以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
60:1 Ê-lú-sa-lèm Chiong-lâi ê Êng-iāu
Khí-.lâi, hoat-chhut kng! In-ūi lí ê kng í-keng kàu! Siōng-chú ê êng-kng chhut-hiān, chiò tī lí ê téng-bīn.
60:2 Lí khòaⁿ, o͘-àm jia-khàm choân tē, tōa o͘-àm jia-khàm lia̍t kok; chóng-.sī, Siōng-chú beh hián-hiān chiò lí, I ê êng-kng beh chhut-hiān tī lí ê sin chiūⁿ.
60:3 Lia̍t kok beh lâi kìⁿ lí ê kng, kun-ông beh lâi kìⁿ lí hián-hiān ê tōa kng.
60:4 Lí gia̍h thâu khòaⁿ sì-hng, in lóng chū-chi̍p lâi lí chia. Lí ê chèng kiáⁿ tùi hn̄g-hn̄g lâi; lí ê chèng chabó͘ kiáⁿ mā beh hō͘ lâng phō-.lâi.
60:5 Hit sî, lí khòaⁿ tio̍h chiū ū êng-kng; lí ê sim tio̍h-kiaⁿ kah gāng-.khì, koh tōa khui-khoah, in-ūi tōa hái hong-sēng ê châi-bu̍t ē tò tńg-lâi kui lí, lia̍t kok ê châi-pó mā ē lâi kui lí.
60:6 Kui tīn ê lo̍k-tô kah Mí-tiân í-ki̍p E-hoah toaⁿ-lêng ê lo̍k-tô, beh phiàn-móa tī lí ê kéng lāi; Sí-bah ê kûn-chiòng lóng beh kàu; beh tòa n̂g-kim, jú-hiuⁿ lâi, mā beh pò-thoân Siōng-chú ê miâ-siaⁿ.
60:7 Ke-tal ê iûⁿ-kûn lóng beh chū-chi̍p kàu lí chia, Ne-bá-iot ê kang mî-iûⁿ beh chò lí ê lō͘-ēng, tī Góa ê tôaⁿ téng beh tit tio̍h chiap-la̍p; Góa êng-kng ê chhù, Góa beh êng-kng i.
60:8 Hiahê poe-.lâi chhin-chhiūⁿ hûn, koh chhin-chhiūⁿ hún-chiáu poe-lâi i ê siū ê sī siáⁿ lâng?
60:9 Chiahê tó-sū beh thèng-hāu Góa; Tal-si-sih ê chûn-chiah beh chò thâu, kā lí ê chèng kiáⁿ liân in ê kim-gîn, tùi hn̄g-hn̄g chò chi̍t-ē tòa-.lâi; che lóng sī ūi tio̍h Siōng-chú — lí ê Siōng-tè ê miâ, koh ūi tio̍h I-su-la-el ê sèng ê, in-ūi I í-keng êng-kng lí.
60:10 Gōa-pang lâng beh khí lí ê siâⁿ chhiûⁿ, in ê ông beh ho̍k-sāi lí. Góa bat siū-khì phah lí, taⁿ beh si un liân-bín lí.
60:11 Lí ê siâⁿ mn̂g ē tiāⁿtiāⁿ khui, mê-ji̍t bô koaiⁿ, hō͘ lâng kā lia̍t kok ê châi-pó tòa-lâi kui lí, mā kā in ê kun-ông khan-.lâi.
60:12 Kiàn-nā jîn-bîn kah pang-kok m̄ ho̍k-sāi lí ê, ē tú tio̍h bia̍t-bông, hiahê pang-kok ē choân-jiân hong-hùi.
60:13 Le-ba-nòng ê êng-kng, to̍h-sī siông chhiū, sam chhiū, n̂g-iông chhiū, lóng beh chò-hóe kui lí, ūi tio̍h beh táⁿ-pān Góa ê sèng-só͘; Góa mā beh hō͘ góa kha-ta̍h ê só͘-chāi tit tio̍h êng-kng.
60:14 Pêng-siông sî khó͘-to̍k lí ê, in ê kiáⁿ-sun lóng beh kàu lí ê bīn-chêng àⁿ-io; khòaⁿ-khin lí ê, lóng beh tī lí ê kha chêng kūi-pài. In beh chheng lí chò " Siōng-chú ê siâⁿ ", chheng-chò " I-su-la-el ê sèng-.ê ê Si-óng ".
60:15 Lí chêng siū pàng-sak, siū thó-ià, sīm-chì bô lâng keng-kòe lí hia, taⁿ Góa beh hō͘ lí piàn-chò éng-oán ê êng-hôa, chiâⁿ-chò le̍k-tāi ê hí-lo̍k.
60:16 Lí ē chia̍h bān-kok ê leng, koh suh chiahê kun-ông ê leng-thâu. Lí chiū ē chai Góa — Siōng-chú sī lí ê Kiù-chú, sī kiù-sio̍k lí ê Chú, Iâ-kop ê tōa koân-lêng-.ê.
60:17 Góa beh tòa kim lâi tāi-thè tâng, tòa gîn lâi tāi-thè thih, tâng lâi tāi-thè chhâ, thih lâi tāi-thè chio̍h-thâu, mā beh ēng hô-pêng chò lí ê koaⁿ-tiúⁿ, ēng kong-gī chò lí ê kàm-tok.
60:18 Lí ê só͘-chāi bô koh thiaⁿ tio̍h kiông-pō, lí ê kéng lāi bô koh thiaⁿ tio̍h pha-hng, húi-bia̍t ê tāichì; lí ē chheng lí ê chhiûⁿ chò chín-kiù, chheng lí ê mn̂g chò oló.
60:19 Ji̍t-thâu bô koh chò lí ji̍t-sî ê kng, goe̍h mā bô koh hoat kng chiò lí. In-ūi Siōng-chú beh chò lí éng-oán ê kng, lí ê Siōng-chú beh chò lí ê êng-iāu.
60:20 Lí ê ji̍t-thâu bô koh lo̍h soaⁿ, lí ê goe̍h mā bô kiu bô-.khì, in-ūi Siōng-chú beh chò lí éng-oán ê kng. Lí pi-ai ê ji̍t mā kiat-sok à.
60:21 Lí ê chú-bîn lóng chiâⁿ-chò gī lâng, éng-oán tit tio̍h thó͘-tē chò sán-gia̍p; in sī Góa só͘ chèng ê chhiū chai, sī Góa ê chhiú só͘ chò ê, beh hō͘ Góa tit tio̍h êng-kng.
60:22 Chì bî-sè ê beh chiâⁿ-chò chi̍t-chheng; ke̍k pi-bî ê beh chiâⁿ-chò kiông ê kok. Góa — Siōng-chú beh chiàu tiāⁿ tio̍h ê kî, kóaⁿ-kín kā i chiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。