以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
54:1 Siōng-chú Tùi I-su-la-el ê Thiàⁿ
Lí bô hoâi-īn bô seⁿ kiáⁿ ê, tio̍h chhiùⁿ koa; lí m̄ bat keng-kòe seⁿ kiáⁿ ê kan-khó͘, tio̍h chhut siaⁿ chhiùⁿ koa, chhut hoaⁿ-hí ê siaⁿ; in-ūi kakī tòa ê chabó͘ lâng pí ū tiōng-hu ê seⁿ khah chē kiáⁿ. Che sī Siōng-chú kóng ê.
54:2 Tio̍h khai-thok lí pò͘-pêⁿ ê tē, hòng-tōa lí tòa ê tiùⁿ-pak, m̄ thang hān-tiāⁿ; tio̍h khan-tn̂g lí ê soh, kian-kò͘ lí ê khit-á.
54:3 In-ūi lí beh ǹg-chó ǹg-iū lâi khai-thok; lí ê kiáⁿ-sun it-tēng ē tit tio̍h lia̍t kok chò sán-gia̍p, koh hō͘ pha-hng ê siâⁿ ū lâng tòa.
54:4 M̄-thang kiaⁿ-hiâⁿ, in-ūi lí it-tēng bô tì-sú kiàn-siàu, mā m̄ thang kiaⁿ-ùi siáu-jîn, in-ūi lí bô tì-sú siū lêng-jio̍k. Lí it-tēng ē kì-tit siàu-liân ê sî ê kiàn-siàu, bô koh kì-liām lí chiú-kóaⁿ sî ê lêng-jio̍k.
54:5 In-ūi chhòng-chō lí ê sī lí ê tiōng-hu; bān-kun ê Siōng-chú sī I ê miâ; kiù-sio̍k lí ê sī I-su-la-el ê sèng ê; I it-tēng ē chheng-chò choân tē ê Siōng-tè.
54:6 Siōng-chú tiàu lí, chhin-chhiūⁿ teh tiàu siū khì-sak, sim-lāi iu-siong ê bó͘, to̍h-sī siàu-liân ê sî só͘ chhōa, siū khì-sak ê bó͘. Che sī lí ê Siōng-tè só͘ kóng ê.
54:7 Góa pàng-lī lí put-kò chi̍t-sî-á, m̄ koh, Góa beh ēng tōa chû-pi siu lí tò tńg-.lâi.
54:8 Góa hoat-chhut siū-khì, chiām-sî tùi lí am bīn; m̄ koh, beh ēng éng-oán ê chû-ài liân-bín lí. Che sī Siōng-chú — kiù-sio̍k lí ê Chú só͘ kóng ê.
54:9 In-ūi che chāi Góa khòaⁿ khí-.lâi, chhin-chhiūⁿ Nó͘-ah ê tōa-chúi. Góa án-chóaⁿ chiùchōa bô koh hō͘ Nó͘-ah ê tōa-chúi hoàn-lām choân tē, Góa mā beh chiàu ánne chiùchōa bô koh tùi lí siū-khì, kā lí chek-pī.
54:10 Tōa soaⁿ ē sóa-khui, sió soaⁿ ē î-sóa; to̍k-to̍k Góa ê chû-ài it-tēng bô lī-khui lí, Góa pêng-an ê iok mā bô î-sóa. Che sī liân-bín lí ê Siōng-chú kóng ê.
54:11 Ê-lú-sa-lèm ê Chiong-lâi
Lí chit-ê siū khùn-khó͘, hō͘ tōa hong iô-tāng bē tàng an-ùi ê lâng, Góa beh ēng chhái-sek an-tì lí ê chio̍h-thâu, ēng nâ-sek ê pó-chio̍h hē lí ê tē-ki.
54:12 Góa koh ēng âng-pó-chio̍h chō lí ê siâⁿ kak-thâu, ēng âng-ge̍k chō lí ê siâⁿ mn̂g, ēng pó-chio̍h chō lí sì-kho͘-ûi ê pian-kài.
54:13 Lí ê kiáⁿ-jî lóng beh hō͘ Siōng-chú kà-sī; lí ê kiáⁿ-jî ē tit tio̍h tōa pêng-an.
54:14 Lí ē in-ūi kong-gī tit tio̍h khiā chāi, ē lī-khui chè-ap hn̄g-hn̄g, bô tì-sú kiaⁿ-hiâⁿ; lí ē lī-khui chai-hō hn̄g-hn̄g, in-ūi i it-tēng bô kīn-óa lí.
54:15 Kiám-chhái ū lâng chū-chi̍p, m̄ koh, m̄-sī tùi Góa; kiàn-nā chū-chi̍p kong-kek lí ê, beh in-ūi lí lâi poa̍h-tó.
54:16 Hitê pûn hóe-thòaⁿ, chè-chō ha̍h-iōng ê khì-hâi ê thih-chhiūⁿ, sī Góa só͘ chhòng-chō ê; Góa mā chhòng-chō hit-ê hām-hāi lâng ê, hō͘ i khì kiâⁿ châu-bia̍t.
54:17 Kiàn-nā ūi tio̍h kong-kek lí lâi chō ê khì-hâi it-tēng ē chiâⁿ-chò bô lō͘-ēng; kiàn-nā tī sím-phòaⁿ ê sî khí-lâi kong-kek lí ê chi̍h, lí ē tēng i ê chōe. Che sī Siōng-tè ê lô͘-po̍k ê sán-gia̍p, mā sī in tùi Góa só͘ tit tio̍h ê gī. Che sī Siōng-chú kóng ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。