以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
51:1 An-ùi Ê-lú-sa-lèm ê Ōe
Lín chiahê jiok kong-gī, cháu-chhōe Siōng-chú ê lâng tio̍h thiaⁿ góa ê ōe! Lín tio̍h siūⁿ khòaⁿ lín tùi hia phah chhut-.lâi ê chio̍h-pôaⁿ, tùi hia ku̍t chhut-.lâi ê thô͘-khang.
51:2 Tio̍h siūⁿ khòaⁿ lín ê chó͘-sian A-bu-la-hàm kah seⁿ lín ê Sa-la̍h. In-ūi i ko͘-toaⁿ chi̍t-ê lâng ê sî, Góa kéng-tiàu i, sù-hok i, hō͘ i ke-thiⁿ chin chē.
51:3 In-ūi Siōng-chú í-keng an-ùi Si-óng, mā an-ùi i it-chhè pha-hng ê só͘-chāi, hō͘ i ê khòng-iá chhin-chhiūⁿ E-tiân, hō͘ soa-bô͘ chhin-chhiūⁿ Siōng-chú ê hn̂g; tī in tiong-kan ē ū hoaⁿ-hí, khoài-lo̍k, kám-siā kah chhiùⁿ koa ê siaⁿ.
51:4 Góa ê jîn-bîn, tio̍h chù-ì thiaⁿ Góa ê ōe; Góa ê jîn-bîn, tio̍h àⁿ hīⁿ-khang thiaⁿ Góa kóng; in-ūi lu̍t-hoat beh tùi Góa chhut; Góa beh li̍p Góa ê kong-lí lâi chò lia̍t pang ê kng.
51:5 Góa ê kong-gī kīn lah; Góa ê kiù-un hoat-chhut. Góa ê chhiú beh phòaⁿ-toàn lia̍t pang; tó-sū lóng beh thèng-hāu Góa, koh beh óa-khò Góa ê chhiú.
51:6 Lín tio̍h gia̍h thâu ǹg thiⁿ, àⁿ thâu khòaⁿ tē; in-ūi chiahê thiⁿ ē chhin-chhiūⁿ ian-hûn siau-sòaⁿ, tē ē chhin-chhiūⁿ saⁿ chiām-chiām kū-.khì; tòa tī hia ê jîn-bîn mā ē chhin-chhiūⁿ ánne sí-bông. Chí-ū Góa ê kiù-un ē éng-oán chûn-chāi, Góa ê kong-gī mā bô hùi-tû.
51:7 Tì-sek kong-gī, koh kā Góa ê kà-sī chûn tī sim-lāi ê jîn-bîn, tio̍h thiaⁿ Góa ê ōe: M̄-bián kiaⁿ lâng ê khau-sé, mā m̄ thang in-ūi lâng ê húi-pòng lâi kiaⁿ-hiâⁿ.
51:8 In-ūi chiù-thâng ē kā in chiù, chhin-chhiūⁿ teh chia̍h saⁿ-khò͘; chián-thâng ē chia̍h in, chhin-chhiūⁿ teh chia̍h iûⁿ-mn̂g; chí ū Góa ê kong-gī éng-oán chûn-chāi, Góa ê kiù-un ti̍t-kàu bān tāi.
51:9 Siōng-chú ê chhiú, khí-.lâi! Khí-.lâi! Si-chhut tōa khùi-la̍t. Khí-.lâi! Chhin-chhiūⁿ tī chá-sî ê nî-ji̍t, chhin-chhiūⁿ tī kó͘-chá ê sè-tāi. Í-chêng phah-chhùi hái-koài La̍h-hap, chha̍k-thàu ok liông ê kám m̄-sī lí?
51:10 Hō͘ hái kah chhim-ian ê chúi ta-.khì, hō͘ hái chhim ê só͘-chāi piàn-chò lō͘, hō͘ siū sio̍k ê jîn-bîn keng-kòe ê, kám m̄-sī lí?
51:11 Siōng-chú kiù-sio̍k ê jîn-bîn beh tò tńg-.lâi. In beh chhiùⁿ koa lâi-kàu Si-óng; beh tit tio̍h éng-oán ê hoaⁿ-hí chò bián-liû. In ē hoaⁿ-hí khoài-lo̍k, iu-būn thó͘-khùi lóng ē cháu-.khì.
