耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
36:1 Pa-lo-sih tī Sèng-tiān Tián Koàn Soan-tho̍k
Iô-tah ông Io-si-iah ê kiáⁿ — E-hō͘-iá-kim tē-sì nî, ū ōe tùi Siōng-chú lîm-kàu I-é-lí-miah, kóng,
36:2 " Lí tio̍h the̍h chi̍t pún chheh, kā Góa só͘ tùi lí kóng beh kong-kek I-su-la-el kah Iô-tah, í-ki̍p ta̍k kok só͘-ū ê ōe, tùi Góa kā lí kóng-ōe ê hit ji̍t khí, to̍h-sī tùi Io-si-iah hiahê ji̍t khí kàu tī kin-á-ji̍t, lóng siá tī hit lāi-bīn.
36:3 Kiám-chhái Iô-tah ke ē thiaⁿ tio̍h Góa só͘ àn-sǹg beh kàng hō͘ in ê it-chhè chai-hō, tì-sú in ē oa̍t-thâu, ta̍k lâng lī-khui i ê pháiⁿ lō͘, Góa chiū thang sià-bián in ê chōe-kò kah chōe-ok. "
36:4 I-é-lí-miah chiū kiò Nê-lé-iù ê kiáⁿ — Pa-lo-sih lâi; Pa-lo-sih chiū kā I-é-lí-miah só͘ thoân Siōng-chú tùi i kóng it-chhè ê ōe, lóng kì tī chheh-.ni̍h.
36:5 I-é-lí-miah hoan-hù Pa-lo-sih kóng, " Góa siū chó͘-gāi, bē tàng ji̍p-khì Siōng-chú ê tiān.
36:6 Lí tio̍h khì, kā góa só͘ thoân, lí só͘ siá tī chheh-.ni̍h ê Siōng-chú ê ōe, tī Siōng-chú ê tiān, tī kìm-chia̍h ê ji̍t tha̍k hō͘ chèng lâng thiaⁿ, mā tha̍k hō͘ tùi chiahê siâⁿ lâi ê Iô-tah lâng thiaⁿ.
36:7 Kiám-chhái in ē tī Siōng-chú ê bīn-chêng khiam-pi kî-tó, in ē hôe-thâu, ta̍k lâng lī-khui i ê pháiⁿ lō͘, in-ūi Siōng-chú tùi chiahê jîn-bîn só͘ kóng beh hoat-chhut ê siū-khì, hit-ê siū-khì chin tōa. "
36:8 Nê-lé-iù ê kiáⁿ — Pa-lo-sih chiū chiàu I-é-lí-miah sian-ti it-chhè só͘ hoan-hù ê khì kiâⁿ, tī Siōng-chú ê tiān, tha̍k chheh-.ni̍h só͘ kì-chài Siōng-chú ê ōe.
36:9 Iô-tah ông Io-si-iah ê kiáⁿ — E-hō͘-iá-kim gō͘ nî ê káu-.goe̍h, Ê-lú-sa-lèm ê chèng lâng kah hiahê tùi Iô-tah siâⁿ lâi-kàu Ê-lú-sa-lèm ê chèng lâng; soan-pò͘ tī Siōng-chú ê bīn-chêng kìm-chia̍h.
36:10 Hit sî, tī Siōng-chú ê tiān, su-kì Sia-hóaⁿ ê kiáⁿ — Ge-má-liah ê pâng, tī téng īⁿ, kīn Siōng-chú ê tiān, sin mn̂g ê mn̂g-kháu, Pa-lo-sih tùi hit pún chheh tha̍k I-é-lí-miah ê ōe, hō͘ chèng lâng chhin-hīⁿ lâi thiaⁿ.
36:11 Hiòng Koaⁿ-oân Soan-tho̍k
Sia-hóaⁿ ê sun — Ge-má-liah ê kiáⁿ — Mi-ka-iah thiaⁿ tio̍h chheh lāi Siōng-chú it-chhè ê ōe,
36:12 i chiū lo̍h-khì ông-kiong, ji̍p-khì su-kì ê pâng. Lí khòaⁿ, chèng kùi-cho̍k lóng chē tī hia, to̍h-sī su-kì E-lí-sia-mah, Si-má-iah ê kiáⁿ Te-la-iah, Ak-bol ê kiáⁿ El-ná-than, Sia-hóaⁿ ê kiáⁿ Ge-má-liah, Ha-na-niah ê kiáⁿ Che-ti-kiah kah só͘-ū ê kùi-cho̍k.
36:13 Chiū ánne, Mi-ka-iah tùi in kóng-khí i só͘ thiaⁿ tio̍h it-chhè ê ōe, to̍h-sī Pa-lo-sih tùi jîn-bîn tha̍k hit pún chheh ê sî i só͘ thiaⁿ tio̍h ê.
36:14 In-ūi ánne, chiahê kùi-cho̍k chiū chhe Ku-si ê kan-á-sun, Si-le-mi-ah ê sun, Ne-thá-niah ê kiáⁿ E-ho-tih kàu Pa-lo-sih hia, tùi i kóng, " Lí kā só͘ tha̍k hō͘ jîn-bîn thiaⁿ ê chheh, chhin-chhiú the̍h-lâi hō͘ góa. " Nê-lé-iù ê kiáⁿ — Pa-lo-sih chiū chhin-chhiú the̍h hit pún chheh lâi i hia.
