以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
43:1 Siōng-chú Chín-kiù I ê Chú-bîn
Iâ-kop, chhòng-chō lí ê Siōng-chú, I-su-la-el, hit-ê chō-sêng lí ê ánne kóng: Lí m̄-bián kiaⁿ, in-ūi Góa í-keng kiù-sio̍k lí. Góa bat kiò lí ê miâ tiàu-lí, lí sī Góa ê.
43:2 Lí tùi chúi tiong keng-kòe, Góa it-tēng kah lí tông-chāi; lí keng-kòe kang-hô, chúi it-tēng bē kā lí im-ba̍t; lí tùi hóe tiong kiâⁿ kòe-.khì, it-tēng bē siū sio siong, hóe-iām mā bē to̍h tī lí ê sin chiūⁿ.
43:3 In-ūi Góa sī Siōng-chú — lí ê Siōng-tè, sī I-su-la-el ê sèng ê, lí ê Kiù-chú; Góa í-keng hō͘ Ai-gi̍p chò lí sio̍k-hôe ê kè-chîⁿ, hō͘ Kú-si̍t kah Se-bah chò lí ê thè-sin.
43:4 In-ūi Góa kā lí khòaⁿ-chò sī pó-pòe, tòng-chò sī chun-kùi, koh in-ūi Góa thiàⁿ lí, só͘-í, Góa hō͘ lâng tāi-thè lí, hō͘ lia̍t kok ê jîn-bîn tāi-thè lí ê sèⁿ-miā.
43:5 M̄-bián kiaⁿ, in-ūi Góa kah lí tông-chāi; Góa beh chhōa lí ê kiáⁿ-sun tùi tang-hng lâi, koh tùi se-hong chū-chi̍p lí.
43:6 Góa beh tùi pak-hong kóng: Pàng chhut-.lâi! Tùi lâm-hong kóng: M̄-thang khàu-liû! Góa kā Góa ê chèng kiáⁿ tùi hn̄g-hn̄g chhōa-.lâi, kā Góa ê chèng chabó͘ kiáⁿ tùi tē-ke̍k chhōa tńg-.lâi.
43:7 Kiàn-nā ēng Góa ê miâ lâi chheng-ho͘ ê, sī Góa ūi tio̍h kakī ê êng-kng chhòng-chō ê, sī Góa só͘ chō-sêng, só͘ chhòng-chō ê.
43:8 I-su-la-el Sī Siōng-chú ê Chèng-jîn
Siōng-chú kóng: Lí tio̍h kā ū ba̍k-chiu khiok chheⁿmê, ū hīⁿ-khang khiok chhàu-hīⁿ-lâng ê jîn-bîn, kā in só͘-ū ê lóng chhōa chhut-.lâi.
43:9 Bān-kok tio̍h chū-chi̍p, chèng lâng tio̍h chū-hōe. Kî-tiong siáⁿ lâng ē kā chit-ê kóng bêng, mā kā í-chêng ê tāichì lóng kóng hō͘ goán thiaⁿ? In thang chhōa kiàn-chèng lâi, kakī hián-bêng in chò tio̍h, á-.sī lâng nā thiaⁿ-.tio̍h, chiū kóng: Che sī chin-si̍t.
43:10 Siōng-chú kóng: Lín sī Góa ê kiàn-chèng-jîn, sī Góa só͘ kéng ê lô͘-po̍k; ánne sī beh hō͘ lín chai, lâi sìn Góa, koh bêng-pe̍k Góa to̍h-sī Siōng-chú. Tī Góa ê chìn-chêng pēng bô hêng-sêng chin-sîn, tī Góa ê í-āu mā bô.
43:11 Chí-ū Góa, Góa sī Siōng-chú; tû Góa í-gōa, bô ū Kiù-chú.
43:12 Góa bat chí-sī, Góa bat chín-kiù, Góa bat kóng bêng, koh tī lín tiong-kan bô ū pa̍t chióng ê chin-sîn. Só͘-í, Siōng-chú kóng, Lín sī góa ê kiàn-chèng. Góa to̍h-sī Siōng-tè.
