耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 Hō͘ Che-ti-kiah ê Sìn-sit
Ba-bú-lông ông Nep-kat-ne-chal chhōa i só͘-ū ê kun-peng kah i só͘ koán tē-chiūⁿ ê bān-kok ta̍k cho̍k, lâi kong-kek Ê-lú-sa-lèm, í-ki̍p hiahê sio̍k i ê siâⁿ. Hit sî, Siōng-chú ê ōe lîm-kàu I-é-lí-miah, kóng,
34:2 " Siōng-chú — I-su-la-el ê Siōng-tè ánne kóng: Lí tio̍h khì kā Iô-tah ông Che-ti-kiah kóng: Siōng-chú ánne kóng: Lí khòaⁿ, Góa beh kā chit-ê siâⁿ kau tī Ba-bú-lông ông ê chhiú, i ē ēng hóe lâi sio siâⁿ.
34:3 Lí bē tàng thoat-lī i ê chhiú, it-tēng ē siū lia̍h, kau tī i ê chhiú-thâu. Lí ê ba̍k-chiu ē khòaⁿ Ba-bú-lông ông ê ba̍k-chiu, i beh kah lí chhùi tùi chhùi kóng-ōe, lí mā ē khì-kàu Ba-bú-lông.
34:4 " Iô-tah ông Che-ti-kiah, lí iáu koh tio̍h thiaⁿ Siōng-chú ê ōe. Siōng-chú kóng tio̍h lí ánne kóng: Lí it-tēng bē hō͘ to-kiàm thâi-sí, lí ē pêng-an kòe chi̍t-sì-lâng,
34:5 lâng ē ūi lí sio phang ê mi̍h, chhin-chhiūⁿ ūi tio̍h lí ê chó͘-sian, to̍h-sī kah lí í-chêng ê sian-ông só͘ sio ê kāng-khoán. Lâng ē ūi tio̍h lí ai-siong, kóng, ' Chhám ah, góa ê Chú ah. ' Siōng-chú kóng: Chit-ê ōe Góa í-keng kóng kòe à. "
34:6 Chiū ánne, I-é-lí-miah sian-ti tī Ê-lú-sa-lèm, kā che it-chhè ê ōe tùi Iô-tah ông Che-ti-kiah kóng.
34:7 Hit sî, Ba-bú-lông ông ê kun-peng teh kong-kek Ê-lú-sa-lèm, koh kong-kek Iô-tah só͘ chhun lo̍h-.lâi ê siâⁿ, to̍h-sī La̍h-ki-sih kah A-che-kah. In-ūi Iô-tah kian-kò͘ ê siâⁿ, chí ū chhun chiahê.
34:8 Ûi-pōe Tháu-pàng Lô͘-lē ê Iok
Siōng-chú ê ōe koh lîm-kàu I-é-lí-miah.
34:9 Sī in-ūi Che-ti-kiah ông kah Ê-lú-sa-lèm ê chèng lâng li̍p-iok, kā in soan-pò͘ tháu-pàng ê siau-sit, to̍h-sī ta̍k lâng tio̍h tháu-pàng i ê lô͘-po̍k, lú-pī, só͘-ū Hi-bú-lâi ê lâm-lí, hō͘ in chū-iû, bô lâng thang koh ēng i ê hiaⁿ-tī — Iô-tah lâng chò lô͘-po̍k.
34:10 Ū hūn chit-ê iok ê kùi-cho̍k kah chèng lâng, thiaⁿ tio̍h ta̍k lâng tio̍h tháu-pàng i ê lô͘-po̍k, lú-pī, hō͘ i chū-iû, bô koh ēng i chò chhe-ēng, in chiū chun-thàn lâi tháu-pàng.
34:11 Āu-lâi, chiū hō͘-hóe, hō͘ in só͘ tháu-pàng chū-iû ê lô͘-po̍k, lú-pī tò tńg-.lâi, bián-kióng in iû-goân chò lô͘-po̍k, lú-pī.