36:15 In tùi i kóng, " Chhiáⁿ chē, tha̍k hō͘ goán thiaⁿ. " Pa-lo-sih chiū tha̍k hō͘ in thiaⁿ.
36:16 In thiaⁿ che it-chhè ê ōe, tāi-ke chiū kiaⁿ-hiâⁿ sio-khòaⁿ, kā Pa-lo-sih kóng, " Goán choa̍t-tùi beh kā chiahê ōe lóng tùi ông kóng. "
36:17 In koh mn̄g Pa-lo-sih kóng, " Chhiáⁿ lí kā goán kóng, lí ēng siáⁿ khoán lâi siá i só͘ thoân it-chhè ê ōe? "
36:18 Pa-lo-sih ìn kóng, " I chhin-chhùi tùi góa kóng chiahê ōe, góa chiū ēng pit-ba̍k siá tī chheh-.ni̍h. "
36:19 Hiahê kùi-cho̍k tùi Pa-lo-sih kóng, " Lí kah I-é-lí-miah tio̍h khì bih-.leh, m̄ thang hō͘ lâng chai lín tī tó-ūi. "
36:20 Ông Sio Chheh-koàn
Hiahê kùi-cho̍k kā hit pún hē tī su-kì E-lí-sia-mah ê pâng, chiah ji̍p-khì īⁿ lāi kìⁿ ông, kā chiahê ōe lóng kóng hō͘ ông thiaⁿ.
36:21 Ông chhe E-ho-tih khì the̍h hit pún chheh lâi; i chiū tùi su-kì E-lí-sia-mah ê pâng the̍h-.lâi. E-ho-tih tha̍k hō͘ ông thiaⁿ, mā hō͘ khiā tī ông chó-iū hiahê kùi-cho̍k thiaⁿ.
36:22 Hit sî, sī káu-.goe̍h, ông chē tī kòe kôaⁿ-thiⁿ ê chhù, bīn-thâu-chêng ū hóe-lô͘ teh to̍h.
36:23 E-ho-tih kiàn-nā tha̍k saⁿ phiⁿ á-.sī sì phiⁿ, ông chiū ēng su-kì ê to kā i koah khí-.lâi, hiat tī hóe-lô͘, kàu choân-pún lóng tī lô͘ tiong ê hóe sio-tiāu.
36:24 Ông kah thiaⁿ tio̍h chiahê ōe ê jîn-sîn, in lóng bô kiaⁿ mā bô thiah-li̍h in ê saⁿ.
36:25 El-ná-than, Te-la-iah kah Ge-má-liah, kiû ông m̄ thang sio hit pún chheh, chóng-.sī, i m̄-thiaⁿ.
36:26 Ông chiū bēng-lēng ông-chú （ Chù, goân e̍k-pún sī " Hap-bí-le̍k ê kiáⁿ"," Hap-bí-le̍k"ê goân-bûn sī " Ông " ê ì-sù ） E-la-mel, kah A-su-li-el ê kiáⁿ Se-la-iah, kah Ab-tel ê kiáⁿ Si-le-mi-ah, khì lia̍h su-kì Pa-lo-sih kah I-é-lí-miah sian-ti. Chóng-.sī, Siōng-chú kā in chhàng khí-.lâi.
36:27 I-é-lí-miah Têng Siá Chheh-koàn
Ông kā hit pún, to̍h-sī Pa-lo-sih só͘ siá I-é-lí-miah só͘ thoân ê ōe, sio-khì liáu-āu, Siōng-chú ê ōe koh lîm-kàu I-é-lí-miah, kóng,
36:28 " Lí koh the̍h chi̍t pún, kā Iô-tah ông E-hō͘-iá-kim só͘ sio chá-chêng hit pún hiahê ōe, lóng siá tī hit lāi-bīn.
36:29 Kóng tio̍h Iô-tah ông E-hō͘-iá-kim, lí tio̍h kóng: Siōng-chú ánne kóng: Lí sio hit pún, kóng, ' Lí ná ē tī hit lāi-bīn siá kóng, Ba-bú-lông ông it-tēng ē lâi húi-bia̍t chit-ê thó͘-tē, hō͘ chit só͘-chāi ê lâng kah chengseⁿ lóng sí-.khì? '
36:30 Só͘-í, Siōng-chú koan-hē Iô-tah ông E-hō͘-iá-kim, kóng: I ē bô lâng thang chē Ta-bi̍t ê pó-chō, i ê sin-si ē hông hiat-ka̍k tī gōa-bīn, ji̍t-sî hō͘ ji̍t pha̍k, àm-sî hō͘ sng tàng.
36:31 Góa beh in-ūi i kah i ê kiáⁿ-sun kah i ê jîn-sîn ê chōe-kò, kā in hêng-hoa̍t. Góa beh hō͘ Góa só͘ kóng it-chhè ê chai-hō lîm-kàu in, í-ki̍p Ê-lú-sa-lèm ê jîn-bîn kah Iô-tah lâng; chóng-.sī, in m̄-thiaⁿ. "
36:32 Chiū ánne, I-é-lí-miah koh the̍h chi̍t pún, kau hō͘ Nê-lé-iù ê kiáⁿ — su-kì Pa-lo-sih, i chiū kā I-é-lí-miah só͘ thoân ê ōe siá tī hit lāi-bīn, to̍h-sī Iô-tah ông E-hō͘-iá-kim só͘ sio-khì hit pún só͘-ū ê ōe, lēng-gōa koh thiⁿ chin chē lūi-sū ê ōe.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。