耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 I-é-lí-miah kah Khè-iok
Ū ōe tùi Siōng-chú lîm-kàu I-é-lí-miah, kóng,
11:2 " Lín tio̍h thiaⁿ chit-ê iok ê ōe, kā Iô-tah lâng kah tòa tī Ê-lú-sa-lèm ê jîn-bîn kóng.
11:3 Lí tio̍h tùi in kóng: Siōng-chú — I-su-la-el ê Siōng-tè ánne kóng: Bô chun-thàn chit-ê iok ê ōe ê lâng tio̍h siū chiù-chó͘.
11:4 Chit-ê iok sī Góa chhōa lín ê chó͘-sian chhut Ai-gi̍p tē, thoat-lī chù-thih ê lô͘, hit ji̍t só͘ kā in hoan-hù ê, kóng: Lín tio̍h chun-thàn Góa ê ōe, chiàu Góa it-chhè só͘ hoan-hù ê khì kiâⁿ. Án-ne, lín chiū ē chò Góa ê chú-bîn, Góa mā chò lín ê Siōng-tè;
11:5 hō͘ Góa thang kian-kò͘ tùi lín ê chó͘-sian só͘ chiù ê chōa, siúⁿ-sù hō͘ in lâu leng kah bi̍t ê tē; tútú chhin-chhiūⁿ kin-á-ji̍t ánne. " Góa chiū ìn kóng, " Siōng-chú ah, A-men! "
11:6 Siōng-chú koh tùi góa kóng, " Lí tio̍h tī Iô-tah chiahê siâⁿ kah Ê-lú-sa-lèm ê ke-lō͘ thoân chiahê ōe, kóng: Lín tio̍h thiaⁿ chit-ê iok ê ōe, lâi chiàu ánne kiâⁿ.
11:7 In-ūi tùi Góa chhōa lín chó͘-sian chhut Ai-gi̍p hit chi̍t ji̍t kàu kin-á-ji̍t, Góa pek-chhiat kā in kéng-kài, to̍h-sī chá-chá khí-lâi kā in kéng-kài, kóng, ' Lín tio̍h chun-thàn Góa ê ōe. '
11:8 Chóng-.sī, in m̄ chun-thàn, m̄ àⁿ hīⁿ-khang lâi thiaⁿ, kèng-jiân ta̍k-ê chiàu kakī pháiⁿ ê ngē-sim khì kiâⁿ. Só͘-í, Góa hō͘ chit-ê iok it-chhè chiù-chó͘ ê ōe lîm-kàu tī in ê sin chiūⁿ; chit-ê iok sī Góa kā in hoan-hù tio̍h chiàu ánne kiâⁿ ê, m̄ koh, in bô ánne kiâⁿ. "
11:9 Siōng-chú koh tùi góa kóng, " Tī Iô-tah lâng kah Ê-lú-sa-lèm lâng ê tiong-kan ū kè-bô͘ chō-hoán ê tāichì.
11:10 In oa̍t tńg-khì kiâⁿ in ê chó͘-sian ê pháiⁿ, in ê chó͘-sian m̄-khéng thiaⁿ Góa ê ōe, in chun-thàn pa̍t chióng ê sîn-bêng lâi kā i ho̍k-sāi. I-su-la-el ê chú-bîn kah Iô-tah ke ûi-pōe Góa kah in ê chó͘-sian só͘ li̍p ê iok.
11:11 Só͘-í, Góa — Siōng-chú ánne kóng: Lí khòaⁿ, Góa beh hō͘ chai-hō lîm-kàu tī in, to̍h-sī in só͘ bē tàng tô-thoat ê. In ē tùi Góa ai-kiû, Góa m̄-thiaⁿ in ê ōe.
11:12 Hit sî, Iô-tah chiahê siâⁿ ê lâng kah tòa tī Ê-lú-sa-lèm ê jîn-bîn, beh khì ai-kiû in sio hiuⁿ lâi ho̍k-sāi hiahê sîn-bêng. Chóng-.sī, tú tio̍h hoān-lān ê sî, chiahê sîn-bêng lóng bē tàng kā in chín-kiù.
