以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
53:1 Lán só͘ thiaⁿ tio̍h ê, ū siáⁿ lâng siong-sìn? Siōng-chú ê chhiú sī ǹg siáⁿ lâng hián-bêng?
53:2 In-ūi i tī I ê bīn-chêng seng-tióng chhin-chhiūⁿ chíⁿ-chíⁿ ê íⁿ, mā chhin-chhiūⁿ kin hoat tī ta tē. I bô hó hêng-chōng, bô ui-gî; lán mā bô khòaⁿ tio̍h i ū hó iông-māu, thang hō͘ lán him-bō͘ i.
53:3 I siū khòaⁿ-khin, hō͘ lâng pàng-sak, i siū chin chē thòng-khó͘, tiāⁿtiāⁿ tú tio̍h iu-būn; i siū khòaⁿ-khin, chhin-chhiūⁿ lâng am bīn m̄-khòaⁿ i; lán mā bô chun-tiōng i.
53:4 I si̍t-chāi tam-tng lán ê iu-būn, phāiⁿ lán ê thòng-khó͘; m̄ koh, lán lia̍h-chò i sī teh siū chek-hoa̍t, hō͘ Siōng-tè phah, koh siū khó͘-to̍k.
53:5 M̄ koh, i ūi tio̍h lán ê kòe-sit siū-siong, ūi tio̍h lán ê chōe-kò siū hāi; i tam-tng hêng-hoa̍t, lán tit tio̍h pêng-an; i siū piⁿ-phah, lán tit tio̍h i hó.
53:6 Lán lóng chhin-chhiūⁿ iûⁿ teh bê-lō͘; ta̍k lâng kiâⁿ kakī ê phian lō͘; Siōng-chú hō͘ lán tāi-ke ê chōe lóng kui tī i sin chiūⁿ.
53:7 I siū ap-pek tú tio̍h kan-khó͘, iáu koh bô khui chhùi; i chhin-chhiūⁿ iûⁿ-á hông khan kàu siū thâi ê só͘-chāi, koh chhin-chhiūⁿ iûⁿ tī chián-mn̂g ê lâng ê bīn-chêng bô chhut siaⁿ, i mā kāng-khoán ánne bô khui chhùi.
53:8 In-ūi ap-pek kah sím-phòaⁿ, i hông lia̍h-.khì; tī i ê sè-tāi, siáⁿ lâng siūⁿ tio̍h i tùi oa̍h-lâng ê tē siū chián-tû? Á-sī ūi tio̍h Góa ê chú-bîn ê chōe-kò siū phah?
53:9 I sûi-jiân bô kiâⁿ kiông-pō, chhùi mā bô ū kúi-chà, m̄ koh in hō͘ i kah pháiⁿ lâng kâng bōng, mā kah hó-gia̍h lâng chò-hóe.
53:10 Chóng-.sī, Siōng-chú hoaⁿ-hí sún-hāi i, hō͘ i siū thòng-khó͘; i ê oa̍h-miā chò sio̍k-chōe ê chè, hit sî i ē khòaⁿ tio̍h i ê kiáⁿ-sun, koh ke-thiⁿ hòe-siū, Siōng-chú só͘ hoaⁿ-hí ê tāichì ē tī i ê chhiú tiong heng-thong.
53:11 I ē khòaⁿ tio̍h pún-sin lô-khó͘ ê hāu-kó, chiū sim-móa ì-chiok; Góa gī ê lô͘-po̍k ē ēng i ê tì-sek hō͘ chin chē lâng tit tio̍h chheng-chò gī; i mā beh tam-tng in ê chōe-kò.
53:12 Só͘-í, Góa beh hō͘ i kah chē koân ūi ê lâng pun hūn-gia̍h kah kiông-béng ê lâng pun só͘ chhiúⁿ ê mi̍h. In-ūi i pàng-sak sèⁿ-miā kàu sí, i mā lia̍t tī chōe-hoān ê tiong-kan. Chóng-.sī, i tam-tng chin chē lâng ê chōe, koh thè chōe-hoān kî-tó.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。