耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Goān góa ê thâu-khak chiâⁿ-chò chúi-chôaⁿ, góa ê ba̍k-chiu chiâⁿ-chò ba̍k-sái ê goân-thâu, góa thang ūi tio̍h góa tông-pau tiong-kan siū thâi ê lâng, mê-ji̍t thî-khàu.
9:2 Goān góa tī khòng-iá ū chhut-gōa lâng hioh mê ê só͘-chāi, góa chiū thang khì-sak góa ê jîn-bîn lâi lī-khui in; in-ūi in lóng sī kiâⁿ kan-îm ê, sī kiâⁿ kúi-chà ê tóng-lūi.
9:3 In kā chi̍h kńg oan chhin-chhiūⁿ kiong lâi kóng pe̍h-chha̍t. In tī kok lāi ke-thiⁿ sè-le̍k, m̄-sī ūi tio̍h chin-si̍t, to̍h-sī pháiⁿ liáu koh pháiⁿ ê, in mā m̄ bat Siōng-tè. Che sī Siōng-chú kóng ê.
9:4 Lín ta̍k lâng tio̍h thê-hông i ê chhù-piⁿ, lóng m̄ thang sìn-khò hiaⁿ-tī; in-ūi hiaⁿ-tī choân-pō͘ lóng hō͘-siong môa-phiàn, chhù-piⁿ lóng sì-kè kiâⁿ khì húi-pòng lâng.
9:5 In ta̍k lâng khi-phiàn chhù-piⁿ, m̄-goān kóng chin-si̍t; in kà-sī in ê chi̍h kóng pe̍h-chha̍t, phah-piàⁿ chò pháiⁿ.
9:6 Siōng-chú kóng, " Lí tòa tī kúi-chà tiong; in in-ūi kúi-chà m̄-khéng jīn-bat Góa. Che sī Siōng-chú kóng ê. "
9:7 Só͘-í, bān-kun ê Siōng-chú ánne kóng: Lí khòaⁿ, Góa beh kā in iûⁿ-hòa lâi kā in toàn-liān; nā bô, Góa ūi tio̍h Góa ê chú-bîn tio̍h án-chóaⁿ chò chiah hó?
9:8 In ê chi̍h sī hāi-sí-lâng ê chìⁿ, sī kóng kúi-chà ê; lâng-lâng tùi i ê chhù-piⁿ chhùi kóng pêng-an, sim-lāi khiok teh siàu-siūⁿ i.
9:9 Góa kám bô in-ūi chiahê tāichì lâi pān in? Góa ê sim kám bô beh tùi chit khoán ê chú-bîn pò-siû? "
9:10 Góa kóng, Góa beh ūi tio̍h soaⁿ-niá thî-khàu pi-ai, ūi tio̍h khòng-iá ê chháu-tiûⁿ chhut siaⁿ ai-háu; in-ūi in í-keng sio-sio-.khì, sīm-chì bô lâng tùi hia keng-kòe. Lâng mā bô thiaⁿ tio̍h chengseⁿ ê siaⁿ, khong-tiong ê poe-chiáu kah tē-chiūⁿ ê iá-siù lóng cháu liáu-liáu.
9:11 Siōng-chú kóng: Góa beh hō͘ Ê-lú-sa-lèm piàn-chò thô͘-tui, chiâⁿ-chò iá-káu tòa ê só͘-chāi, mā beh hō͘ Iô-tah chiahê siâⁿ pha-hng, bô lâng tī hia tòa.
9:12 Góa mn̄g, " Siáⁿ lâng sī tì-hūi ê lâng thang bêng-pe̍k chit-ê ò-pì? Siōng-chú ê chhùi tùi siáⁿ lâng kóng thang hō͘ i thoân-pò? Chit-ê tē ná ē húi-bia̍t, sio-húi kah ná chhin-chhiūⁿ khòng-iá, sīm-chì bô lâng tùi hia keng-kòe? "
9:13 Siōng-chú ìn kóng, " In-ūi in khì-sak Góa tī in ê bīn-chêng só͘ siat ê lu̍t-hoat, bô thiaⁿ Góa ê ōe, mā bô chiàu ánne kiâⁿ;
9:14 To̍k-to̍k chiàu in ê ngē-sim lâi kiâⁿ, koh chun-thàn chiahê Ba-al, to̍h-sī in ê chó͘-sian só͘ kà-sī ê.
