耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
44:1 Siōng-chú hō͘ Liû-bông tī Ai-gi̍p ê I-su-la-el Lâng ê Sìn-sit
Ū ōe lîm-kàu I-é-lí-miah, kóng tio̍h só͘-ū tòa tī Ai-gi̍p tē ê Iô-tah lâng, to̍h-sī tòa tī Mik-tol, Ta̍k-pe-neh, Nó͘-hu, Pa-thó-loh ê kéng lāi ê Iô-tah lâng, kóng,
44:2 " Bān-kun ê Siōng-chú — I-su-la-el ê Siōng-tè ánne kóng: Góa só͘ kàng-lo̍h tī Ê-lú-sa-lèm kah Iô-tah chiahê siâⁿ só͘-ū ê chai-hō, lín lóng ū khòaⁿ-.tio̍h. Lí khòaⁿ, taⁿ hiahê siâⁿ lóng pha-hng, bô lâng tòa.
44:3 Che sī in-ūi in só͘ kiâⁿ ê pháiⁿ, in khì sio hiuⁿ ho̍k-sāi pa̍t-ê sîn-bêng, to̍h-sī in kah lín í-ki̍p lín ê chó͘-sian só͘ m̄ bat ê, ánne lâi jiá Góa siū-khì.
44:4 Chóng-.sī, Góa bat chhe Góa ê chèng lô͘-po̍k sian-ti lâi kìⁿ lín; sī chá-chá to̍h khí-lâi chhe i, kóng: Chhiat-chhiat goān lín m̄ thang kiâⁿ chit-ê khó-ò͘ⁿ ê tāichì, Góa só͘ oàn-hūn ê.
44:5 Chóng-.sī, in bô beh thiaⁿ, mā bô àⁿ hīⁿ-khang lâi thiaⁿ, bô oa̍t-tńg lī-khui in ê pháiⁿ, iû-goân sio hiuⁿ tī pa̍t chióng ê sîn-bêng.
44:6 In-ūi ánne, Góa ê tōa siū-khì kah Góa ê siū-khì piàⁿ chhut-lâi tī Iô-tah chiahê siâⁿ kah Ê-lú-sa-lèm ê ke-lō͘, chhin-chhiūⁿ hóe to̍h khí-.lâi, tì-sú in pha-hng léng-chhìn, chhin-chhiūⁿ kin-á-ji̍t ánne.
44:7 " Taⁿ bān-kun ê Siōng-chú — I-su-la-el ê Siōng-tè ánne kóng: Lín ná ē kiâⁿ chit-ê tōa pháiⁿ, hāi lín kakī, hō͘ lín ê chapo͘ lâng, chabó͘ lâng, gín'á kah chia̍h leng ê eⁿ-á, lóng tùi Iô-tah tiong kā lín tû-.khì, bô lâu kah pòaⁿ-ê?
44:8 Sī in-ūi lín ēng lín ê chhiú só͘ chò ê kek-khí Góa ê siū-khì, tī só͘ khì kià-kha ê Ai-gi̍p tē, sio hiuⁿ tī pa̍t chióng ê sîn-bêng, tì-sú lín tú tio̍h châu-bia̍t, tī thian-hā bān-kok tiong, chiâⁿ-chò thang chiù-chó͘, thang lêng-jio̍k ê.
44:9 Lí ê chó͘-sian ê pháiⁿ, Iô-tah lia̍t ông ê pháiⁿ, in ê hō͘-hui ê pháiⁿ, lín kakī ê pháiⁿ, lín ê bó͘ ê pháiⁿ, to̍h-sī tī Iô-tah tē, Ê-lú-sa-lèm ke-lō͘ só͘ kiâⁿ ê, lín kám bē kì-.tit?
44:10 In kàu taⁿ iáu bô kakī khiam-pi, bô kiaⁿ-hiâⁿ, bô chun-thàn Góa tī lín ê bīn-chêng kah lín ê chó͘-sian ê bīn-chêng só͘ siat-li̍p Góa ê hoat-tō͘ kah lu̍t-lē.
