耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 Siōng-chú Tùi Chú-bîn ê Èng-ín
Siōng-chú ê ōe lîm-kàu I-é-lí-miah, kóng,
30:2 " I-su-la-el ê Siōng-tè — Siōng-chú ánne kóng: Kiàn-nā Góa só͘ bat kā lí kóng ê ōe, lóng tio̍h siá tī chheh-.ni̍h.
30:3 Siōng-chú kóng: Lí khòaⁿ, ji̍t-chí teh beh kàu, Góa beh hō͘ Góa ê chú-bîn — I-su-la-el lâng kah Iô-tah siū lia̍h ê lâng tò tńg-.lâi; Góa mā beh hō͘ in tò tńg-lâi Góa só͘ siúⁿ-sù hō͘ in ê chó͘-sian ê tē, in chiū tit tio̍h chit-ê tē chò sán-gia̍p. Che sī Siōng-chú kóng ê. "
30:4 Siōng-chú kóng tio̍h I-su-la-el kah Iô-tah ê ōe, kì tī ē-té:
30:5 Siōng-chú ánne kóng: Goán ū thiaⁿ tio̍h phi̍h-phi̍h chhoah, kiaⁿ-hiâⁿ kah bô pêng-an ê siaⁿ.
30:6 Taⁿ lín tio̍h khì mn̄g khòaⁿ ū chapo͘ lâng seⁿ kiáⁿ á-bô, Góa ná ē khòaⁿ tio̍h lâng-lâng ēng chhiú ji̍h io, chhin-chhiūⁿ beh seⁿ kiáⁿ ê chabó͘ lâng, bīn lóng piàn chheⁿ?
30:7 Chhám ah! Hitê ji̍t sī tōa, bô thang pí-phēng; sī Iâ-kop tú tio̍h hoān-lān ê kî-ji̍t; chóng-.sī, i ē tit tio̍h kiù lâi thoat-chhut.
30:8 Bān-kun ê Siōng-chú ánne kóng, " Kàu hit ji̍t, Góa beh tùi lí ê ām-kún at-tn̄g i ê ka-taⁿ, chhoah-tn̄g pa̍k lí ê soh; gōa-pang lâng bô koh ēng i chò chhe-ēng.
30:9 In sī beh ho̍k-sāi in ê Siōng-tè — Siōng-chú kah in ê ông Ta-bi̍t ê, to̍h-sī Góa beh kā in heng-khí ê. "
30:10 Siōng-chú kóng: Góa ê lô͘-po̍k Iâ-kop, ánne lí m̄-bián kiaⁿ; I-su-la-el, lí m̄-bián kiaⁿ-hiâⁿ; in-ūi Góa beh tùi hn̄g ê só͘-chāi kā lí chín-kiù, mā beh tùi siū lia̍h-.khì ê tē chín-kiù lí ê kiáⁿ-sun, Iâ-kop ē tò tńg-lâi tit tio̍h an-chēng kah pêng-an, bô lâng hō͘ i tio̍h-kiaⁿ.
30:11 In-ūi Góa kah lí tông-chāi, lâi kā lí chín-kiù, mā beh kā Góa só͘ kóaⁿ lí khì-kàu hiahê kok choân-pō͘ châu-bia̍t, chóng-.sī, bô choân-pō͘ kā lí châu-bia̍t, Góa beh chiàu só͘ ha̍p-gî ê kā lí chek-pī, choa̍t-tùi bē tàng bô kā lí hêng-hoa̍t. Che sī Siōng-chú kóng ê.
30:12 Siōng-chú ánne kóng: Lí ê siong bē i-tit, lí ê siong-hûn chin siong-tiōng.
30:13 Bô lâng thè lí piān-hō͘, hō͘ lí ê siong-hûn tit tio̍h pau-chat; lí bô i-tī ê hó-io̍h.
30:14 Thiàⁿ lí ê lâng lóng bē kì-tit lí, bô lâi kā lí thàm-hóng. In-ūi lí ê chōe-kò chin tāng, chōe-ok chin chē, Góa ēng tùi-te̍k hit khoán ê phah-hoat lâi phah lí, mā ēng chân-jím-.ê ê kéng-kài, lâi kā lí kéng-kài.
30:15 Lí ná ē in-ūi lí ê siong lâi tōa-siaⁿ hoah? Lí ê thòng-khó͘ bē i-tit. In-ūi lí ê chōe-kò chin tāng, chōe-ok chin chē, só͘-í Góa ēng chiahê khoán-thāi lí.
30:16 Só͘-í, kiàn-nā thun-chia̍h lí ê ē siū thun-chia̍h; lí ê tùi-te̍k chi̍t-ê chi̍t-ê lóng hō͘ lâng lia̍h-.khì; chhiúⁿ lí ê ē hō͘ lâng chhiúⁿ, kiap lí ê Góa beh hō͘ i siū kiap.
30:17 Siōng-chú kóng: Góa beh hō͘ lí ê seng-khu ho̍k-goân, i hó lí ê siong-hûn, in-ūi lâng lóng chheng lí chò siū kóaⁿ-tio̍k ê, kóng: Che sī Si-óng, bô lâng lâi thàm-mn̄g ê.
30:18 Siōng-chú ánne kóng: Lí khòaⁿ, Góa beh hō͘ Iâ-kop siū chhian-sóa ê pò͘-pêⁿ tò tńg-.lâi, mā beh khó-liân i tòa ê só͘-chāi. Siâⁿ ē khí tī goân-kū ê chhiûⁿ-ki, ông-kiong mā chiàu kū ū lâng tòa.
30:19 Ē ū kám-siā kah khoài-lo̍k-.ê ê siaⁿ tùi in tiong-kan chhut-.lâi, Góa mā beh hō͘ in ke-thiⁿ chin chē, bē tì-kàu kiám-chió; hō͘ in chun-kùi, bē tì-kàu pi-bî.
30:20 In ê kiáⁿ-jî ē chhin-chhiūⁿ chá-chêng; in ê hōe-chiòng ē khiā chāi tī Góa ê bīn-chêng; só͘-ū ap-chè in ê Góa beh kā i pān.
30:21 In ê kun-ông it-tēng sī sio̍k tī in ê; chiáng-koán in ê ē tùi in tiong-kan chhut. Góa beh hō͘ i kīn-óa, i mā ē chhin-kīn Góa; nā m̄-sī ánne, siáⁿ lâng káⁿ hó-táⁿ chhin-kīn Góa? Che sī Siōng-chú kóng ê.
30:22 Lín ē chò Góa ê chú-bîn, Góa beh chò lín ê Siōng-tè.
30:23 Lí khòaⁿ, Siōng-chú ê siū-khì chhin-chhiūⁿ tōa hong hoat-chhut; to̍h-sī kiông-lia̍t ê kńg-lê-á hong, ē tńg-se̍h lâi kong-kek pháiⁿ lâng ê thâu-khak.
30:24 Siōng-chú ê sim só͘ gí-tiāⁿ ê iáu-bōe chò, iáu-bōe chiâⁿ ê chìn-chêng, I ê tōa siū-khì it-tēng bô siu tò-tńg; ji̍t-āu lín ē bêng-pe̍k.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。