耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Ho͘-tiàu I-su-la-el Hóe-kái
Siōng-chú kóng, " I-su-la-el lâng, lí nā khéng tò tńg-.lâi, chiū tò tńg-lâi góa chia; nā tùi Góa ê bīn-chêng tû-khì lí khó-ò͘ⁿ ê tāichì, mā bô chhìn-chhái kiâⁿ.
4:2 Μā chiàu sêng-si̍t, kong-pêⁿ, kong-gī, kí Siōng-chú éng-oán ê oa̍h-miā lâi chiùchōa; lia̍t kok chiū ē tùi I lâi kakī kiû hok-khì, mā ē in-ūi I lâi khoa-kháu. "
4:3 Siōng-chú tùi Iô-tah lâng kah Ê-lú-sa-lèm ánne kóng, " Tio̍h khai-khún lín ê thó͘-tē, m̄ thang iā chéng tī chhì-phè lāi.
4:4 Tòa tī Iô-tah kah Ê-lú-sa-lèm ê jîn-bîn, lín tio̍h kā pún-sin kiâⁿ kat-lé, kui tī Siōng-chú; tû-khì sim-lāi ê su-io̍k; chiah bián-tit góa ê siū-khì in-ūi lín só͘ kiâⁿ ê pháiⁿ lâi hoat-chok, chhin-chhiūⁿ hóe to̍h khí-.lâi, sīm-chì bô lâng ē-tàng phah-hoa."
4:5 Gōa-hoān Ui-hia̍p Iô-tah
Lín tio̍h tī Iô-tah thoân, tī Ê-lú-sa-lèm pò-iông, kóng: Lín tio̍h tī kok lāi pûn sàu-kak, tōa-siaⁿ hoah: Lín tio̍h chū-chi̍p, lán thang chìn-ji̍p kian-kò͘ ê siâⁿ.
4:6 Eng-kai ǹg Si-óng khiā tōa kî. Tio̍h tô-cháu, m̄ thang thêng-kha; in-ūi Góa beh hō͘ chai-hō kah tōa ê húi-hoāi tùi pak-hong lâi.
4:7 Ū sai tùi ām ê chhiū-nâ tiong chiūⁿ-.lâi, húi-hoāi lia̍t kok ê, i í-keng chhut-hoat, lī-khui i ê pún só͘-chāi; beh hō͘ lí ê tē pha-hng, hō͘ lí ê siâⁿ hong-hùi, bô lâng tòa.
4:8 Ūi tio̍h ánne, lín ê io tio̍h hâ môa-pò͘, tōa-siaⁿ thî-khàu; in-ūi Siōng-chú ê tōa siū-khì bô beh tùi lán oa̍t tò tńg-.khì.
4:9 Siōng-chú kóng, " Kàu hit ji̍t, kun-ông ê sim kah kùi-cho̍k ê sim lóng ē siau-bia̍t; chè-si lóng ē chheⁿ-kiaⁿ, sian-ti lóng ē tio̍h-kiaⁿ kah gāng-.khì. "
4:10 Góa kóng, " Ai-ah, chì-koân Siōng-chú ah, Lí chin-chiàⁿ sī tōa-tōa khi-phiàn chiahê jîn-bîn kah Ê-lú-sa-lèm, kā in kóng, ' Lín ē tit tio̍h pêng-an', kî-si̍t to-kiàm hāi tio̍h in ê sèⁿ-miā. "
4:11 Hit sî, ū ōe ē tùi chiahê jîn-bîn kah Ê-lú-sa-lèm kóng, " Ē ū jia̍t-jia̍t ê hong, tùi khòng-iá kng liu-liu koân ê só͘-chāi, ǹg Góa ê chú-bîn chhoe-.lâi, m̄-sī beh pòa i, mā m̄-sī beh hō͘ i chheng-khì.
4:12 Ē ū koh khah tōa ê hong ūi tio̍h Góa chhoe-.lâi; taⁿ Góa koh beh hoat-chhut phòaⁿ-sû lâi kā in kong-kek. "
4:13 Iô-tah hō͘ Te̍k-jîn Ûi-khùn
Lí khòaⁿ, i ē chhin-chhiūⁿ hûn khí-.lâi; i ê chiàn-chhia chhin-chhiūⁿ kńg-lê-á hong, i ê bé pí eng-chiáu khah kín. Ū chai-hō à! In-ūi lán teh beh bia̍t-bông ā.
4:14 Ê-lú-sa-lèm, lí tio̍h sé-chheng lí ê sim, tû-khì pháiⁿ, hō͘ lí thang tit tio̍h kiù. Pháiⁿ liām-thâu chûn tī lí ê sim-lāi, beh kàu tang-sî?
4:15 Ū siaⁿ tùi Tàn thoân-pò, tùi E-hu-laim soaⁿ pò chai-hō.
