耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
49:1 Siōng-chú Sím-phòaⁿ Am-móng
Koan-hē Am-móng, Siōng-chú ánne kóng, " I-su-la-el kám bô kiáⁿ? Kám bô hō͘-sû? Mal-kam ná ē tit tio̍h Ga̍t ê tē chò sán-gia̍p, i ê jîn-bîn ná ē tòa tī i tiong-kan hiahê siâⁿ?
49:2 Lí khòaⁿ, ji̍t-chí teh beh kàu, Góa beh hō͘ kau-chiàn ê siaⁿ tī Am-móng cho̍k ê Lap-bah thiaⁿ-.tio̍h, i ē chiâⁿ-chò pha-hng ê thô͘-tui; i chiahê siâⁿ ē hō͘ hóe sio, í-chêng chiàm I-su-la-el ê, taⁿ ē hō͘ I-su-la-el chiàm tò tńg-.lâi. Che sī Siōng-chú kóng ê.
49:3 " He-si-bóng lâng, lí tio̍h ai-khàu, in-ūi Ai siâⁿ piàn-chò pha-hng. Lap-bah ê jîn-bîn, lí tio̍h tōa-siaⁿ hoah, ēng môa-pò͘ hâ io; tio̍h thî-khàu, tī lî-pa tiong kiâⁿ lâi kiâⁿ khì; in-ūi Mal-kam kah i ê chè-si, kùi-cho̍k ē chò chi̍t-ē hō͘ lâng lia̍h-.khì.
49:4 Pōe-ge̍k ê jîn-bîn, lín ná ē in-ūi hiahê soaⁿ-kok, to̍h-sī ū chúi chu-jūn ê soaⁿ-kok lâi khoa-kháu? Lí óa-khò châi-pó, kóng: Siáⁿ lâng ē lâi-kàu goán chia.
49:5 Góa — Chú — bān-kun ê Siōng-chú ánne kóng: Lí khòaⁿ, Góa beh hō͘ kiaⁿ-hiâⁿ tùi sì-kho͘-ûi lîm-kàu tī lín, lín ē siū kóaⁿ-chhut, ta̍k lâng ti̍t-ti̍t cháu-.khì, cháu bô lō͘ ê bô lâng thang siu-liû.
49:6 " Chóng-.sī, āu-lâi, Góa ē hō͘ Am-móng cho̍k siū lia̍h ê lâng tò tńg-.lâi. Che sī Siōng-chú kóng ê. "
49:7 Siōng-chú Sím-phòaⁿ E-tóm
Koan-hē E-tóm, bān-kun ê Siōng-chú ánne kóng, " Tī Thê-man kám bô koh ū tì-hūi? Chhong-bêng ê lâng kám bô koh ū kè-ōe? In ê tì-hūi kám bô-.khì à?
49:8 Tí-tàn ê jîn-bîn, lí tio̍h thè-.khì, tio̍h khì tô-cháu, tio̍h bih khì ún-ba̍t ê só͘-chāi; in-ūi Góa hêng-hoa̍t E-sáu ê sî, Góa beh hō͘ i ê chai-hō lîm-kàu tī i.
49:9 Bán phû-tô ê nā kàu lí hia bán, kám bô iáu lâu kúi-lia̍p-á? Chha̍t-á nā àm-sî lâi, kám m̄-sī sún-hoāi kàu boán-ì niā-niā?
49:10 Chóng-.sī, Góa hō͘ E-sáu kng liu-liu, lō͘-hiān i ún-ba̍t ê só͘-chāi, tì-sú bô tè thang bih. I ê kiáⁿ-sun, i ê hiaⁿ-tī, i ê chhù-piⁿ lóng sit-pāi, i mā kui tī khang-khang.
49:11 Tio̍h kā lí ê ko͘-jî pàng hē-.leh, Góa ē kā in pó-choân hō͘ in oa̍h lo̍h-.khì; lí chiahê kóaⁿ-hū, mā tio̍h óa-khò Góa. "
49:12 In-ūi Siōng-chú ánne kóng, " Lí khòaⁿ, pún-lâi bô eng-kai lim hit-ê poe ê, it-tēng tio̍h lim, hô-hòng sī lí, lí kám ē choân-pō͘ bián siū hêng-hoa̍t? Lí it-tēng bē tàng bián siū hêng-hoa̍t, lí it-tēng tio̍h lim.
