê, pò-kò hō͘ Ba-bú-lông ông chai, i ê siâⁿ sì-bīn hō͘ lâng cheng-ho̍k khì à,
51:32 Lō͘-thâu hō͘ lâng chiàm-.khì, lô͘-tek siū hóe sio, kau-chiàn ê lâng mā lóng kiaⁿ-hiâⁿ.
51:33 Bān-kun ê Siōng-chú — I-su-la-el ê Siōng-tè ánne kóng: Ba-bú-lông chhin-chhiūⁿ tiū-tiâⁿ, í-keng hō͘ lâng ta̍h kah pêⁿ-pêⁿ, koh bô gōa kú, siu-sêng ê sî chiū beh kàu.
51:34 Ba-bú-lông ông — Nep-kat-ne-chal thun-chia̍h góa, teh chhùi góa, hō͘ góa chiâⁿ-chò khang-khang ê khì-kū. I chhin-chhiūⁿ tōa hî thun góa, ēng góa ê pó-bu̍t chhiong-móa i ê pak-tó͘, koh kā góa thò͘ chhut-.lâi.
51:35 Tòa tī Si-óng ê jîn-bîn ē kóng: Ba-bú-lông ēng pō-gio̍k khoán-thāi góa kah góa ê seng-khu, goān chit-ê chōe kui tī i. Ê-lú-sa-lèm lâng ē kóng: Goān lâu goán ê hoeh ê chōe kui hō͘ tòa tī Kal-tí-ah ê jîn-bîn.
51:36 Siōng-chú beh Pang-chō͘ I-su-la-el
Só͘-í, Siōng-chú ánne kóng, " Lí khòaⁿ, Góa beh thè lí sin-oan, mā beh thè lí pò-siû; Góa beh hō͘ Ba-bú-lông ê hái ta-.khì, hō͘ i ê chúi-chôaⁿ bô chúi.
51:37 Ba-bú-lông ē chiâⁿ-chò thô͘-tui, chò iá-káu tòa ê só͘-chāi, chò thang tio̍h-kiaⁿ kah gāng-.khì, thang thí-chhiò ê, mā bô lâng tī hia tòa.
51:38 In ē chhin-chhiūⁿ ióng-béng ê sai hm̄-hm̄ háu, chhin-chhiūⁿ sè-chiah sai teh háu-kiò.
51:39 Tng in joa̍h-.lâng ê sî, Góa beh ūi in pān chiú-toh, hō͘ i chiú-chùi, hō͘ i khoài-lo̍k, hō͘ i kú-tn̂g teh khùn, éng-oán bô cheng-sîn. Che sī Siōng-chú kóng ê.
51:40 Góa beh chhōa in lo̍h-.khì, chhin-chhiūⁿ teh chhōa iûⁿ-á, chhin-chhiūⁿ chhōa kang ê mî-iûⁿ kah kang ê soaⁿ-iûⁿ, khì-kàu siū thâi ê tē. "
51:41 Ba-bú-lông ê Miā-ūn
" Si-siak ná ē siū kong-phòa? Thian-hā só͘ oló ê ná ē siū pà-chiàm? Ba-bú-lông tī lia̍t kok tiong ná ē piàn-chò pha-hng?
51:42 Hái chúi tiòng khí-.lâi, im-kòe Ba-bú-lông; i hō͘ chin chē éng khàm ba̍t.
51:43 I ê siâⁿ piàn-chò pha-hng, ta-sò ê tē, soa-bô͘, bô lâng tòa, bô lâng keng-kòe ê só͘-chāi.
51:44 Góa beh tī Ba-bú-lông hêng-hoa̍t Be-l, Góa beh ó͘-chhut i ê chhùi só͘ thun lo̍h-.khì ê. Bān-bîn bô koh kui-óa i; Ba-bú-lông ê siâⁿ chhiûⁿ mā tó-hoāi.
51:45 Góa ê jîn-bîn, lín tio̍h tùi i ê tiong-kan chhut-.khì! Ta̍k lâng tio̍h kiù kakī, siám-phiah Siōng-chú ê tōa siū-khì.
51:46 Lín ê sim m̄ thang sit táⁿ, mā m̄ thang in-ūi kéng lāi só͘ thiaⁿ-.tio̍h ê hong-siaⁿ lâi kiaⁿ-hiâⁿ; in-ūi kin-nî ū hong-siaⁿ thoân-.lâi, àm-sî mā ū hong-siaⁿ; kéng lāi ū kiông-pō ê tāichì, koaⁿ-tiúⁿ kong-kek koaⁿ-tiúⁿ.
51:47 Lí khòaⁿ, ji̍t-chí teh beh kàu, Góa beh pān Ba-bú-lông só͘ tiau-khek ê ngó͘-siōng. Hō͘ in choân tē kiàn-siàu; i hiahê siū thâi ê lâng ē tó tī in tiong-kan.
51:48 Hit sî, thiⁿ-tē kah kî-tiong só͘-ū ê ē in-ūi Ba-bú-lông sit-pāi lâi hoaⁿ-hí, in-ūi kiâⁿ húi-bia̍t ê ē tùi pak-hong lâi-kàu i hia. Che sī Siōng-chú kóng ê.
