耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
38:1 I-é-lí-miah tī Ko͘-tâ ê Chéⁿ-.Ni̍h
Mat-than ê kiáⁿ Si-hoa-ti-ah, Pa-si-hul ê kiáⁿ Ge-tá-lia̍h, Si-le-mi-ah ê kiáⁿ Iu-kal, Mal-ki-iah ê kiáⁿ Pa-si-hul, thiaⁿ tio̍h I-é-lí-miah tùi kûn-chiòng só͘ kóng ê ōe, kóng,
38:2 " Siōng-chú ánne kóng: Kiàn-nā tòa tī chit-ê siâⁿ lāi ê ē tùi to-kiàm, tùi ki-hng, tùi un-e̍k lâi sí; to̍k-to̍k chhut-khì kui Kal-tí-ah lâng ê ē tit tio̍h oa̍h, ē khioh tio̍h i ê sèⁿ-miā lâi oa̍h lo̍h-.khì.
38:3 Siōng-chú ánne kóng: Chit-ê siâⁿ choa̍t-tùi ē kau tī Ba-bú-lông ông kun-peng ê chhiú, i ē kā i cheng-ho̍k. "
38:4 Chiū ánne, kùi-cho̍k kā ông kóng, " Kiû lí hō͘ chit-ê lâng sí; in-ūi i tùi siâⁿ lāi chhun lo̍h-.lâi ê peng-á kah chèng lâng kóng chit khoán ê ōe, hō͘ in ê chhiú nńg. Chit-ê lâng m̄-sī kiû hō͘ jîn-bîn pêng-an, sī hō͘ in tú tio̍h chai-hō. "
38:5 Che-ti-kiah ông kóng, " Lí khòaⁿ, i tī lín ê chhiú-thâu, ông bē tàng kan-sia̍p lín siáⁿ-mi̍h tāichì. "
38:6 In chiū lia̍h I-é-lí-miah, kā i hiat tī Hap-bí-le̍k ê kiáⁿ Mal-ki-iah ê chéⁿ; hit kháu chéⁿ tī khu-liû-só͘ ê īⁿ lāi. In ēng soh-á kā I-é-lí-miah lūi lo̍h-.khì. Kó͘-chéⁿ lāi bô chúi, chí ū thô͘-môe, I-é-lí-miah chiū hām-lo̍h tī thô͘-môe tiong.
38:7 Tī ông-kiong lāi ê thài-kàm — Kú-si̍t lâng E-bia̍t-me-le̍k thiaⁿ tio̍h in kā I-é-lí-miah lūi-lo̍h chéⁿ （ hit sî, ông chē tī Biān-iá-mín mn̂g-kháu ）.
38:8 E-bia̍t-me-le̍k chiū chhut ông-kiong, tùi ông kóng,
38:9 " Góa ê chú — góa ê ông, chiahê lâng khoán-thāi I-é-lí-miah sian-ti ê lóng sī pháiⁿ, ū kā i hiat-lo̍h chéⁿ, i ē tī hia gō-.sí, in-ūi siâⁿ lāi bô bí-niûⁿ. "
38:10 Ông chiū hoan-hù Kú-si̍t lâng E-bia̍t-me-le̍k kóng, " Lí tùi chia tòa saⁿ-cha̍p lâng, thàn I-é-lí-miah sian-ti iáu-bōe sí, khì kiù i chhut chéⁿ. "
38:11 Chiū ánne, E-bia̍t-me-le̍k chhōa chiahê lâng chò-hóe khì, ji̍p-khì ông-kiong, kàu khò͘-pâng ē-bīn, tùi hia the̍h phòa-pò͘, kū saⁿ, ēng soh-á lūi lo̍h-khì kó͘-chéⁿ lāi, lâi-kàu I-é-lí-miah hia.
38:12 Kú-si̍t lâng E-bia̍t-me-le̍k kā I-é-lí-miah kóng, " Lí ēng chiahê phòa-pò͘ kah kū saⁿ, chū tī koh-ē-lang, hē tī soh-á téng-bīn. " I-é-lí-miah chiū chiàu ánne khì chò.
38:13 Án-ne, in chiū ēng soh-á kā I-é-lí-miah khiú chhut kó͘-chéⁿ. I-é-lí-miah iû-goân tòa tī khu-liû-só͘ ê īⁿ lāi.