11:13 Iô-tah, lí ê sîn-bêng ê sò͘-gia̍h kah lí ê siâⁿ ê sò͘-gia̍h pêⁿ-pêⁿ; lí mā ūi tio̍h thang kiàn-siàu ê mi̍h lâi khí tôaⁿ, chiàu Ê-lú-sa-lèm chiahê ke-lō͘ ê sò͘-gia̍h, hiahê tôaⁿ to̍h-sī tī Ba-al ê bīn-chêng sio hiuⁿ ê.
11:14 Só͘-í, lí m̄ thang ūi tio̍h chiahê jîn-bîn kî-tó, m̄ thang ūi tio̍h in chhut siaⁿ kî-kiû, in-ūi in tú tio̍h hoān-lān chiah lâi ai-kiû Góa ê sî, Góa bô beh thiaⁿ in ê ōe. "
11:15 Siōng-chú kóng, " Góa só͘ thiàⁿ ê, lí í-keng piàn pháiⁿ, lí tī Góa ê chhù beh chhòng siáⁿ? Lí hē goān, hiàn bah, kám ē tû-khì lí ê chōe-ok lâi hō͘ lí hoaⁿ-hí?
11:16 Góa bat chheng lí ê miâ chò ' chheⁿ-chhùi ê kaⁿ-ná chhiū', hó khòaⁿ, mā kiat hó kóe-chí; taⁿ Góa beh ēng hōa-hōa jióng ê siaⁿ, khí hóe tī i ê téng-bīn, ki-oe mā siū at-tn̄g.
11:17 " Góa — bān-kun ê Siōng-chú, chá to̍h chai-pôe lí ê, taⁿ bēng-lēng chai-hō kong-kek lí, sī in-ūi I-su-la-el kah Iô-tah ke kiâⁿ pháiⁿ, ǹg Ba-al sio hiuⁿ, jiá Góa siū-khì; kakī chò, tio̍h kakī siū pò-èng. "
11:18 Bô͘-hāi I-é-lí-miah
Siōng-chú chí-sī góa, góa chiah chai; hit sî, I kā in só͘ kiâⁿ ê pò góa khòaⁿ.
11:19 Chóng-.sī, góa chhin-chhiūⁿ sûn-liông ê iûⁿ-á, khan kàu beh siū sat-hāi ê tē; góa pēng m̄-chai in siat-kè beh hāi góa, kóng, " Lán kā chhiū kah kóe-chí lóng bia̍t-.khì, kā i tùi oa̍h-lâng ê tē chián tû-.khì, hō͘ i ê miâ bô koh hō͘ lâng kì-liām. "
11:20 Góa kî-tó kóng, " Bān-kun ê Siōng-chú ah, Lí sī chiàu kong-gī phòaⁿ-toàn, kàm-chhat lâng ê sim-su ì-liām ê, kiû Lí hō͘ góa khòaⁿ tio̍h Lí tùi in pò-siû, in-ūi góa kā góa ê àn-kiāⁿ pín-bêng tī Lí ê bīn-chêng."
11:21 Só͘-í, Siōng-chú kóng tio̍h siàu-siūⁿ lí ê sèⁿ-miā ê A-ná-thot lâng, I ánne kóng, " In kóng: Lí m̄ thang hōng Siōng-chú ê miâ lâi ī-giân, bián-tit lí sí tī goán ê chhiú-thâu."
11:22 Só͘-í, bān-kun ê Siōng-chú ánne kóng, " Lí khòaⁿ, Góa beh kā in hêng-hoa̍t! Siàu-liân lâng ē hō͘ to thâi-sí; in ê kiáⁿ-jî ē in-ūi ki-hng lâi sí, hō͘ in bô chhun kah chi̍t-ê;
11:23 in-ūi pān-lí in ê hit nî, góa beh kàng chai-hō tī A-ná-thot lâng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。