耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
46:1 Ai-gi̍p Ông tī Kal-ke-mí-si Hông Phah-pāi
Siōng-chú ê ōe lîm-kàu I-é-lí-miah sian-ti, lūn-khí lia̍t kok ê tāichì.
46:2 Lūn Ai-gi̍p sī lūn Ai-gi̍p ông Pa-lo-ne-koh ê kun-peng, chat iâⁿ tī Iu-hu-la-té hô piⁿ ê Kal-ke-mí-si, tng Iô-tah ông Io-si-iah ê kiáⁿ E-hō͘-iá-kim sì nî, hō͘ Ba-bú-lông ông Nep-kat-ne-chal só͘ phah-pāi ê.
46:3 Ai-gi̍p ê kun-koaⁿ hā bēng-lēng: Lín tio̍h chún-pī tōa-sió ê tîn-pâi, khì kau-chiàn.
46:4 Lín tio̍h thò bé-chhia, khiâ bé! Tì thâu-khoe khiā khí-.lâi, bôa chhiuⁿ, chhēng chiàn-kah!
46:5 Siōng-chú mn̄g kóng: Góa ná ē khòaⁿ tio̍h ánne? In kiaⁿ-hiâⁿ thè-āu; in ê ióng-sū thâi-su, kóaⁿ-kín chàu, bô oa̍t-thâu; sì-kho͘-ûi ū kiaⁿ-hiâⁿ! Che sī Siōng-chú kóng ê.
46:6 Gâu cháu ê cháu bē lī, ióng-sū bē tàng thoat-lī; tī pak-hong ê Iu-hu-la-té hô piⁿ, in lóng kha that-.tio̍h poa̍h-tó.
46:7 Chit-ê chhin-chhiūⁿ Nai-l hô tiòng móa, chhin-chhiūⁿ kang-hô ê chúi teh giâ éng ê sī siáⁿ lâng?
46:8 Ai-gi̍p chhin-chhiūⁿ Nai-l hô tiòng móa, i ê chúi chhin-chhiūⁿ kang-hô teh giâ éng. I ê ōe kóng: Góa beh chhèng koân, góa beh jia-khàm choân tē; góa beh húi-hoāi hiahê siâⁿ kah tòa tī kî-tiong ê jîn-bîn.
46:9 Bé tio̍h kín chiūⁿ-.lâi! Chhia tio̍h loān-loān cháu! Ióng-sū tio̍h chhut-.lâi, Kú-si̍t kah Put ê lâng lóng giâ tîn-pâi, Lù-t ê lâng gâu khui kiong.
46:10 In-ūi hit ji̍t sī Chú — bān-kun ê Siōng-chú ê ji̍t, pò-siû ê ji̍t, thang tùi I ê tùi-te̍k pò-siû. To-kiàm ē thun-chia̍h kàu pá, lim hoeh kàu chùi; in-ūi Chú — bān-kun ê Siōng-chú, tī pak-hong Iu-hu-la-té hô piⁿ ū hiàn chè ê tāichì.
46:11 Ai-gi̍p ê jîn-bîn, lí tio̍h chiūⁿ-khì Gi-lia̍t chhú jú-hiuⁿ; lí ēng chin chē io̍h sī bô chhái-kang, lí bē tit tio̍h i hó.
46:12 Lia̍t-pang thiaⁿ tio̍h lí ê lêng-jio̍k, choân tē lóng sī lí ai-khàu ê siaⁿ; in-ūi ióng-sū kah ióng-sū sio kha̍p, chò chi̍t-ē poa̍h-tó.
46:13 Nep-kat-ne-chal Lâi Kong Ai-gi̍p
Siōng-chú tùi I-é-lí-miah sian-ti só͘ kóng ê ōe, kóng tio̍h Ba-bú-lông ông Nep-kat-ne-chal ē kàu, lâi kong-kek Ai-gi̍p tē.
46:14 Lín tio̍h soan-iông tī Ai-gi̍p, soan-pò͘ tī Mik-tol, soan-pò͘ tī Nó͘-hu kah Ta̍k-pe-neh, kóng: Tio̍h pâi tūi, kakī chún-pī, in-ūi to-kiàm tī lí ê sì-kho͘-ûi teh thun-bia̍t.
46:15 Lí ê ióng-sū ná ē poa̍h-tó? In khiā bē chāi, in-ūi Siōng-chú teh kóaⁿ in.