34:12 In-ūi ánne, Siōng-chú ê ōe koh lîm-kàu I-é-lí-miah, kóng,
34:13 " Siōng-chú — I-su-la-el ê Siōng-tè ánne kóng: Góa chhōa lín ê chó͘-sian tùi Ai-gi̍p tē chò lô͘-lē ê ke chhut-.lâi ê ji̍t kah in li̍p-iok, kóng,
34:14 ' Kàu tē-chhit nî, lín tio̍h ta̍k lâng tháu-pàng bē hō͘ lí ê hiaⁿ-tī — Hi-bú-lâi lâng; i í-keng ho̍k-sāi lí la̍k nî, lí tio̍h kā i tháu-pàng, lī-khui lí lâi chū-iû. ' Chóng-.sī, lín ê chó͘-sian m̄-thiaⁿ Góa ê ōe, mā bô àⁿ hīⁿ-khang lâi thiaⁿ.
34:15 Taⁿ lín í-keng kái-piàn, kiâⁿ Góa só͘ khòaⁿ-chò chèng-ti̍t ê tāichì; ta̍k lâng tùi chhù-piⁿ soan-pò͘ tháu-pàng, koh tī ēng Góa ê miâ lâi chheng-ho͘ ê chhù, tī Góa ê bīn-chêng li̍p-iok.
34:16 Chóng-.sī, lín iū-koh hō͘-hóe, siat-to̍k Góa ê miâ, ta̍k lâng hō͘ só͘ tháu-pàng tit tio̍h chū-iû ê lô͘-po̍k, lú-pī tò tńg-.lâi, bián-kióng in iû-goân chò lín ê lô͘-po̍k, lú-pī.
34:17 " Só͘-í, Góa—Siōng-chú ánne kóng: Lín bô chun-thàn Góa, ta̍k lâng tùi i ê hiaⁿ-tī, tùi i ê chhù-piⁿ soan-pò͘ tháu-pàng. Lí khòaⁿ, Góa tùi lín soan-pò͘ lēng-gōa chi̍t chióng ' tháu-pàng', to̍h-sī hō͘ lín tú tio̍h to-kiàm, un-e̍k, ki-hng, koh hō͘ lín tī thian-hā bān-kok tiong liû-lōng. Che sī Siōng-chú kóng ê.
34:18 " Kiàn-nā ûi-pōe Góa ê iok, bô chun-thàn hit-ê iok ê ōe, to̍h-sī phòa-khui gû-á lâi keng-kòe hit tiong-kan ê sî, tī Góa ê bīn-chêng só͘ li̍p ê iok,
34:19 to̍h-sī Iô-tah ê kùi-cho̍k, Ê-lú-sa-lèm ê kùi-cho̍k, í-ki̍p thài-kàm, chè-si kah kéng lāi chèng lâng, kiàn-nā tùi phòa-khui ê gû-á ê tiong-kan keng-kòe ê.
34:20 Góa beh kā in kau tī in ê tùi-te̍k ê chhiú kah siàu-siūⁿ in ê sèⁿ-miā ê lâng ê chhiú; in ê sin-si ē hō͘ khong-tiong ê poe-chiáu kah tē-chiūⁿ ê iá-siù chò chia̍h-mi̍h.
34:21 Góa koh beh kā Iô-tah ông — Che-ti-kiah kah i ê kùi-cho̍k kau tī in ê tùi-te̍k ê chhiú kah siàu-siūⁿ i ê sèⁿ-miā ê lâng ê chhiú, mā beh kau tī Ba-bú-lông ông kun-peng ê chhiú, to̍h-sī lī-khui lín khì ê.
34:22 Góa beh bēng-lēng in, hō͘ in koh lâi chit-ê siâⁿ; in ē kong-kek chit-ê siâⁿ, kā i cheng-ho̍k, ēng hóe kā i sio. Góa mā beh hō͘ Iô-tah chiahê siâⁿ pha-hng, bô lâng tòa tī hia."
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。