耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 I-é-lí-miah tī Sèng-tiān Thoân-káng Sìn-sit
Ū ōe tùi Siōng-chú lîm-kàu I-é-lí-miah, kóng,
7:2 " Lí tio̍h khiā tī Siōng-chú ê tiān ê mn̂g, tī hia soan-iông chiahê ōe, kóng: Hoān-nā sio̍k Iô-tah ji̍p chiahê mn̂g lâi kèng-pài Siōng-chú ê, tio̍h thiaⁿ Siōng-chú ê ōe.
7:3 Bān-kun ê Siōng-chú — I-su-la-el ê Siōng-tè ánne kóng: Lín tio̍h kái-chèng lín ê só͘ kiâⁿ só͘ chò, Góa chiū ē hō͘ lín tòa tī chit-ê só͘-chāi.
7:4 Lín m̄ thang óa-khò pe̍h-chha̍t ōe, kóng, ' Chiahê sī Siōng-chú ê tiān, sī Siōng-chú ê tiān, sī Siōng-chú ê tiān! '
7:5 " Lín nā choân-pō͘ kái-chèng lín ê só͘ kiâⁿ só͘ chò, tī lâng kah chhù-piⁿ ê tiong-kan chin-chiàⁿ ū kiâⁿ kong-pêⁿ,
7:6 bô pháiⁿ khoán-thāi chhut-gōa lâng kah ko͘-jî, kóaⁿ-hū, tī chit-ê só͘-chāi bô lâu bô chōe ê lâng ê hoeh, mā bô chun-thàn pa̍t chióng ê sîn-bêng lâi hām-hāi kakī,
7:7 Góa chiū ē hō͘ lín tòa tī chit-ê só͘-chāi, to̍h-sī Góa só͘ siúⁿ-sù hō͘ lín ê chó͘-sian ê tē, tùi éng-oán kàu éng-oán.
7:8 " Lí khòaⁿ, lín óa-khò pe̍h-chha̍t, bô lī-ek ê ōe.
7:9 Lín thau-the̍h, thâi lâng, kan-îm, lāmsám chiùchōa, ǹg Ba-al sio hiuⁿ, mā chun-thàn lín pêng-sî só͘ m̄ bat ê pa̍t chióng sîn-bêng,
7:10 koh lâi khiā tī Góa ê bīn-chêng, tī chit keng ēng Góa ê miâ lâi chheng-ho͘ ê chhù, kóng, ' Goán tit tio̍h kiù à! ' Αń-ne, kám m̄-sī ē hō͘ lín khì kiâⁿ chiahê khó-ò͘ⁿ ê tāichì?
7:11 Chit keng ēng Góa ê miâ lâi chheng-ho͘ ê chhù, lín kám kā i khòaⁿ-chò sī chha̍t-siū? Siōng-chú kóng: Lí khòaⁿ, Góa, Góa í-keng khòaⁿ tio̍h à.
7:12 Taⁿ lín tio̍h khì Góa tī Sī-lô ê só͘-chāi, to̍h-sī Góa khí-thâu siat-chò kiû-kiò Góa ê miâ ê só͘-chāi, khì khòaⁿ Góa in-ūi Góa ê chú-bîn — I-su-la-el lâng ê chōe-ok án-chóaⁿ khoán-thāi hit só͘-chāi. "
7:13 Siōng-chú kóng, " Taⁿ in-ūi lín kiâⁿ chiahê it-chhè ê tāichì, Góa ū tùi lín kóng, mā sī chá-chá khí-lâi kóng, m̄ koh lín m̄-thiaⁿ; Góa koh kiò lín, m̄ koh lín m̄ ìn.
7:14 Só͘-í, Góa beh kā lín khoán-thāi só͘ óa-khò chit keng ēng Góa ê miâ chheng-ho͘ ê chhù, í-ki̍p Góa só͘ siúⁿ-sù hō͘ lín kah lín ê chó͘-sian ê tē, chhin-chhiūⁿ Góa chá-chêng khoán-thāi Sī-lô ánne.
7:15 Góa mā beh kā lín kóaⁿ lī-khui Góa ê bīn-chêng, chhin-chhiūⁿ Góa bat kóaⁿ lín ê chèng hiaⁿ-tī — E-hu-laim só͘-ū ê kiáⁿ-sun."
7:16 Jîn-bîn Ûi-pōe Bēng-lēng
" Só͘-í, lí m̄ thang ūi tio̍h chiahê jîn-bîn kî-tó, m̄ thang ūi tio̍h in chhut siaⁿ kî-kiû, mā m̄ thang thè in tùi Góa kiû, in-ūi Góa bô beh thiaⁿ lí ê ōe.
7:17 In tī Iô-tah chiahê siâⁿ tiong kah Ê-lú-sa-lèm ê ke-lō͘ só͘ kiâⁿ ê, lí kám bô khòaⁿ-.tio̍h?