38:14 Che-ti-kiah Ông Hiòng I-é-lí-miah Chhéng-kàu Kè-bô͘
Che-ti-kiah ông chhe lâng khì chhōa I-é-lí-miah sian-ti, ji̍p-khì Siōng-chú ê tiān ê tē-saⁿ-ê mn̂g, lâi-kàu ông hia. Ông chiū tùi I-é-lí-miah kóng, " Góa mn̄g lí chi̍t hāng sū, lí lóng m̄ thang tùi góa ún-môa. "
38:15 I-é-lí-miah ìn Che-ti-kiah kóng, " Góa nā kā lí kóng, lí kám bô beh thâi-sí góa? Góa nā chí-sī lí, lí mā bô beh thiaⁿ. "
38:16 Che-ti-kiah ông thau-thau-á tùi I-é-lí-miah chiùchōa kóng, " Hitê chhòng-chō lán ê oa̍h-miā ê Siōng-chú sī oa̍h ê, góa kí I lâi chiùchōa, góa it-tēng bô beh thâi lí, mā bē kā lí kau hō͘ chiahê siàu-siūⁿ lí sèⁿ-miā ê lâng ê chhiú. "
38:17 I-é-lí-miah tùi Che-ti-kiah kóng, " Siōng-chú — bān-kun ê Siōng-chú — I-su-la-el ê Siōng-tè ánne kóng: Lí nā chhut-khì tâu-hâng Ba-bú-lông ông ê kùi-cho̍k, lí ê sèⁿ-miā chiū ē oa̍h-.leh, chit-ê siâⁿ bē tì-kàu hō͘ hóe sio, lí kah lí ê choân ke lóng ē oa̍h-.leh.
38:18 Lí nā m̄ chhut-khì tâu-hâng Ba-bú-lông ông ê kùi-cho̍k, chit-ê siâⁿ chiū ē kau tī Kal-tí-ah lâng ê chhiú. In ē ēng hóe sio siâⁿ, lí mā bē tàng thoat-lī in ê chhiú. "
38:19 Che-ti-kiah ông tùi I-é-lí-miah kóng, " Góa kiaⁿ hiahê tâu-hâng Kal-tí-ah ê Iô-tah lâng, khióng-kiaⁿ Kal-tí-ah lâng ē kā góa kau tī in ê chhiú, in ē kā góa lêng-jio̍k. "
38:20 I-é-lí-miah kóng, " Bē lah. Kiû lí thiaⁿ góa tùi lí só͘ kóng Siōng-chú ê ōe, ánne lí chiū ē tit tio̍h lī-ek, lí ê sèⁿ-miā mā ē pó-chûn.
38:21 Lí nā m̄-khéng chhut-.khì, Siōng-chú chí-sī góa ê ōe to̍h-sī ánne:
38:22 Lí khòaⁿ, Iô-tah ông-kiong só͘ chhun lo̍h-.lâi ê chabó͘ lâng ē hō͘ lâng chhōa-khì-kàu Ba-bú-lông ông ê kùi-cho̍k hia, chiahê chabó͘ lâng ē kóng: Lí ti-kí ê pêng-iú sái-lōng lí, khah iâⁿ lí; lí ê kha lok lo̍h-khì thô͘-môe, in chiū oa̍t tńg-sin thè-.khì. "
38:23 I-é-lí-miah koh kóng, " Lâng ē kā lí chiahê bó͘ kah lí chiahê kiáⁿ, lia̍h kàu Kal-tí-ah lâng hia, lí mā bē tàng thoat-lī in ê chhiú, lí ē hō͘ Ba-bú-lông ông ê chhiú lia̍h tio̍h; lí mā ē liân-lūi tio̍h chit-ê siâⁿ siū hóe sio. "
38:24 Che-ti-kiah tùi I-é-lí-miah kóng, " M̄-thang hō͘ lâng chai chiahê ōe, lí chiū bē sí.
38:25 Kùi-cho̍k nā thiaⁿ tio̍h góa ū kah lí kóng-ōe, in chiū ē lâi chhōe lí, mn̄g lí kóng, ' Lí kā ông kóng siáⁿ-mi̍h, m̄ thang tùi goán ún-môa, goán chiū bô beh hō͘ lí sí. Ông tùi lí kóng siáⁿ-mi̍h, mā lóng tio̍h kā goán kóng. '
38:26 Lí chiū tio̍h kā in kóng, ' Góa tī ông ê bīn-chêng khún-kiû i m̄ thang hō͘ góa koh ji̍p-khì Io-ná-than ê chhù, lâi sí tī hia. '"
38:27 Āu-lâi, chèng kùi-cho̍k lâi chhōe I-é-lí-miah, mn̄g i; i chiū chiàu ông só͘ hoan-hù it-chhè ê ōe lâi ìn in. In chiū soah, bô koh kah i kóng-ōe, in-ūi sū-chêng bô lō͘-chhut.
38:28 Chiū ánne, I-é-lí-miah iû-goân tòa tī khu-liû-só͘ ê īⁿ lāi, ti̍t-kàu Ê-lú-sa-lèm siū cheng-ho̍k ê ji̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。