耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
32:1 I-é-lí-miah Kò͘-tì Chhân-hn̂g
Iô-tah ông Che-ti-kiah tē-cha̍p nî, to̍h-sī Nep-kat-ne-chal cha̍p-peh nî, ū Siōng-chú ê ōe lîm-kàu I-é-lí-miah.
32:2 Hit sî, Ba-bú-lông ông ê kun-tūi ûi-khùn Ê-lú-sa-lèm, I-é-lí-miah sian-ti koaiⁿ tī khu-liû-só͘ ê īⁿ, tī Iô-tah ông ê chhù.
32:3 In-ūi Iô-tah ông Che-ti-kiah í-keng kā i koaiⁿ-kìm, kóng, " Lí ná ē ī-giân kóng: Siōng-chú ánne kóng, ' Lí khòaⁿ, Góa beh kā chit-ê siâⁿ kau tī Ba-bú-lông ông ê chhiú, i ē kā i cheng-ho̍k.
32:4 Iô-tah ông Che-ti-kiah it-tēng bē thoat-lī Kal-tí-ah lâng ê chhiú, tiāⁿ tio̍h ē kau tī Ba-bú-lông ông ê chhiú, mā ē kah i chhùi tùi chhùi kóng-ōe, i ê ba̍k-chiu mā ē khòaⁿ i ê ba̍k-chiu.
32:5 Che-ti-kiah ē hō͘ i lia̍h kàu Ba-bú-lông, tòa tī hia, kàu góa chiàu-kò͘ i ê sî móa. Lín sûi-jiân kah Kal-tí-ah lâng kau-chiàn, mā bô lī-ek. Che sī Siōng-chú kóng ê. '"
32:6 I-é-lí-miah kóng, " Siōng-chú ê ōe lîm-kàu góa kóng,
32:7 ' Lí khòaⁿ, lí ê a-chek Sia-lúm ê kiáⁿ Ha-ná-mel beh lâi kìⁿ lí, kóng: Góa tī A-ná-thot hit khu chhân, chhiáⁿ lí lâi bé; in-ūi sio̍k-hôe ê koân chāi tī lí, lí thang bé. '"
32:8 Góa ê a-chek ê kiáⁿ Ha-ná-mel kó-jiân chiàu Siōng-chú ê ōe lâi khu-liû-só͘ ê īⁿ chhōe góa, tùi góa kóng, " Góa tī Biān-iá-mín ê kéng lāi ê A-ná-thot ê hit khu chhân, chhiáⁿ lí lâi bé; in-ūi sêng-chiap kah sio̍k-hôe ê koân chāi tī lí, lí tio̍h bé lâi chiâⁿ-chò lí ê! " Góa chiū chai che sī Siōng-chú ê ōe.
32:9 Góa chiū tùi góa ê a-chek ê kiáⁿ Ha-ná-mel bé A-ná-thot hit khu chhân, chhìn hit-ê kè-chîⁿ hō͘ i, kiōng cha̍p-chhit si-khel.
32:10 Góa tī khè-bīn chhiam-miâ, kā khè-iok su hong ba̍t, koh chhiáⁿ lâng lâi chò chèng-jîn, mā ēng thian-phêng chhìn gîn hō͘ i.
32:11 Góa chiū the̍h chiàu kui-lē só͘ li̍p ê bé-khè, to̍h-sī hong ba̍t ê hit-tiuⁿ khè-iok su kah bô hong ba̍t ê hit-tiuⁿ,
32:12 Tng góa ê a-chek ê kiáⁿ Ha-ná-mel kah chhiam-miâ tī khè-bīn chiahê chèng-jîn, í-ki̍p chē tī khu-liû-só͘ īⁿ lāi só͘-ū Iô-tah lâng ê bīn-chêng, kā bé-bē ê kè-chîⁿ kau hō͘ Ma-a-se-iah ê sun — Nê-lé-iù ê kiáⁿ Pa-lo-sih.
32:13 Tng in ê bīn-chêng, góa hoan-hù Pa-lo-sih kóng,
32:14 " Bān-kun ê Siōng-chú — I-su-la-el ê Siōng-tè ánne kóng: Lí tio̍h kā hong ba̍t ê kah bô hong ba̍t ê chit nn̄g tiuⁿ khè-iok su, siu tī hûi-khì ê lāi-bīn, thang kú-tn̂g liû-chûn.
