以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
42:1 Siōng-chú ê Koán-ke
Siōng-chú kóng: Lí khòaⁿ, Góa ê lô͘-po̍k, Góa só͘ hû-chhî ê, Góa só͘ kéng-soán ê, Góa ê sim só͘ hoaⁿ-hí ê, Góa ū kā Góa ê sim-sîn hō͘ I, I ē kā kong-lí thoân hō͘ gōa-pang.
42:2 I bô soan-hoa, bô chhut siaⁿ, mā bô hō͘ lâng tī ke-lō͘-.ni̍h thiaⁿ tio̍h I ê siaⁿ.
42:3 Siū siong ê lô͘-úi, I bô at-tn̄g; beh hoa ê teng-hóe, I bô phah-sit. I chiàu chin-si̍t, kā kong-lí thoân-pò͘.
42:4 I bô chhìn-sim, mā bô sit táⁿ, it-ti̍t kàu I tī tē-chiūⁿ siat-li̍p kong-lí; tó-sū lóng thèng-hāu I ê kà-sī.
42:5 Siōng-chú — Siōng-tè chhòng-chō chiahê thiⁿ lâi kā i thí-khui, khui-khoah tē kah i só͘ chhut ê, sù oa̍h-khì hō͘ tē-chiūⁿ ê chèng lâng, koh kā sîn-hûn hō͘ kiâⁿ tī hit téng-bīn ê lâng ê, kóng,
42:6 " Góa — Siōng-chú ēng kong-gī tiàu Lí, beh khan Lí ê chhiú, pó-siú Lí, hō͘ Lí chò kah jîn-bîn ê iok ê tiong-pó, chò gōa-pang lâng ê kng,
42:7 Lâi khui chheⁿmê-.ê ê ba̍k-chiu, chhōa siū koaiⁿ ê chhut kaⁿ, hō͘ tiàm tī o͘-àm ê chhut kaⁿ-lô.
42:8 Góa sī I-é-ho-bah, che sī Góa ê miâ, Góa bô kā Góa ê êng-kng kui hō͘ pa̍t-ê sîn-bêng, mā bô kā Góa ê miâ-siaⁿ kui hō͘ tiau-khek ê ngó͘-siōng.
42:9 Lí khòaⁿ, chêng ê tāichì í-keng oân-sêng, taⁿ góa mā beh kā sin ê tāichì kóng bêng; chiahê tāichì iáu-bōe hoat-seng í-chêng, góa to̍h kóng hō͘ lín thiaⁿ. "
42:10 O-ló ê Si-koa
Kòe hái ê kah hái lāi só͘-ū ê, tó-sū kah tòa tī kî-tiong ê jîn-bîn, lín lóng tio̍h ǹg Siōng-chú chhiùⁿ sin ê koa, tùi tē-ke̍k lâi oló I.
42:11 Khòng-iá kah kî-tiong ê siâⁿ, í-ki̍p Ke-tal lâng tòa ê chng-thâu, lóng tio̍h chhut siaⁿ; tòa tī Se-la̍h ê jîn-bîn tio̍h chhiùⁿ koa, tī soaⁿ téng ê tio̍h chhut tōa-siaⁿ.
42:12 In tio̍h kā êng-kng kui hō͘ Siōng-chú, tī tó-sū tiong soan-iông I ê miâ-siaⁿ.
42:13 Siōng-chú ē chhin-chhiūⁿ ióng-béng ê lâng chhut-.khì, ē chhin-chhiūⁿ kau-chiàn ê lâng kek-tōng jia̍t-sim, ē chhut siaⁿ hoah, tōa-siaⁿ hoah, ē ēng tōa khùi-la̍t kong-kek I ê tùi-te̍k.
42:14 Siōng-chú Èng-ín Pang-chō͘ I ê Chú-bîn
Siōng-chú kóng: Góa chin kú bô khui chhùi, tiām-tiām kakī chiat-chè; taⁿ Góa beh tōa-siaⁿ hoah, chhin-chhiūⁿ beh seⁿ kiáⁿ ê chabó͘ lâng; Góa ē hā-hā chhoán, bē chiap khùi.