49:13 Góa kí kakī lâi chiùchōa, Bo-chu-la̍h ē chiâⁿ-chò thang tio̍h-kiaⁿ kah gāng-.khì, thang lêng-jio̍k, thang chiù-chó͘, koh hong-hùi; i só͘-ū ê siâⁿ ē éng-oán piàn-chò pha-hng. "
49:14 Góa kóng, " Góa tùi Siōng-chú hia thiaⁿ tio̍h siau-sit, mā ū sù-chiá hōng chhe-phài khì lia̍t kok, kiò in tio̍h chū-chi̍p lâi kā i kong-kek, tio̍h khí-lâi kau-chiàn.
49:15 In-ūi góa hō͘ lí tī lia̍t kok tiong chò bî-sè-.ê, hō͘ lâng khòaⁿ-khin.
49:16 Tòa tī chio̍h-tōng lāi pé-siú soaⁿ téng ê, lí ê ui-hong, lí sim-lāi ê kiau-ngō͘ phiàn kakī; lí sûi-jiân chhin-chhiūⁿ eng-chiáu, chò lí ê siū tī koân ê só͘-chāi, Góa beh tùi hia kā lí chhú lo̍h-.lâi. Che sī Siōng-chú kóng ê.
49:17 Siōng-chú kóng, " E-tóm ē chiâⁿ-chò thang tio̍h-kiaⁿ kah gāng-.khì ê, kiàn-nā tùi hia keng-kòe ê it-tēng ē kám-kak kî-koài, in-ūi i só͘ tú-.tio̍h ê it-chhè chai-hō lâi kā i thí-chhiò.
49:18 Tek-khak bô lâng tòa tī hia, mā bô lâng kià-kha tī hia, ē chhin-chhiūⁿ So͘-tóm, Am-mo͘-la̍h, kah hù-kīn ê siâⁿ tó-hoāi.
49:19 Lí khòaⁿ, i ē chhin-chhiūⁿ sai, tùi Iol-tàn hô piⁿ ê chhiū-nâ khí-.lâi, kong-kek kian-kò͘ ê tòa ê só͘-chāi. Ba̍k-nih-kú, Góa beh hō͘ in tô-cháu, lī-khui chit-ê só͘-chāi. Siáⁿ lâng siū kéng-soán, Góa chiū phài i tī-lí chit-ê tē; siáⁿ lâng ē pí-tit Góa? Siáⁿ lâng ē kā Góa tēng chi̍t-ê kî? Ū siáⁿ-mi̍h bo̍k-chiá ē-tàng khiā tī Góa ê bīn-chêng?
49:20 Só͘-í, lín tio̍h thiaⁿ Siōng-chú só͘ kè-ōe beh kong-kek E-tóm ê kè-chhek, í-ki̍p I só͘ chù-tiāⁿ beh kong-kek tòa tī Thê-man ê jîn-bîn ê chí-ì; in tiāⁿ tio̍h beh kā hiahê iûⁿ-kûn ê sè chiah ê thoa-.khì, I mā beh hō͘ in tòa ê só͘-chāi hong-hùi.
49:21 In-ūi in tó-hoāi ê siaⁿ, tē chiū iô-tāng. In tōa-siaⁿ hoah ê siaⁿ, thoân kàu Âng-hái.
49:22 Lí khòaⁿ, i beh khí-.lâi, chhin-chhiūⁿ eng-chiáu poe-.lâi, thí-khui i ê si̍t tī Bo-chu-la̍h. Kàu hit ji̍t, E-tóm chiahê ióng-sū ê sim ē chhin-chhiūⁿ beh seⁿ kiáⁿ ê chabó͘ lâng ê sim. "
49:23 Siōng-chú Sím-phòaⁿ Ta-má-su-ko
Koan-hē Ta-má-su-ko, Ha-mat kah Al-pat bē kiàn-siàu, in-ūi in thiaⁿ tio̍h pháiⁿ siau-sit chiū sit táⁿ. Hái bīn ū iu-chhiû, bē pêng-chēng.
49:24 Ta-má-su-ko soe-jio̍k, oa̍t tńg-sin beh tô-cháu, phi̍h-phi̍h chhoah kā i lia̍h tiâu-tiâu; thòng-khó͘ iu-chhiû kā i khiú tiâu-tiâu, chhin-chhiūⁿ beh seⁿ kiáⁿ ê chabó͘ lâng.
49:25 Thang oló ê siâⁿ, to̍h-sī Góa só͘ hoaⁿ-hí ê siâⁿ, ná ē siū pàng-sak kàu ánne?
