耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35:1 I-é-lí-miah kah Le-kap Cho̍k
Tng Iô-tah ông — Io-si-iah ê kiáⁿ E-hō͘-iá-kim chē-ūi ê sî, Siōng-chú ê ōe lîm-kàu I-é-lí-miah, kóng,
35:2 " Lí tio̍h khì Le-kap cho̍k ê chhù kah in kóng-ōe; chhōa in kàu Siōng-chú ê tiān, ji̍p-khì chi̍t keng pâng, ēng chiú hō͘ in lim. "
35:3 Góa chiū kā Ha-ba-ji-niah ê sun, E-le-miah ê kiáⁿ Ia-cha-niah kah i ê hiaⁿ-tī kah i ê chèng kiáⁿ, í-ki̍p Le-kap choân cho̍k ê lâng,
35:4 chhōa in lâi-kàu Siōng-chú ê tiān, ji̍p-khì Siōng-tè ê lô͘-po̍k —Ik-ta-liah ê kiáⁿ Ha-nan chèng kiáⁿ ê pâng. Hit keng pâng tī kùi-cho̍k ê pâng keh-piah, kùi-cho̍k ê pâng to̍h-sī tī Sia-lúm ê kiáⁿ pé-mn̂g ê Ma-a-se-iah ê pâng téng-bīn.
35:5 Góa chiū ēng óaⁿ, ēng poe té chiú móa-móa, pâi tī Le-kap cho̍k lâng ê bīn-chêng, kā in kóng, " Chhiáⁿ lín lim chiú. "
35:6 In chiū kóng, " Goán m̄-lim chiú, in-ūi goán ê sian-chó͘ — Le-kap ê kiáⁿ Io-Ná-tap bat hoan-hù goán kóng, ' Lín kah lín ê kiáⁿ-sun éng-oán m̄ thang lim chiú,
35:7 mā m̄ thang khí chhù, m̄ thang iā chéng, m̄ thang chai-chèng phû-tô hn̂g, m̄ thang ū chiahê; chi̍t-sì-lâng tio̍h tòa tī pò͘-pêⁿ, hō͘ lín tī lín kià-kha ê só͘-chāi tn̂g hòe-siū. '
35:8 Kiàn-nā goán sian-chó͘ — Le-kap ê kiáⁿ Io-Ná-tap hoan-hù goán ê ōe, goán lóng chun-thàn; goán kah goán ê bó͘, goán ê kiáⁿ, goán ê chabó͘ kiáⁿ, chi̍t-sì-lâng lóng bô lim chiú,
35:9 mā bô khí chhù lâi hō͘ kakī tòa, mā bô ū phû-tô hn̂g, bô ū chhân-hn̂g, bô ū chéng-chí.
35:10 To̍k-to̍k tòa tī pò͘-pêⁿ, lóng chun-thàn goán ê sian-chó͘ — Io-Ná-tap só͘ bēng-lēng ê lâi kiâⁿ.
35:11 Chóng-.sī, Ba-bú-lông ông Nep-kat-ne-chal lâi-kàu chit-ê tē ê sî, goán chiū kóng, ' Lâi, lán tio̍h chiuΝ7 Ê-lú-sa-lèm, lâi siám-phiah Kal-tí-ah lâng ê peng kah A-lâm ê peng; in-ūi ánne, goán chiah tòa tī Ê-lú-sa-lèm. "
35:12 Siōng-chú ê ōe lîm-kàu I-é-lí-miah, kóng,
35:13 " Bān-kun ê Siōng-chú — I-su-la-el ê Siōng-tè ánne kóng: Lí tio̍h khì kā Iô-tah lâng kah tòa tī Ê-lú-sa-lèm ê jîn-bîn kóng: Siōng-chú kóng: Lín kám m̄-siū kà-sī, m̄ chun-thàn Góa ê ōe?
35:14 Le-kap ê kiáⁿ Io-Ná-tap só͘ hoan-hù i ê kiáⁿ-sun m̄ thang lim chiú ê ōe, in lóng chun-siú, kàu kin-á-ji̍t mā bô lim, in-ūi in chun-thàn sian-chó͘ ê bēng-lēng. Chóng-.sī, Góa ū tùi lín kóng, chá-chá to̍h khí-lâi kóng, m̄ koh, lín m̄-thiaⁿ Góa ê ōe.
35:15 Góa mā chhe Góa ê chèng lô͘-po̍k — chiahê sian-ti lâi kìⁿ lín, chá-chá to̍h khí-lâi chhe in, kóng, ' Lín tio̍h oa̍t-thâu, ta̍k lâng lī-khui i ê pháiⁿ lō͘, kái-ōaⁿ lín ê só͘ chò, bô thàn pa̍t chióng ê sîn-bêng lâi ho̍k-sāi in, lín chiū thang tòa tī Góa só͘ siúⁿ-sù hō͘ lín kah lín chó͘-sian ê tē. ' Chóng-.sī, lín m̄ àⁿ hīⁿ-khang lâi thiaⁿ, mā m̄-thiaⁿ Góa ê ōe.
35:16 In-ūi Le-kap ê kiáⁿ — Io-Ná-tap ê kiáⁿ-sun ū chun-siú in ê sian-chó͘ só͘ kā in hoan-hù ê bēng-lēng, to̍k-to̍k chiahê jîn-bîn bô beh chun-thàn Góa!
35:17 Só͘-í, Siōng-chú — bān-kun ê Siōng-chú — I-su-la-el ê Siōng-tè ánne kóng: Lí khòaⁿ, Góa beh hō͘ Góa só͘ kóng ē kā in kong-kek ê it-chhè chai-hō lîm-kàu Iô-tah lâng kah Ê-lú-sa-lèm só͘-ū ê jîn-bîn. In-ūi Góa tùi in kóng, in bô beh chun-thàn; Góa kiò in, in bô beh ìn. "
35:18 I-é-lí-miah tùi Le-kap cho̍k ê lâng kóng, " Bān-kun ê Siōng-chú — I-su-la-el ê Siōng-tè ánne kóng: In-ūi lín chun-thàn lín ê sian-chó͘ Io-Ná-tap ê bēng-lēng, siú i it-chhè ê kài-bēng, chiàu ánne kiâⁿ it-chhè só͘ bēng-lēng lín ê,
35:19 só͘-í, bān-kun ê Siōng-chú — I-su-la-el ê Siōng-tè ánne kóng: Le-kap ê kiáⁿ Io-Ná-tap it-tēng éng-oán ū lâng khiā tī Góa ê bīn-chêng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。