以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
41:1 Siōng-tè Tùi I-su-la-el ê Pó-chèng
Chèng tó-sū, tio̍h tī góa ê bīn-chêng tiām-tiām! Chèng lâng tio̍h tit tio̍h sin ê khùi-la̍t! Lín lóng tio̍h kiâⁿ óa-.lâi, chiah thang lâi kóng-ōe; lán thang tāi-ke lâi piān-lūn.
41:2 Siáⁿ lâng tùi tang-hong heng-khí chi̍t-ê lâng, ēng kong-gī tiàu i lâi-kàu I ê kha chêng? I kā lia̍t kok kau hō͘ i, hō͘ i koán-hat kun-ông, kā in chhin-chhiūⁿ tîn-ai kau hō͘ i ê to, chhin-chhiūⁿ hong chhoe ê chháu-á-iù kau hō͘ i ê kiong.
41:3 I jiok in, kiâⁿ i só͘ m̄ bat kiâⁿ ê lō͘, an-jiân kòe-.khì.
41:4 Siáⁿ lâng chò chit-ê tāichì lâi kā i oân-sêng, koh tùi khí-thâu to̍h ho͘-tiàu le̍k-tāi? Góa — Siōng-chú, sī khí-thâu ê, mā sī lō͘-bóe ê, góa to̍h-sī I.
41:5 Hái-tó khòaⁿ tio̍h chiū kiaⁿ-hiâⁿ; tē-ke̍k mā phi̍h-phi̍h chhoah, chiū kīn óa-.lâi.
41:6 In ta̍k lâng hō͘-siong pang-chān, tùi hiaⁿ-tī kóng: Tio̍h chòng-táⁿ!
41:7 Ba̍k-chhiūⁿ bián-lē gîn-chhiūⁿ, ēng thûi phah kng ê bián-lē phah tiam ê, lūn hōaⁿ-chhiūⁿ ê kang-hu kóng: Hōaⁿ liáu hó; koh ēng teng tèng tiâu-.leh, hō͘ i bē iô-tāng.
41:8 To̍k-to̍k lí — I-su-la-el, sī góa ê lô͘-po̍k, Iâ-kop, sī góa só͘ kéng-soán ê, góa ê pêng-iú — A-bu-la-hàm ê kiáⁿ-sun,
41:9 Lí sī góa tùi tē-ke̍k só͘ chhōa-.lâi ê, tùi tē ê kak-thâu só͘ tiàu-.lâi ê, koh tùi lí kóng: Lí sī góa ê lô͘-po̍k, góa kéng-soán lí, mā bô khì-choa̍t lí.
41:10 Lí m̄-bián kiaⁿ-hiâⁿ, in-ūi góa kah lí tông-chāi; m̄ thang lún-neh, in-ūi góa sī lí ê Siōng-tè. Góa it-tēng kā lí kian-kò͘, góa it-tēng pang-chān lí; góa it-tēng ēng góa kong-gī ê chiàⁿ chhiú hû-chhî lí.
41:11 Lí khòaⁿ, só͘-ū tùi lí tōa siū-khì ê it-tēng lóng ē làu-khùi, kiàn-siàu; kah lí sio-cheⁿ ê it-tēng ē chhin-chhiūⁿ bô chûn-chāi, mā ē bia̍t-bông.
41:12 Kah lí sio-cheⁿ ê, lí beh chhōe in, mā chhōe bô; kah lí cheng-chiàn ê, ē chhin-chhiūⁿ bô mi̍h-kiāⁿ, chiâⁿ-chò khang-khang.
41:13 In-ūi Góa — Siōng-chú, beh khan lí ê chiàⁿ chhiú, kā lí kóng: M̄-bián kiaⁿ, góa ē pang-chān lí.
41:14 Chhin-chhiūⁿ tō͘-kún ê Iâ-kop kah lín I-su-la-el lâng, m̄-bián kiaⁿ! Siōng-chú kóng: Góa beh pang-chān lí; kiù-sio̍k lí ê to̍h-sī I-su-la-el ê sèng ê.
41:15 Lí khòaⁿ, góa beh hō͘ lí chò phah ngó͘-kok ê sin khì-kū, lāi koh ū khí; lí ē kā soaⁿ-niá phah kàu chhùi-chhùi, hō͘ soaⁿ-thâu chhin-chhiūⁿ chho͘-khng.
