出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Pôaⁿ-kòe-cheh
Siōng-chú tī Ai-gi̍p tē tùi Mô͘-se kah A-lông kóng,
12:2 " Chit goe̍h tio̍h chò lín ê chiaⁿ-.goe̍h, chò múi nî ê thâu chi̍t-ê goe̍h.
12:3 Lín tio̍h tùi I-su-la-el ê choân hōe-chiòng kóng, " Pún goe̍h chhe-cha̍p, chò lāu-pē ê tio̍h ūi choân ke ê lâng chhú iûⁿ-á, chi̍t ke chi̍t chiah.
12:4 Nā-sī chi̍t ke ê lâng siuⁿ chió, chi̍t chiah iûⁿ-á chia̍h bē liáu, i tio̍h kah chhù-piⁿ, chiàu lâng-gia̍h chò-hóe chhú chi̍t chiah. Lín chún-pī iûⁿ-á, tio̍h àn-sǹg ta̍k lâng só͘ ē chia̍h ê liōng.
12:5 Lín ê iûⁿ-á tio̍h bô khoat-tiám ê, bī-móa-nî ê iûⁿ-káng-á, lín tio̍h tùi mî-iûⁿ tiong á-.sī soaⁿ-iûⁿ tiong, lóng thang.
12:6 Lín tio̍h lâu kàu pún goe̍h cha̍p-sì ji̍t, hông-hun ê sî, I-su-la-el choân-hōe chèng lâng lóng tio̍h thâi iûⁿ-á.
12:7 In tio̍h chhú tām-po̍h-á hoeh, boah tī chia̍h iûⁿ-á hit keng chhù ê siang pêng ê mn̂g-kheng kah mn̂g-bâi.
12:8 Hit mê, tio̍h chia̍h ēng hóe piak ê iûⁿ-á bah kah bô-kàⁿ piáⁿ, khó͘-chhài chham-teh chia̍h.
12:9 M̄-thang chheⁿ-chia̍h, choa̍t-tùi m̄ thang ēng chúi chú, tio̍h ēng hóe piak, thâu, kha kah ngó͘-chōng lóng tio̍h chia̍h.
12:10 Lóng m̄ thang lâu keh mê, nā lâu kàu keh kang chá-khí, tio̍h ēng hóe sio-tiāu.
12:11 Lín tio̍h ánne chia̍h, io hâ tòa, kha chhēng ê, chhiú gia̍h koái-á, mā tio̍h kóaⁿ-kín chia̍h. Che sī Siōng-chú ê Pôaⁿ-kòe-cheh.
12:12 " In-ūi hit mê góa beh piàn kiâⁿ Ai-gi̍p tē, phah-sí Ai-gi̍p tē só͘-ū thâu-chúi seⁿ ê, bô-lūn lâng á-.sī chengseⁿ, koh beh sím-phòaⁿ Ai-gi̍p só͘-ū ê sîn-bêng. Góa to̍h-sī Siōng-chú.
12:13 Chit-ê hoeh tī lín só͘ tòa ê chhù, beh chò lín ê kì-hō; Góa chi̍t-ē khòaⁿ tio̍h chit-ê hoeh, chiū ē tùi lín pôaⁿ kòe-.khì. Góa phah Ai-gi̍p tē ê sî, chai-hō bē lîm-kàu lín lâi kā lín húi-bia̍t.
12:14 Lín tio̍h ēng chit ji̍t chò kì-liām, chò Siōng-chú ê cheh lâi siú, lín tio̍h tāi-tāi siú chit-ê cheh, chò éng-oán ê lē.
12:15 Bô-kàⁿ-cheh
Siōng-chú koh kóng, " Lín tio̍h chia̍h bô-kàⁿ piáⁿ chhit ji̍t, thâu chi̍t ji̍t tio̍h tùi lín ta̍k keng chhù kā kàⁿ tû-.khì, in-ūi tùi thâu chi̍t ji̍t kàu tē-chhit ji̍t, só͘-ū chia̍h ū kàⁿ ê, ē tùi I-su-la-el tiong tû-.khì.
12:16 Thâu chi̍t ji̍t, lín tio̍h ū sèng-hōe, tē-chhit ji̍t mā tio̍h ū sèng-hōe. Chit nn̄g ji̍t, tû-khì chún-pī ta̍k lâng só͘ tio̍h chia̍h-.ê í-gōa, bô-lūn siáⁿ-mi̍h kang lóng m̄ thang chò.
