耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Put-tiong ê I-su-la-el
Siōng-chú kóng, " Lâng nā lî i ê bó͘, bó͘ chiū lī-khui i khì kè pa̍t lâng, i chá-chêng ê tiōng-hu kám thang koh chhin-kīn i? Nā ánne, hit-ê só͘-chāi kám bô bak tio̍h lahsap? Chóng-.sī, lí kah chin chē chhin-ài ê kiâⁿ kan-îm, iáu koh thang kui tī Góa. Che sī Siōng-chú kóng ê.
3:2 Lí tio̍h gia̍h thâu khòaⁿ chiahê kng liu-liu ê koân só͘-chāi, tī tó-ūi bô ū îm-hēng? Lí chē tī lō͘ piⁿ teh thèng-hāu, chhin-chhiūⁿ A-la-puh lâng tī khòng-iá ánne, koh ēng lí ê îm-hēng, siâ-ok kā choân tē òe lahsap.
3:3 In-ūi ánne, hó ê hō͘-chúi thêng-chí, chhun-thiⁿ ê hō͘ bô koh lo̍h. Lí iáu ū chhiong-ki ê bīn, m̄-chai kiàn-siàu.
3:4 Lí ná ē m̄ chit sî kiò Góa kóng, ' Góa ê Pē ah, Lí sī Góa siàu-liân ê sî ín-chhōa góa ê?
3:5 Lí kám éng-oán khǹg siū-khì, lâu kàu lō͘-bóe? ' Lí khòaⁿ, lí iáu koh chīn lí só͘ ē ê teh kiâⁿ pháiⁿ. "
3:6 I-su-la-el kah Iô-tah Tio̍h Hóe-kái
Tng Io-si-iah ông chē-ūi ê sî, Siōng-chú koh tùi góa kóng, " Pōe-ge̍k ê I-su-la-el só͘ chò ê, lí ū khòaⁿ tio̍h bô? I chiūⁿ chiahê koân soaⁿ, tī só͘-ū chheⁿ-chhùi ê chhiū kha kiâⁿ kan-îm.
3:7 I kiâⁿ chiahê tāichì í-āu, Góa kóng: I ē kui-óa góa, chóng-.sī, i bô, i kan-chà ê sió-mōe — Iô-tah mā ū khòaⁿ-.tio̍h.
3:8 Pōe-ge̍k ê I-su-la-el teh kiâⁿ kan-îm, Góa ūi tio̍h chit-ê iân-kò͘ hō͘ i lî-hun-su, kā i lī-hun; Góa khòaⁿ tio̍h i kan-chà ê sió-mōe Iô-tah, iû-goân bô kiaⁿ, mā sī khì kiâⁿ îm.
3:9 I sûi-piān chiàu ánne kiâⁿ ê îm-loān, chiū kā chit-ê só͘-chāi òe lahsap, chiū kah chio̍h-thâu, chhâ-thâu kiâⁿ kan-îm.
3:10 Sûi-jiân ū chiahê it-chhè ê tāichì, i kan-chà ê sió-mōe Iô-tah iû-goân bô choan-sim kui-ǹg Góa, chí-put-kò sī ké-ì niā-niā. Che sī Siōng-chú kóng ê. "
3:11 Siōng-chú tùi góa kóng, " Pōe-ge̍k ê I-su-la-el, pí kan-chà ê Iô-tah, iáu khah ū gī.
3:12 Lí tio̍h khì ǹg pak-hong thoân chiahê ōe, kóng, ' Siōng-chú kóng: Pōe-ge̍k ê I-su-la-el, lín tio̍h tò tńg-.lâi! Góa bô beh ēng siū-khì ê ba̍k-chiu khòaⁿ lín; in-ūi Góa sī chû-ài ê, Góa bô beh éng-oán khǹg siū-khì. Che sī Siōng-chú kóng ê. '
3:13 To̍k-to̍k lí tio̍h jīn lí ê chōe, to̍h-sī lí ûi-pōe Siōng-chú — lí ê Siōng-tè; tī só͘-ū chheⁿ-chhùi ê chhiū kha, cháu tang cháu sai khì chhōe pa̍t-ê sîn-bêng, bô chun-thàn Góa ê ōe, che sī Siōng-chú kóng ê. "
3:14 Siōng-chú kóng, " Pōe-ge̍k ê kiáⁿ-jî, lín tio̍h tò tńg-.lâi! In-ūi Góa chò lín ê tiōng-hu, jî-chhiáⁿ Góa beh kā lín tùi chi̍t-ê siâⁿ chhú chi̍t-ê lâng, tùi chi̍t cho̍k chhú nn̄g-ê lâng, chhōa kàu Si-óng.
