耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 Ê-lú-sa-lèm ê Chōe-ok
Lín tio̍h tī Ê-lú-sa-lèm ê ke-lō͘ lâi khòaⁿ, lâi thàm-thiaⁿ, tī i khui-khoah ê só͘-chāi lâi chhōe, khòaⁿ ē tú tio̍h chi̍t-ê lâng, á-.sī ū lâng kiâⁿ kong-gī, kiû sêng-si̍t? Góa chiū beh sià-bián chit-ê siâⁿ.
5:2 In sûi-jiân kóng: Siōng-chú sī oa̍h ê, in só͘ chiù ê chōa si̍t-chāi sī ké ê.
5:3 Siōng-chú ah, Lí ê ba̍k-chiu kám m̄-sī ǹg sêng-si̍t? Lí kā in phah, in mā bô iu-siong; Lí kā in húi-bia̍t, in mā m̄-khéng siū kàu-tok. In hō͘ in ê bīn pí chio̍h khah tēng, m̄-khéng hôe-thâu.
5:4 Góa chiū kóng: Chiahê lâng si̍t-chāi sī sànchhiah, sī gû-gōng, in-ūi m̄ bat Siōng-chú ê lō͘ kah in ê Siōng-chú ê hoat-tō͘;
5:5 góa beh khì kìⁿ in ê sè-ka, kah in kóng-ōe; in-ūi in bat Siōng-chú ê lō͘ kah in ê Siōng-chú ê hoat-tō͘. M̄ koh, in tâng-sim at-tn̄g ka-taⁿ, kā pa̍k i ê soh-á phah-tn̄g.
5:6 Só͘-í, chhiū-nâ ê sai ē chhut-lâi kā in kā-sí; ê-hng sî ê chhâi-lông ē thun-chia̍h in, pà ē tī chiahê siâⁿ gōa tng-tán in, kiàn-nā chhut siâⁿ ê it-tēng ē hō͘ in thiah-chhùi, in-ūi in ê chōe-kò chin chē, pōe-ge̍k ná siong-tiōng.
5:7 Che Góa ná ē sià-bián lí? Lí ê kiáⁿ-jî lī-khui Góa, koh kí chiahê m̄-sī Siōng-chú ê lâi chiùchōa. Góa hō͘ in pá-chiok, in chiū kiâⁿ kan-îm, kui tīn chū-chi̍p tī chhiong-ki ê chhù.
5:8 In chhin-chhiūⁿ chhī pá ê bé sì-kè pháu, ta̍k-ê ǹg i chhù-piⁿ ê bó͘ chhin-chhiūⁿ bé teh ki-ki háu.
5:9 Siōng-chú kóng: Góa kám bô in-ūi chiahê tāichì lâi pān in? Góa ê sim kám bô beh tùi chit khoán jîn-bîn lâi pò-siû?
5:10 Góa beh bēng-lēng te̍k-jîn kóng, " Lín tio̍h chiūⁿ i ê phû-tô hn̂g ê chhiûⁿ lâi kā i húi-hoāi, chóng-.sī, m̄ thang choân-pō͘ húi-tiāu, tio̍h tû-khì i ê ki, in-ūi in bô sio̍k tī Siōng-chú.
5:11 In-ūi I-su-la-el ê chú-bîn kah Iô-tah ke teh tōa-tōa kiâⁿ kúi-chà, kong-kek Góa. Che sī Siōng-chú kóng ê. "
5:12 Siōng-chú Khì-sak I-su-la-el
In m̄-jīn Siōng-chú, chiū kóng, " Che pēng m̄-sī I, chai-hō ē lîm-kàu goán; goán mā bē tú tio̍h to-kiàm kah ki-hng. "
5:13 In koh kóng, " Sian-ti ê ōe ē chiâⁿ-chò hong, Chú ê ōe bô tī in ê sim; beh chiàu ánne hō͘ in tú-.tio̍h. "
5:14 Só͘-í, bān-kun ê Siōng-tè — Siōng-chú kóng, " In-ūi lín kóng chit-ê ōe, lí khòaⁿ, Góa beh hō͘ Góa ê ōe tī lí ê chhùi piàn-chò hóe, hō͘ chiahê jîn-bîn piàn-chò chhâ, chit-ê hóe ē kā in sio-bia̍t. "
5:15 Siōng-chú kóng, " I-su-la-el ê ke, lí khòaⁿ, Góa beh hō͘ chi̍t kok tùi hn̄g-hn̄g lâi kā lín kong-kek, to̍h-sī kiông ê kok, tùi kó͘-chá to̍h ū ê kok, i ê giân-gí lí bē liáu-kái, mā bē bêng-pe̍k i só͘ kóng ê.