7:18 Kiáⁿ-jî khioh chhâ, lāu-pē hiâⁿ hóe, chabó͘ lâng chhiau mī chò piáⁿ, hiàn hō͘ thian-hō͘, koh tùi pa̍t chióng ê sîn-bêng koàn-tiān, in beh kek Góa siū-khì. "
7:19 Siōng-chú kóng, " In kám sī teh kek Góa siū-khì? Kám m̄-sī teh kek in kakī, tì-sú in ê bīn kiàn-siàu? "
7:20 Só͘-í, chì-koân Siōng-chú ánne kóng, " Lí khòaⁿ, Góa beh kā Góa ê siū-khì kah Góa ê thòng-hūn piàⁿ tī chit só͘-chāi, to̍h-sī piàⁿ tī lâng kah chengseⁿ, í-ki̍p chhân-iá ê chhiū-ba̍k kah thó͘-tē ê chhut-sán, chhin-chhiūⁿ hóe teh to̍h bē hoa. "
7:21 Bān-kun ê Siōng-chú — I-su-la-el ê Siōng-tè ánne kóng, " Tio̍h kā lín ê sio-chè chham lo̍h-khì lín chiahê chè, lâi chia̍h bah!
7:22 In-ūi Góa chhōa lín ê chó͘-sian chhut Ai-gi̍p ê ji̍t, kóng tio̍h sio-chè kah chiahê chè, Góa m̄ bat tùi in kóng-khí lâi bēng-lēng in.
7:23 Góa to̍k-to̍k kā in hoan-hù chit chi̍t hāng, kóng, ' Lín tio̍h chun-thàn Góa ê ōe, Góa chiū ē chò lín ê Siōng-tè, lín mā beh chò Góa ê jîn-bîn. Koh kiâⁿ Góa só͘-ū bēng-lēng lín ê lō͘, lín chiū thang tit tio̍h hok-khì. '
7:24 Chóng-.sī, in m̄ chun-thàn Góa, mā m̄ àⁿ hīⁿ-khang lâi thiaⁿ, kèng-jiân chiàu in ê kè-bô͘ kah pháiⁿ ê ngē-sim, thè-āu bô chìn-chêng.
7:25 Tùi lín ê chó͘-sian chhut Ai-gi̍p ê ji̍t kàu kin-á-ji̍t, Góa chhe Góa ê chèng lô͘-po̍k sian-ti kàu tī lín hia, koh ta̍k ji̍t chá-chá khí-lâi chhe in.
7:26 In iáu koh m̄-thiaⁿ Góa ê ōe, mā m̄ àⁿ hīⁿ-khang lâi thiaⁿ, tian-tò ngē in ê ām-kún, in kiâⁿ pháiⁿ pí in ê chó͘-sian khah siong-tiōng.
7:27 " Lí tio̍h kā chiahê it-chhè ê ōe tùi in kóng, chóng-.sī, in bô beh thiaⁿ lí; lí kiò in, in mā bô beh ìn lí.
7:28 Lí tio̍h tùi in kóng: Che to̍h-sī m̄ chun-thàn Siōng-chú — in ê Siōng-tè ê ōe, bô siū kàu-tok ê jîn-bîn; sêng-si̍t chiū siau-sit-.khì, tùi in ê chhùi choa̍t-tn̄g. "
7:29 Tī Biān-hin-nóm Soaⁿ-kok ê Hoān-chōe
Ê-lú-sa-lèm lâng, lí tio̍h kā lí ê thâu-mn̂g thì hiat-ka̍k! Tī kng liu-liu koân ê só͘-chāi chhiùⁿ ai-siong ê koa! In-ūi Siōng-chú í-keng khì-sak lī-khui I só͘ siū-khì ê sè-tāi.
7:30 Siōng-chú kóng, " Iô-tah ê jîn-bîn kiâⁿ Góa só͘ khòaⁿ-chò pháiⁿ ê tāichì, kā khó-ò͘ⁿ ê mi̍h chhāi tī ēng Góa ê miâ chheng-ho͘ ê chhù, kā i òe lahsap.
7:31 In tī Biān-hin-nóm ê soaⁿ-kok khí To-hu-teh soaⁿ-thâu ê tôaⁿ, thang tī hóe tiong sio in ê kiáⁿ-jî. Che m̄-sī Góa só͘ hoan-hù ê, mā m̄-sī Góa ê sim só͘ siūⁿ ê. "
7:32 Siōng-chú kóng, " In-ūi ji̍t-chí teh beh kàu, chit-ê só͘-chāi bô koh kiò-chò To-hu-teh kah Biān-hin-nóm ê soaⁿ-kok, sī beh kiò-chò thâi lâng ê soaⁿ-kok. In-ūi beh tī To-hu-teh bâi-chòng sí-lâng, it-ti̍t kàu bô chhun só͘-chāi thang tâi;
7:33 jî-chhiáⁿ chiahê jîn-bîn ê sin-si, ē hō͘ khong-tiong ê poe-chiáu kah tē-chiūⁿ ê iá-siù chò chia̍h-mi̍h, bô lâng kā i kóaⁿ-cháu.
7:34 Hit sî, tī Iô-tah chiahê siâⁿ kah Ê-lú-sa-lèm ê ke-lō͘, Góa beh hō͘ hoaⁿ-hí ê siaⁿ, khoài-lo̍k ê siaⁿ, sin-lông ê siaⁿ kah sin-niû ê siaⁿ soah-.khì, in-ūi chit-ê tē lóng ē piàn-chò pha-hng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。