51:12 Góa, Góa sī an-ùi lín ê. Lí sī siáⁿ lâng, kèng-jiân kiaⁿ hit-ê ē sí ê lâng? Kiaⁿ hit-ê ē piàn-chò chhin-chhiūⁿ chháu ê sè-kan lâng?
51:13 Mā bē kì-tit thí-khui chiahê thiⁿ, an-tēng tē ê tē-ki, chhòng-chō lí ê Siōng-chú, lí kui ji̍t in-ūi pō-gio̍k ê tōa siū-khì lâi kiaⁿ-hiâⁿ, chiàu i tô͘-bô͘ beh húi-bia̍t lí ê chêng-hêng. Kî-si̍t hit-ê pō-gio̍k ê tōa siū-khì tàu-té tī tó-ūi?
51:14 Siū ap-pek ê ē chin kín tit tio̍h tháu-pàng, it-tēng bē lo̍h tī hia̍t tōng lâi sí; i ê bí-niûⁿ mā bô toān-choa̍t.
51:15 Góa sī Siōng-chú — lí ê Siōng-tè, iô-tāng tōa hái, hō͘ i ê éng hōa-hōa háu; bān-kun ê I-é-ho-bah sī I ê miâ.
51:16 Góa kā Góa ê ōe hē tī lí ê chhùi, ēng Góa ê chhiú ê iáⁿ jia-khàm lí, Góa khai-thian pi̍t-tē, koh tùi Si-óng kóng: Lí sī Góa ê chú-bîn.
51:17 Ê-lú-sa-lèm ê Thòng-khó͘ Kiat-kio̍k
Ê-lú-sa-lèm, khí-.lâi! Khí-lâi khiā-.leh! Lí tùi Siōng-chú ê chhiú tiong lim I tōa siū-khì ê poe; lim hit-ê hō͘ lâng tian-tian tó-tó ê poe-chóaⁿ, lim kàu ta-ta.
51:18 I só͘ seⁿ chiahê kiáⁿ ê tiong-kan, bô kah chi̍t-ê ín-chhōa i; i só͘ iúⁿ-chhī tōa-hàn chiahê kiáⁿ ê tiong-kan, bô kah chi̍t-ê khan i ê chhiú.
51:19 Chit nn̄g hāng lîm-kàu lí, siáⁿ lâng ē thè lí ai-siong? Chiū-sī ū soe-pāi kah bia̍t-bông, ki-hng kah to-kiàm; Góa tio̍h án-chóaⁿ an-ùi lí?
51:20 Lí chiahê kiáⁿ hūn-.khì, tó tī ta̍k-ê ke-lō͘ kháu, chhin-chhiūⁿ lo̍k tī lô-bāng ê tiong-kan. In siū Siōng-chú móa-móa ê siū-khì kah lí ê Siōng-tè ê chek-pī.
51:21 Só͘-í, lí chit-ê khùn-khó͘ koh chùi, khiok m̄-sī in-ūi chiú lâi chùi ê lâng, lí tio̍h thiaⁿ.
51:22 Lí ê chì-koân Siōng-chú, to̍h-sī ūi tio̍h I ê chú-bîn sin-oan ê Siōng-chú, ánne kóng: Lí khòaⁿ, Góa í-keng kā hit-ê hō͘ lâng tian-tian tó-tó ê poe, to̍h-sī Góa tōa siū-khì ê poe-chóaⁿ, tùi lí ê chhiú the̍h chhut-.lâi, lí it-tēng m̄-bián koh lim.
51:23 Góa beh kā chit-ê poe hē tī pháiⁿ khoán-thāi lí ê lâng ê chhiú tiong; in bat tùi lí kóng: Lí tio̍h àⁿ lo̍h-.khì, chhut-chāi goán ta̍h kòe-.khì; lí chiū ēng kha-chiah-phiaⁿ chò chhin-chhiūⁿ tē, chhin-chhiūⁿ ke-lō͘, chhut-chāi lâng keng-kòe.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。