5:16 In ê chìⁿ tē sī khui-khui ê bōng; in lóng sī ióng-sū.
5:17 In ē chia̍h-liáu lí ê ngó͘-kok kah lí ê bí-niûⁿ, to̍h-sī lí ê kiáⁿ-jî só͘ tio̍h chia̍h ê, mā ē chia̍h-liáu lí ê iûⁿ-kûn kah gû-kûn; chia̍h-liáu lí ê phû-tô kah bû-hoa-kó, koh ē ēng to húi-hoāi lí só͘ óa-khò ê kian-kò͘ ê siâⁿ. "
5:18 Siōng-chú kóng, " Chiū-sī kàu hit sî, Góa mā bô beh kā lín choân-pō͘ châu-bia̍t.
5:19 Hit sî, lín nā kóng, ' Siōng-chú — goán ê Siōng-tè sī ūi tio̍h án-chóaⁿ tùi goán kiâⁿ che it-chhè ê tāichì? ' Lí tio̍h ìn i kóng, ' Chhin-chhiūⁿ lín í-keng pàng-sak Siōng-chú, tī lín ê só͘-chāi ho̍k-sāi pa̍t chióng ê sîn-bêng, ánne, lín mā ē tī bô sio̍k lín ê só͘-chāi ho̍k-sāi gōa-pang lâng. '"
5:20 Siōng-chú Kéng-kò I ê Chú-bîn
Siōng-chú kóng, " Lín tio̍h thoân tī Iâ-kop ke, pò tī Iô-tah kóng,
5:21 Gōng-gōng bû-ti ê jîn-bîn, lín ū ba̍k-chiu m̄-khòaⁿ, ū hīⁿ-khang m̄-thiaⁿ, taⁿ lín tio̍h thiaⁿ chit-ê ōe.
5:22 Siōng-chú kóng: Lín kám m̄-kiaⁿ Góa? Kám bô tī Góa ê bīn-chêng phi̍h-phi̍h chhoah? Góa siat éng-oán ê lē, ēng soa chò hái ê kài-hān, hái chúi bē pôaⁿ-kòe soa-than. I ê éng sûi-jiân giâ koân, mā bē tàng iâⁿ-kòe; sûi-jiân hōa-hōa háu, mā bē tàng pôaⁿ-kòe.
5:23 To̍k-to̍k chiahê jîn-bîn ū chō-hoán pōe-ge̍k ê sim; in pōe-ge̍k Góa chò in khì.
5:24 In sim-lāi mā bô kóng: Taⁿ lán tio̍h kèng-ùi Siōng-chú — lán ê Siōng-tè, I chiàu-sî siúⁿ-sù hō͘-chúi, to̍h-sī chhun-hō͘ chhiu-lîm, I mā ū tēng chiahê siu-sêng ê sî-kî, lâu-.leh hō͘ lán.
5:25 Lín ê chōe-gia̍t hō͘ chiahê tāichì tian-tò lī-khui lín; lín ê chōe-ok hō͘ lín bē tàng tit tio̍h hok-khì.
5:26 " In-ūi tī Góa ê chú-bîn tiong-kan ū chhōe tio̍h pháiⁿ lâng. In bih-.leh, chhin-chhiūⁿ siat oa̍h-tauh ê lâng teh tng-tán; in tiuⁿ lô-bāng lâi lia̍h lâng.
5:27 In ê chhù ū kúi-chà móa-móa, sī chhin-chhiūⁿ chiáu-lang lāi ū chiáu-á móa-móa; só͘-í, in chiâⁿ-chò tōa koh hó-gia̍h.
5:28 In pûi koh bô jiâu-bûn, chò pháiⁿ kòe-thâu, bô ūi tio̍h lâng sin-oan! Chiū-sī bô ūi tio̍h ko͘-jî sin-oan, hō͘ i heng-thong, mā bô ūi tio̍h sànchhiah lâng phòaⁿ-toàn.
5:29 " Góa kám bô in-ūi chiahê tāichì lâi pān in? Góa ê sim kám bô beh tùi chit khoán ê jîn-bîn lâi pò-siû? "
5:30 Chit-ê thó͘-tē ū kî-ī khó-ò͘ⁿ ê tāichì;
5:31 sian-ti thoân hi-ké, chè-si óa-khò in lâi pà-koân; Góa ê chú-bîn mā ài i ánne, kàu kiat-kio̍k, lín beh án-chóaⁿ chò?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。