32:15 In-ūi bān-kun ê Siōng-chú — I-su-la-el ê Siōng-tè ánne kóng: Chiong-lâi tī chit só͘-chāi, lâng ē koh bé chhù-the̍h, chhân-hn̂g kah phû-tô hn̂g. "
32:16 I-é-lí-miah ê Kî-tó
Góa kā bé-khè kau hō͘ Nê-lé-iù ê kiáⁿ Pa-lo-sih í-āu, chiū tùi Siōng-chú kî-tó, kóng,
32:17 " Chì-koân Siōng-chú ah, Lí bat ēng tōa koân-lêng kah chhun-chhut ê chhiú chhòng-chō thiⁿ-tē, chāi tī Lí, bô chi̍t hāng oh chiâⁿ ê tāichì.
32:18 Lí si chû-ài hō͘ chheng-bān lâng, koh kā lāu-pē ê chōe-kò pò-èng tī i kiáⁿ-sun ê sin chiūⁿ. Chì-tōa choân-lêng Siōng-tè, bān-kun ê I-é-ho-bah sī I ê miâ.
32:19 Lí ê kè-ōe ū tōa pún-sū, chò tāichì ū tōa koân-lêng, chù-ba̍k khòaⁿ sè-kan lâng it-chhè ê hêng-ûi, chiàu ta̍k lâng ê só͘ kiâⁿ kah in ê só͘ chò ê hāu-kó, lâi kā i pò-èng.
32:20 Tī Ai-gi̍p tē hián-chhut sîn-jiah kî-sū, it-ti̍t kàu kin-á-ji̍t; tī I-su-la-el kah pa̍t lâng ê tiong-kan mā sī ánne, hō͘ Lí tit tio̍h miâ-siaⁿ, chhin-chhiūⁿ kin-á-ji̍t ánne.
32:21 Lí ēng sîn-jiah kî-sū kah tōa koân-lêng ê chhiú, í-ki̍p chhun-chhut ê chhiú-kut kah tōa koh thang kiaⁿ ê tāichì, chhōa Lí ê chú-bîn — I-su-la-el lâng chhut Ai-gi̍p tē.
32:22 Lí kā chit-ê lâu leng kah bi̍t ê tē siúⁿ-sù hō͘ in, to̍h-sī Lí tùi in ê chó͘-sian chiùchōa beh hō͘ in ê.
32:23 In ji̍p-lâi tit tio̍h i chò sán-gia̍p, chóng-.sī, in bô chun-thàn Lí ê ōe, bô kiâⁿ Lí ê lu̍t-hoat; Lí it-chhè bēng-lēng in kiâⁿ ê, in bô kiâⁿ kah pòaⁿ-hāng, só͘-í, Lí hō͘ só͘-ū ê chai-hō lîm-kàu tī in.
32:24 " Lí khòaⁿ, ū koân ê thô͘-tui, in í-keng pek-óa chit-ê siâⁿ, beh kā i cheng-ho̍k; siâⁿ mā in-ūi to-kiàm, ki-hng, un-e̍k, kau hō͘ kong-kek i ê Kal-tí-ah lâng ê chhiú. Lí só͘ kóng ê í-keng chiâⁿ, Lí mā chhin-ba̍k khòaⁿ-.tio̍h.
32:25 Chì-koân Siōng-chú ah, Lí kā góa kóng, tio̍h ūi kakī ēng gîn bé chhân, koh chhiáⁿ lâng chò chèng-jîn. Taⁿ chit-ê siâⁿ í-keng kau tī Kal-tí-ah lâng ê chhiú à. "
32:26 Siōng-chú ê ōe lîm-kàu I-é-lí-miah, kóng,
32:27 " Lí khòaⁿ, Góa sī Siōng-chú, sī só͘-ū ū hia̍t-khì-.ê ê Siōng-tè, chāi tī Góa kám ū chi̍t hāng oh chiâⁿ ê tāichì?
32:28 Lí khòaⁿ, Góa beh kā chit-ê siâⁿ kau hō͘ Kal-tí-ah lâng ê chhiú kah Ba-bú-lông ông Nep-kat-ne-chal ê chhiú, i ē kā i cheng-ho̍k.
32:29 Kong siâⁿ ê Kal-tí-ah lâng ē pàng hóe sio chit-ê siâⁿ kah chhù-the̍h. Tī chiahê chhù téng, lâng bat ǹg Ba-al sio hiuⁿ, ǹg pa̍t-ê sîn-bêng koàn-tiān, lâi jiá Góa siū-khì.
32:30 I-su-la-el lâng kah Iô-tah lâng, tùi siàu-liân í-lâi, ngē-ngē beh kiâⁿ Góa ba̍k-chiu tiong khòaⁿ-chò pháiⁿ ê tāichì; I-su-la-el lâng choân-pō͘ ēng chhiú só͘ chò ê lâi jiá Góa siū-khì. Che sī Siōng-chú kóng ê.
