耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
42:1 Jîn-bîn Kiû I-é-lí-miah Tāi-tó
Chèng kun-tiúⁿ, Ka-le-ah ê kiáⁿ Io-ha-nân, Ho-sia-iah ê kiáⁿ Ia-cha-ni-iah, í-ki̍p chèng lâng, tùi sè kàu tōa lóng chìn-chêng lâi,
42:2 tùi I-é-lí-miah sian-ti kóng, " Kiû lí chún goán tī lí bīn-chêng ê só͘ kiû, thè goán chiahê chhun lo̍h-.lâi ê lâng tùi Siōng-chú — lí ê Siōng-tè kî-tó. Goán pún-lâi ū chin chē lâng, taⁿ só͘ chhun lo̍h-.lâi ê chin chió, che sī lí chhin-ba̍k só͘ khòaⁿ tio̍h-.ê.
42:3 Goān Siōng-chú — lí ê Siōng-tè chí-sī goán só͘ tio̍h kiâⁿ ê lō͘, só͘ tio̍h chò ê tāichì. "
42:4 Sian-ti I-é-lí-miah kā in kóng, " Góa í-keng thiaⁿ-.tio̍h, hó, góa ē chiàu lín ê ōe tùi Siōng-chú — lín ê Siōng-tè kî-tó. Bô-lūn Siōng-chú ìn lín siáⁿ-mi̍h, góa it-tēng lóng ē kā lín kóng, bē tùi lín ún-ba̍t kah pòaⁿ-kù. "
42:5 Chiū ánne, in kā I-é-lí-miah kóng, " Goán nā bô chiàu Siōng-chú — lí ê Siōng-tè chhe lí lâi kóng it-chhè ê ōe khì kiâⁿ, chiū goān Siōng-chú tī lí kah goán ê tiong-kan chò chin-si̍t tiong-sìn ê kiàn-chèng.
42:6 Goán chit sî chhiáⁿ lí kàu Siōng-chú — goán ê Siōng-tè ê bīn-chêng, I só͘ kóng ê, bô-lūn sī hó sī pháiⁿ, goán lóng ē chun-thàn I ê ōe; goán chun-thàn Siōng-chú — goán ê Siōng-tè ê ōe, chiū thang tit tio̍h heng-thong. "
42:7 Siōng-chú Hôe-tap I-é-lí-miah ê Kî-tó
Keng-kòe cha̍p kang, ū Siōng-chú ê ōe lîm-kàu I-é-lí-miah.
42:8 I chiū kā Ka-le-ah ê kiáⁿ Io-ha-nân, í-ki̍p kah i tông-chāi ê chèng kun-tiúⁿ kah chèng lâng, tùi sè kàu tōa lóng kiò in lâi,
42:9 tùi in kóng, " Siōng-chú — I-su-la-el ê Siōng-tè, to̍h-sī lín chhe góa kàu I ê bīn-chêng, lâi hiàn lín só͘ kiû ê, I ánne kóng,
42:10 ' Lín nā iû-goân beh tòa tī chit só͘-chāi, Góa chiū beh kā lín kiàn-chō, bô beh húi-hoāi lín, beh kā lín chai-pôe, bô beh kā lín poe̍h-chhut, in-ūi Góa ū hō͘-hóe Góa só͘ kàng hō͘ lín ê chai-hō.
42:11 M̄-bián kiaⁿ lín só͘ kiaⁿ ê Ba-bú-lông ông. '" Siōng-chú kóng, " M̄-thang kiaⁿ i! In-ūi Góa kah lín tông-chāi, Góa beh chín-kiù lín, hō͘ lín thoat-lī i ê chhiú.
42:12 Góa beh liân-bín lín, hō͘ in mā liân-bín lín, hō͘ lín tńg-lâi pún só͘-chāi.
42:13 Siat-sú lín kóng, ' Goán m̄ tòa chit só͘-chāi', ánne to̍h-sī lín m̄ chun-thàn Siōng-chú — lín ê Siōng-tè ê ōe,
42:14 nā kóng, ' M̄ lah, goán beh ji̍p-khì Ai-gi̍p tē, tī hia bô khòaⁿ tio̍h kau-chiàn, bô thiaⁿ tio̍h sàu-kak ê siaⁿ, mā bē tì-kàu bô thang chia̍h lâi iau-gō; goán beh tòa tī hia. '
42:15 Taⁿ lín chiahê Iô-tah só͘ chhun lo̍h-.lâi ê jîn-bîn, tio̍h thiaⁿ Siōng-chú ê ōe. Bān-kun ê Siōng-chú — I-su-la-el ê Siōng-tè ánne kóng, ' Lín nā kèng-jiân ngē-ngē beh khì Ai-gi̍p, tòa hia kià-kha,
42:16 lín só͘ kiaⁿ ê to-kiàm chiū ē tī Ai-gi̍p tē jiok tio̍h lín! Jî-chhiáⁿ lín só͘ kiaⁿ ê ki-hng ē tī Ai-gi̍p tē kā lín tòe tiâu-tiâu! Lín ē sí tī hia.
42:17 Kiàn-nā ngē-ngē beh khì Ai-gi̍p, tī hia kià-kha ê lâng lóng ē ánne; in ē tùi to-kiàm, tùi ki-hng, tùi un-e̍k lâi sí, kî-tiong bô kah chi̍t-ê lâu-.leh, mā bô kah chi̍t-ê thoat-lī Góa só͘ kàng hō͘ in ê chai-hō. '
42:18 " In-ūi bān-kun ê Siōng-chú — I-su-la-el ê Siōng-tè ánne kóng, ' Góa ū án-chóaⁿ kā Góa ê siū-khì kah tōa siū-khì piàⁿ tī tòa tī Ê-lú-sa-lèm ê jîn-bîn, lín khì Ai-gi̍p ê sî, Góa mā beh chiàu ánne kā Góa ê tōa siū-khì piàⁿ tī lín ê sin chiūⁿ, hō͘ lín chiâⁿ-chò thang chiù-chó͘, thang tio̍h-kiaⁿ, thang chhoh-mē, thang lêng-jio̍k, lín mā ē bô koh khòaⁿ tio̍h chit-ê só͘-chāi. '
42:19 " Lín chiahê Iô-tah só͘ chhun lo̍h-.lâi ê jîn-bîn, Siōng-chú kóng tio̍h lín ū kóng, ' M̄-thang khì Ai-gi̍p. ' Lín tio̍h khak-si̍t chai, Góa kin-á-ji̍t chèng-bêng Góa ū kā lín khoàn-kài à.
42:20 Lín kiâⁿ phian-siâ lâi liân-lūi kakī; in-ūi lín chhe góa khì-kàu Siōng-chú — lín ê Siōng-tè hia, kóng, ' Kiû lí thè goán tùi Siōng-chú — lán ê Siōng-tè kî-tó, chiàu Siōng-chú — lán ê Siōng-tè it-chhè só͘ kóng ê kā goán kóng; goán beh chiàu ánne khì kiâⁿ. '
42:21 Góa kin-á-ji̍t ū kā lín kóng à, m̄ koh, lín ê Siōng-tè — Siōng-chú ê ōe kah I chhe góa it-chhè chí-sī lín ê, lín lóng bô chun-thàn.
42:22 Taⁿ lín tio̍h khak-si̍t chai, lín tī só͘ beh khì kià-kha ê tē, ē tùi to-kiàm, tùi ki-hng, tùi un-e̍k lâi sí. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。