出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 Mô͘-se Chi Koa
Hit sî, Mô͘-se kah I-su-la-el lâng chhiùⁿ chit-ê koa oló Siōng-chú, kóng: Góa beh chhiùⁿ koa oló Siōng-chú, in-ūi I chì-koân chì-tōa, I kā bé kah khiâ bé ê hiat lo̍h-khì hái tiong.
15:2 Siōng-chú sī góa ê khùi-la̍t, sī góa ê si-koa, mā sī chò góa chín-kiù ê Chú. I sī góa ê Siōng-tè, góa beh oló I, sī góa ê pē ê Siōng-tè, góa beh chun I chò tōa.
15:3 Siōng-chú sī chiàn-sū, I ê miâ kiò-chò I-é-ho-bah.
15:4 Hôa-láu ê chhia kah i ê kun-peng, Siōng-chú kā in hiat lo̍h-khì hái tiong; i te̍k-pia̍t kéng ê kun-tiúⁿ, lóng tîm tī Âng-hái.
15:5 Chhim-ian kā in khàm khí-.lâi; in chhin-chhiūⁿ chio̍h-thâu, tūi kàu chhim ê só͘-chāi.
15:6 Siōng-chú ah, Lí ê chiàⁿ chhiú tián-chhut lêng-le̍k, tit tio̍h êng-kng; Siōng-chú ah, Lí ê chiàⁿ chhiú phah-chhùi tùi-te̍k.
15:7 Lí hoat-chhut tōa ui-giâm, chhia-tó hiahê khí-lâi kong-kek Lí ê; Lí hoat-chhut tōa siū-khì, kā in sio-húi chhin-chhiūⁿ teh sio chháu.
15:8 Lí hoat-chhut phīⁿ tiong ê khùi, chúi chiū ná chhèng ná koân, tōa-chúi khiā khí-lâi chhin-chhiūⁿ kui tui chhiûⁿ; hái tiong ê chhim-chúi piàn ta tē.
15:9 Tùi-te̍k kóng, góa beh jiok in, góa beh jiok tio̍h in, góa beh pun só͘ chhiúⁿ ê mi̍h, góa beh tī in ê sin chiūⁿ lâi boán-chiok góa ê sim-goān. Góa beh poe̍h to, góa ê chhiú beh kā in siau-bia̍t.
15:10 Lí chi̍t ē pûn-hong, hái chiū kā in khàm ba̍t; in chhin-chhiūⁿ iân tîm tī tōa-chúi tiong.
15:11 Siōng-chú ah, chiahê sîn-bêng ê tiong-kan, siáⁿ lâng ē chhin-chhiūⁿ Lí? Siáⁿ lâng chhin-chhiūⁿ Lí, chì-sèng thang êng-kng, ui-giâm thang oló, kiâⁿ-chhut kî-sū?
15:12 Lí chhun-chhut chiàⁿ chhiú, tē chiū kā in thun-bia̍t.
15:13 Lí ēng Lí ê chû-ài, chhōa Lí só͘ kiù-sio̍k ê chú-bîn; Lí ēng Lí ê koân-lêng, chhōa in ji̍p-khì Lí sèng ê só͘-chāi.
15:14 Lia̍t-pang thiaⁿ-.tio̍h chiū phi̍h-phi̍h chhoah; tòa tī Hui-lī-sū tē ê, tú tio̍h thòng-khó͘.
15:15 Hit sî, E-tóm ê cho̍k-tiúⁿ tio̍h-kiaⁿ kah gāng-.khì, Mô͘-ap eng-hiông ê lâng tì-sú phi̍h-phi̍h chhoah, tòa tī Ka-nân tē ê jîn-bîn, sim lóng siau-iûⁿ.
15:16 Khióng-pò͘ kiaⁿ-hiâⁿ lîm-kàu tī in. Siōng-chú ah, in-ūi Lí ê chhiú ê tōa koân-lêng, in tiāⁿtiāⁿ chhin-chhiūⁿ chio̍h-thâu, thèng-hāu Lí ê chú-bîn keng-kòe, thèng-hāu Lí só͘ tit tio̍h ê chú-bîn kòe-.khì.
15:17 Lí ē chhōa in ji̍p-.khì, chai-pôe in tī Lí ê sán-gia̍p ê soaⁿ, Siōng-chú ah, to̍h-sī Lí ūi kakī só͘ chún-pī tòa ê só͘-chāi, Chú ah, to̍h-sī Lí ê chhiú só͘ kiàn-li̍p ê sèng-só͘.
15:18 Siōng-chú beh chò ông, it-ti̍t kàu éng-oán.
15:19 Mi-lí-ám Chi Koa
In-ūi Hôa-láu ê bé kah i ê chhia, i ê bé-peng, kàu tī hái tiong, Siōng-chú hō͘ hái chúi hoán-lâu kā in im-sí; to̍k-to̍k I-su-la-el lâng tī hái tiong kiâⁿ ta tē.
15:20 A-lông ê tōa-ché lú-sian-ti Mi-lí-ám, chhiú-.ni̍h gia̍h lin-long-kó͘, chèng chabó͘ lâng mā tòe i chhut-.khì, gia̍h lin-long-kó͘ thiàu-bú.
15:21 Mi-lí-ám hô só͘ chhiùⁿ ê kóng, Lín tio̍h chhiùⁿ koa oló Siōng-chú, in-ūi I sī chì-koân chì-tōa, kā bé kah khiâ bé ê lóng hiat lo̍h-khì hái tiong.
15:22 Mô͘-se chhōa I-su-la-el lâng tùi Âng-hái chìn-chêng kiâⁿ, in chhut-.khì, lâi-kàu Siu-l ê khòng-iá, tī khòng-iá kiâⁿ saⁿ ji̍t, chhōe bô chúi.
15:23 Lâi-kàu Mah-la̍h ê sî, Mah-la̍h ê chúi bē lim-.tit, in-ūi chúi khó͘, só͘-í kā hit só͘-chāi ê miâ kiò-chò Mah-la̍h.
15:24 Jîn-bîn chiū tùi Mô͘-se ai-oàn, kóng, " Goán beh lim siáⁿ-mi̍h? "
15:25 Mô͘-se kiû-kiò Siōng-chú, Siōng-chú chí-sī i chi̍t châng chhiū, i chiū kā hit-châng chhiū hiat lo̍h-khì chúi-.ni̍h, chúi chiū piàn kam. Siōng-chú tī hia ūi in tēng lu̍t-lē kah hoat-tō͘, tī hia kā in chhì-liān.
15:26 Koh kóng, " Lí nā tì-ì thiaⁿ Siōng-chú — lí ê Siōng-tè ê siaⁿ, koh kiâⁿ I só͘ khòaⁿ-chò ha̍p-gî ê tāichì, chù-ì thiaⁿ I ê kài-bēng, siú I it-chhè ê lu̍t-lē, góa hō͘ Ai-gi̍p lâng só͘ tú-.tio̍h ê phòa-pēⁿ, chiū it-tēng bô hō͘ lí tú-.tio̍h, in-ūi Góa sī kā lí i-tī ê Siōng-chú. "
15:27 In lâi-kàu E-lîm, tī hia ū cha̍p-jī-ê chúi-chôaⁿ, chhit-cha̍p châng ê chó chhiū, in chiū tī hia ê chúi piⁿ chat iâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。