41:16 Lí beh kā in pòa, hong ē kā in chhoe-.khì, kńg-lê-á hong ē kā in sàu-.khì. M̄ koh, lí ē in-ūi Siōng-chú lâi hoaⁿ-hí, ē in-ūi I-su-la-el ê sèng ê lâi khoa-kháu.
41:17 Sàn-chhiah khùn-khó͘ ê lâng beh chhōe chúi mā chhōe bô; in in-ūi chhùi khoah, chi̍h ta. Góa — Siōng-chú ē ìn in, Góa — I-su-la-el ê Siōng-tè it-tēng bô pàng-sak in.
41:18 Góa beh tī bô chháu ê soaⁿ khui kang-hô, tī soaⁿ-kok tiong khui chúi-chôaⁿ; Góa beh hō͘ soa-bô͘ piàn-chò chúi-tî, hō͘ ta tē piàn-chò chúi-chôaⁿ.
41:19 Góa beh tī khòng-iá chai pek-hiuⁿ chhiū, chô-kia̍p chhiū, kong-liam chhiū kah iá kaⁿ-ná chhiū. Góa beh tī soa-bô͘ kā siông chhiū, sam chhiū kah n̂g-iông-chhiū chò chi̍t-ē chai-chèng;
41:20 thang hō͘ lâng lâi khòaⁿ, lâi chai, lâi siūⁿ, chò-hóe liáu-kái. Che sī Siōng-chú ê chhiú só͘ chò ê, sī I-su-la-el ê sèng ê só͘ chhòng-chō ê.
41:21 Siōng-chú Hiòng Ké Sîn Thiau-chiàn
Siōng-chú kóng, " Lín tio̍h thê-khí lín ê àn-kiāⁿ. " Iâ-kop ê kun-ông kóng, " Lín tio̍h pâi-lia̍t lín ū chèng-kì ê lí-iû. "
41:22 In tio̍h kā i pâi-lia̍t, tio̍h hō͘ goán chai chiong-lâi ē án-chóaⁿ; hō͘ goán chai í-chêng ê tāichì sī siáⁿ-mi̍h, hō͘ goán thang chhâ-khó, ē-tàng chai tāichì ê kiat-kio̍k, á-.sī kā beh lâi ê tāichì kóng hō͘ goán thiaⁿ.
41:23 Tio̍h hō͘ goán chai chiong-lâi ê tāichì, thang hō͘ goán chai lín sī sîn-bêng. Á-sī hó, á-.sī pháiⁿ, lín tio̍h chiàu ánne kiâⁿ, hō͘ goán tio̍h-kiaⁿ kah gāng-.khì, lâi chò-hóe khòaⁿ.
41:24 Lí khòaⁿ, lín sio̍k tī bô, lín ê só͘ chò sio̍k tī khang-khang; hit-ê kéng-soán lín ê sī khó-ò͘ⁿ ê.
41:25 Góa tùi pak-hong heng-khí chi̍t-ê lâng, i chiū lâi; i tùi ji̍t chhut ê só͘-chāi kiû-kiò góa ê miâ, i ē ta̍h chiáng-koân-chiá chhin-chhiūⁿ teh ta̍h hoe-thô͘, chhin-chhiūⁿ sio-hûi sai-hū teh ta̍h thô͘.
41:26 Siáⁿ lâng tùi khí-thâu kóng bêng chit-ê tāichì hō͘ goán chai? Siáⁿ lâng tùi khí-thâu to̍h kóng bêng, thang hō͘ goán kóng: I bô chhò? M̄ koh, bô ū kóng bêng, bô ū pâi-lia̍t, bô lâng thiaⁿ tio̍h lín ê ōe.
41:27 Góa tāi-seng tùi Si-óng kóng: Lí khòaⁿ, lí khòaⁿ, góa beh kā chi̍t ūi pò hó siau-sit ê siúⁿ-sù hō͘ Ê-lú-sa-lèm.
41:28 Góa khòaⁿ Ê-lú-sa-lèm, bô chi̍t-ê gâu lâng; in tiong-kan mā bô bô͘-sū, tī góa mn̄g ê sî, thang ìn chi̍t kù.
41:29 Lí khòaⁿ, in lóng sī khang-khang, in ê só͘ chò sī bô mi̍h; in só͘ chù ê ngó͘-siōng lóng sī hong, lóng sī khang-khang ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。