44:11 " Só͘-í, Góa — bān-kun ê Siōng-chú — I-su-la-el ê Siōng-tè ánne kóng: Lí khòaⁿ, Góa beh tùi lín pìⁿ bīn, kàng chai-hō tì-sú châu-bia̍t Iô-tah ê kûn-chiòng.
44:12 Iô-tah só͘ chhun lo̍h-.lâi ê jîn-bîn, ngē-ngē beh khì Ai-gi̍p tē, beh tī hia kià-kha ê, Góa beh kā in chhú-lâi siau-bia̍t; in ē tó tī Ai-gi̍p tē, in ē tùi to-kiàm, tùi ki-hng lâi bia̍t-bông; tùi sè kàu tōa lóng ē tùi to-kiàm, tùi ki-hng lâi sí; in ē chiâⁿ-chò thang chiù-chó͘, thang tio̍h-kiaⁿ, thang chhoh-mē, thang lêng-jio̍k ê.
44:13 In-ūi Góa beh ēng to-kiàm, ēng ki-hng, ēng un-e̍k lâi hêng-hoa̍t tòa tī Ai-gi̍p tē ê, chhin-chhiūⁿ Góa í-keng hêng-hoa̍t Ê-lú-sa-lèm ánne;
44:14 hō͘ hiahê khì Ai-gi̍p tē só͘ chhun lo̍h-.lâi ê Iô-tah lâng, lóng bē tàng thoat-lī á-.sī lâu-.leh, thang tńg-lâi Iô-tah tē, to̍h-sī in ê sim chin him-bō͘ beh tńg-lâi tòa ê só͘-chāi; in-ūi tit tio̍h thoat-lī ê í-gōa, bô kah chi̍t-ê ē-tàng tńg-.lâi. "
44:15 Hiahê tòa tī Ai-gi̍p tē ê Pa-thó-loh ê lâng, kiàn-nā chai in ê bó͘ bat tùi pa̍t-ê sîn-bêng sio hiuⁿ ê kah tī piⁿ-á teh khiā ê chèng chabó͘ lâng, chū-chi̍p kui tōa-tīn, ìn I-é-lí-miah kóng,
44:16 " Lí hōng Siōng-chú ê miâ tùi goán só͘ kóng ê ōe, goán m̄-thiaⁿ lí ê ōe.
44:17 Goán choa̍t-tùi ē chiâⁿ goán ê chhùi só͘ kóng it-chhè ê ōe, ǹg thian-hō͘ sio hiuⁿ, koàn-tiān, chiàu goán kah goán ê chó͘-sian, goán ê kun-ông, goán ê kùi-cho̍k, tī Iô-tah chiahê siâⁿ kah Ê-lú-sa-lèm ê ke-lō͘, pêng-sî só͘ kiâⁿ ê kāng-khoán; in-ūi hit sî, goán ê chia̍h-mi̍h chhiong-chiok, hióng-siū pêng-an, pēng bô khòaⁿ tio̍h chai-hō.
44:18 Chóng-.sī, tùi goán thêng-chí bô tùi thian-hō͘ sio hiuⁿ, bô koàn-tiān, goán tian-tò khiàm-khoeh it-chhè, koh tùi to-kiàm, tùi ki-hng lâi bia̍t-bông.
44:19 Goán tùi thian-hō͘ sio hiuⁿ koàn-tiān ê sî, goán chò piáⁿ lâi kā i ho̍k-sāi, tùi i koàn-tiān, goán ê tiōng-hu kám bô hūn? "
44:20 I-é-lí-miah chiū ìn hiahê jîn-bîn, to̍h-sī tùi hiahê chapo͘ lâng kah chabó͘ lâng, ēng chiahê ōe ìn i ê jîn-bîn, kóng,
44:21 " Lín kah lín ê chó͘-sian, lín ê kun-ông, lín ê kùi-cho̍k kah kok lāi ê jîn-bîn, tī Iô-tah chiahê siâⁿ kah Ê-lú-sa-lèm ke-lō͘ só͘ sio ê hiuⁿ, Siōng-chú kám bē kì-tit in, sim-lāi kám bô teh siūⁿ?
