耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 Iô-tah Jîn-bîn ê Pháiⁿ Ūn
Siōng-chú tùi góa kóng, " Sûi-jiân ū Mô͘-se kah Sa-mu-el khiā tī Góa ê bīn-chêng, thè in kiû, Góa ê sim mā bô chiàu-kò͘ chiahê jîn-bîn. Tio̍h kā in kóaⁿ lī-khui Góa ê bīn-chêng, hō͘ in chhut-.khì.
15:2 In nā tùi lí kóng, ' Goán tio̍h chhut-khì tó-ūi? ' Lí tio̍h kā in kóng: Siōng-chú ánne kóng: Kai sí ê tio̍h sí; kai hō͘ to thâi ê tio̍h hō͘ to thâi; kai tú tio̍h ki-hng ê tio̍h tú tio̍h ki-hng; kai siū lia̍h ê tio̍h hō͘ lâng lia̍h-.khì. "
15:3 Siōng-chú koh kóng, " Góa thiau-kang chhoân sì hāng lâi kā in pān, to̍h-sī to lâi thâi in, káu lâi thoa in, khong-tiong ê chiáu, tē-chiūⁿ ê iá-siù lâi chia̍h in, kā in bia̍t-tiāu.
15:4 Koh beh hō͘ in tī thian-hā bān-kok tiong liû-lōng, lóng sī in-ūi Iô-tah ông Hi-che-kia ê kiáⁿ Má-ná-se tī Ê-lú-sa-lèm só͘ kiâⁿ ê tāichì. "
15:5 Siōng-chú kóng: Ê-lú-sa-lèm lâng, siáⁿ lâng khó-liân lí? Siáⁿ lâng ūi lí pi-siong? Siáⁿ lâng oa̍t tńg-sin lâi kā lí chhéng-an?
15:6 Lí khì-choa̍t Góa, oa̍t tńg-sin thè-āu; in-ūi ánne, Góa chhun chhiú kong-kek lí, húi-hoāi lí. Góa liân-bín lí kàu ià.
15:7 Góa tī kéng lāi ta̍k-ê siâⁿ mn̂g-kháu, ēng pòa-ki kā in pòa; Góa choa̍t in ê hō͘-sû, Góa bia̍t Góa ê chú-bîn, in iû-goân bô oa̍t tńg-lâi lī-khui in ê lō͘.
15:8 In ê kóaⁿ-hū ke-thiⁿ tī Góa ê bīn-chêng, pí hái soa khah chē; Góa hō͘ chân-sat ê tiong-tàu lâi, kong-kek siàu-liân lâng ê lāu-bú, hō͘ thòng-khó͘, kiaⁿ-hiâⁿ hut-jiân lîm-kàu tī i ê sin chiūⁿ.
15:9 Seⁿ chhit-ê kiáⁿ ê chabó͘ lâng, soe-lám khùi tn̄g; tng-thâu pe̍h-ji̍t, i ê ji̍t-thâu hut-jiân lo̍h, i làu-khùi kiàn-siàu; só͘ chhun lo̍h-.lâi ê jîn-bîn, Góa beh tī in ê tùi-te̍k ê bīn-chêng, kā in kau hō͘ to-kiàm. Che sī Siōng-chú kóng ê.
15:10 I-é-lí-miah Hiòng Siōng-chú Thó͘-khùi
Góa ê lāu-bú, góa ū chai-hō à! In-ūi lí seⁿ góa chò chi̍t-ê kah choân tē sio-cheⁿ kè-kàu ê lâng. Góa pêng-sî bô ēng gîn chioh lâng lâi the̍h lī-sek, lâng mā bô ēng gîn chioh góa lâi the̍h lī-sek, chóng-.sī, lâng lóng kā góa chiù-chó͘.
15:11 Siōng-chú kóng, " Góa chin-chiàⁿ beh hō͘ lí kian-kò͘, hō͘ lí tit tio̍h hok-khì. Chai-hō, khó͘-lān lîm-kàu ê sî, góa chin-chiàⁿ beh hō͘ tùi-te̍k kiû lí.
15:12 （ Thih, to̍h-sī pak-hong ê thih kah tâng, lâng kám at ē tn̄g? ）
15:13 Siōng-chú kā góa kóng, " In-ūi lí ê chōe-ok, Góa beh tī lí ê sì-kho͘-ûi, hō͘ lí ê châi-bu̍t, pó-bu̍t pe̍h-pe̍h hō͘ lâng chhiúⁿ-.khì.
15:14 Góa mā beh hō͘ tùi-te̍k kā in lia̍h kàu lí só͘ m̄ bat ê só͘-chāi; in-ūi Góa tī siū-khì tiong ū hoat-chhut hóe, beh kā lín sio-sio-.khì. "
15:15 Góa ìn kóng, " Siōng-chú ah, Lí chai, kiû Lí kì-liām góa, chiàu-kò͘ góa, tùi hiahê pek-hāi góa ê lâng thè góa pò oan-siû; Lí khoan-iông ê sî, m̄ thang lia̍h góa-.khì, tio̍h chai góa ūi tio̍h Lí ê iân-kò͘ siū lêng-jio̍k.
15:16 Bān-kun ê Siōng-tè — Siōng-chú ah, góa tit tio̍h Lí ê ōe chiū kā i chia̍h; Lí ê ōe tī góa sī chò góa sim-lāi ê hoaⁿ-hí kah khoài-lo̍k, in-ūi góa sī kiò-chò sio̍k Lí ê miâ ê.
15:17 Góa bô chē tī iàn-lo̍k ê lâng ê hōe tiong lâi khoài-lo̍k; góa in-ūi Lí ê kám-tōng, kakī tiām-tiām chē, in-ūi Lí hō͘ siū-khì chhiong-móa góa.
15:18 Góa ê thòng-khó͘ ná ē kú-tn̂g bô soah? Góa ê siong ná ē bē i-.tit, i bē hó? Lí khoán-thāi góa kám ē chhin-chhiūⁿ khi-phiàn ê khe, khò bē chū ê chúi? "
15:19 Só͘-í, Siōng-chú ánne ìn góa kóng, " Lí nā tò tńg-.lâi, Góa chiū beh hō͘ lí tò tńg-lâi khiā tī Góa ê bīn-chêng; lí nā tùi hā-chiān ê tiong-kan kéng pó-kùi ê chhut-.lâi, lí chiū ē-tàng chò Góa ê tāi-giân-jîn. In it-tēng ē kui-ǹg lí, chóng-.sī, lí m̄ thang kui-ǹg in.
15:20 Góa beh hō͘ lí tùi chiahê jîn-bîn chiâⁿ-chò kian-kò͘ ê tâng-chhiûⁿ; in ē kong-kek lí, chóng-.sī, bē iâⁿ lí; in-ūi Góa kah lí tông-chāi, beh kā lí chín-kiù, khan-kiù lí. Che sī Siōng-chú kóng ê.
15:21 Góa beh khan-kiù lí thoat-lī pháiⁿ lâng ê chhiú, kiù-sio̍k lí thoat-lī kiông-pō ê lâng ê chhiú-thâu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。