49:26 I ê siàu-liân lâng ē tī ke-lō͘ tó lo̍h-.khì; tng hit ji̍t, i só͘-ū ê peng-á ē bia̍t-bông. Che sī bān-kun ê Siōng-chú kóng ê.
49:27 Góa mā beh hō͘ hóe to̍h tī Ta-má-su-ko ê siâⁿ chhiûⁿ, sio-bia̍t Bian-ha-tat ê kiong-tiān. "
49:28 Sím-phòaⁿ Ke-tal Kok kah Ha-cho͘l Kok
Koan-hē Ke-tal kah Ha-cho͘l chiahê kok, to̍h-sī Ba-bú-lông ông Nep-kat-ne-chal só͘ phah-pāi ê, Siōng-chú ánne kóng, " Lí khí-.lâi, chiūⁿ-khì Ke-tal, châu-bia̍t tang-hong ê lâng.
49:29 In ê pò͘-pêⁿ kah iûⁿ-kûn ē hō͘ lâng chhiúⁿ-.khì, kā tiùⁿ-pak kah it-chhè ê khì-kū, í-ki̍p lo̍k-tô, lóng chhiúⁿ-khì chò kakī ê. Lâng tùi in hoah, ' sì-kho͘-ûi lóng ū kiaⁿ-hiâⁿ'.
49:30 " Tòa tī Ha-cho͘l ê jîn-bîn, lí tio̍h tô-cháu, cháu-khì hn̄g-hn̄g, bih khì ún-ba̍t ê só͘-chāi; in-ūi Ba-bú-lông ông Nep-kat-ne-chal siat-kè beh hāi lín, koat-tēng beh kā lín kong-kek.
49:31 Siōng-chú kóng, " Khí-.lâi! Chiūⁿ-khì kong-kek an-jiân seng-oa̍h bô chhau-hoân ê cho̍k, in bô mn̂g-hō͘, bô mn̂g-chhòaⁿ, sī kakī tòa ê.
49:32 In ê lo̍k-tô ē hō͘ lâng chhiúⁿ-.khì; in chin chē chengseⁿ ē hō͘ lâng kiap-khì. Kiàn-nā thì pìn-piⁿ ê, ē kā in kóaⁿ-sòaⁿ khì tī sì-hng, hō͘ chai-hō tùi sì-kho͘-ûi lîm-kàu tī in. Che sī Siōng-chú kóng ê.
49:33 Ha-cho͘l ē chiâⁿ-chò iá-káu tòa ê só͘-chāi, éng-oán hi-bî, bô lâng tī hia tòa, mā bô lâng tī hia kià-kha. "
49:34 Siōng-chú Sím-phòaⁿ Ê-lám
Iô-tah ông Che-ti-kiah khí-thâu chē-ūi ê sî, Siōng-chú koan-hē Ê-lám ê ōe lîm-kàu I-é-lí-miah sian-ti, kóng,
49:35 " Bān-kun ê Siōng-chú ánne kóng: Lí khòaⁿ, Góa beh at-tn̄g Ê-lám lâng ê kiong, to̍h-sī in siōng-téng ê khùi-la̍t.
49:36 Góa beh hō͘ sì-bīn ê hong tùi thiⁿ ê sì-bīn chhoe-.lâi, lîm-kàu Ê-lám lâng, kā in kóaⁿ-sòaⁿ khì tī sì-hng. Ê-lám siū kóaⁿ-sòaⁿ ê lâng bô chi̍t kok bô kàu.
49:37 Góa beh hō͘ Ê-lám lâng tī tùi-te̍k ê bīn-chêng kah siàu-siūⁿ in ê sèⁿ-miā ê lâng ê bīn-chêng lâi kiaⁿ-hiâⁿ; Góa mā beh hō͘ chai-hō, to̍h-sī Góa ê tōa siū-khì lîm-kàu tī in, koh beh hō͘ to-kiàm jiok in, ti̍t-kàu kā in choân-pō͘ siau-bia̍t.
49:38 Góa beh siat-li̍p Góa ê pó-chō tī Ê-lám, tùi hia tû-khì kun-ông kah kùi-cho̍k. Che sī Siōng-chú kóng ê.
49:39 " Chóng-.sī, kàu ji̍t-āu, Góa beh hō͘ Ê-lám siū lia̍h ê lâng tò tńg-.lâi. Che sī Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。