44:22 Siōng-chú in-ūi lín só͘ chò ê pháiⁿ, só͘ kiâⁿ khó-ò͘ⁿ ê tāichì, bē koh lún-.tit; só͘-í, lín ê tē pha-hng, chiâⁿ-chò thang tio̍h-kiaⁿ, thang chiù-chó͘, bô lâng tòa, chhin-chhiūⁿ kin-á-ji̍t chit khoán.
44:23 In-ūi lín sio hiuⁿ, mā in-ūi lín tek-chōe Siōng-chú, mā bô thiaⁿ Siōng-chú ê ōe, bô chun-thàn I ê lu̍t-hoat kah I ê tiâu-lē, I ê kiàn-chèng ê ōe, só͘-í, lín tú tio̍h chit-ê chai-hō, chhin-chhiūⁿ kin-á-ji̍t chit khoán. "
44:24 I-é-lí-miah koh tùi chèng lâng kah chèng chabó͘ lâng kóng, " Lín tī Ai-gi̍p tē só͘-ū ê Iô-tah lâng, lóng tio̍h thiaⁿ Siōng-chú ê ōe.
44:25 Bān-kun ê Siōng-chú — I-su-la-el ê Siōng-tè ánne kóng: Lín kah lín ê bó͘ bat ēng chhùi kóng, ēng chhiú lâi kā i chiâⁿ, kóng, ' Goán só͘ hē ê goān, choa̍t-tùi ē chiàu ánne khì kiâⁿ, to̍h-sī beh tùi thian-hō͘ sio hiuⁿ, mā beh tùi i koàn-tiān. ' Taⁿ chò lí kian-kò͘ lí ê goān, lâi kiâⁿ lí ê goān!
44:26 Só͘-í, lín tòa tī Ai-gi̍p tē só͘-ū ê Iô-tah lâng, lóng tio̍h thiaⁿ Siōng-chú ê ōe. Lí khòaⁿ, Siōng-Chú kóng: Góa kí Góa ê tōa miâ lâi chiùchōa, tī Ai-gi̍p choân tē, góa ê miâ bô koh hō͘ Iô-tah cho̍k chi̍t-ê lâng ê chhùi só͘ chheng-ho͘, kóng, ' Chì-koân Siōng-chú sī éng-oán ê oa̍h-miā. '
44:27 Lí khòaⁿ, Góa beh tì-ì tī in, beh kàng chai-hō, bô beh kàng hok-khì, tī Ai-gi̍p tē só͘-ū ê Iô-tah lâng lóng ē tùi to-kiàm, tùi ki-hng lâi bia̍t-bông, kàu lóng sí liáu-liáu.
44:28 Thoat-lī to-kiàm, beh tùi Ai-gi̍p tē tńg-lâi Iô-tah tē ê, in ê lâng-gia̍h chin chió; hiahê só͘ chhun lo̍h-.lâi ê Iô-tah lâng khì Ai-gi̍p tē, siūⁿ beh tī hia kià-kha ê, beh chai siáⁿ lâng ê ōe ē tit tio̍h èng-giām ê, sī Góa ê á-.sī in ê?
44:29 Siōng-chú kóng: Góa tī chit-ê só͘-chāi beh kā lín hêng-hoa̍t, ē ū chit-ê tiāu-thâu, hō͘ lín chai Góa só͘ kóng beh kàng chai-hō hō͘ lín hiahê ōe it-tēng ē èng-giām.
44:30 Lí khòaⁿ, Góa beh kā Ai-gi̍p ông Hôa-láu Ho-hu-la̍h kau tī i ê tùi-te̍k ê chhiú kah siàu-siūⁿ i ê sèⁿ-miā ê lâng ê chhiú; tú chhin-chhiūⁿ Góa ū kā Iô-tah ông Che-ti-kiah kau tī i ê tùi-te̍k, to̍h-sī siàu-siūⁿ i ê sèⁿ-miā ê Ba-bú-lông ông Nep-kat-ne-chal ê chhiú.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。