耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Siōng-chú kóng, " Hit tong-sî, lâng ē kā Iô-tah lia̍t ông ê kut-hâi, kùi-cho̍k ê kut-hâi, chè-si ê kut-hâi, sian-ti ê kut-hâi kah tòa tī Ê-lú-sa-lèm ê jîn-bîn ê kut-hâi, lóng tùi bōng tiong the̍h chhut-.lâi,
8:2 pâi tī ji̍t, goe̍h kah thiⁿ ê ē-bīn, to̍h-sī in pêng-sî só͘ ì-ài, só͘ ho̍k-sāi, só͘ sūn-ho̍k, só͘ cháu-chhōe, só͘ kūi-pài ê. Chiahê kut-hâi bô koh siu-khioh, bô koh bâi-chòng, beh tī tē-bīn chiūⁿ chiâⁿ-chò pùn-sò;
8:3 jî-chhiáⁿ chit-ê pháiⁿ cho̍k só͘ chhun lo̍h-.lâi ê, to̍h-sī tī Góa kā in kóaⁿ kàu hia só͘ chhun lo̍h-.lâi ê, in lóng beh kéng sí, m̄ kéng oa̍h. Che sī bān-kun ê Siōng-chú kóng ê. "
8:4 Chōe kah Têng-hoa̍t
Siōng-chú hoan-hù góa tio̍h tùi in ánne kóng, " Lâng poa̍h-tó, kám bô koh peh khí-.lâi? Lâng oat cháu-.khì, kám bô koh oat tò tńg-.lâi?
8:5 Án-ne, chit-ê Ê-lú-sa-lèm ê jîn-bîn ê pōe-ge̍k, ná ē kú-tn̂g teh pōe-ge̍k? In kò͘-chi̍p in ê kúi-chà, m̄-khéng hôe-thâu.
8:6 Góa chù-ì thiaⁿ, chóng-.sī, in bô kóng chèng-ti̍t ê ōe, bô lâng hóe-kái in pháiⁿ ê só͘ kiâⁿ, kóng Góa chò ê sī siáⁿ-mi̍h? In ta̍k lâng tian-tò kiâⁿ kakī ê lō͘, chhin-chhiūⁿ bé pháu ji̍p-khì chiàn-tiûⁿ.
8:7 Khong-tiong ê ho̍h chai i tiāⁿ tio̍h ê kî; pan-kah, ìⁿ-á kah hái-gān lóng siú in lâi ê cheh-kùi; to̍k-to̍k Góa ê chú-bîn m̄-chai Siōng-chú ê lu̍t-hoat.
8:8 Lín ná ē kóng, goán sī tì-hūi ê lâng, Siōng-chú ê lu̍t-hoat kám ū tī goán tiong-kan? Lí khòaⁿ, keng-ha̍k kàu-su bú-lāng pit-ba̍k, hō͘ i piàn-chò ké ê.
8:9 Tì-hūi ê lâng kiàn-siàu, kiaⁿ-hiâⁿ, siū lia̍h; lí khòaⁿ, in pàng-sak Siōng-chú ê ōe, in ê sim-lāi kám iáu ū siáⁿ-mi̍h tì-hūi?
8:10 Só͘-í, Góa beh kā in ê bó͘ hō͘ pa̍t lâng, kā in ê chhân-hn̂g hō͘ pa̍t lâng lâi sêng-chiap chò sán-gia̍p; in-ūi in tùi siōng sè kàu siōng tōa ê lóng it-bī tham-sim, tùi sian-ti kàu chè-si lóng kiâⁿ kan-chà.
8:11 In chhìn-chhìn chhái-chhái i-tī Góa ê chú-bîn ê siong, kóng, ' Pêng-an lah! Pêng-an lah!' Kî-si̍t lóng bô pêng-an.
8:12 In kiâⁿ khó-ò͘ⁿ ê tāichì, kám chai kiàn-siàu? Bô, in lóng bô kám-kak kiàn-siàu, bīn mā bē âng. In-ūi ánne, in ē tī poa̍h-tó ê lâng ê tiong-kan poa̍h-tó; in siū pān ê sî ē tian-tian tó-tó. Che sī Siōng-chú kóng ê."
8:13 Siōng-chú kóng, " Góa beh kā in choân-pō͘ siau-bia̍t; phû-tô chhiū ē bô phû-tô, bû-hoa-kó chhiū ē bô bû-hoa-kó, hio̍h-á mā ē ta-.khì. Góa só͘ hō͘ in ê lóng ē bô-.khì."
8:14 Siōng-tè ê chú-bîn mn̄g, " Lán ná ē tiām-tiām teh chē? Lín tio̍h chū-chi̍p, lán chiū thang ji̍p-khì chiahê kian-kò͘ ê siâⁿ, tī hia tiām-tiām; in-ūi lán ê Siōng-tè — Siōng-chú hō͘ lán tiām-tiām, koh ēng khó͘ ê chúi hō͘ lán lim, lóng sī in-ūi lán tek-chōe Siōng-chú.
8:15 Lán ǹg-bāng pêng-an, mā bô tit tio̍h hó-chhù; ǹg-bāng ū i hó ê sî-kî, tian-tò ū kiaⁿ-hiâⁿ.
8:16 Thiaⁿ-kìⁿ tùi Tàn hia tùi-te̍k ê bé phn̄g-phn̄g háu, in ê ióng ê bé teh ki-ki háu, choân tē chiū lóng iô-tāng; in-ūi in lâi thun-bia̍t chit-ê tē, í-ki̍p hit lāi-bīn só͘-ū ê, thun-bia̍t chit-ê siâⁿ kah tòa tī kî-tiong ê jîn-bîn. "
8:17 Siōng-chú kóng, " Lín khòaⁿ, Góa beh chhe chôa kah to̍k-chôa kàu lín tiong-kan, lín bô hoat-tit kā in kóaⁿ-cháu ê ē kā lín kā. Che sī Siōng-chú kóng ê. "
8:18 I-é-lí-miah Ūi Tông-pau Pi-siong
Góa ū iu-būn, goān góa ē tit tio̍h an-ùi; góa ê sim teh beh hūn-.khì.
8:19 Lí khòaⁿ, góa ê tông-pau ai-siong ê siaⁿ tùi hn̄g-hn̄g ê só͘-chāi lâi, kóng, " Siōng-chú kám bô tī Si-óng? Si-óng ê ông kám bô tī hit lāi-bīn? " Siōng-chú kóng, " In ná ē ēng tiau-khek ê ngó͘-siōng kah gōa-pang hi-ké ê sîn-bêng lâi kek Góa ê siū-khì? "
8:20 Jîn-bîn kóng, " Siu-sêng ê sî í-keng kòe-.khì, joa̍h-thiⁿ ê ji̍t í-keng chīn, goán iáu bô tit tio̍h kiù! "
8:21 I-é-lí-miah kóng, " In-ūi góa ê tông-pau ê húi-siong, góa mā siū tio̍h húi-siong. Góa hui-siông ai-siong, kiaⁿ-hiâⁿ kā góa khîⁿ tiâu-.leh.
8:22 Tī Gi-lia̍t kám bô jú-hiuⁿ? Tī hia kám bô i-seng? Góa ê chú-bîn ná ē bē tàng tit tio̍h i hó? "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。