32:31 Chit-ê siâⁿ tùi khí-chō ê ji̍t kàu kin-á-ji̍t, tiāⁿtiāⁿ jiá Góa siū-khì, hō͘ Góa àu-náu, tì-sú Góa kā i tû-.khì, lī-khui Góa ê bīn-chêng;
32:32 sī in-ūi I-su-la-el lâng kah Iô-tah lâng it-chhè ê siâ-ok, to̍h-sī in kah in ê kun-ông, kùi-cho̍k, chè-si, sian-ti kah Iô-tah ê kûn-chiòng, í-ki̍p tòa tī Ê-lú-sa-lèm ê jîn-bîn só͘ kiâⁿ ê, lâi jiá Góa siū-khì.
32:33 In ēng kha-chiah-phiaⁿ ǹg Góa, bô ēng bīn; Góa sûi-jiân kà-sī in, sī chá-chá to̍h khí-lâi kà-sī in, chóng-.sī, in bô chun-thàn lâi siū kà-sī.
32:34 In kèng-jiân ēng in khó-ò͘ⁿ ê mi̍h hē tī ēng Góa ê miâ só͘ chheng-ho͘ ê chhù, lâi kā i òe lahsap.
32:35 In tī Biān-hin-nóm ê soaⁿ-kok khí Ba-al ê siâⁿ-pó, beh hō͘ in ê kiáⁿ-jî keng-kòe hóe lâi kui Mô͘-lo̍k; in kiâⁿ che khó-ò͘ⁿ ê tāichì lâi hō͘ Iô-tah hām-lo̍h chōe. Che m̄-sī Góa só͘ bēng-lēng ê, mā m̄-sī Góa ê sim só͘ siūⁿ ê. "
32:36 Ho̍k-kok ê Èng-ín
Taⁿ kóng tio̍h chit-ê siâⁿ, sī lín só͘ kóng í-keng in-ūi to-kiàm, ki-hng, un-e̍k, kau tī Ba-bú-lông ông ê chhiú ê. I-su-la-el ê Siōng-tè — Siōng-chú ánne kóng,
32:37 " Lí khòaⁿ, Góa tī siū-khì, àu-náu kah tōa siū-khì ê tiong-kan, kā in kóaⁿ khì kàu ta̍k kok. Āu-lâi, Góa beh tùi hia chio-chi̍p in chhut-.lâi, chhōa in tńg-lâi chit só͘-chāi, hō͘ in an-jiân tòa tī hia.
32:38 In ē chò Góa ê chú-bîn, Góa beh chò in ê Siōng-tè.
32:39 Góa beh hō͘ in it-sim it-ì, hō͘ in tiāⁿtiāⁿ kèng-ùi Góa, hō͘ in kah in ê kiáⁿ-sun tit tio̍h hok-khì.
32:40 Góa beh kah in li̍p éng-oán ê iok, to̍h-sī bô beh oa̍t-tńg lī-khui in, sī beh sù-hok hō͘ in, koh hō͘ in chûn-sim kèng-ùi Góa, bô oa̍t-tńg lī-khui Góa.
32:41 Góa beh thiàⁿ in, sù-hok hō͘ in, Góa si̍t-chāi beh chīn-sim chīn-ì, kā in chai-pôe tī chit-ê só͘-chāi. "
32:42 Siōng-chú ánne kóng, " Góa án-chóaⁿ hō͘ chit-ê tōa ê chai-hō lîm-kàu tī chiahê jîn-bîn, Góa mā beh ánne hō͘ Góa só͘ èng-ín in it-chhè ê hok-khì lîm-kàu in.
32:43 Lín kóng: Chit-ê só͘-chāi sī pha-hng, bô lâng, bô chengseⁿ, sī kau hō͘ Kal-tí-ah lâng ê chhiú ê. Chiong-lâi lâng ē koh tī chit só͘-chāi bé chhân-hn̂g.
32:44 Tī Biān-iá-mín tē, tī Ê-lú-sa-lèm ê sì-kho͘-ûi, tī Iô-tah chiahê siâⁿ, tī soaⁿ-tē chiahê siâⁿ, tī pêng-goân chiahê siâⁿ kah tī lâm-hong chiahê siâⁿ, lâng ē ēng gîn bé chhân, tī khè-bīn chhiam-miâ, kā khè-iok su hong ba̍t, chhiáⁿ lâng chò chèng-jîn; in-ūi Góa beh hō͘ siū lia̍h ê lâng tò tńg-.lâi. Che sī Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。