46:16 Lí hō͘ chin chē lâng poa̍h-tó; tāi-ke tó sio-tha̍h, in chiū kóng, khí-.lâi! Lán tò- tńg lâi-khì pún cho̍k, kàu lán ê pún só͘-chāi, lâi siám-phiah ap-chè lán ê to-kiàm.
46:17 In tī hia tōa-siaⁿ hoah, Ai-gi̍p ông Hôa-láu chí-put-kò sī chi̍t-ê siaⁿ, i ū phahsńg i ê ki-hōe.
46:18 Tōa-kun-ông, I ê miâ kiò-chò bān-kun ê Siōng-chú kóng: Góa kí Góa ê oa̍h-miā lâi chiùchōa, i ē lâi, chhin-chhiūⁿ soaⁿ tiong ê Tha-bo͘l, chhin-chhiūⁿ hái piⁿ ê Kal-mel.
46:19 Tòa tī Ai-gi̍p ê jîn-bîn, lí tio̍h chún-pī siū lia̍h su-iàu ēng ê mi̍h-kiāⁿ, in-ūi Nó͘-hu ē pha-hng, sio-húi, bô lâng tòa.
46:20 Ai-gi̍p sī súi ê gû-chéng-á, chóng-.sī, tùi pak-hong chhut-.lâi ê húi-bia̍t lâi ā, í-keng lâi à!
46:21 Kî-tiong iong-peng, chhin-chhiūⁿ tiâu lāi pûi ê gû-á, in oa̍t tńg-sin chò chi̍t-ē tô-cháu, khiā bē tiâu; in-ūi in tú tio̍h hoān-lān ê ji̍t, siū hêng-hoa̍t ê sî í-keng kàu à.
46:22 I ê siaⁿ chhin-chhiūⁿ chôa teh sô. Tùi-te̍k ē kui tīn lâi, in ē gia̍h pó͘-thâu lâi kong-kek i, chhin-chhiūⁿ chhò chhiū ê lâng.
46:23 Siōng-chú kóng: I ê chhiū-nâ sûi-jiân chin ba̍t, in mā beh kā i chhò, in-ūi in pí chháu-meh khah chē, bē tàng sǹg-.tit.
46:24 Ai-gi̍p ê jîn-bîn ē kiàn-siàu, ē hông kau tī pak-hong ê jîn-bîn ê chhiú.
46:25 Bān-kun ê Siōng-chú — I-su-la-el ê Siōng-tè kóng, " Lí khòaⁿ, Góa beh hêng-hoa̍t sio̍k tī Nô͘ ê Am-móng sîn kah Hôa-láu kah Ai-gi̍p, kah i ê sîn-bêng, kah i ê kun-ông, mā beh hêng-hoa̍t Hôa-láu kah óa-khò i ê lâng.
46:26 Góa beh kā in kau tī siàu-siūⁿ in ê sèⁿ-miā ê lâng ê chhiú, kah Ba-bú-lông ông Nep-kat-ne-chal ê chhiú, kah i ê jîn-sîn ê chhiú; í-āu Ai-gi̍p it-tēng ē koh ū lâng tòa, kah chá-chêng kāng-khoán. Che sī Siōng-chú kóng ê. "
46:27 Siōng-chú ē Kiù I ê Chú-bîn
Góa ê lô͘-po̍k — Iâ-kop, lí m̄-bián kiaⁿ! I-su-la-el, lí m̄-bián kiaⁿ-hiâⁿ! Lí khòaⁿ, Góa beh tùi hn̄g-hn̄g ê só͘-chāi kā lí chín-kiù, tùi siū lia̍h-.khì ê tē chín-kiù lí ê kiáⁿ-sun. Iâ-kop ē tò tńg-.lâi, tit tio̍h an-chēng, pêng-an, bô lâng hō͘ i kiaⁿ-hiâⁿ.
46:28 Góa ê lô͘-po̍k — Iâ-kop, lí m̄-bián kiaⁿ-hiâⁿ, in-ūi Góa kah lí tông-chāi, mā beh kā Góa só͘ kóaⁿ lí khì-kàu ê hiahê kok choân-pō͘ châu-bia̍t; chóng-.sī, bô beh kā lí choân-pō͘ châu-bia̍t, beh chiàu só͘ ha̍p-gî ê kā lí chek-pī, choa̍t-tùi bē tàng bô kā lí hêng-hoa̍t. Che sī Siōng-chú kóng ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。