3:15 Góa beh kā ha̍h Góa ê sim ê bo̍k-chiá siúⁿ-sù hō͘ lín. In ē ēng tì-sek kah tì-hūi iúⁿ-chhī lín.
3:16 " Lín tī kok lāi seⁿ-thòaⁿ chin chē; tng hiahê ji̍t-chí, lâng bô beh koh kóng-khí Siōng-chú ê iok-kūi, mā bô beh kì tī sim-lāi, lóng bē kì-.tit, lóng bô khì chhōe, mā bô koh chò iok-kūi.
3:17 Hit sî, lâng ē chheng Ê-lú-sa-lèm chò Siōng-chú ê pó-chō; bān-kok ē chū-chi̍p kàu hia, to̍h-sī in-ūi Siōng-chú ê miâ lâi-kàu Ê-lú-sa-lèm. In bô koh chiàu kakī pháiⁿ ê ngē-sim chò tāichì.
3:18 Tng hiahê ji̍t-chí, Iô-tah ke ē kah I-su-la-el ê jîn-bîn tâng kiâⁿ; tùi pak-hong ê tē chò-hóe lâi, kàu Góa siúⁿ-sù hō͘ lín ê chó͘-sian chò sán-gia̍p ê tē. "
3:19 Siōng-chú ê Chú-bîn Pài Ngó͘-siōng
Chóng-.sī, Siōng-chú kóng: Góa ná ē thang kā lín pâi-lia̍t tī chiahê kiáⁿ ê tiong-kan, kā hó ê tē siúⁿ-sù hō͘ lí, to̍h-sī lia̍t kok tiong siōng hó ê sán-gia̍p? Góa koh kóng, Lín tio̍h chheng Góa kóng, " Góa ê Pē ah", mā bô koh tò tńg-.khì, m̄-tòe Góa.
3:20 I-su-la-el ê chú-bîn, lín tùi Góa kiâⁿ kan-chà, chin-chiàⁿ chhin-chhiūⁿ chabó͘ lâng kiâⁿ kan-chà lī-khui i ê tiōng-hu. Che sī Siōng-chú kóng ê.
3:21 Tī kng liu-liu koân ê só͘-chāi thiaⁿ tio̍h siaⁿ, to̍h-sī I-su-la-el lâng thî-khàu khún-kiû ê siaⁿ; to̍h-sī in-ūi in kiâⁿ siâ-ok ê lō͘, bē kì-tit in ê Siōng-tè — Siōng-chú.
3:22 Lín chiahê pōe-ge̍k ê kiáⁿ-jî, lín tio̍h tò tńg-.lâi; Góa ē i hó lín ê pōe-ge̍k. Lín ìn kóng, " Lí khòaⁿ, goán lâi-kàu Lí chia, in-ūi Lí sī goán ê Siōng-tè — Siōng-chú.
3:23 Tùi sió soaⁿ á-.sī tōa soaⁿ ê lāu-jia̍t, ǹg-bāng tit tio̍h pang-chān, si̍t-chāi sī khang-khang; I-su-la-el ê tit tio̍h kiù, chin-chiàⁿ chāi tī goán ê Siōng-tè — Siōng-chú.
3:24 Tùi goán siàu-liân í-lâi, hit-ê thang kiàn-siàu ê tāichì, kā goán ê chó͘-sian só͘ lô-khó͘ lâi tit tio̍h ê, to̍h-sī in ê iûⁿ-kûn, gû-kûn kah in ê kiáⁿ-jî, lóng thun-chia̍h-.khì.
3:25 Goán tó tī goán ê kiàn-siàu tiong, goán ê lêng-jio̍k jia-khàm goán; in-ūi tùi siàu-liân kàu taⁿ, goán kah goán ê chó͘-sian tiāⁿtiāⁿ tek-chōe goán ê Siōng-tè, bô chun-thàn goán ê Siōng-tè — Siōng-chú ê siaⁿ. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。