9:15 Só͘-í, I-su-la-el ê Siōng-tè ánne kóng: Lí khòaⁿ, Góa beh ēng in-tîn hō͘ chiahê jîn-bîn chia̍h, koh ēng khó͘ ê chúi hō͘ in lim.
9:16 Góa mā beh kā in sì-sòaⁿ khì tī lia̍t pang tiong, to̍h-sī in kah in ê chó͘-sian m̄ bat ê pang-kok, mā beh hō͘ to-kiàm jiok in, kàu Góa kā in choân-pō͘ châu-bia̍t ûi-chí. "
9:17 Ê-lú-sa-lèm Ai-kiû Oân-chō͘
Bān-kun ê Siōng-chú ánne kóng:Tio̍h tì-ì siūⁿ, kiò hiahê thè lâng khàu ê chabó͘ lâng lâi, mā chhe lâng khì chhōe hiahê gâu ê chabó͘ lâng, kiò in lóng lâi.
9:18 Jîn-bîn kóng: In tio̍h kóaⁿ-kín lâi, ūi lán chhut siaⁿ háu, hō͘ lán ê ba̍k-sái ti̍t-ti̍t lâu, hō͘ lán ê ba̍k-chiu phôe chhèng-chhut chúi.
9:19 In-ūi ū thiaⁿ tio̍h ai-siong ê siaⁿ tùi Si-óng chhut, kóng: Lán ná ē soe-pāi! Tōa-tōa kiàn-siàu! In-ūi lán lī-khui thó͘-tē, in-ūi lâng ū thiah-húi lán ê chhù-the̍h.
9:20 Góa kóng: Lín chiahê chabó͘ lâng tio̍h thiaⁿ Siōng-chú ê ōe, hīⁿ-khang tio̍h thiaⁿ I ê chhùi só͘ kóng ê ōe, tio̍h kà-sī lín ê chabó͘ kiáⁿ thî-khàu, ta̍k-ê tio̍h kà-sī in ê chhù-piⁿ chhiùⁿ ai-ko.
9:21 In-ūi sí-bông lâi-kàu lán ê thang-á-mn̂g, ji̍p-lâi lán ê siâⁿ-pó; tùi gōa-bīn châu-bia̍t hiahê gín'á, tùi ke-lō͘ châu-bia̍t hiahê siàu-liân lâng.
9:22 Lí tio̍h kā in kóng: Siōng-chú ánne kóng: Lâng ê sin-si ē chhin-chhiūⁿ pùn-sò hiat tī kau-iá, koh chhin-chhiūⁿ siu-koah ê lâng kha-chiah-āu só͘ ka-la̍uh chi̍t pé-á ê tiū-á, bô lâng beh khioh.
9:23 Siōng-chú ánne kóng: Tì-hūi ê lâng m̄ thang in-ūi i ê tì-hūi lâi khoa-kháu; ióng-béng ê lâng m̄ thang in-ūi i ê ióng-béng lâi khoa-kháu; hó-gia̍h ê lâng m̄ thang in-ūi i ê hó-gia̍h lâi khoa-kháu.
9:24 Kiàn-nā ài khoa-kháu ê, tio̍h in-ūi chit-ê lâi khoa-kháu, to̍h-sī i bat Góa, chai-iáⁿ Góa sī Siōng-chú, kiâⁿ chû-ài, kong-pêⁿ, kong-gī tī tē-.ni̍h ê, in-ūi Góa lia̍h chiahê chò hoaⁿ-hí. Che sī Siōng-chú kóng ê.
9:25 Siōng-chú kóng, " Lí khòaⁿ, ji̍t-chí teh beh kàu, Góa beh hêng-hoa̍t só͘-ū siū kat-lé ê kah bô siū kat-lé ê,
9:26 to̍h-sī Ai-gi̍p, Iô-tah, E-tóm, Am-móng cho̍k, Mô͘-ap lâng kah só͘-ū tòa tī khòng-iá ū thì pìn-piⁿ ê; in-ūi lia̍t kok lóng bô siū kat-lé, I-su-la-el lâng ê sim mā bô siū kat-lé. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。