4:16 Lín tio̍h thoân hō͘ lia̍t kok, pò-kò kong-kek Ê-lú-sa-lèm ê tāichì, kóng, " Ū beh ûi-khùn siâⁿ ê, tùi hn̄g-hn̄g ê só͘-chāi lâi, chhut in ê siaⁿ, kong-kek Iô-tah chiahê siâⁿ.
4:17 In sì-kho͘-ûi kā i kong-kek chhin-chhiūⁿ kò͘ hn̂g ê lâng. In-ūi i pōe-poān góa. Che sī Siōng-chú kóng ê.
4:18 Iô-tah lâng, lí ê só͘ kiâⁿ, lí ê só͘ chò, tì-sú lí ū chiahê tāichì; che sī lí ê chōe-ok, si̍t-chāi sī khó͘, sī hāi tio̍h lí ê sim. "
4:19 I-é-lí-miah Tam-iu Tông-pau
Góa ê sim-tn̂g, góa ê sim-tn̂g, góa ê sim thàng-thiàⁿ, góa ê sim tī góa ê lāi-bīn iu-būn. Góa bē tàng tiām-tiām bô kóng-ōe, in-ūi góa í-keng thiaⁿ tio̍h sàu-kak ê siaⁿ, kau-chiàn ê hoah-hiàm.
4:20 Lâng teh pò húi-hoāi, koh húi-hoāi; in-ūi choân tē pāi-hoāi, góa ê pò͘-pêⁿ hut-jiân pāi-hoāi, góa ê tiùⁿ-ûi chi̍t-sî-á to̍h phòa-li̍h.
4:21 Góa khòaⁿ tio̍h tōa kî, thiaⁿ tio̍h sàu-kak ê siaⁿ; beh kàu gōa kú?
4:22 Góa ê jîn-bîn gû-gōng, m̄ bat góa; in sī gû-gōng bô chhong-bêng ê kiáⁿ; kiâⁿ pháiⁿ to̍h gâu, kiâⁿ hó to̍h han-bān.
4:23 I-é-lí-miah Ī-giân Chiong-lâi ê Húi-bia̍t
Sian-ti kóng: Góa khòaⁿ tē, lí khòaⁿ, tē sī khang-khang hūn-tūn; góa khòaⁿ thiⁿ, thiⁿ mā bô kng.
4:24 Góa khòaⁿ hiahê tōa soaⁿ, lí khòaⁿ, in lóng tín-tāng, sió soaⁿ mā lóng iô lâi iô-khì.
4:25 Góa koh khòaⁿ, lí khòaⁿ, lóng bô lâng; khong-tiong ê poe-chiáu, mā lóng poe cháu-.khì.
4:26 Góa koh khòaⁿ, lí khòaⁿ, pûi ê chhân piàn-chò pha-hng ê tē; só͘-ū ê siâⁿ tī Siōng-chú ê bīn-chêng, in-ūi I ê tōa siū-khì, choân-pō͘ tó-hoāi.
4:27 In-ūi Siōng-chú ánne kóng, " Choân tē it-tēng pha-hng, chóng-.sī, Góa bô beh húi-bia̍t kàu chīn.
4:28 In-ūi ánne, tē ē iu-būn, thiⁿ-téng mā ē o͘-àm; Góa í-keng kóng à, í-keng kā i tiāⁿ tio̍h, it-tēng bô hō͘-hóe, mā bô oa̍t-tńg ê ì-sù, bô beh ánne chò. "
4:29 Ta̍k-ê siâⁿ ê lâng in-ūi bé-peng kah siā chìⁿ ê lâng ê hōa-hōa háu, chiū lóng tô-cháu, chìn ji̍p-khì chhiū-nâ, peh-chiūⁿ chio̍h-pôaⁿ téng; ta̍k-ê siâⁿ tú tio̍h siū khì-sak, bô lâng tòa.
4:30 Lí soe-pāi ê sî beh án-chóaⁿ chò? Sûi-jiân chhēng chu-âng ê saⁿ, ēng kim-khì táⁿ-pān, ēng sek-liāu ōe lí ê ba̍k-chiu, ánne tián hó khòaⁿ, sī khang-khang! Loân-ài lí ê khòaⁿ-khin lí, koh siàu-siūⁿ lí ê sèⁿ-miā.
4:31 In-ūi góa thiaⁿ tio̍h chhin-chhiūⁿ seⁿ kiáⁿ ê chabó͘ lâng ê siaⁿ, chhin-chhiūⁿ seⁿ tōa-kiáⁿ ê kan-khó͘, to̍h-sī Si-óng chabó͘ kiáⁿ ê siaⁿ, i chhoán tōa khùi, thí-khui chhiú, kóng, " Góa ū chai-hō à, in-ūi góa ê sîn-hûn ūi tio̍h thâi lâng ê lâi hūn-.khì."
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。