12:17 Lín tio̍h siú Bô-kàⁿ-cheh, in-ūi Góa tútú tī hit ji̍t chhōa lín ê kun-tūi tùi Ai-gi̍p tē chhut-.lâi. Só͘-í, lín tio̍h siú chit ji̍t, ta̍k sè-tāi chò éng-oán ê lē.
12:18 Tùi chiaⁿ-goe̍h cha̍p-sì ê-hng kàu jī-it ê-hng, lín tio̍h chia̍h bô-kàⁿ piáⁿ.
12:19 Tī lín ta̍k keng chhù, chhit ji̍t lāi m̄ thang ū kàⁿ, in-ūi kiàn-nā chia̍h ū kàⁿ ê mi̍h, bô-lūn sī kià-kha ê á-.sī pún-tē ê, hit-ê lâng tio̍h tùi I-su-la-el hōe tiong tû-.khì.
12:20 Ū kàⁿ ê mi̍h, lín lóng m̄ thang chia̍h, tī lín só͘-ū tòa ê só͘-chāi, tio̍h chia̍h bô-kàⁿ piáⁿ. "
12:21 Tē-it pái ê Pôaⁿ-kòe-cheh
Mô͘-se chiū kiò I-su-la-el chèng tiúⁿ-ló lâi, kā in kóng, " Lín ta̍k lâng tio̍h chiàu ke-kháu chhú iûⁿ-á, kā i thâi lâi chò Pôaⁿ-kòe-cheh.
12:22 Lín tio̍h the̍h chi̍t pé ê gû-chhek-chháu, ùn phûn lāi ê hoeh, ēng phûn lāi ê hoeh boah mn̂g-bâi kah siang pêng ê mn̂g-kheng, lín bô-lūn siáⁿ lâng lóng m̄ thang tùi i ê chhù-chhut-mn̂g, it-ti̍t kàu bîn-á chá-khí.
12:23 In-ūi Siōng-chú beh piàn kiâⁿ, phah-sí Ai-gi̍p lâng, I khòaⁿ tio̍h hoeh tī mn̂g-bâi kah siang pêng ê mn̂g-kheng, Siōng-chú chiū ē pôaⁿ-kòe hit-ê mn̂g, m̄-chún bia̍t sèⁿ-miā-.ê ji̍p-khì lín ê chhù, lâi phah-sí lín.
12:24 Chit-ê tāichì lín tio̍h chun-siú, chò lín kah lín ê kiáⁿ-sun éng-oán ê lē.
12:25 Āu-lâi, lín lâi-kàu Siōng-chú chiàu I só͘ èng-ín siúⁿ-sù hō͘ lín hit-ê tē, chiū tio̍h siú chit-ê lé-gî.
12:26 Lín ê kiáⁿ-jî nā mn̄g lín, ' Ūi siáⁿ-mi̍h kiâⁿ chit-ê lé-gî? '
12:27 Lín chiū tio̍h kóng, ' Che sī Siōng-chú Pôaⁿ-kòe-cheh ê chè, tng I-su-la-el lâng tī Ai-gi̍p ê sî, Siōng-chú phah-sí Ai-gi̍p lâng, pôaⁿ-kòe I-su-la-el lâng ê chhù, kiù lán tāi-ke. '" Chiū ánne, jîn-bîn àⁿ thâu kèng-pài.
12:28 I-su-la-el lâng chiū chiàu ánne kiâⁿ, Siōng-chú só͘ hoan-hù Mô͘-se kah A-lông ê, in chiàu ánne khì kiâⁿ.
12:29 Thâu-thai-.ê Lóng Thâi
Kàu pòaⁿ-mê, Siōng-chú kā Ai-gi̍p tē só͘-ū ê tōa-kiáⁿ, to̍h-sī tùi chē-ūi ê Hôa-láu ê tōa-kiáⁿ kàu kaⁿ-hoān ê tōa-kiáⁿ, í-ki̍p thâu-chúi seⁿ ê chengseⁿ, choân-pō͘ thâi-sí.
12:30 Hôa-láu kah só͘-ū ê jîn-sîn, í-ki̍p Ai-gi̍p ê kûn-chiòng, àm-sî lóng khí-.lâi, tī Ai-gi̍p ū tōa thî-khàu ê siaⁿ, in-ūi bô chi̍t ke bô sí-lâng.
12:31 Hôa-láu thàu-mê tiàu Mô͘-se kah A-lông lâi, kóng, " Khí-.lâi! Kiò I-su-la-el lâng tio̍h tùi góa ê jîn-bîn tiong-kan chhut-.khì, chiàu lín só͘ kóng ê, khì ho̍k-sāi Siōng-chú!
