耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Khó-phàⁿ ê Hān-chai
Koan-hē khòng-ōaⁿ ê tāichì, Siōng-chú ê ōe lîm-kàu I-é-lí-miah:
14:2 Iô-tah pi-ai, siâⁿ mn̂g soe-pāi, lâng chhēng o͘ saⁿ chē tī thô͘-kha; Ê-lú-sa-lèm pi-ai ê siaⁿ thàu kàu téng-bīn.
14:3 In ê sè-ka chhe gín'á kang khì chhiūⁿ chúi; in lâi-kàu chéⁿ piⁿ, chhōe bô chúi, chiū tòa khang ê khì-kū tò tńg-.lâi, kiàn-siàu, làu-khùi, tà thâu-khak.
14:4 Choh-chhân lâng kiàn-siàu, tà thâu-khak; sī in-ūi bô lo̍h hō͘, thó͘-tē pit li̍h.
14:5 Chhân-iá ê lo̍k-bú seⁿ kiáⁿ, chiū pàng hiat-ka̍k, in-ūi bô chháu thang chia̍h.
14:6 Iá-lî khiā tī kng liu-liu koân ê só͘-chāi, chhoán-khùi chhin-chhiūⁿ iá-káu; in-ūi bô chháu thang chia̍h, ba̍k-chiu sit-bêng.
14:7 Siōng-chú ah, goán ê chōe-kò sûi-jiân chò kiàn-chèng kò goán, iáu koh kiû Lí ūi tio̍h Lí ê miâ lâi chò tāichì. Goán tiāⁿtiāⁿ pōe-ge̍k, tek-chōe Lí.
14:8 I-su-la-el só͘ ǹg-bāng ê, tī hoān-lān tiong chò Kiù-chú ê ah, Lí ná ē tī chit só͘-chāi chhin-chhiūⁿ kià-kha ê, koh chhin-chhiūⁿ kòe-lō͘ lâng oat-lâi hioh kòe-mê?
14:9 Lí ná ē chhin-chhiūⁿ tio̍h-kiaⁿ kah gāng-.khì ê lâng, ná ē chhin-chhiūⁿ bē tàng kiù lâng ê ióng-sū? Siōng-chú ah, Lí iû-goân tī goán tiong-kan; goán mā kiò-chò sio̍k Lí ê miâ ê lâng, kiû Lí m̄ thang pàng-sak goán.
14:10 Siōng-chú tùi chiahê jîn-bîn ánne kóng, " In ài hòng-tōng, bô iok-sok in ê kha, só͘-í, Siōng-chú m̄ chiap-la̍p in. Taⁿ Góa beh ē kì-tit in ê chōe-kò, lâi pān in ê chōe-ok. "
14:11 Siōng-chú koh tùi góa kóng, " M̄-thang ūi tio̍h chiahê jîn-bîn kî-tó kiû hok-khì.
14:12 In kìm-chia̍h ê sî, Góa m̄-thiaⁿ in ê kiû-kiò; in hiàn sio-chè kah lé-mi̍h, Góa mā m̄ chiap-la̍p. Góa tian-tò beh ēng to-kiàm, ēng ki-hng, ēng un-e̍k lâi kā in châu-bia̍t. "
14:13 Góa chiū kóng, " Hāi-ah! Chì-koân Siōng-chú ah, Lí khòaⁿ, hiahê sian-ti tùi in kóng: Lín khòaⁿ bē tio̍h to-kiàm, mā bē tú tio̍h ki-hng; Siōng-chú beh tī chit-ê só͘-chāi siúⁿ-sù hō͘ lín kú-tn̂g ê pêng-an. "
14:14 Chóng-.sī, Siōng-chú ìn góa kóng, " Hiahê sian-ti thok Góa ê miâ kóng pe̍h-chha̍t, Góa bô chhe in, bô kā in hoan-hù, mā bô tùi in kóng; in thoân hō͘ lín ê sī hi-ké ê khé-sī kah chiam-pok, kah bô-iáⁿ ê tāichì, í-ki̍p in ê sim ê kúi-chà.
14:15 Só͘-í, Góa — Siōng-chú ánne kóng: Kóng tio̍h thok Góa ê miâ lâi thoân-pò͘ ê hiahê sian-ti, Góa pēng bô chhe in, in iáu koh kóng chit-ê tē bē tú tio̍h to-kiàm, ki-hng, kî-si̍t hiahê sian-ti ē tùi to-kiàm, ki-hng lâi bia̍t-bông.
14:16 Jî-chhiáⁿ thiaⁿ in thoân-pò͘ ê jîn-bîn ē in-ūi ki-hng, to-kiàm, siū hiat-ka̍k tī Ê-lú-sa-lèm ê ke-lō͘; in kah bó͘-kiáⁿ lóng bô lâng bâi-chòng; Góa beh kā in ê pháiⁿ piàⁿ tī in ê sin chiūⁿ. "
14:17 Siōng-chú hoan-hù góa tio̍h kā chit-ê ōe tùi in kóng: Goān góa ê ba̍k-sái mê-ji̍t lâu bô thêng, in-ūi góa ê jîn-bîn tú tio̍h tōa húi-siong, siū phah kàu chin thiám.
14:18 Góa nā chhut-khì chhân-.ni̍h, chiū khòaⁿ tio̍h ū hō͘ to thâi ê; góa nā ji̍p siâⁿ, chiū khòaⁿ tio̍h ū tùi ki-hng lâi phòa-pēⁿ ê; sian-ti kah chè-si tī kok lāi sì-kè kiâⁿ, mā lóng bē liáu-kái.
14:19 Jîn-bîn Khún-kiû Siōng-chú
Siōng-chú ah, Lí kám choân-pō͘ khì-sak Iô-tah? Lí ê sim kám thó-ià Si-óng? Lí ná ē phah goán, koh hō͘ goán bô thang tit tio̍h i hó? Goán ǹg-bāng pêng-an, mā bô ū hok-khì; ǹg-bāng i-tī ê ki-hōe, bô siūⁿ kóng ē tú tio̍h kiaⁿ-hiâⁿ.
14:20 Siōng-chú ah, goán jīn kakī ê chōe-ok kah goán ê chó͘-sian ê chōe-kò, in-ūi goán tek-chōe Lí.
14:21 Kiû Lí in-ūi Lí ê miâ ê iân-kò͘, m̄ thang thó-ià goán; m̄ thang lêng-jio̍k Lí êng-kng ê pó-chō. Kiû Lí tui-liām goán, m̄ thang ûi-pōe Lí kah goán só͘ li̍p ê iok.
14:22 Gōa-pang hi-ké ê sîn-bêng, kám ū chi̍t-ê ē lo̍h hō͘? Thiⁿ kám ē kakī lo̍h tōa hō͘? Siōng-chú — goán ê Siōng-tè ah, ē ánne ê, kám m̄-sī Lí? Só͘-í, goán iû-goân beh thèng-hāu Lí, in-ūi che lóng sī Lí só͘ chò ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。