51:49 Ba-bú-lông án-chóaⁿ hō͘ I-su-la-el siū thâi ê lâng tó lo̍h-.khì, chhin-chhiūⁿ ánne, i choân tē siū thâi ê lâng mā ē tī Ba-bú-lông tó lo̍h-.khì. "
51:50 Hō͘ tī Ba-bú-lông ê I-su-la-el Lâng ê Sìn-sit
Siōng-chú kóng, " Siám-phiah to-kiàm ê tio̍h kín cháu, m̄ thang khiā-.leh! Tio̍h tī hn̄g-hn̄g ê só͘-chāi kì-liām Siōng-chú, sim-lāi tui-sióng Ê-lú-sa-lèm.
51:51 Goán in-ūi thiaⁿ tio̍h chhoh-mē lâi làu-khùi, móa-bīn kiàn-siàu, in-ūi ī-pang lâng ji̍p-khì Siōng-chú ê tiān hiahê sèng ê só͘-chāi.
51:52 Só͘-í, Siōng-chú kóng: Lí khòaⁿ, ji̍t-chí teh beh kàu, Góa beh pān Ba-bú-lông tiau-khek ê ngó͘-siōng, choân kok siū-siong ê lâng ē ai-siaⁿ thó͘-khùi.
51:53 Ba-bú-lông sûi-jiân chiūⁿ-kàu thiⁿ, sûi-jiân hō͘ i kian-kò͘ koân ê só͘-chāi koh khah kian-kò͘, iáu koh ū kiâⁿ húi-bia̍t ê beh tùi Góa chia kàu i hia. Che sī Siōng-chú kóng ê.
51:54 Ba-bú-lông ê Bia̍t-bông
Siōng-chú kóng: Tùi Ba-bú-lông ū ai-khàu ê siaⁿ, tùi Kal-tí-ah lâng ê tē ū tōa húi-bia̍t ê siaⁿ.
51:55 In-ūi Siōng-chú húi-bia̍t Ba-bú-lông, hō͘ in tiong-kan ê tōa-siaⁿ soah-.khì, in ê éng hōa-hōa háu, chhin-chhiūⁿ tōa hái, i hiáng ê siaⁿ mā hoat chhut-.lâi.
51:56 In-ūi húi-bia̍t ê lâi kong-kek Ba-bú-lông. I ê ióng-sū siū lia̍h, in ê kiong tú tio̍h at-tn̄g; in-ūi Siōng-chú sī kiâⁿ pò-èng ê Siōng-tè, I choa̍t-tùi ē pò-siû.
51:57 Kun-ông — miâ chò bān-kun ê Siōng-chú ê, kóng: Góa beh hō͘ i ê kùi-cho̍k, chheⁿ-siōng-ka, chóng-tok kah koaⁿ-oân, í-ki̍p ióng-sū lóng chiú-chùi, éng-oán teh khùn, bē cheng-sîn.
51:58 Bān-kun ê Siōng-chú ánne kóng: Ba-bú-lông khoah-tōa ê siâⁿ chhiûⁿ ē choân-pō͘ tó-hoāi; i koân-tōa ê siâⁿ mn̂g ē hō͘ hóe sio-sio-.khì. Chèng lâng só͘ lô-khó͘ ê ē kui tī khang-khang; lia̍t kok só͘ lô-khó͘ ê kui tī hóe, in lóng ē ià-siān.
51:59 I-é-lí-miah ê Sìn-sit Thoân Kàu Ba-bú-lông
Iô-tah ông Che-ti-kiah chē-ūi ê tē-sì nî tńg-khì Ba-bú-lông ê sî, Ma-a-se-iah ê sun — Nê-lé-iù ê kiáⁿ Se-la-iah kah ông chò-hóe khì.
51:60 ( Se-la-iah sī ông ê kiong lāi sū-hāu ) Sian-ti I-é-lí-miah ū ōe hoan-hù i. I-é-lí-miah kā só͘-ū beh lîm-kàu Ba-bú-lông ê chai-hō, to̍h-sī kóng tio̍h Ba-bú-lông só͘ siá it-chhè ê ōe, kì tī chheh-.ni̍h.
51:61 I-é-lí-miah tùi Se-la-iah kóng, " Lí kàu Ba-bú-lông ê sî, iáu kín tio̍h tha̍k chit pún chheh-.ni̍h ê ōe;
51:62 koh tio̍h kóng, ' Siōng-chú ah, Lí kóng tio̍h chit só͘-chāi bat kóng beh kā i siau-bia̍t, sīm-chì bô lâng tòa, liân chengseⁿ mā bô, it-tēng éng-oán pha-hng. '
51:63 Lí chit pún chheh tha̍k-liáu, chiū tio̍h kā i pa̍k tī chi̍t lia̍p chio̍h-thâu, hiat lo̍h-khì Iu-hu-la-té hô tiong,
51:64 kóng, ' Ba-bú-lông ūi tio̍h Siōng-chú só͘ beh kàng hō͘ i ê chai-hō it-tēng ē chhin-chhiūⁿ ánne tîm lo̍h-.khì, bē koh khí-.lâi; in lóng ē ià-siān. '" I-é-lí-miah ê ōe kàu chia ûi-chí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。