12:32 Μā chiàu lín só͘ kóng ê, liân iûⁿ-kûn, gû-kûn lóng tòa-tòa-.khì, mā tio̍h kā góa chiok-hok. "
12:33 Ai-gi̍p lâng pek jîn-bîn, kiò in kóaⁿ-kín lī-khui in ê tē, kóng, " Goán lóng sí à. "
12:34 Jîn-bîn chiū the̍h bô-kàⁿ ê chheⁿ-mī, kā chhiau mī ê khì-kū pau tī saⁿ-á lāi, phāiⁿ tī keng-kah-thâu téng.
12:35 I-su-la-el lâng chiàu Mô͘-se ê ōe kiâⁿ, tùi Ai-gi̍p lâng thó gîn-khì, kim-khì kah saⁿ-khò͘.
12:36 Siōng-chú hō͘ jîn-bîn tī Ai-gi̍p lâng ê bīn-chêng tit tio̍h un-tián, chiàu in só͘ thó-.ê hō͘ in. Chiū ánne, in khì chhiúⁿ Ai-gi̍p lâng.
12:37 I-su-la-el Lâng Lī-khui Ai-gi̍p
I-su-la-el lâng tùi Lâm-sek khì Su-kot, tû gín'á í-gōa, kiâⁿ lō͘ ê tōa-lâng iok ū la̍k-cha̍p-bān.
12:38 Koh ū chin chē cha̍p-cho̍k ê lâng, mā ū iûⁿ-kûn, gû-kûn, chin chē chengseⁿ kah in chò-hóe khì.
12:39 In ēng tùi Ai-gi̍p tòa chhut-.lâi ê chheⁿ-mī piak chò bô-kàⁿ piáⁿ, bô hoat-kàⁿ, sī in-ūi siū-pek chhut Ai-gi̍p, bē tàng iân-chhiân-.tit, mā bô ūi kakī chún-pī siáⁿ-mi̍h chia̍h-mi̍h.
12:40 I-su-la-el lâng chhut-gōa tī Ai-gi̍p, chóng-kiōng sì-pah saⁿ cha̍p nî.
12:41 Kàu sì-pah saⁿ cha̍p nî móa, tútú hit ji̍t, Siōng-chú ê kun-tūi lóng tùi Ai-gi̍p tē chhut-.lâi.
12:42 Chit mê, tio̍h ūi Siōng-chú lâi siú-chò kì-liām-ji̍t, in-ūi I chhōa in chhut Ai-gi̍p tē. Che sī Siōng-chú ê mê, sī I-su-la-el jîn-bîn tāi-tāi só͘ tio̍h siú ê kì-liām-ji̍t.
12:43 Pôaⁿ-kòe-cheh ê Kui-tēng
Siōng-chú tùi Mô͘-se kah A-lông kóng, " Pôaⁿ-kòe-cheh ê lē sī ánne: Gōa-pang lâng lóng m̄ thang chia̍h Pôaⁿ-kòe-cheh.
12:44 To̍k-to̍k ta̍k lâng ēng gîn bé-.lâi ê lô͘-po̍k í-keng kā i kiâⁿ kat-lé ê, chiū thang chia̍h.
12:45 Kià-kha ê kah chhiàⁿ-kang lóng m̄ thang chia̍h.
12:46 Tio̍h tī chi̍t keng chhù lāi chia̍h, chi̍t tè bah mā m̄ thang tòa chhut-khì chhù gōa, i ê kut chi̍t ki mā m̄ thang phah-tn̄g.
12:47 I-su-la-el lâng choân hōe-chiòng lóng tio̍h siú chit-ê cheh.
12:48 Nā ū gōa-cho̍k lâng chhut-gōa tī lín tiong-kan, ài siú Pôaⁿ-kòe-cheh lâi ho̍k-sāi Siōng-chú, i só͘-ū ê chapo͘ lâng tio̍h siū kat-lé, jiân-āu i chiū thang lâi siú chit-ê cheh, chiū kah pún cho̍k ê lâng bô koh-iūⁿ; chóng-.sī, bô siū kat-lé ê lâng lóng m̄ thang siú chit-ê cheh.
12:49 Pún-cho̍k ê lâng kah gōa-cho̍k ê lâng chhut-gōa tī lín tiong-kan, lóng kâng sio-siâng ê lē.
12:50 I-su-la-el jîn-bîn chiū ánne kiâⁿ, chiàu Siōng-chú só͘ hoan-hù Mô͘-se kah A-lông ê khì chò.
12:51 Tng hit ji̍t, Siōng-chú chhōa I-su-la-el lâng, chiàu in ê kun-tūi, chhut Ai-gi̍p tē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。