42:15 Góa beh hō͘ tōa soaⁿ, sió soaⁿ piàn-chò pha-hng, hō͘ hit téng-bīn ê hoe-chháu lóng ta-.khì; Góa beh hō͘ kang-hô piàn-chò soa-chiu, tó-sū, hō͘ chúi-tî lóng ta-.khì.
42:16 Góa beh chhōa chheⁿmê-.ê kiâⁿ in m̄ bat kiâⁿ ê tō-lō͘, chhōa in kiâⁿ m̄ bat kiâⁿ ê lō͘-kèng; tī in ê bīn-chêng hō͘ o͘-àm piàn-chò kng-bêng, hō͘ oan-khiau piàn-chò pêⁿ-ti̍t. Chiahê tāichì Góa lóng beh chò, mā bô beh pàng-sak in.
42:17 Óa-khò tiau-khek ê ngó͘-siōng, tùi chù-chō ê ngó͘-siōng kóng, " Lí sī goán ê Siōng-tè " ê, chit khoán lâng ē siū kóaⁿ-cháu, in ē tōa kiàn-siàu.
42:18 I-su-la-el M̄-siū Kà-sī
Siōng-chú kóng: Lín chhàu-hīⁿ-lâng ê tio̍h thiaⁿ! Lín chheⁿmê-.ê tio̍h khòaⁿ? Thang hō͘ lín ē khòaⁿ-.tio̍h.
42:19 Góa ê lô͘-po̍k í-gōa, siáⁿ lâng sī chheⁿmê? Siáⁿ lâng chhàu-hīⁿ-lâng, chhin-chhiūⁿ Góa só͘ chhe ê sù-chiá? Siáⁿ lâng chheⁿmê, chhin-chhiūⁿ hit-ê kah Góa hô-hó ê, á-.sī chheⁿmê, chhin-chhiūⁿ Siōng-tè ê lô͘-po̍k?
42:20 Lí khòaⁿ tio̍h chin chē tāichì, mā bô teh chù-ì; khui hīⁿ-khang, mā bô thiaⁿ-.tio̍h.
42:21 Siōng-chú in-ūi kakī ê kong-gī, hoaⁿ-hí hō͘ lu̍t-hoat chò tōa, chò chun-kùi.
42:22 Chóng-.sī, chiahê jîn-bîn sī siū chhiúⁿ-toa̍t ê, tī soaⁿ-hia̍t hông tng-.tio̍h, hông koaiⁿ-ba̍t tī kaⁿ-.ni̍h; in hō͘ lâng lia̍h-.tio̍h, bô lâng kā in chín-kiù, hō͘ lâng chhiúⁿ-lia̍h-.khì, bô lâng kóng: Pàng i tò tńg-.khì.
42:23 Lín tiong-kan siáⁿ lâng khéng àⁿ hīⁿ-khang thiaⁿ che? Siáⁿ lâng khéng chù-ì thiaⁿ, āu-lâi koh chun-thàn i?
42:24 Siáⁿ lâng kā Iâ-kop kau hō͘ lâng khì chhiúⁿ? Koh kā I-su-la-el kau hō͘ chha̍t-á? Kám m̄-sī Siōng-chú — lán só͘ tek-chōe ê? In m̄-khéng kiâⁿ I ê tō-lō͘, mā m̄-khéng chun-thàn I ê lu̍t-hoat.
42:25 Só͘-í, I kā béng-lia̍t ê siū-khì kah cheng-chiàn ê hiong-béng piàⁿ tī i ê sin chiūⁿ. Tī i ê sì-kho͘-ûi chhin-chhiūⁿ hóe to̍h, i iáu m̄-chai, hóe sio-.tio̍h i, i mā bô khòa-ì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。