43:13 Tùi ū ji̍t-chí í-lâi, Góa to̍h-sī Siōng-chú; bô chi̍t-ê ē-tàng kiù lâng thoat-lī Góa ê chhiú. Góa beh chò ê tāichì, siáⁿ lâng ē-tàng chó͘-chí?
43:14 Tùi Ba-bú-lông Tô-thoat
Kiù-sio̍k lín ê chì-koân Siōng-chú, I-su-la-el ê sèng ê ánne kóng: In-ūi lín ê iân-kò͘, Góa í-keng chhe lâng khì-kàu Ba-bú-lông, jî-chhiáⁿ Góa beh hō͘ Kal-tí-ah lâng soe-pāi, chhin-chhiūⁿ tô-cháu ê jîn-bîn, lóng chē in hōa-hōa háu ê chûn.
43:15 Góa sī Siōng-chú — lín ê sèng ê, sī chhòng-chō I-su-la-el ê, sī lín ê kun-ông.
43:16 Siōng-chú tī tōa hái tiong khui lō͘, tī tōa-chúi tiong khui lō͘,
43:17 hō͘ chhia, bé, peng-á kah ióng-béng ê lâng lóng chhut-.lâi; in chò chi̍t-ē tó lo̍h-.khì, bē koh khí-.lâi; in bia̍t-bông, chhin-chhiūⁿ sit-.khì ê hóe.
43:18 Siōng-chú ánne kóng, " Lín m̄ thang kì-liām í-chêng ê tāichì, mā m̄ thang siūⁿ kó͘-chá ê tāichì.
43:19 Lí khòaⁿ, Góa beh chò chi̍t hāng sin ê tāichì, taⁿ teh hián-hiān, lín kám m̄-chai? Góa beh tī khòng-iá khui tō-lō͘, tī soa-bô͘ khui kang-hô.
43:20 Soaⁿ-.ni̍h ê cháu-siù ē chun-tiōng Góa; soaⁿ-káu kah tô-chiáu mā ē ánne. In-ūi Góa hō͘ khòng-iá ū chúi, hō͘ soa-bô͘ ū hô, thang hō͘ Góa ê jîn-bîn, Góa só͘ kéng ê chú-bîn lim.
43:21 Chiahê jîn-bîn sī Góa ūi tio̍h kakī só͘ chō ê, beh lâi soan-iông Góa ê miâ-siaⁿ.
43:22 I-su-la-el ê Chōe
Siōng-Chú kóng: Iâ-kop, lí bô kiû-kiò Góa; I-su-la-el, lí tian-tò thó-ià Góa.
43:23 Lí bô tòa lí ê iûⁿ chò sio-chè lâi hō͘ Góa, mā bô ēng chè-mi̍h chun-kèng Góa. Góa bô in-ūi só͘ hiàn ê mi̍h hō͘ lí lô-khó͘, mā bô in-ūi jú-hiuⁿ hō͘ lí ià-siān.
43:24 Lí bô ēng gîn ūi Góa bé chhiong-pô͘, mā bô ēng chè-mi̍h ê iû hō͘ Góa pá-chiok; tian-tò hō͘ Góa in-ūi lí ê chōe-ok lô-khó͘, hō͘ Góa in-ūi lí ê chōe-kò ià-siān.
43:25 Chí-ū Góa in-ūi kakī ê iân-kò͘, chhat-siau lí chiahê kòe-sit; Góa mā bô kì-tit lí chiahê chōe-ok.
43:26 Lí tio̍h tiám-chhéⁿ Góa, lí Góa thang chò-hóe piān-lūn; lí thang pâi-lia̍t lí ê chêng-lí, thang tit tio̍h chheng-chò gī.
43:27 Lí ê khai-ki chó͘ hoān chōe, lí ê tiong-pó pōe-ge̍k Góa.
43:28 Só͘-í, Góa beh lêng-jio̍k sèng-só͘ ê siú-léng, hō͘ Iâ-kop siū chiù-chó͘, hō͘ I-su-la-el siū chhoh-mē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。